San Marcos 6

Jesús yok'o Nazaret

(Mt. 13.53-58; Lc. 4.16-30)

1Jok'i a Jesús tita y bini yok'o u lu'mi tuj kʌjnʌ yete u teto' y tʌn u t'u'ra' u pach ten u kʌ'sa winiko'. 2Kaj k'uchi u k'ini ku je'sik u bʌjo' a judíos, Jesús kʌ'sʌnʌj yok'o u nʌji tuku much'ik u bʌjo' a judíos u xake u t'ʌn K'uj y ne pim ne tsoy tu yiro' u kʌ'sa a Jesús y ka tu yao':

—¿Tu tu kʌna a je' a ne ya'p ba'? ¿Tu tu laj eta' a je' a ba' a ne u yej? ¿Y a ba' ku metik, to'o tuku ch'eik u muk'?. 3¿A je' mo' lʌji' a ku meaj che', au ti'a María, u bojo' Jacobo a José, Judas yete Simón? ¿Y mo' ket kaj kʌjta yete u ch'upra u bojo'?

Y bex a winik mo' tu ch'ao' u t'ʌn a Jesús. 4Chen a Jesús tu ya'tio':

Muj p'akta' a profeta wa ku yok'o u jer lu'm, chen yok'o u lu'mi, tu tiʌ u teto' u yet bojo' y yok'o u yatochi' mix ku ki ira'.

5Y tita Jesús muj ye'sa u muk' K'uj, tu muj ch'ei'ko' u t'ʌn y tu che' tʌra a winik a to'o mo' uts y tu che ch'ensa mo' ya'p. 6Y Jesús ne peknʌ u yor ka tu yira a winik jach ne chich u pixʌn y muj ch'ei'ko' u t'ʌn. Y mʌni tu kʌ'sa tu woro tu xur u meje kʌjta.

3. «Tech lʌji' a Mesías»

(6.6—8.30)

Jesús ku tuchi'tik a doce u apóstoles u kʌ'so' u t'ʌn K'uj

(Mt. 10.5-15; Lc. 9.1-6)

7Pachi, Jesús tu t'ʌnʌ a doce u apóstoles y ka tu tuchi'ta ka'to' ka'to', y tu ts'ati' u muk' K'uj tio', ti' u jarik kisin a mok akʌ' ti'. 8Y tu li'sa' u t'ʌn a Jesús tio' y tu ya'tio': Ma' naj ch'eike'x ba' tu ka bine'x, toj jari jump'e xote' ka ch'eike'x y mix a poxa, mix a wo'che'x y mix a tak'in ka ch'eike'x.

9Chen a pechek xʌnʌ' ka ch'eike'x, y ma' ch'eike'x ka'p'e a nok'e'x. 10Tu ya'tio':

―Tuk'in ka woke'x yok'o jump'e kʌjta, ka p'ʌte'x jari yok'o jump'e nʌj turu a ka' jok'ex yok'o a lay a kʌjta. 11Wa ka k'uche'x tuba a winiko' mu' u k'at u yaksike'x y mu' u k'at u yuiko a t'ʌnex, jok'ene'x tita, tite'x u tʌ'ni a woke'x ti u yirko' jach mo' taj ba' ku metko' y ti u yetko' baij ku metko'. Jach taj kin wei'k teche'x, tuk'in ka k'uchuk u xu' t'ʌn, más yaj ku bin u yue a lay a kʌjta y mo' ne k'uchuk u yʌyi bex tu mʌsa' u kʌjta Sodoma y Gomorra.

12Jeo' kaj jok'o u doce u kʌ'sa winiko' a Jesús, tu yao' ti' a winiko' ka u suto' u t'ʌn ti K'uj y u k'axo' u tuko'. 13Bexi' tu jaro' ne pim kisin a mok akʌ' tio' y ne pim tu cho'a tsats tia winik a mok mo' utso' y laj ch'eno' u ya'jo'.

Kaj kimi a Juan a ku but'ik ja' a winiko'

(Mt. 14.1-12; Lc. 9.7-9)

14A Herodes a lʌji' aj wes tu yua u tsikbʌta a ba' ne tsoy ku metik a Jesús, ch'ik tu woro winik tʌn u yei'ko' u k'aba', tax jujuntu tʌn u yei'ko': «A Juan a ku but'ik ja' a winiko' lʌji' ka lik' tu ka' kuxta, ben yʌn u muk' ti' u ye'sik u muk' K'uj.»

15U jer a winik tʌn u yei'ko':

«Lʌji' a Elías.»

U jero' ku yei'ko': «lʌji' profeta y u jero' ku yei'k lʌji' a profetas a yʌn uchik.»

16Kaj u yua Herodes, tu ya'a:

―Lʌji' a Juan, a mok a tin ch'ʌka u kar uchik y ka' lik'i tu kuxta.

