Tèmel keeya 21

Mboya ge Pol ne mbo suwal ga̰a̰l Jerusalem

1Guwa̰ ge i n̰a nda ga̰a̰l ge ɗeme nda ge ho fareba ge no suwal ga̰a̰l Efez diŋ ma go, i ndee ge baaburi ge mam se ge go, i dusi jaŋeya i ndwa zḛḛ temel sin̰ag mbo ge til Kos yà. Ge dwam ge zi pagal, i deɗ-ɗa ge til Rode go. I ɓyan zum ge sok mbe go, mbo suwal Patara. 2Ge sok mbe go, i seɗ baaburi ge mbo ge suwa ge Fenesi ne ya. I ndee ne, i ɓyan zum jaŋeya haa mam ga̰a̰l nuwam pul. 3Sok ge i yin̰a ya guwa ge til Chipr, i ndal ne ge i tok magul pagal, i kale jaŋeya mbo ya yabeya ge suwal Tir ge no ge suwa ge Siri ne go, sok ge àa wa ɔwabe kaŋ ge baaburi pul go ge ma kan digi. 4Ge suwal mbe diŋ, i seɗ nda ge ame hateya ma, i kee num ta dwam ɓỳala. On̰om ge Harcal ee num wuwage Pol go a̰me hê ne ndwa ge mbo suwal ga̰a̰l Jerusalem gale ɓaca. 5Ɗaŋɗe, sok ge i dwam mbe ma aa go, i ɗege zum mboya. Àa ɗeme i ɓanna ge maa gwale mage maa van ma peɗ, mbo zum ge suwal ga̰a̰l diŋ, ɗiŋ mbo ge mam ga̰a̰l nuwam wa yà. Ge sok mbe go, i guu i ko se kee kaɗeya ge wa kal go. 6Guwa̰ ge i ge num sa̰a̰ ta wa ɗu ge ɗu go, i ndee ge baaburi ge mam se ge go, num sḛ ma gwan mbo maa zok ma diŋ yà.

7I ɓyan zum ge suwal Tir go, i jaŋe i ndwa zḛḛ ɗiŋ i deɗ-ɗa ge suwal Tolemayis go. I kan i ko ya digi san na̰ van ma wa, i kee dwam ɗu ge num ta. 8Sok yan kin̰are, i kale mbo suwal Sezare, sok ge i dee yà, i mbo ge Filib, ndu ge oy fare ge Dok ne diŋ. Ne sḛ kaa ge nda ge ɓỳala ge àa taa num mbaa Zeso nda ge temeya ma buwal zì, i kaɗ gɔswal ge ne diŋ. 9Kaa ge van gwale ge gale kaa zok to ma ndà. Àa kaɗ ge bobo ge zwagre Dok wa. 10Ajo̰o̰ i kee ya dwam ma kaal ge sok mbe go, ndu ge zwagre Dok wa a̰me ɗu, ge àa tol ne Agabus, mbo ge suwa Jude ya ge i ta. 11Ɔwabe biɗ ge Pol ka taa na pul ge ne, vwal na ko mage na tok ma ge ne, jan go: On̰om ge Harcal jan fare ndu ge ne biɗ no ge mbi tok go no go, Yahuɗ ma mbo mbo vwal ne mbe go ca ge suwal ga̰a̰l Jerusalem diŋ. Àa mbo ɓyan ne ge nda ge no rusu Yahuɗ zì to ma tok go. 12Sok za̰a̰ fare mbe go, i sḛ ma ɓanna ge nda ge ho fareba ge suwal Sezare diŋ-ge ma, i ka gwarge ta ge Pol ta go, a̰me hê ne ndwa mbo suwal Jerusalem to. 13Ɗaŋɗe, gwan ge i janna go: Ge dape, ḛ wa ka fyal fiyaso a̰se ge ɓyare kun mbi dul wa go de? Ago, mbi vḭḭ tene go, àa doo mbi daŋay bàŋ to, koo àa gwan hun mbi ge Bagezok Zeso pe, mbi mbo mbo suwal ga̰a̰l Jerusalem diŋ. 14Ajo̰o̰ i fare ma be deɗ ne dul wa zì ge ee ne eya fare to, i daa be gwan dwage ne fare mbe ma to, i gaa gwan jan ne bàŋ go: N̰a Bagezok ne kee na laa ɓyareya.

