San Marcos 8

Jesús ku jʌnsik cuatro mil winik

(Mt. 15.32-39)

1A layo' u k'ini, yʌn ne pim winik mʌnʌ' baij ku jʌntik y a Jesús tu t'ʌna u kʌ'sa winiko' y tu ya'tio':

2—Kin ch'eik otsi ti' a je' a winiko', yʌn oxp'e k'in tiʌ yete ten y mʌnʌ' baij u jʌnto';

3Wa kin tuchi'tiko' ka xi'ko' tu yatocho' je' u lubu u muk'o ix bej tu mo jʌntko' y yʌn tax jujuntu nʌch u taro'.

4U kʌ'sa winiko' tu nuko' ti':

―¿Chen tuba kin bin in jaro' way o'chi ti' ak ts'ek u jʌno', ka wirik mix mok yʌn kʌjtik way?

5Jesús tu k'ata tio': —¿Bon pʌn yʌn teche'x? Tio' tu nuko': —Siete.

6Y Jesús tu tuchi'ta a winik ka xi'ko' kuta ix lu'm, pachi tu chuka a siete pʌn y tu ya'a:

—Bay tech K'uj,

Y pachi tu jʌtsa ti u kʌ'sa winiko' ti u ka jʌtsiko' ti a winiko' y bex tu meto'. 7Bexi' yʌntio' mo cho ya'p kʌy, bexi' tu ka' a'a Jesús:

—Bay tech K'uj,

Pachi bexi' tu tuchi'ta u kʌ'sa winiko' u jʌtso' ti' a winiko'. 8Y laj jʌno' y ne ki nʌjcho' tu woro, y tu much'o' u yʌrʌ' siete xak. 9Tu woro a mok jʌno' yʌn cuatro mil winik. Pachi Jesús tu t'ʌna a winiko' ij bino'. 10Y Jesús kaj okij yete u kʌ'sa winiko' ix chem, bino' yok'o u lu'mi u k'aba' Dalmanuta.

U winik a judíos a ku ya'bati' fariseos tu ka'to' ti' Jesús ka u ye'se tio' jump'e ba' yete u muk' K'uj

(Mt. 16.1-4; Lc. 12.54-56)

11Kaj k'ucho' u winiko' a judíos a ku ya'batio' fariseos tu tiʌ Jesús, chu'mpʌjo' u chich t'ʌno' yete Jesús, ti u tuntik u yor, tu k'ato' ka' u ye'se jump'e ba' yete u muk' K'uj, ti' u yirko' wa jach ti u tar ti K'uj. 12Jesús tu ch'a u yik' y tu ya'tio':

―¿Biken a je' a winik a kuxo' beje' ku k'atik u ye'sa ba' ti' u yirik u muk' K'uj? Chen jach toj tu jay kin toj ki eik teche'x, mʌnʌ' u ye'sa' tio'

13Pachi Jesús tu p'ʌta a layo' y ka' oki ix chem ij bini tu jer u xur a peta'.

U kʌ'sa a mok lʌji' u winiko' judío a ku ya'batio' fariseos

(Mt. 16.5-12)

14U kʌ'sa winiko' Jesús tu'bi tio' u ch'eik pʌn, to jai' yʌn tio' junts'iti' pʌn yok'o chem. 15Y Jesús tu jach ki a'tio':

―Ki' kʌnʌnte a bʌje'x a ba' ku kʌ'sik teche'x u winiko' a judíos a ku ya'batio' fariseos yete a ba' ku kʌ'sik teche'x a Herodes.

16U kʌ'sa winiko' chu'mpʌjo' u tsikbo' yete bojo' y ku yei'ko': lʌji' ku yei'k tu mo' tak tasa aj pʌn.

17Jesús tu k'o'ota u tuko', kaj u ya'tio':

―¿Biken ka jume'x yok'o pʌn? ¿Xuy maj ki ui'ke'x a ba' kin wei'k teche'x? ¿Xuy ne chich a ts'ome'x?. 18¿Yʌn a wiche'x y maj wirke'x ba', yʌn a xikine'x y maj wui'ke'x? ¿Muj k'a'ja teche'x? 19Kaj in jʌtsa a cinco aj pʌn ti' a cinco mil winik ¿bon xak ta mare'x a to'o p'ati?

Y tio' tu nuko':

―Tin maro' doce xak.

20Y kaj in jʌtsa a siete kʌy ti' a cuatro mil winik, ¿bon xak ta mare'x a to'o p'ati?

Tio' tu nuko':

―Siete xak tin maro'.

21A Jesús tu ya'tio':

―¿Y xuy maj ki' ui'ke'x baij in wei'k?