17Ma' ja' wire, lʌji' Herodes a tu tuchi'taj mʌka a Juan y tu k'ʌxa yete maska' u sumi (cadena) y tu k'ʌra tuku naj mʌka' winik, yok'o a Herodías a lʌji' u lak' a Felipe u ka' xi'ra u bojo' a Herodes a tu ka' ch'a u lak' u xi'ra u bojo'. 18A Juan tu ya'ti' a Herodes: «Mo' tsoy a ch'eik u lak' u xi'ra a bojo'»

19Chen lʌji' yok'o a Herodías tu p'akta a Juan y ne poch u kinsik, chen mo' bik u kinsik, 20A Herodes sajak ti' a Juan, tu u yue a Juan jach tsoy u tuku y mix k'ʌs yʌn u si'pi, ben tu kʌnʌnta, y bexi' ne tsoy u yui'k u tsikba a Juan ben mu' yue baij ku bin u mete ti'. 21Chen jump'eri' u k'ini a Herodías tu yira bik u kʌxtik u kinsik a Juan, tuk'in a Herodes tu meta u yo'ch a tuj k'uchi jer u yax k'in y tu meta ne ya'p o'chi, y tu laj pʌya u ts'urio' a lay a lu'm, a mok yʌn u kuch y bexi' a mok t'ojo' u kucho' tiu u lu'mi a Galilea, 22u ch'upra u tia a Herodías oki tuku jʌno' a Herodes y a mok tiʌ yete ti', ij chu'mpʌ u yok'ot u ch'upra u ti'a, y a Herodes ne tsoy tu yira yete a mok tiʌ yete ti' y a Herodes tu ya'ti' u ch'upra u ti'a a Herodías:

―K'ate ten a baij ka k'at, y je'e in ts'ek tech.

23Y tu jach ts'a u tʌn ti', ka tu ya'ti': Tu woro ba' ka a k'atik ten je' in ts'ek tech, tak u chumuki u lu'mi tu kin wesintik.

24U ch'upra u ti'a Herodías jok'i y tu ya'ti' u nʌ':

―¿Baij ki bin k'ate?

Y tu nuka ti':

―K'ate u jo' Juan a ku but'ik ja' a winiko'.

25Se'p' kaj sutpʌji tu yiknʌ a wes a lʌji' a Herodes y tu k'ata ti':

―In k'at ka ts'ek ten beje' yok'o jump'e lʌk u jo' a Juan a ku but'ik ja' a winiko'.

26Y a Herodes ne tu tukra u bʌj, chen a tu tu ts'a u tʌn y tu laj ua tu woro a mok tu pʌya tu jʌnʌ, ben mo bin u yei'k mʌnʌ'. 27Y lʌji' ka tu tuchi'ta aj wes se'p' junturi' u ba'kʌi ka u tase u jo' a Juan. 28Y aj ba'kʌi bini a tuku mʌka winik u tu ch'ʌka u jo' a Juan y tu tasa u jo' yok'o jump'e lʌk y tu ts'a ti' u ch'upra u ti'a Herodías y a lay a ch'upra tu ka ts'a ti u nʌ'

29Ka tu yuo' u kʌ'sa winiko' a Juan baij meta ti' a Juan, taro' tuj p'ati u bʌk'e a Juan y tu biso' u muko'.

Jesús ku jʌnsik jach ne pim winik

(Mt. 14.13-21; Lc. 9.10-17; Jn. 6.1-14)

30Pachi, a apóstoles tu much'a u bʌjo' tu yiknʌ a Jesús y tu tsikbʌto' ti' tu woro ba' tu meto' y a ba' tu kʌ'so'. 31Jesús tu ya'tio':

―Ko'xe'x ix u lu'mi tu mʌnʌ' winik tia je'sike'x a bʌj chichin.

Tu ya'tio' bex, tu ne pim winik ku bino' y ku taro' tu yʌno' y mix ku pajta u jʌno'. 32Ij bini Jesús yete u kʌ'sa winik yok'o jump'e chen yok'o u lu'mi tu mʌnʌ' winik. 33Che ne pim winik tu yiro' u bino' y tu k'o'oto' moko', lʌji' kaj laj lik'o tu woro u winki tu jer u kʌjto' ij bino' k'ʌnʌ'ako' y lʌjio' pʌti k'ucho', y tu much'a u bʌjo' yete Jesús y yete u kʌ'sa winiko'. 34Y kaj emi Jesús ix chem, tu yira ne ya'p winik k'ucho' y tu ch'a otsi tio', ka tu yira mʌnʌ' mok kʌnʌntiko' a bex a mok ku kʌnʌntik aj me', ben kaj chu'mpʌ u kʌ'siko' ne ya'p ba'. 35Tuk'in taba u bi k'in, u kʌ'sa winiko' a Jesús xok'o tu yiknʌn a Jesús y tu yao' ti':

—Way mix k'ʌs winik y ya binukaj ak'ʌ'chʌ 36Tuchi'te a winiko' ka xik u kʌxto' u yo'cho' tuku kana' o'chi, a tu xok'o yʌn kʌjta, ka wirik mix ba' yʌn ti' u jʌntko'

37Jesús tu nuka tio':

―Ts'ae'x u yo'cho' ti' u jʌno'.

