San Lucas 21

A ch'upra a kimen u lak' tu ts'a u tak'in ti' K'uj

(Mr. 12.41-44)

1Jesús tu pʌktaj, tu yiraj bik u but'ik u tak'in a yʌn u tak'in yok'o u xaki tuku much'ik u tak'in K'uj. 2Bexi' tu yiraj junturi' ch'upra a kimen u lak' jach bik tu but'a tak'in y mo' tak'in u ka', tu but'a ka'p'e chix tak'in. 3Jesús tu ya'tio':

—Jach taj kin wei'k teche'x, A je' ch'upra a kimen u lak', jach k'ux ya'p tu but'a mo' bex a yʌno'. 4Chen tu woro a mok tu but'a u tak'in toj ja'ri' u yʌra' u tak'in tu but'a; y a je' a ch'upra to' a mʌnʌ' u tak'in, tuj laj but'a tu woro u tak'in a tu ku jʌnʌ.

Jesús tu ya'a bij ku bij juba' u yatoch K'uj

(Mt. 24.1-2; Mr. 13.1-2)

5Ti' yʌn moko' tʌn u yei'ko':

—Ira' wire, jach tsoy u tunichi yʌn yok'o u yaj yatoch K'uj, yete a jach k'ux tsoy ba' ch'uikintʌ' yok'o, Jesús tu ya'a: 6—A je' ka wike'x, a yaja nʌj, ku bij k'uchu tu k'ini, je' u laj bin jubu, tu woro ku laj bij jene y mix ku bin naj p'ʌta chichin.

Jesús ku tsikbʌtik baij ku e'sa' tuk'in ne tak u xu' t'ʌn

(Mt. 24.3-28; Mr. 13.3-23)

7U kʌ'sa winiko' kaj u k'ata ti' Jesús:

—Wʌjkʌ'si ¿tuk'in ku bin mʌn a je' ka wei'k? ¿Y baij ku bin e'sa' ba' tuk'in ka' xok'ok u mʌn a ka wei'k?

8Jesús tu ya'a:

—Ma' cheik u tuske'x, a lay u k'ini ku bij tar ne pim ku bin u yei'k: “A ten lʌjien a Cristo”, y “Xok'o u tar a lay u k'ini.” Chen ma' bine'x a t'ure'x a layo'. 9A tuk'in ka wui'ke'x ts'iki y kinsa', ma' sʌjtike'x; toj laj yʌnti' u laj mʌn tu woro a je' a ba' tu yʌj chuni; chen moj toj se'p' ku bij xu' t'ʌn.

10Jesús tu ya'a:

—Bin u kaj lik'i ts'iki u kʌjta winik yete u jer kʌjta y u wesi yete u jer wes. 11Binukaj tar wi'ji, binukaj tar ne ya'p ya'ji y ne pim kʌjta ku bin pek a lu'm y ne ya'p ba' ku bin e'sa' ix kʌ' y bexi' jach moki otsi ku bij ira'.

12»Chen mo' ki k'uchuk tu k'ini a tu woro a ba' ku laj bin tar, ku bij t'ure'x ti' u ts'eke'x yok'o u nʌji tuku much'ik u bʌjo' a judíos u xake u t'ʌn K'uj, bexi' tu ku mʌka' winik, ti' ku bin u pure'x tu ti'o' aj wes y tu tio' u t'oji wes lʌji' yok'o ten. 13Y bex yʌn bik ka tsikbʌtik a ba' ti meta. 14Ma' toj tukrike'x a bʌje'x baij ka bin a wa'ex ti a takik a bʌje'x, 15A ten ki bin y ts'ae teche'x u taji baij ka bin a wa'ex, y a wʌjp'aktie'x mix ku bin u ts'ati' u sutik u nu'ku ti u yei'k teche'x mo' taj ta wa'ex. 16Laj bexi' a tete'x ku bin k'ube'x, a sukue'x, y a bojo' y a mok ne a wet mʌn; y tax jujuntu teche'x ku bij kinse'x. 17A teche'x ku laj bin u p'aktike'x, che yok'o ten. 18Chen ma' tukrike'x a bʌje'x, mʌnʌ' u naj sa'ta mix k'ʌs jump'eri' u tso'tse a jo'. 19Wa ka muk'tike'x hasta turu u laj mʌn a je' a ba', jea' a bine'x ix kʌ'.