Jesús ku ch'ensik junturi' a mok muj yik u ber ix Betsaida

22Pachi a Jesús yete u kʌ'sa winik k'ucho' ix u kʌjta Betsaida, y tita tasa' ti' junturi' xi'ra a muj yirik u ber y tu p'isubʌjo' u k'atko' ti' a Jesús, ka u tʌrej a xi'ra a muj yirik u ber. 23Y Jesús tu mʌcha u k'ʌ' a xi'ra a muj yirik u ber y tu jara yok'o a lay u kʌjta. Pachi tu tup'a u wich y tu tʌra yete u k'ʌ' y tu k'ata ti', wa ku yirik u ba'. 24A xi'ra a muj yirik u ber, chu'mpʌ u yirik ba' y tu ya'a:

―Kin wirik a winik p'is che', chen tʌn wirik tʌn u mʌno'.

25Pachi Jesús tu ka' tʌra' u wich a xi'ra y a xi'ra tu ki tunta' u ki chʌ', lʌji' kaj ki chʌkʌ'pʌj u yirik tu woro a ba'. 26Y Jesús tu tuchi'taj ix u yatoch y tu ya'ti':

―Ma' woko ix u kʌjta y ti' mix mok ka wei'k ti' tita

A Pedro ku yei'k moki a Jesús

(Mt. 16.13-20; Mt. 9.18-21)

27Pachi Jesús yete u kʌ'sa winiko' bino' ix u kʌjta u k'aba' Cesarea Filipo. Ix bej tu k'ata Jesús ti' u kʌ'sa winiko':

―¿Moken ku yei'k a winiko'?

28Y tio' tu nuko':

―Tax jujunto' ku yei'k lʌjiech a Juan a ku but'ik ja' a winiko', u jero' ku yei'k, lʌjiech a Elías, u jero' ku yei'k lʌjiech jujuntu a profetas a yʌn uchik.

29Kaj u k'ata Jesús tio':

―¿Moken ka wei'ke'x a teche'x?

Pedro tu nuka ti':

―A tech lʌjiech a Cristo.

30Chen Jesús tu ya'tio' mu' bin u yao' ti mix mok, moki a ti'.

II. JESÚS KU YEI'K U KIMI Y KU METIK A BA' TU YA'A

(8.31—16.20)

Jesús ku yei'k u kimi

(Mt. 16.21-28; Mt. 9.22-27)

31A Jesús chu'mpʌ u kʌ'sik ti' u kʌ'sa winik yok'o u Ti'a Xi'ra, a jach yʌnti' u mʌsik ne yaj ba', ku bij kinsa' y pachi ku mʌn oxp'e k'in ku ka' lik'i kuxta y binukaj p'akta ti u winiko' a judíos a jak'ʌ u kucho' yete u t'ojio' a moko' ku meajo' yok'o u yatoch K'uj y yete a ku kʌ'sko' u t'ʌn K'uj a toj u ts'ibtamʌ a Moisés uchik. 32Tu toj ki a'a' tio'. La'jen a Pedro ka tu pʌya Jesús tu juna y tu chich a'ti' mu' yei'k bex. 33Chen Jesús tu sutaj u bʌj u pʌkte u kʌ'sa winiko' kaj u k'eya a Pedro y bex tu ya'ti':

―¡K'uyabʌj ti ten Satanás! A tech mo lʌji' ka tukrik a baij u k'at K'uj, toj ja'ri' lʌji' ka tukrik a baij u k'at a winik.

34Pachi tu t'ʌna a winiko' yete u kʌ'sa winiko' y tu ya'tio':

―Wa mok poch u tar ti ten, u tup'se a baij u k'at a ti', u kuche u cruz y ka tak tin pach. 35Tu woro a mok ku tukrik u takik u bʌj ti' mu' kimi, a lay binukaj kimi; y a mok ku kimi yok'o u jach tsoyi u t'ʌn K'uj a lay jeu bin ix kʌ'. 36¿Ba'wi ti a xi'ra wa ku tenetik tu woro a ba' a yʌn yok'o lu'm si ku sʌtik u kuxta? 37¿Je' wa u k'uchu u muk' u bo'tik u kuxta? 38Wa mok ku ch'eik su'raki ti ten y yok'o in t'ʌn, ti a je' a winiko' a kuxo' beje', a lʌjio' a ne mo' tsoy u tuko' y ne yʌno' u k'ebo', bexi' u Ti'a Xi'ra ku bin u su'rakchʌ ti' ka sutuk yete u muk' u tet y yete ne pim a ángeles.

Currently Selected:

San Marcos 8: PLacNaha

Highlight

Copy