Yohana 6

Kaŋ zam ge Zeso ho̰ nda ge dudubu nuwan̰ ma

Mat 14.13-21; Mrk 6.30-44; Luk 9.10-17

1Dwam ma guwa̰ kwaɗa lag, Zeso haa mbo ge mangaɗam ga̰a̰l ge Galile ne, ge àa tol ne waɗme go mangaɗam ga̰a̰l ge Tiberiyaɗ ne wa lee gene yà ɓanna ge na nda ge ame hateya ma. 2Ɓase ma gḛḛ ka kàre ne pe, ge dape, àa ka kuwa kaŋ ajab ge ne ka kee num ma, sok zon nda ge ka kee tuguɗi ma go. 3Guwa̰, Zeso mage na nda ge ame hateya ma ndee ge njal sok ge ta̰a̰sal digi, àa kaɗ se ge sok mbe go. 4Zane no, vḛḛso ge Paska ge Yahuɗ ma way gaa ya guwa. 5Sok mbe go, Zeso hee na ndwa digi, kuwa ɓase ma gḛḛ mbo ya ge na ta, jan Filib go: Nè mà mbo yaɗ kaŋ zam ge dii ya ndwa wal nda mbe ma no ɗem de? 6Ka ele Filib fare mbe ndwa kugi ne, ge dape, kaa ge kuwaya ge kaŋ ge na mà mbo kee ne ya. 7Filib gwan ge ne janna go: Koo nè yiya kaŋ zam ndwa silay kikis zi puy, mbyaɗ mà ge ndu ge diige paa na tok na wa zì to peɗ.

8Zeso ndu ge ame hateya ge ɗogle ge àa tol ne Andre, ge Simo̰ Piyer na̰ van jan ne go: 9Van dore a̰me no ge dupḛ ge kee ge swa org#6.9 Dupḛ ge swa org ne, a kaŋ zam ge nda ge hoɗegeya ma way ne. ma nuwan̰, ge sini ma zi me. Ɗaŋɗe, ano mbe mà mbyaɗ nda mbe ma no ɗem de? 10Guwa̰, Zeso jan na nda ge ame hateya ma go: Ḛ ee nda mbe ma kaɗɗa se, àa mbo ya kaɗ se. Nda soɗob ma kaa guwa ge dudubu nuwan̰ go. Ge sok mbe go, sugu tɔgwal ge tyal ge se kaa gḛḛ. 11Zeso ame dupḛ mbe ma, kee kaɗeya gwan ge mersi hon Dok, ee nda vaa num ge kaa sok mbe go ma. Kee mbe go waɗme sok ɓyare vaa num sini ma go. Àa hon ndu ge diige ge laa ɓyareya ge ne ne pagal tem. 12Sok ge àa zâ kaŋ zam huriya go peɗ, jan na nda ge ame hateya ma go: Ḛ kwate kaŋ pe ge gaa ma digi ndwa go a̰me vḛḛne gezi to. 13Àa kwate dupḛ ge nuwan̰ ge kê ge swa org pe ge nda zâ num ma digi huy gwal pul wol pɔgwa zi.

14Sok ge nda kuwa kaŋ ajab ge Zeso kê ne, àa ɗege janna digi go: «Ndu mbe no, a ndu ge zwagre Dok wa ge fareba ge mbiya mbo ya dunin̰a zì mbe ne.» 15Guwa̰, Zeso mbo ya kuwaya go ɓase mbe ma ɓyare mbo ya wan na ge pool ndwa ee na kaɗ maa gan. Sok mbe go, gwan ɔwabe tene mbo ge njal pagal digi ya na sḛ hini ɗu.

Mboya ge Zeso ne ge mam pagal

Mat 14.22-34; Mrk 6.45-53

16Guwa̰ ge sok kê gasamal go ɗe, Zeso nda ge ame hateya ma mbo ya ge mangaɗam ga̰a̰l wa se, 17àa ndee ge faa ga̰a̰l a̰me go ɗu ndwa haa mbo ge suwal ga̰a̰l Kapernawom yà. Sok ge àa ɗege ɓyan zum go ɗe, sok keeya ɗaal, Zeso gale wa ya be gwan-na ge num ta. 18Sa̰a̰m ge labreya ɗege kwalla, sḭ̀ḭl ka mbeɗe digi ge mangaɗam ga̰a̰l pul go. 19Guwa̰ ge àa ɗiibi zum ya mbo kilometr nuwan̰ koo menengal go ɗe, àa kuwa Zeso ya mboya mam pagal ge faa ta zì. Sok mbe go, voo mbo ya wan num. 20Ɗaŋɗe, Zeso jan num go: Ḛ chiya voo to, a mbi ne! 21Nda ge ame hateya ma ɓyare go maa ame ne ge maa pe faa go, ɗaŋɗe, faa ga̰a̰l kale mbo ya yabeya ge wa kal ge àa mbô ne yà go gaw.

