Luk 2

Tolla ge Zeso Krist ne

Mat 1.18-25; Mic 5.1-2; Eza 7.14; 9.5

1Ɗeɗ-ɗa ge zaman mbe ma go go, Sezar#2.1 Sezar pe wanna wa garab go: Gan ga̰a̰l ge waɗe, ge ka no suwal ga̰a̰l Rom diŋ. Ogust hoɗ na wa go àa isi nda ge suwa pagal go ma peɗ. 2Isi nda mbe kaa isiya ge zḛḛge ne, ge zaman ge Kiriniyus ne go, wa ya goformo̰ ne ge suwa ge Siri ne pagal. 3Ge wa hoɗɗa mbe pagal, nda peɗ ka mboya go àa isi maa, ndu ge diige ge na baŋ ma suwal sḛ diŋ. 4Jozef sḛ waɗme ɗege ge suwal ga̰a̰l Nazareɗ diŋ, ge no suwa ge Galile ne go, ndwa mbo ge Jude yà, ge suwal ga̰a̰l ge Daviɗ ne diŋ, ge àa tol ne Betlehem, ge dape wuwa ge vuwal pe ge Daviɗ ne zì. 5Mbo yà ndwa mbo njaŋe na dḭḭl ɓanna ge Mari ge na ka dwam ne, Mari kaa ge na sḛ. 6Sok ge àa dee ya suwal Betlehem diŋ, dwam twàl ge Mari ne ma mbyaɗ, 7tol na van son ge pul sway mbe, laa ne zì ge ba̰a̰, fii ne ge kaŋ kan kaŋ kogor ma kaŋ zam go, ge dape sok be kaɗ ge num pe ge zok gɔswal zì to.

8Ge suwa mbe go waɗme, nda ge koy tame ma kaa ful zì yà, dwamma ge ndwa, sok koy maa vwag kaŋ kogor ma go ɗaal zì. 9Malayka ge Bagezok ne a̰me ɗu dyan tene ge num ta, pool ge Dok ne dinna ge kɔn̰al go mbo ya kulbi num se. Voo mbo ya waɗ ge num zì cɔcwab. 10Ɗaŋɗe, malayka jan num go: Ḛ chiya voo to, ago mbi mbo ya wuwage ḛ Fare ge Kwaɗa, ge mbo ee ɓase ge Izrayel ma way ma peɗ kee laa saal gḛḛ. 11Ḛ kuwa go, ge ɗaal mbe no zì, ge suwal ga̰a̰l ge Daviɗ ne diŋ, àa tol Ba ge mon ḛ ya go, ne sḛ Krist, ndu ge Dok taa nee ne, kaɗ Bagezok me. 12Ḛ mà seɗ van kaare a̰me laaya zì ge ba̰a̰, fiiya ge kaŋ kan kaŋ kogor ma kaŋ zam go, a ge ano mbe ma no ta, ḛ mà mbo kuwa ne.

13Tugcug, malayka mbe ɓanna ge ɓaraŋ vwag twam ma nɔnɔg, ge mbô no ge digi zì ya ma ɗege uware Dok, àa ka janna go:

14Dok ge no pḭḭ ma zì yà mbiya seɗ hormo,

Nda duwana ge suwa pagal,

Ge Dok za̰a̰ tii no ge num pe ma,

Halas ne kaa num pagal me.

15Sok ge malayka ma n̰a num, àa gwan mbo pḭḭ zì yà, nda ge koy tame ma ɗege jan ta ta buwal zì go: Ḛ mbo nè suwal Betlehem yà, nè mbo kuwa kaŋ ge a kê, ge Bagezok teme malayka ya jan nè. 16Àa haa ta vun cab mboya, àa seɗ sok ge Mari mage Jozef no go, van kaare fiiya, ge kaŋ kan kaŋ kogor ma kaŋ zam go me. 17Sok ge àa kuwa ne, àa wan fare ge malayka jin̰a maa num, ge van jiyale mbe pe ma pe. 18Nda peɗ ge za̰a̰ fare ge nda ge koy tame ma ka wanna ma, kee ajab. 19Kaɗɗa ge Mari ɗe, ka koy fare mbe ma peɗ na dul wa zì, ka ele tene fare gḛḛ ge num pagal me. 20Nda ge koy tame ma gwan mbo ful zì, àa ka sale Dok, àa ka gwan ge mersi hon ne, ge kaŋ ge maa za̰a̰ ma pe, ge maa dee ya kuwa num no ma pe peɗ me, ndwa go fare mbe ma kee tetem ge mojo̰o̰ àa wuwage maa num go.