Y tio' tu nuko':

―¿Poch a wirik in metko' u yo'cho' tu woro a je' a winik yete u ya'p'i u bo'ri bex ne tak jump'e yaxk'in u bo'ri u meaj junturi' xi'ra?

38Jesús tu ya'tio':

―Xene'x ire'x bon pʌn yʌn teche'x.

Kaj ts'o'k u yiriko', tu yao':

―Yʌn cinco pʌn y ka'p'e kʌy.

39Pachi Jesús tu tuchi'ta u kʌ'sa winik ka u yao' ti a winiko' ka kurko' u ti'ri u ti'ri mo ne pim yok'o tu ya'x aj su'k. 40Ij bino' kuto' tax jujunto' u pimi cien winik y jer u pimi cincuenta winik, bex tu jʌtsa u bʌjo'. 41Pachi a Jesús kaj u mʌcha a cinco pʌn yete a ka'to' kʌy, kaj u pʌktaj ix kʌ' y tu ya'a: “Bay tech K'uj tu taj ts'a in wo'cho'” y tu p'uya aj pʌn y tu ts'ati' u kʌ'sa winik ti' u jʌtsiko' tia winiko', bexi' tu jʌtsa a ka'p'e kʌy ti' tu woro a winiko'. 42Laj jʌno' tu woro y laj ki nʌjcho'. 43Pachi u kʌ'sa winiko' a Jesús mʌni u much'o' u yʌrʌ' aj pʌn yete a kʌy y tu much'o' doce xak woro u yʌrʌ'. 44Cinco mil xi'ra a mok laj jʌno' a lay u k'ini.

Jesús ku xima yok'o peta'

(Mt. 14.22-27; Jn. 6.16-21)

45Pachi a Jesús tu ya'ti' u kʌ'sa winiko' ka nʌjko' ix chem y ka xi'ko' pati' ti' u nu'ku ix Betsaida y ti' ku bij p'ata ti' u yei'k ti' a winiko' binuka'. 46Kaj ts'o'k u t'ʌnik a winiko', bini u t'ʌne K'uj ix wits. 47Kaj ak'ʌ'chʌ, a chem ya tiʌ chumuk peta' y a Jesús p'at tu juna ix lu'm. 48Y toj tu tiʌ Jesús tita tu yira u kʌ'sa winik tʌn u ne chich babtiko' a chem tu lik'i ne k'ʌ'm ik' u wich tar tu tio', tu jach bin sasta, Jesús ximuka' tu yo'kobi a ja' bini tu tio' u kʌ'sa winik y tuk'in tʌn u más ch'ʌktik tu tio' 49Kaj tu yiro' u kʌ'sa winiko' Jesús tʌn u xima tu yo'kobi a ja' a Jesús, tu tukro' kisin, y chu'mpʌjo' u yaboto', 50tu ne ja'k'o u yoro' a ba' tu yiro'. Chen Jesús se'p' tu t'ʌnao' y tu ya'tio':

―¡Chichkinte a wore'x! ¡Ma' sʌjtike'x, tenen a Jesús!

51Y Jesús nʌ'ki ix a chem, ij ch'en u tar a chich u yik'a, u kʌ'sa winiko' Jesús jach laj pekno' u yoro' a tu yiro' a ba' tu meta Jesús. 52Tu yuo' u bʌjo' bex, tu mo' u ki' uo' a ba' tu meta a Jesús a ka tu ye'sa u muk' u t'arsik aj pʌn y bexi' tu mʌkʌ' u tuko'.

Jesús ku ch'ensik a mo utso' yok'o Genesaret

(Mt. 14.34-36)

53Chen ka tu ch'ʌkto' a peta', k'ucho' yok'o u kʌjta u k'aba' Genesaret, y tu xur tita tu mako' a chem. 54Toj ka emi Jesús yete u kʌ'sa winik, a winiko' tu k'o'oto' a Jesús. 55Ij chu'mpʌjo' u bino' se'p' jach k'ʌneaka' ch'ik tu woro a lay u kʌjto', ti' u kʌxko' a mok mo' utso', y chu'mpʌjo' u tasko' yete meje ch'ak a mok mo' utso', to' tuku yui'ko' tiʌ tita a Jesús. 56Tu ku laj bin a Jesús, wa yok'o tu yʌn meje kʌjta, tu nuk u kʌjta o yok'o u lu'mo' u koro', o yok'o bej ku mʌn, tita ku laj tasa' ti' a mok mo' utso', y ku p'iskubʌjo' u k'ata ti' wa jai' ku cheik u tʌra' u xur u nok' y tu woro a mok ku tʌrko' ku laj ch'eno'.

Currently Selected:

San Marcos 6: PLacNaha

Highlight

Copy