Zeso kaŋ zam ge ee nda kaɗ ge ndwa ne

Yoh 3.14-16; 1Ko 11.23-26; 1Yo 5.10-13

22Sok yan kin̰are, ɓase ge gaa ge mangaɗam ga̰a̰l ge Galile ne wa lee gene yà ma mbo ya kuwaya go faa ga̰a̰l kaa dana ɗu ge sok mbe go. Àa kaa ge kuwaya go Zeso dana be ndee ne go ɓanna ge na nda ge ame hateya ma to. Ɗaŋɗe, num mbo hini be ne. 23Guwa̰, faa ga̰a̰l ge ɗogle ma yan ge suwal ga̰a̰l Tiberiyaɗ ya, ge sok ge ɓase mbe ma zâ kaŋ zam go, guwa̰ ge Bagezok kê mersi hon Dok go. 24Sok ge ɓase mbe ma kuwa go koo Zeso, koo ne nda ge ame hateya ma daa ge sok mbe go to, àa ndee ge faa mbe ma go haa mbo ɓyare ne pe, ge mangaɗam ga̰a̰l wa lee gene yà, ge suwal ga̰a̰l Kapernawom diŋ. 25Sok ge ɓase mbe ma dee ya ge mangaɗam ga̰a̰l wa lee gene mbe go, àa mbo ya seɗ Zeso, àa ele ne go: Ba ge hateya, mo daa mbo ya go go ma̰ del de? 26Gwan ge num janna go: Fareba mbi jan ḛ ne no, ḛ ɓyare mbi pe ge sego ge ḛ zâ kaŋ zam huriya pe, a be go ḛ ɓyare kuwa kaŋ ajab mbe ge mbi kee num ma pe to. 27Ḛ ke tèmel be ge kaŋ zam ge vḛḛne gezi pe to, ɗaŋɗe, ge kaŋ zam ge hon nda ndwa ge ɗiŋ ge din pe. Kaŋ zam mbe ge hon nda ndwa ge ɗiŋ ge din, ge mbi, Van ge Ndu ne mbo hon ḛ ya, ago mbi Ba Dok ho̰ mbi pool ge kee ano mbe ne. 28Àa ele ne go: A ma̰ kaŋ ge i mbiya kee num ma ne, ge wa huy laa ɓyareya ge Dok ne ma de? 29Zeso gwan ge num janna go: Tèmel keeya ge Dok ɓyare ne ge ḛ ta, ago ḛ ho fareba ge, mbi, Ndu ge Dok teme ne ya ta. 30Àa gwan ele ne go: «Mo sḛ mbo mà kee ma̰ kaŋ ajab pe ge i mà kuwa ne ya, i wa hoɗ fareba mo ta de? Mo kee ma̰ kaŋ pe de? 31I baŋ ma zâ kaŋ zam ge àa tol ne man#6.31 Man kaŋ zam ge Dok ho̰ Izrayel van ma ne ge babur pul go. ge babur pul go, dinna ge Njaŋeya ge Dok ne jan ne no zì go: “Ho̰ num kaŋ zam ge mbo ya se ge pḭḭ zì ya.”»#Mkm 78.24. 32Zeso gwan ge num janna go: Fareba mbi jan ḛ ne no, a be Moyiz ho̰ ḛ kaŋ zam ge mbo ya se ge pḭḭ zì ya ne to, a mbi Ba ho̰ ḛ kaŋ zam ge fareba ge mbo ge pḭḭ zì ya se ne. 33Ago kaŋ zam ge Dok sḛ hon ne, a ne ge mbo ya se ge pḭḭ zì ya, ee nda duwana ma kaɗ ge ndwa ge fareba ge dunin̰a zì me. 34Àa jan ne go: Ndu ge zok-goo, ho̰ i kaŋ zam mbe no ɗaɗag. 35Zeso jan num go: Mbi ge kaŋ zam ge hon nda ndwa ge fareba go. Ndu ge mbo ya mbi ta, camal mbo kee ne to. Kaɗɗa na hoɗ fareba ya mbi ta, mam njuwal mbo kee ne to me.

