Hechos 9

Ujalwachixik uk'aslemal ma Saulo

1Tz'aqat, i ma Saulo xumayij ti ub'ixkil chi keukamsaj ni'pa i winaq chi kekojon che i Ajwal. Rumali xuk'ut rib' che i atz laj rajpatan i Dios, 2Are uri xutz'onoj uwuj re i rokb'al pa taq ja re molb'al ib' ke i judío pa tinimit Damasco, tzukb'al ke i winaq chi kimajom i k'ak' b'e chi are uk'utunik i Ajwal, chi achiyab', chi ixoqib', lik keuk'am b'i prexil chila Jerusalén. 3Xwiri, are ya naqaj chik o wi che i tinimit Damasco, xaqte'et xwinaqir jun a' chikaj chi lik xwalch'in chrij chwach. 4Are uri ma Saulo xtzaq pulew xaq xuta jun ch'awb'al chi xub'ij: Ma Saulo, ma Saulo, ¿B'uchak ka'an ch'oj chwij?

5 I ma Saulo xutz'onoj che: ¿At pachin Yet, Nim laj Winaq? I ch'awb'al xub'ij che: Yin in Jesús, chwij yin kattijin wi chu'anik ch'oj.#9.5 Chupam i nab'e taq uwuj i Dios kriqtaj ti jub'i' i versículo ri: Xwiri atukel yet ka'an k'ax che awib', keje pacha ku'an jun b'oyex are kukoj aqan che jun puyu, utukel ku'an k'ax che rib'. 6#9.6 Chupam i nab'e taq Uwuj i Dios kriqtaj ti jub'i' i versículo ri: I ma Saulo ksiksat rumal uxib'rikil, xutz'onoj: Ajwal, ¿Wach kawaj kin-ano? I Ajwal xub'ij che. Chatwalijoq, jat pa tinimit, chila kb'ix wi chawe wach ka'ano.

7I achiyab' chi je rachi'il ma Saulo le, lik je oknaq il man xkita i ch'awb'al, xwiri xkil ti uwach pachin xch'awik. 8Te'uri ma Saulo xwalij chwach ulew; xwiri are xujaq ub'a'wach, ktzun ti chik. Rumali xkich'elej b'i che u'ab' xaq xkik'am b'i pa tinimit Damasco. 9Oxib' ij xk'iji chila, chi lik ktzun taj, kutij ti chik uwa xaq kutu' ti chik uya'.

10Pa tinimit Damasco le, o jun achi jeqel chila chi kkojon che i Ajwal, ma Ananías ub'i. I Ajwal xuk'ut rib' che puwach xaq xub'ij che: “¡Ma Ananías!” Ire xula' uwach che: “¡Riy in oliki, Ajwal!”

11Are uri i Ajwal xub'ij che: Chatwalijoq, jat che i b'e chi ub'i: “B'e Suk'ulik”, chila chi rachoch ma Judas, chach'ob'o raqan jun achi chi ma Saulo ub'i, aj pa tinimit Tarso. Man ire ktijin che i lapanik ru' i Dios, 12man rilom chik puwach chi kupon jun achi ru', chi ma Ananías ub'i, kuya ni u'ab' puwi man keje ile ktzun tan chik ire.

13I ma Ananías, are xuta iri, xub'ij: Ajwal, je k'i winaq kib'im chwe chi i achi le lik k'i jalajuj taq k'ax u'anom chke i winaq chi je kojonnaq che i Dios pa Jerusalén. 14Wo'or k'unnaq waral, man i kaj-atzil i rajpatan i Dios xkiya che chi keuchap b'i ni'pa i winaq chi kkikoj a'ij man keutz'apij pa prexil; xcha.

15Xwiri i Ajwal xub'ij che: Jat, man yin in-ulum achi le re kub'ij intzij chke i winaq re i jub'an chik nimaq taq tinimit, chke i ajawinelab' xaq chke aj Israel. 16Yin kink'ut ni che chi lik k'i uyej kutij wumal yin, rumal intzij chi kub'ij na.

17Are uri ma Ananías x-e ru' ja ipa o wi ma Saulo. Are xok b'ik, xuya u'ab' puwi i xub'ij che:

—Wachalal chwach i Cristo, ma Saulo, i Ajwal Jesús chi xuk'ut rib' chawe pa b'e, are xintaqaw li awu', man keje ile kattzun tan chik xaq kok ni Lo'laj Utewal i Dios pawanima.

18Are uri ma Saulo juntir lik pacha taq xk'ojon ub'a'wach xaq xtzun chik. Are uri xwalijik xaq xqajsax ya puwi. 19Te'uri, xutij uwa xaq xpe chik ucho'ab'. Xaq xkanaj keb' oxib' ij ku' i winaq chi je kojonnaq che i Dios chila Damasco.

I ma Saulo kub'ij utzij i Dios pa Damasco

20I ma Saulo juntir xujeq ub'ixkil pa taq ja re molb'al ib' ke i judío chi i Jesús are Uk'ojol i Dios. 21Konojel ni'pa xkita ire le, lik xkib'isoj xaq xkib'ij:

—¿Xatab'a are ti achi ile chi ku'an ch'oj chkij ni'pa kkikoj utzij i Jesús chila pa Jerusalén? ¿Are ti b'awa ire ile chi xaq xk'un waral chkichapik re keujach chke i kaj-atzil i rajpatan i Dios?

22Xwiri i ma Saulo lik xukowij uwach chub'ixkil utzij i Dios, rumali lik xusach kinojb'al i aj Judío chi je jeqel pa Damasco, k'utb'al re chke chi i Jesús lik are i Cristo.

