Tèmel keeya 20

Gwanna ge Pol ne ya ge suwa Maseduwan mage Gres ne go

1Ko 16.1-7; Rom 15.25-27

1Sok ge ho̰o̰l wa wa̰a̰ se go, Pol kwate nda ge ame hateya ma ya se, moɗege num me. Guwa̰ ge moɗege num go, san num wa, hee vin̰a mbo suwa Maseduwan. 2Sok mboya go, ka dwage nda ge ho fareba ma moɗegeya ge na ndwa zḛḛ, ɗiŋ deɗ ge suwa ge Gres ne yà. 3Gaa kàɗɗa ge sok mbe go ɗiŋ saba taa. Sok ge dee ya nuusi tene go, na gaa ndee baaburi mbo suwa Siri ɗe, za̰a̰ go Yahuɗ ma vwal wa ya ge na pagal go. Vin tene go, na hee na ko pul gwan mbo suwa Maseduwan. 4Nda ge ɗeme ne ma kaa gḛḛ. Ge num buwal zì: Sopater ge Pyrus van, ndu ge suwal Bere ne, Aristark mage Sekondus, nda ge suwal Tesalonik ne ma, Gayus ndu ge suwal Derb, Timote, Tichig mage Trofim, van ge suwa Azi ne ma. 5Nda mbe ma mbo ge i ndwa zḛḛ yà, àa mbo da̰a̰re i ge suwal Trowas diŋ no. 6Ge vḛḛso ge dupḛ ge be jìn̰al hore ma ne guwa̰, i sḛ ma gaa ndee baaburi ge num pe ya ge suwal Filib go no. I kê no dwam nuwan̰ ge vin̰a zì, i dee ya ge num ta no, ge suwal Trowas diŋ. Ge sok mbe go, i kê no dwam ɓỳala.

Pol ge suwal Trowas diŋ

7Dwam Dumas go, i kwate ya se ndwa siɗi dupḛ no. Ajo̰o̰ Pol kaa ge dwaɗɗa ge mbo kin̰are ɗe, ka hon hateya, ndiri na hateya mbe ɗiŋ mbo ge ɗaal ga̰a̰l zì yà. 8Ge zok ge kon pagal digi-ge, ge i kwate ge ne zì, lampe ma kaa digi eeya gḛḛ-gḛḛ. 9Van bogol ge àa tol ne Etikus, kaa ge zok ndwal go, ajo̰o̰ Pol ndiri na fare mbe kaal nde, dwam ge tii mbo ya wan van mbe ɗiŋ, ee ne fwageya ge zok ge kon pagal ge taa digi ya se. Sok ge àa mbo ya wan ne digi, àa seɗ go ne suu suu. 10Ɗaŋɗe, Pol ndee ya se, hugi ge ne pagal go, ɔwabe ne ge na kṵwa̰l zì, jan go: Ḛ iigi ta to, on̰om gale ne zì. 11Guwa̰, Pol ndee digi, siɗi dupḛ se, a ge num zam me. Gwan ndiri na hateya mbe ɗiŋ mbo aaram, gaa ɗege mbo ya. 12Guwa̰, àa gene van bogol mbe mbo diŋ yà ge na ndwa. Ano mbe kaa kaŋ eyal laa ge ga̰a̰l ne ge nda ta peɗ me.

Ɗegeya ge Pol ne ge suwal Trowas go mbo suwal Mile

13Ajo̰o̰ Pol vḭḭ tene go na mbo suwal Asos ge na ko, i sḛ ma hee baaburi ge mam se ge zḛḛ, jaŋe mbo ge suwal mbe yà, ndwa go i wa ame ne ge i pe go. 14Sok ge mbo ya seɗ i ge Asos go, i ame ne, i ge num ɓan jaŋeya mbo suwal ga̰a̰l Mitilen. 15I ɓyan zum ge sok mbe go, i jaŋe mbo ge til Chiyo zì yà. Ge dwam ge zi pagal, i haa mbo ge til Samos zì yà. Ge dwam ge taa pagal, i ɗege ge Samos go, i deɗ-ɗa ge suwal ga̰a̰l Mile go. 16Ago, Pol vḭḭ tene go, na yabe ge suwal ga̰a̰l Efez diŋ to, sok mà kee ge kale na ge suwa ge Azi ne go. Ka haa tene ge dwaɗɗa ge go, kaɗɗa vin̰a go, na kaa ge dwam vḛḛso ge Pantekoɗ ne go, ge Jerusalem diŋ.

17A go mbe no, Pol doo tèmel ge suwal Mile go mbo tol nda ga̰a̰l ge ɗeme tèmel ge no ɓase ge Krist ne pagal ma ge suwal ga̰a̰l Efez diŋ ya no. 18Sok ge àa mbo ya ge ne ta, jan num go: Ḛ kuwa mboya mage tèmel keeya ge ambi ḛ buwal zì, ge dwam ge mbi ka̰a̰ mbi ko ge suwa Azi go, ge pe eeya ya day ɗiŋ deɗ-ɗa ge dwam ge mbi n̰a ḛ go. 19Mbi kê tèmel ge Bagezok ne, ge pagal gwanna se lɔlɔgwaɗ, ge miim mage yal ge Yahuɗ ma ka gene num ya ge mbi pagal ma ta. 20Ḛ kuwa go, mbi be ka koy a̰me ge mbiya mbaa ḛ ge mbi sḛ pe to, sok oy ḛ mage hate ḛ fare ge Bagezok Zeso ne go, ge sok ɓase ma go, ge zok ma diŋ me. 21Mbi ka jan Yahuɗ mage Grek ma fare zum waŋ go, num seŋe ta ya se ge Dok ta, num ho fareba ge nè Bagezok Zeso ta me.