36Ɗaŋɗe, mbi jan ḛ ne ya go: Koo ge ḛ kuwa mbi ya no puy, ḛ ɓyare hoɗ fareba ge mbi ta to. 37Ndu ge diige ge mbi Ba mbo hon mbi ne ya, mbo mbo ya mbi ta. Mbi mbo kuri ndu ge mbo mbo ja mbi ta gezi to baɗ me, 38ago mbi mbo ya se ge pḭḭ zì ya ndwa kee laa ɓyareya ge ba ge teme mbi ya ne, be mbi laa ɓyareya sḛ to. 39Kaŋ ge ba ge teme mbi ya laa ɓyare ne no: Ɓyare go mbi ba̰a̰ ndu a̰me ɗu ge num ge na ho̰ mbi ma buwal zì to, ɗaŋɗe, ɓyare go mbi ta̰a̰ num ge dwam pe aaya#6.39 Dwam pe aaya, jan fare ge dwam kun sariya ne. go. 40O̰o̰, kaŋ ge mbi Ba laa ɓyare ne, ago ndu ge diige ge mbo kuwaya go mbi ne Van ne, hoɗ fareba ge mbi ta, seɗ ndwa ge ɗiŋ ge din ya go. Mbi mbo tan ne ge dwam pe aaya go me.

41 Yahuɗ ma ɗege ka jan fare sone ge Zeso pagal, ge ne daa jin̰a go: Mbi ge kaŋ zam ge mbo ge pḭḭ zì ya se go ne pe. 42Àa ka jan ta ta buwal zì go: Daa be Zeso ge Jozef van ge nè kuwa ne ba mage ne na̰ ne no to de? Kee pe gyana wa jan go, na mbo ya se ge pḭḭ zì ya de? 43Zeso gwan ge num janna go: «Ḛ mḛḛ go ga ge ḛ fare janna mbe ge go ma. 44Ndu a̰me ge mbyaɗ mbo ya ge na pagal mbi ta a to, kaɗ go mbi Ba ge teme mbi ya ɗeme ne ya ne mbi ta mbḛḛ. Mbi me, mbi mbo tan ne ge dwam pe aaya go. 45Nda ge isi kaŋ ge nda ge zwagre Dok wa ma njaŋe num ma zì go: “Ndu ge diige mbo seɗ hateya ge Dok ta.”#Eza 54.13. Ndu ge diige ge za̰a̰ mbi Ba, ame ne hateya me, mbo ya mbi ta. 46Mbi ɓyare jan go, ndu be kuwa mbi Ba ɗu to, ɗeŋew, a ndu ge mbo no ge Dok ta ya, a ne kuwa nee ne.»

47Zeso gwan jan go iya: Fareba mbi jan ḛ ne no, ndu ge hoɗ fareba ya mbi ta, seɗ ndwa ge ɗiŋ ge din. 48Mbi, mbi ge kaŋ zam ge ee nda kaɗ ge ndwa go. 49Ḛ baŋ ma zâ kaŋ zam ge àa tol ne man ge babur pul go, go no puy, àa gwan suu no. 50Ɗaŋɗe, kaŋ zam ge mbo no ya se ge pḭḭ zì ya, a kaŋ zam ge go kaɗɗa ndu zam ne ya, ndu mbe mbo suu to ne. 51Mbi, mbi ge kaŋ zam ge hon nda ndwa go, ge mbo ge pḭḭ zì ya se ne. Kaɗɗa ndu zam kaŋ zam mbe ya, ndu mbe mbo kaɗ ge ndwa ge ɗiŋ ge din. Kaŋ zam ge mbi mbo hon ne ya, a mbi sḛ duul. Mbi hon ne ge dape nda ge dunin̰a zì ma see ndwa.