15Sok ge i dwam gɔswal ma aa go, i nuusi ta mbo suwal Jerusalem. 16Nda ge ame hateya a̰me ge ɗeme i ge suwal Sezare ya ma, gene i ya ge Nason ta, a ndu ge mbo mbo ame i kaɗ gɔswal ya ne ge na diŋ. Ne sḛ a van Chipr ne, kaɗ ndu ge kee ya kaal ge hoɗ fareba zì me.

Seɗ ta ge Pol mage Jak ne ge suwal ga̰a̰l Jerusalem diŋ

17Sok ge i dee ya suwal ga̰a̰l Jerusalem diŋ, na̰ van ge ho fareba ma ame i ge laa saal. 18Sok yan kin̰are, i ge Pol ma ɓan mbo ge Jak ta yà. Nda ga̰a̰l ge ɗeme tèmel mage nda ge ho fareba ma kwateya ge sok mbe go mɔɗwag me. 19Guwa̰ ge àa ge Pol ma komre ta go, ee pe wan num fare pe zum ɗu ge ɗu ge tèmel ge Dok kee ge nda ge no rusu Yahuɗ zì to ma buwal zì, ge na ta. 20Sok ge àa za̰a̰ ne fare mbe ma go, àa sale Dok. Guwa̰, ndu ɗu hee fare ge num buwal zì, jan ne go: Na̰ van, mo kuwa gyana ge Yahuɗ ma dudubu gyana ga ge deɗ ja hoɗ fareba de! Go no puy, àa mḛḛ maa ko ndaa kaka ge eeya ge Moyiz ne pagal. 21Ɗaŋɗe, àa za̰a̰ nda go janna go, mo hate Yahuɗ ma peɗ ge kaa no ge nda ge no rusu Yahuɗ zì to ma suwa ya ma go go, num mbo ge eeya ge Moyiz ne ma pagal to, num vin̰a maa van ma bḛḛ to, num mbo ge kaŋ ge maa baŋ ma ee num keeya ma pagal to me. 22A fareba, Yahuɗ ma mbo za̰a̰ go mo yan ja, gaa go nè sḛ kee gyana de?

23Ge sego, fare ge i yuwale mo ne pagal no. Nda ge kee wa tii ge Dok ndwa se ma go ndà ge i buwal zì. 24Mbo ge num pe yà ge zok ge Dok ne zì, mo ɓan tene ge num kee tuwaleya ge haɗ ta kɔn̰al ge Dok ndwa se. Mo poɗ num pagal ndwa go num soo maa pagal ma gezi. Go no, nda mbo kuwa go, fare ge àa ee num no mo pagal ma, num ge maa vin̰a to. Àa mbo gwan deɗ-ɗa kuwaya go, mo sḛ ge mo pagal, mo mbo go ge eeya ge Moyiz ne pagal. 25Ɗaŋɗe, kaɗɗa ge num ge no rusu Yahuɗ zì to, ge ho fareba ma ɗe, i njaŋe num lawayta ge fare ge i vḭḭ ta ge num pagal ma go go, num daa gwan zam duul ge àa hun num kee tuwaleya hon siim ma to, num za duul ge kaŋ kogor ge àa muwa̰se num ka̰a̰l ma to, koo swàm a̰me num za ne to, num ɔwabe ta gezi ge ene sḛ duul keeya ge batraŋ ma ta me. 26Pol vin num fare mbe, sok yan kin̰are, ɓan tene dagre ge nda ge ndà mbe ma, ndwa ɓyare vin̰a ge haɗ tene kɔn̰al. Guwa̰, Pol mbo ge zok ge Dok ne zì yà wuwage dwam ge maa haɗ ta kɔn̰al mbo aaya ne go, ge bobo ge na mbo hon ne ya ge tuwaleya keeya ge nda gegene ma way pe me.