Bḛḛ vyanna ge Zeso ne

21Sok ge dwam ge wa gezi zi ma mbiya go, àa vyan ne bḛḛ, àa hon ne dḭḭl go Zeso, dḭḭl ge malayka ngay Mari ne, zḛḛ ge go ne hê ne emel.

Geneya ge Zeso ne ya zok ge Dok ne zì

22Sok ge dwam ma mbiya go, Jozef mage Mari kee vḛḛso ge haɗ ta kɔn̰al, ge eeya ge Moyiz ne pagal, àa gene van jiyale mbe ya ge Jerusalem diŋ, ndwa ngay#2.22 Lev. 12.3, 6; Waz. 13.2, 12 Ngay van kaare Bagezok ge Yahuɗ ma ta ge mojo̰o̰ num zu van mbe ya zuu go, ndwa go van son ge zḛḛge ge diige peɗ a Bagezok nee ne. Bagezok ne. 23Ge mojo̰o̰ eeya ge Bagezok ne jin̰a go: «Van son ge pul sway ge diige peɗ, àa mbo mbege ne gezi caɗ ge Bagezok pe.»#Waz 13.2. 24Àa mbo ya ndwa hon bobo ge tuwaleya pe, ge mojo̰o̰ eeya ge Bagezok ne jin̰a go: «Ndwa go tugtug ma kab koo maale van ma zi.»#Lev 12.8.

25Ge del mbe ma go, ge Jerusalem diŋ, ndu a̰me ɗu àa ka tol ne Simeyo̰. Kaa ndu ge temel, kaɗ ge voo ge Dok ne na zì, ka jobre zuuya ge Izrayel van ma way, On̰om ge Harcal kaɗ ne zì me. 26On̰om ge Harcal mbe tin̰a ne pagal gezi no go: Zḛḛ ge go mo see swày, mo mbo kuwa Krist, Ndu ge Dok taa ne, ne ge no temeya ge Bagezok Dok ne ɓiya. 27On̰om ge Dok ne gene ne mbo ge zok ge Dok ne zì yà, ge dwam ge van jiyale Zeso ba ma gene ne ge Dok ndwa se yà go, ge mojo̰o̰ nda ha̰a̰le keeya ge eeya ma pagal go. 28Simeyo̰ wan ne ge na tok go, kee mersi hon Dok, jan go me:

29«Ge sego, Bagezok, mo huy wa tii ge mo ya go,

N̰a mo ndu ge tèmel ne mbo ge dul wa eyalla.

30A fareba go mbi kuwa Ndu ge mon nda ya go ge mbi ndwa

31Ne ge nuusi nuusi no ge Mo ta ya go

Rusu ge suwa pagal ma peɗ num kuwa Ne.

32Kɔn̰al mbe ge mbo ee nda ge no rusu Yahuɗ zì to ma ya kuwa mo ge Dok,

Pate ɓase ge amo, Izrayel van ma me.»

33Ne ba mage ne na̰ ka kee ajab ge fare ge Simeyo̰ ka janna ge ne pe. 34Simeyo̰ kee wa tare ge num pagal, guwa̰, jan ne na̰ Mari go: Kuwa go: Dok temeya ge teme van mbe no ya, mbo ee nda gḛḛ ge Izrayel van ma buwal zige ma deɗɗa me no, nda gḛḛ ɗege digi me. Mbo kaɗ kaŋ ge ngay ne go Dok go, nda mbo kuri ne me. 35Mbo ee nda kuɗ fare ge way no maa dul wa zì ma ya zum, kaɗɗa ge mo ɗe, gwale, dwaɗɗa mbo kun mo dul wa se ɓaɓaɗ ge kasagar vḛḛne kaŋ go.