52Zeso fare mbe ee Yahuɗ ma ame ta wa ge ta buwal zì, àa ka ele ta go: Ndu mbe hon ne na duul zamma mà pe gyana de? 53Zeso jan num go: Fareba mbi jan ḛ ne no: Kaɗɗa ḛ zam Van ge Ndu ne duul to, ḛ njoɗ ne swàm to me, ḛ mbo kaɗ kàɗɗa ge cɔcwab. 54Ndu ge zam mbi duul, njoɗ mbi swàm me, a ge ndwa ge ɗiŋ ge din. Mbi mbo tan ne ge dwam pe aaya go. 55Ago mbi duul kaŋ zam ge fareba ne, mbi swàm kaɗ kaŋ njoɗɗa ge fareba me. 56Ndu ge zam mbi duul, njoɗ mbi swàm me, kaɗ baan ge mbi, mbi kaɗ baan ge ne me. 57Dinna ge Dok Ba ge hon nda ndwa teme mbi ya go, mbi kaa ge ndwa ge ne ta waɗme. Go no me, ndu ge zam mbi duul, mbo kaɗ ge ndwa ge mbi ta. 58Ge mojo̰o̰ mbi jin̰a ḛ go, kaŋ zam ge mbo ge pḭḭ zì ya se ne no. A hini ge kaŋ zam ge ḛ baŋ ma zâ ne, guwa̰, àa suu no. Ndu ge zam kaŋ zam mbe no ya, mbo kaɗ ge ndwa ge ɗiŋ ge din. 59Zeso jin̰a fare mbe ma no, sok ge ka hate nda ge zok kee kaɗeya ge Yahuɗ ma way zì, ge suwal ga̰a̰l Kapernawom diŋ.

Fare janna ge ee ndu seɗ ndwa ge fareba

60Sok ge Zeso nda ge ame hateya ma za̰a̰ ne go, nda gḛḛ ge num buwal zì ɗege janna go: Fare mbe ndaa, ndu ge mbyaɗ vin ne huɗi de? 61Sok ge kuwa na sḛ zì go, na nda ge ame hateya ma tun go ge fare mbe pagal, jan num go: Ano mbe seŋe ya ḛ ta kaŋ chal ko de? 62A ma̰ kaŋ mbo kee ne, sok ge ḛ mbo kuwa Van ge Ndu ne ya mbo digi, ge sok ge na dee kaa wal ge ne ya ne de? 63A On̰om ge Dok ne hon nda ndwa ne, ndu duwana sḛ bàŋ mbyaɗ kee a̰me to. Fare ge mbi jin̰a ḛ num ma mbo ge On̰om ge Dok ne ta ya, àa hon nda ndwa ge fareba me. 64Ɗaŋɗe, nda a̰me ge kuri be hoɗ fareba ma go ḛ buwal zì. Ago, ge dwam ge ne ee pe hate nda ya go day, Zeso kaa ge kuwaya ge num ge mbo hoɗ fareba ya na ta to mage ndu ge mbo ɓyan na ya gezi me. 65Jan num go iya: A ge pe, mbi jin̰a ḛ no go, kaɗɗa ndu ɓyare mbo ya mbi ta, ɓyare go mbi Ba ho̰ ne vin̰a ne mbḛḛ.

66Ge sok mbe go day, ne nda ge ame hateya ma gḛḛ swaɗ ne, àa daa gwan mbo ne pe go to. 67Go mbe no, Zeso jan na nda ge ame hateya ge wol pɔgwa zi ma go: Ḛ sḛ ma puy, ḛ ɓyare mboya waɗme de? 68Simo̰ Piyer gwan ge ne janna go: Bagezok-goo, i mà mbo huɗi ta de? A mo ne ge fare ge hon nda ndwa ge ɗiŋ ge din me ɗe. 69Kaɗɗa ge i sḛ ma, i ge hoɗ fareba, i kaɗ ge ne kuwaya go, mo Ndu ge Harcal ge Dok teme ne ya ne. 70Zeso gwan ge num janna go: A mbi sḛ taa ḛ ge wol pɔgwa zi ma ne. Go no puy, ɗu ge ḛ buwal zige a Ba ge ho̰o̰l ne. 71Sok jan num fare mbe go, ka jan fare ge Yudas ge Simo̰ Iskariyoɗ van pagal. Ago a ne sḛ mbo mà ɓyan Zeso gezi ne, koo ano ge ne nda ge ame hateya ge wol pɔgwa zi ma buwal zì no.

Currently Selected:

Yohana 6: kiaGRB

Highlight

Copy