San Lucas 19

Jesús ti' yʌn yete Zaqueo

1Kaj ok Jesús tu kʌjta Jericó, tʌn u mʌn chumuk u kʌjta. 2Ti' yʌn junturi' xi'ra ne yʌn u tak'in u k'aba' Zaqueo, lʌji' u ts'uri a mok ku k'atik u bo'ri u ba' u bojo'. 3A Zaqueo u k'at u yirik a Jesús ti' u k'oo'tik, chen mo' k'ucha' yirik tu ne pim a winik, bexi' tu mo' kʌ'nʌ u bake. 4Chen tu k'ʌna u yaka' ti' u pʌti bin, y nʌ'ki yok'o jump'e che' u k'aba' sicómoro, ti' u chʌkʌ'pʌj u yirik tuku bij mʌn a Jesús. 5Kaj mʌni Jesús tu tiʌ a Zaqueo, tu pʌktaj kʌ'nʌ ix u k'ʌ' a che', tu yiraj tiʌ Zaqueo, y tu ya'ti':

—Zaqueo, se'p' a weme, beje' yʌn ti' in p'ata ta watoch.

6Y a Zaqueo se'p' emi ix lu'm y jach tsoy u yor tu yaksa Jesús tu yatoch. 7A mok tu yiraj u yoko Jesús tu yatoch a Zaqueo, tu chuno' u jumo', tʌn u yei'ko', tij bini oko' ix u yatoch a mok ne yʌn u k'ebʌn. 8Chen a Zaqueo lik'i ch'ikta tu t'ʌn, y tu ya'ti' ak Ts'uri:

—Ts'uri, bin in ts'ae u chumuki in ba' ti' a mok mʌnʌ' u tak'in o yʌn mok tin wakra u tak'in je'e in sutik ti', laj tu nup wʌts' kin ka sutik ti'.

9Jesús tu ya'ti':

—Beje' K'uj tu sa'sa' u k'ebo' tu woro a mok ti' yʌn yok'o a je' a nʌj ti' mu' bin ix k'ak', bexi' a je' a xi'ra lʌji' u ka' jer u ti'a a Abraham u nuki. 10Ka wirik, u Ti'a Xi'ra, tari u kʌxte a winik sa'sik u k'ebo' y ti' mu bin ix k'ak' a to'o tu laj sʌtubʌj.

A kʌ'sa a yʌn u jer u nu'ku yok'o a tak'in

11A winik tʌn u ch'extik u tsikba a Jesús, y a Jesús kʌ'sʌnʌj yete jump'e a kʌ'sa a yʌn u jer u nu'ku, tu xok'o u k'uchu ix u kʌjta Jerusalén, u tukriko' u winiko' a judíos toj k'uchi tu k'ini u wesintik K'uj.

12Jesús tu ya'tio':

«Tiʌ junturi' xi'ra bex bix u bojo' aj wes, bini ix u jer lu'm tu ne nʌch, ti' u yaksa' tu wesi, y ka ts'o'kok u yaksa' tu wesi ku ka sut. 13Ti' ta mo' xik, tu yʌ t'ʌnʌ kʌ' uj k'ʌ' u ne k'ʌni', tu ts'atio' jujuntu ya'p tak'in, y tu ya'tio': “Ki k'ʌne'x a je' a tak'in ti'a ka kʌnʌnʌ u jer, ti' in ka irik ka sutken.” 14Chen ne p'ek yira' ten a mok u yet kʌjta, ka tu tuchi'to' winik ti' u bin tu pach ti' u yei'k ti a mok ku bin u but'e u wesi: “Mi' k'ato' in wik u yoko u wesintiko' a je' a xi'ra ix in lu'mo'.”

15»Kaj ts'o'ki u but'a tu wesi a xi'ra, y kaj u'ri, tu pʌya u winik a u ne k'ʌni', a tu ts'atio' u tak'in, ti u k'atik tio' bon kʌnʌnʌ yete u tak'in. 16Yʌ tari a mok tu yʌ ch'a, tu ya'a: “Ts'uri, a tak'in a ta ts'a ten, t'ari u jer jumuj k'ʌ' wʌts' más.” 17U Ts'uri tu nuka ti': “Ne tsoy, jach tsoy in winkech; tu ta ki kʌnʌnta in tak'in tak mo' ya'p tin p'ʌta tech bin in ts'ae tech ka uj k'ʌ' kʌjta tiʌ wesintik.” 18Pachi k'uchi u jer u ne k'ʌni', y tu ya'a: “Ts'uri, a tak'in a ta ts'a ten, t'ari u jer jumuj k'ʌ' wʌts'.” 19Bexi' a ti' tu ya'a ti, “Bexi' tech kin bin in ts'ek jumuj k'ʌ' kʌjta tiʌ wesintik.”