I ma Saulo x-anmaj chkiwach i aj Judío

23Are ik'awnaq chik k'iyal ij, i aj Judío xkijunamsaj kitzij chkiwach chi kkikamsaj ma Saulo, 24xwiri ire xretamaj. Chipa'ij chicha'ab' o jujun achiyab' koy-em xol uchija re i elb'al b'ik re i tinimit re kkikamsaj, 25xwiri i winaq chi kikojom utzij i Jesús xkiya ma Saulo chupam jun nim laj chikach, cha'ab' xkiqajsaj b'i chrij i tapial nim uwach chi usutim rij i tinimit. Keje u'anmajik ma Saulo ile.

Ma Saulo o pa Jerusalén

26I ma Saulo are xupon pa Jerusalén xraj umolik rib' ku' i winaq chi je kojonnaq che i Dios; xwiri konojel kkixij kib' che, man kkikoj taj we lik qatzij kojonnaq chik ire che i-Dios. 27Xwiri ma Bernabé xuk'am b'i ku' i apostolab' man kketamaj uwach. Xulap chke chi ma Saulo xril uwach i Ajwal pa b'e, xaq xub'ij chi i Ajwal lik xlapan ru' chi xaq i ma Saulo ub'im utzij i Jesús ru' ukowil uk'ux chila pa Damasco. 28Keje uri ile chi ma Saulo xkanaj kan pa Jerusalén, xaq xb'in junam ku' i winaq chi je kojonnaq che i Dios xaq lik xub'ij utzij i Ajwal ru' ukowil uwach. 29Xlapan ku' xaq xkichap kib' chitzij ku' i Judío chi kech'aw pkich'ab'al aj Grecia; xwiri ike le xa kkitzukuj ukamsaxik. 30I qachalal chwach i Cristo are xketamaj ile, xkik'am b'i ma Saulo pa tinimit Cesarea, te'uri xkitaq b'i pa tinimit Tarso.

31Are uri i tzob'aj re i Dios chi je o pa ronojel taq jyub' re i tinimit Judea, Galilea xaq i Samaria lik o i chomb'al k'uxij ku' xaq ktijin uk'iyik kik'aslemal chwach i Dios. Ike lik xkowir ukub'ib'al kik'ux man lik xkijek' kib' che i utz taj chwach i Ajwal, xaq rumal utob'al Lo'laj Utewal i Dios lik ktijin kik'iyarik i winaq chi kekojon che i Dios.

Rutzirsaxik ma Eneas rumal ma Pedro

32I ma Pedro are ktijin chkisolixik i qachalal chwach i Cristo, xaq x-e chkisolixik jub'an chik chi je o pa tinimit Lida chi xaq je re chik i Cristo. 33Chila xuriq jun achi chi ma Eneas ub'i; o chik wajxaqib' junab' che chi kotz'ol chwach ch'at man sikirnaq uch'akul. 34Are uri ma Pedro xub'ij che:

—Ma Eneas, i Jesucristo katrutzirsaj, chatwalijoq xaq chayaka b'i asok i jat. Are uri i ma Eneas le juntir xwalijik. 35Konojel i winaq aj pa tinimit Lida xaq aj pa tinimit Sarón are xkilo chi xwalij i achi le, xkijach kib' pu'ab' i Ajwal.

Ati Dorcas xwalij che i kamik chkixol i kamnaq

36Che taq i ij le o jun ixoq chila pa tinimit Jope chi kojonnaq che i Dios, chi ati Tabita ub'i, (pkich'ab'al i aj Grecia winaq ke'eloq Dorcas). I ixoq le, utz laj winaq xaq lik keuto i nib'a'ib'. 37Xwiri che taq i ij le, i ati Dorcas x-on iwab' xaq xkamik. Rumali xkatinsaj te'uri xkiya chupam i jutasaj k'ijib'al chi o che i ukab' le. 38I tinimit Jope le naqaj o wi che i tinimit Lida ipa o wi ma Pedro; i winaq chi je kojonnaq che i Jesús, are xketamaj chi chila o wi ma Pedro, xekitaq b'i keb' achiyab' chub'ixkil che: Lik juntir chatpet qu' chi pa Jope; xecha.

39Are uri ma Pedro x-e ku'. Are xuponik, xkik'am b'i chila ipa o wi i kamnaq. Konojel ixoqib' malkanib' xkimol la kib' chrij chwach, lik ke'o'ik xkik'ut ni'pa i k'ul che xaq i jurjaq k'ul chi u'anom ati Dorcas are k'as te'eq. 40I ma Pedro xeresaj b'i jub'i' konojel chisaq, te'uri xxuki qaj ru' i kamnaq xaq xlapan ru' i Dios puwi, are uri xumaj utaqexik xaq xub'ij che:

—¡Tabita, chatwalijoq!

Xaqte'et i ixoq le xujaq ub'a'wach, are xrilo chi o ma Pedro ru', xkub'i anoq. 41I ma Pedro xuchap che u'ab', xutak'b'a anoq. Te'uri juntir xeusik'ij i winaq chi je kojonnaq che i Jesús xaq i ixoqib' malkanib', are uri lik k'as ati Dorcas xuk'ut chke. 42I anik le x-etamax che ronojel tinimit Jope, are uri je k'i i winaq xkikoj i Ajwal. 43I ma Pedro xkanaj k'iyal ij pa tinimit le, chila chi rachoch ma Simón chi ajyijb'al tz'um.

Currently Selected:

Hechos 9: ACHICUB

Highlight

Copy