22Ge sego, mbi mbo Jerusalem ge laa ɓyareya ge On̰om ge Harcal ne pagal. Mbi wan kaŋ ge nda duwana ma mbo kee ge mbi ya pe to. 23Mbi kuwa ɗeŋew go, ge suwal ga̰a̰l ge diige ge mbi ka mbo ge ne diŋ, On̰om ge Harcal ka wuwage mbi go, nda duwana ma mbo wan mbi dol daŋay, àa ee mbi za̰a̰ yal ma gḛḛ me. 24Go no puy, ndwa ge ambi be fare a̰me pe ne ge mbi ta to, kaŋ ge mbi ɓyare ɗeŋew, ago mbi huy tèmel ge Bagezok ɓin̰a ne ge mbi tok go keeya wa. Tèmel mbe ge àa ho̰ mbi ne keeya, ago mbi jin̰a Fare ge Kwaɗa ge kwaɗa keeya ge Dok ne pagal ge nda ta.

25Ge sego, ḛ za̰a̰ gale, ḛ ge mbi ka an oy muluk ge Dok ne ḛ ta ma peɗ, mbi ge kuwaya tyatyaɗ go, a gaa no mbo zḛḛ, ḛ mbo daa gwan kuwa mbi ndwa to. 26Màno, mbi jan ḛ ne zum waŋ go: Ḛ swàm kaa ge ḛ pagal, mbi tok zì to. 27Ago mbi wuwage ḛ nuusiya ge Dok ne ya zum peɗ, be ge way ḛ fare a̰me ɗu to. 28Ḛ nda ga̰a̰l ge On̰om ge Harcal ee ḛ ɗeme ɓase ge Dok ne ma, ḛ doo ḛ ndwa kwaɗa ge ḛ sḛ ma pagal, ge nda ge ḛ ɗeme num ma pagal mɔɗwag me. Dinna ge nda ge koy tame kwaɗa ma go, ḛ koy nda ge Dok ne ma kwaɗa, ge ne sḛ ee num ya gaa na ne ma, ge swàm ge na Van ne ta. 29Mbi kuwa kuwa go, guwa̰ ge mbi mbo kàɗɗa to, nda duwana ge dḭḭ ta ge bagomso cole-cole go ma, mbo waɗ ta ya ge ḛ buwal zì, àa mbo eyan vwag ge tame ma way to. 30Koo nda a̰me ge ḛ buwal zige ma, àa mbo ɗege jan fare ge hày ma, àa zwal nda ge ame hateya ma ge maa pe yà. 31Go mbe no, ḛ kaa yaŋ-yaŋ! Ḛ duwa ge del taa ge mbi kê num ḛ buwal zì ma pagal, ɗaal mage gyala, ge miim ma ge mbi ndwa go, mbi be kan tene se to, mbi ka yuwale ndu ge diige ge ḛ buwal zige.

32Ge sego, mbi deŋe ḛ ge Dok tok go, mbi kaɗe go ne fare ge kwaɗa mba ḛ me. Ne sḛ ge pool ge ee ḛ donna ge hoɗ fareba zì, hon ḛ kaŋ kwaɗa ge na kê wa tii ge nda ge na ne ge seŋe ya harcal ma pe peɗ me. 33Mbi be ee mbi ene ge kaŋ a̰me ge ndu ne pagal to: Koo ne bware, koo ne dinar, koo ne ba̰a̰ ma. 34Ḛ sḛ ma kuwa gyana ge mbi ka kee tèmel ge mbi tok zì, ndwa seɗ kaŋ ge mbaa tene koo ge mbaa mbi ka̰a̰m ge tèmel ma. 35Mbi ngay ḛ ge kaŋ ma zì peɗ go, ḛ ho̰ ta kee tèmel mbe go waɗme, ndwa mbaa nda ge hoɗegeya ma. Nè duwa ge fare janna ge Bagezok Zeso ne pagal, ge jin̰a go: Laa saal go gḛḛ ge ndu ge ɓyan na tok pe zum pe, waɗe ndu ge tok doo no ge ameya pe.

36Guwa̰ ge Pol aa na fare janna ma go, guu na ko se ge num dagre, kee kaɗeya. 37Num sḛ ma paa maa wa fiyaso zì peɗ, àa ka buu ne zì, sok san ne wa ge guwa̰ dwab go. 38Kaŋ ge ee num ka fyal fiyaso ge kirgi ta, a ne fare ge jin̰a go, maa ge num daa gwan kuwa ta ndwa to. Ge guwa̰ go, àa ɗeme ne ya ɗiŋ mbo ya sok ndee baaburi ge mam se ge go.

Currently Selected:

Tèmel keeya 20: kiaGRB

Highlight

Copy