20»Tuk'in ka bin a wire'x jach pim aj ba'kʌi, tʌn u laj sutmʌktike'x tu woro u kʌjta Jerusalén, a we'ex k'uchi tu k'ini u laj juba' u kʌjta Jerusalén. 21A mok ti' yʌn ix u lu'mi Judea, ti' u puts'u ix wits; y a winiko' a tiʌ yok'o u chumuki laj jok'ene'x tita, y a mok tiʌ ix u kor, mu' suto' tita. 22La'jen k'uchi tu k'ini u bo'tik u bo'ri u si'pi ti' K'uj, ti' u nup'u u k'ini tu woro a ba' ts'ibʌ'. 23¡Jach otsi a ch'uprao' a mok mo uts'k'inti' y a mok yʌnti' u ti'a u yʌ chu'chʌntʌ a lay u k'ini! Ka wik, tu woro mok a ti' yʌn tu lu'mi Judea, ku bin ts'aba u bo'tik u si'po' ten K'uj. 24Y ku laj bi kinsa' yete maska' y ku laj bin chuka' mʌkʌ' ti' tu woro u lu'mi kʌjta, y a moko' mo' judíos, ku laj bin u teninte Jerusalén, hasta ku k'uchu tu k'ini bexi' tio'.

U sut u Ti'a Xi'ra

(Mt. 24.29-35,42-44; Mr. 13.24-37)

25»Ku bij ira' ba' yok'o k'in, yok'o aknʌ' y yok'o a ba' kʌ', y yok'o lu'm sajak a winiko' tuk'in ku bin u yue u jach pek u nukuch yʌ'mi a peta'. 26Tu woro mok a ti' yʌn ix yok'o lu'm, ku bin u ch'eik sajkio' tuku tukrik baij ku bin tar yok'o a lu'm. A lay u k'inio' tu woro a ne nuk a ba' yok'o kʌ' ku bij laj pesa' 27La'jen ku bin yiriko' u tar ix muyaj u Ti'a Xi'ra, yete u muk' y jach k'ux tsoy u sasiri 28A u k'ini ku chu'mpʌ a tu woro a je' a ba', chichkinte a wore'x, nʌ'se a wiche'x, tu ne taki u tar u take'x K'uj.

29Jesús, kʌ'sʌnʌj yete jump'e a kʌ'sa a yʌn u jer u nu'ku:

—Ire'x u che'i a higuera y tu woro che'. 30Tuk'in ka wirke'x u yaj jok'otʌ u muni u le' tu woro a che', a wo'ye'x taba u tar u yoko chʌkʌr k'in. 31Bexi' tuk'in ka' wire'x u mʌn tu woro a je' a ba'. A woye'x xok'o u tar tu ku wesintik K'uj a tiʌ kʌ'.

32»Jach taj kin wei'k teche'x, ku yʌj bij tar tu woro ba', a ti' wa'a ti' teche'x, mo' toj kimko' a mok kuxʌ' beje'. 33A kʌ' y a lu'm jeu' mʌn, chen in t'ʌn muj bij u xu'pu.

34»Kʌnʌnte a bʌje'x y ma' cheik a woro jay ka tukrik ne ki' a jʌnʌ y a wu'k' a wo'che'x y bexi' ti' mo' jay ka ne tukrik a bʌj yok'o a ba' yok'o a way a lu'm, y bex mʌnʌ' wike'x toj yayaj u tar u k'uchu a lay u k'ini. 35P'is bix u leja' ba', ku bij tar a lay k'ini ti' tu woro u winki a kʌjʌ' yok'o lu'm. 36Chen teche'x, ki ch'ukte'x a lay u k'ini, tu woro k'in ka t'ʌnike'x K'uj ti' a wirke'x bik tsoy a puts'e'x ka tak tu woro a ba' a ku bij mʌn, y tsoy ka bij k'uchu tu tiʌ u Ti'a Xi'ra.»

37Jesús kʌ'sʌnʌj tu woro k'in yok'o u yatoch K'uj, y ak'bi ku bin ix u jo' wits u k'aba' Olivos. 38Y tu woro a winiko' ku tar ja'ts'ka' yok'o u yatoch K'uj, ti' u ch'extik u kʌ'sa Jesús.

Currently Selected:

San Lucas 21: PLacNaha

Highlight

Copy