36Ge del mbe ma go waɗme, ndu gwale ge zwagre Dok wa a̰me ɗu kaa, ne dḭḭl Hanatu. A Fanuwel ge no ge vuwal pe ge Azer ne zì van ge gwale ne. Sabe go gɔgwa. Kê del ɓỳala ge na obe ge maa ge ne kaa zok ge pe swala day, 37gaa kumu no. Sok ge kee del kis wa gezi zi pɔgwa ndà, gaa kàɗɗa ɗaɗag ge zok ge Dok ne zì, ɗaal mage gyala ka kee ne tèmel, sok wan mam njuwal mage kaɗeya go. 38Ne sḛ deɗ-ɗa ge sok mbe go waɗme, ɗege gwan ge mersi hon Dok, ka faa fare ge Zeso ne, ge num ge ka da̰a̰re zuuya ge Jerusalem ne ma ta peɗ.

39Guwa̰ ge Jozef mage Mari huy kaŋ ge eeya ge Bagezok ne ɓyare ge maa ta ma wa go peɗ, àa gwan ge maa sok kàɗɗa Nazareɗ yà, ge no suwa ge Galile ne go. 40Sok mbe go, van jiyale ka donna, ka haɗ pool ge fare kuwaya zì. Kaɗ ndu ge andaŋ, kuwa a̰se ge Dok ne kaɗ ne pagal me.

Zeso ge nda ge hate eeya ge Moyiz ne ma buwal zì

41Del ma tatab, ne ba ma ka mbo Jerusalem, ge vḛḛso ge Paska ne pe. 42Ge mojo̰o̰ nda ha̰a̰le keeya dwam vḛḛso mbe go go, sok ge Zeso haa ge del wol pɔgwa zi, ɓan mbo Jerusalem dagre ge na ba ma. 43Guwa̰ ge dwam ge vḛḛso ne ma aa go, àa gwan ndwa mbo maa sok kàɗɗa yà, van jiyale Zeso gaa Jerusalem diŋ. Ɗaŋɗe, ne ba mage ne na̰ be wan pe go, ne gaa ya se yà to. 44Àa ka dwaɗ go, ne kaɗ mà nda ge maa ge num ɓa̰a̰ mbo gɔswal ma buwal zì. Guwa̰ ge àa kê dwam ɗu sok mboya vin̰a zì go, àa ɓyare ne ge maa sele mage maa nda ge kuwaya ma buwal zì. 45Ɗaŋɗe, àa seɗ ne to, àa gwan mbo Jerusalem mbo ɓyare ne. 46Ge dwam ge taa pagal, àa mbo seɗ ne ge zok ge Dok ne zì, kàɗɗa ge nda ge hate eeya ge Moyiz ne ma buwal zì za̰a̰ num, ka ele num fare me. 47Nda ge ka za̰a̰ ne ma peɗ ka kee ajab ge fare kuwaya mage ne fare gwanna ge ka gwan nda pe me. 48Sok ge ne ba ma kuwa ne ɗe, num wa a̰a̰le, ne na̰ jan ne go: Mbi van, mo daa kê i kaŋ mbe go gyana de? Kuwa go, i ge mo ba iigiya digi sok ɓyare mo go. 49Ne sḛ gwan ge num janna go: Ḛ ɓyare mbi ge dape de? Ḛ wan pe go mbi hon tene ge mbi Ba tèmel pe to de? 50Ɗaŋɗe, àa wan fare ge ne ɓyare jan maa pe to.

51Guwa̰, ɓan mbo Nazareɗ dagre ge num, ndwa go, guwa̰ na pagal ge num pe se. Ne na̰ ka koy fare mbe ma peɗ ge na dul wa zì. 52Kaɗɗa ge Zeso ɗe, ka donna, ka haɗ andaŋ ɗogle-ɗogle, ka donna ge kwaɗa keeya zì, Dok laa wan ne, nda duwana ma laa wan ne me.

Currently Selected:

Luk 2: kiaGRB

Highlight

Copy