Wanna ge Pol ne

27Sok ge dwam ɓỳala ge haɗ ta kɔn̰al ma ne wa gaa guwa ge aaya, Pol waɗ ge zok ge Dok ne zì, Yahuɗ ge mbô ge suwa Azi ya ma kuwa ne. Àa tun ɓase ma digi ge fare, àa ɗege kee ho̰o̰l ge Pol. 28Àa ka oyya tol ta go: Izrayel van ma, ḛ mbo nè mà ya zì! Ndu mbe hate nda ge sok ma go peɗ, fare ge sone ma ge pe rusu ge Izrayel ne pagal, ge eeya ge Moyiz ne ma pagal, ge zok ge Dok ne pagal me. Ge sego, gene van Grek ma ja ɗiŋ ge zok ge Dok ne pul zì, sok kee ano mbe no go, haɗ zok ge Dok ne ge harcal seŋre. 29Àa ka jan ano mbe ge dape, àa kuwa Pol mage Trofim ge van gɔswal ge suwal Efez ne anna ge suwal ga̰a̰l diŋ, àa duwa no go, ne waɗ ge ne ya ge zok ge Dok ne pul zì.

30Bàŋ go helo ɗe, suwal ga̰a̰l ge ɓul mɔɗwag mbo ya iigi digi, nda chiya ge sok ma ya kakaɗag. Àa wan Pol, àa zwal ne ge zok ge Dok ne pul zì ya zum. Àa dibi zok wa ma ya digi ge maa pe go. 31Guwa̰, àa ɗege Pol ta iyalla ndwa go maa hun ne gezi. Sok ɓyare hun ne go, fare mbo ya seɗ asagar ma ga̰a̰l ge waɗe ge kaa no ge Jerusalem diŋ go, suwal ga̰a̰l iigiya digi ge ɓul mɔɗwag. 32Avun cab, ɔwabe asagar ma ɓanna ge maa ga̰a̰l ma, àa ge num chiya ge ɓase ma pe yà. Sok ge ɓase ma ka̰a̰ ndwa kuwa asagar ma ga̰a̰l ge waɗe ɓanna ge asagar ma ge na pe go, àa daa gwan iyal Pol to. 33Sok ge asagar ma ga̰a̰l ge waɗe dee ya, mbo ge Pol ta yà, wan ne, hoɗ na wa go àa vuwa ne ge zul ma zi. Hale fare pe ge ndu mbe ne ge ɓase ma ta ndwa kuwaya go, ne huɗi ne, ne kee ma̰ kaŋ de. 34Ɗaŋɗe, ge ɓase ma buwal zì, nda ka oyya digi batraŋ. Kṵwa̰ ka keeya ge go, ne seɗ fare a̰me ge jwab to. Go no, ho asagar ma na wa no go, num gene ne ge maa gerger zì yà. 35Sok ge àa yin̰a ge Pol ya, sok ndee mbo waɗ gerger zì go, asagar ma mbo ya mbeɗe ne digi, ge laa ol ge ɓase ma way pe. 36Ago, ɓase ma peɗ ge ka kàre ne pe ya ma, àa ka oyya go: Ḛ hṵṵ ne gezi!

Pol jan fare ge ben tene ge ɓase ma ta

Tkt 9.1-19; 26.9-20; Gal 1.11-16; 1Ti 1.12-17

37Sok ge asagar ma ɗege go maa waɗ ge Pol mbo gerger zì, ele asagar ma ga̰a̰l ge waɗe go: Vin̰a mà kaɗ ge mbi jan mo fare nde de? Gwan ge ne janna go: Mo zane faa wa grek no de! 38Mo be van Ejypt ge dee zuu na pagal zum kee ho̰o̰l ge hakuma, sok ɔwabe nda ge iyal kyarga ge maa suwal pe ma dudubu ndà mbo ge babur pul yà ne to de? 39Pol gwan ne janna go: Mbi be nee ne to. Mbi Yahuɗ ne, ge too ge suwal Tars, ge no ge suwa ge Silisi ne go. Mbi van twàl ge suwal ga̰a̰l mbe ge nda kuwa nee ne peɗ. Mbi kaɗe mo kaɗe, mà kaɗ ge mo hon mbi vin̰a ge jan ɓase mbe ge vin ta pe ya, mbi pagal ma fare nde de? 40Asagar ma ga̰a̰l ge waɗe vin ne, Pol mḛḛ ge na sok mbe go, kee ɓase ma na tok go num zane. Nda mbo ya zaneya kirib. Ge sok mbe go, Pol jan num fare ge wa hebre go:

Currently Selected:

Tèmel keeya 21: kiaGRB

Highlight

Copy