20»Kaj tari u jer u ne k'ʌni' tu ya'a: “Ts'uri, a je' a tak'in a ta ts'aten, ti' li'sa' in tap'e yete u xet'e nok', 21ti sʌjtech, toj in we a tech a xi'ra a jach ts'ik, toj in we a tech ka ch'eik a ba' a ma' tech ta meta y ka jak'ik a nʌr tak mo' tech ta pʌk'a.” 22U Ts'uri tu ya'ti': “Mo' tsoy in winkech, a ka' t'ʌni' tech a ta wa'a lʌji' tu ka bi a bo'te a si'pi, wa a we jach ts'iken, a we ki ch'eik a ba' a mo' ten tin meta, kin jak'ik u nʌr tak mo' ten tin pʌk'a. 23¿Biken mo' ta but'a in tak'in tuku li'sa tak'in ix banco, y ka sutken je' in wirik t'ari in tak'in yete u yar”? 24U ts'uri tu ya'a ti'a mok tiʌ tita: “Take'x ti' u tak'in y ts'ati' a mok a yʌn ka uj k'ʌ' ti'.” 25Chen a tio' tu nuko'; “Ts'uri, ti' ya yʌn ti' ka uj k'ʌ' u tak'in más.” 26U Ts'uri tu nuka tio': “Ten ki wei'k teche'x, a mok yʌn ti' más ya'p ku bij ts'abati' y a mok mʌnʌ' ti tak tiʌ chichin ti binukaj laj taka' ti'. 27Y bexi' a mok ku p'aktiken a mu' u k'ato' u yiko' in woko tin wesi, tase'x way y kinse'x tin wich.”»

V. IX JERUSALÉN

(19.28—24.53)

Ku mʌn ba' yok'o Jerusalén

(19.28—21.38)

Jesús oki ix Jerusalén,

(Mt. 21.1-11; Mr. 11.1-11; Jn. 12.12-19)

28Ka ts'o'ki u tsikba Jesús, pachi bini ix Jerusalén. 29Tuk'in xok'o u k'uchu ix u kʌjta Betfagé y Betania, xok'o yʌn u yaj witsi u k'aba' Olivos, Jesús tu tuchi'taj ka'to' u kʌ'sa winiko', 30tu ya'tio':

—Xene'x toj a lay u kʌjta a ka wirke'x y ka ojke'x tita, bia wire'x junturi' burro, ti' makʌ', a lay a burro mo' nʌj nʌ'kʌ winik kapta tu pach, pite'x y tase'x. 31Wa mok ku k'atik tech, ¿biken ka pitke'x a burro? Bex ka nukik ti': Ak Ts'uri u k'at u k'ʌnik.

32Ij bino' u kʌ'sa winiko', y bex tu yiro' a bex tu ya'a a Jesús. 33Tuk'in tʌn u pitko' a cho burrito, u winko' tu k'ato':

—¿Biken ka pitke'x?

34Tu nu'ku:

—Ak Ts'uri u k'at u k'ʌnik.

35Pachi ka tu biso' u k'use tu yʌn a Jesús, tu jʌyo' u nok'i tu pach u burrito, ij ʌnta' u nʌ'kʌ' Jesús tu kʌpta tu pach. 36Ka tʌn u bin Jesús ix u kʌjta Jerusalén, a winiko' chu'mpʌ u jʌyko' u tep' ix lu'm tuku mʌn a Jesús. 37Tuk'in ka tʌn u xok'o yok'o u yaj jo' witsi u k'aba' u witsi Olivos ti' u ka eme, tu woro a ne pim u kʌ'sa winiko', tsoyji u yoro', chu'mpʌ u k'ʌ'm yaboto' tu ne tsoy u yoro' y bexi' tʌn u k'ʌyko' K'uj, tu tu yiro' ne ya'p tu ye'sa' u muk' K'uj. 38Kaj u yao':

—¡Kaj k'ujinte a je' aj Wes a tuchi'ta' ten K'uj; ka tsoyok u yoro' ix kʌ' y ka u jach k'o'oto' u muk' K'uj ix kʌ'!

39Ti' yʌn junyʌrʌ' u winiko' a judíos a ku ya'batio' fariseos ti' yʌn ix a pim winik kaj u yao' ti' Jesús:

—Wʌjkʌ'si, k'eye a kʌ'sa winiko'.

40Jesús tu nuka tio':

—Kin wei'k teche'x, wa ku mʌjko' u chio' a je' in kʌ'sa winiko', a tunicho' ku bij aboto'.

41Kaj k'uchi Jesús xok'o yok'o u kʌjta Jerusalén, ka tu yiraj, Jesús tu yak'tubʌj ti' a Jerusalén. 42Tu ya'a Jesús: «¡Wa k'ʌs a wue'x a teche'x a beje' u k'ini je'e u tsoyta a wore'x! Chen beje' ta'kʌ' y mo' bik a wike'x. 43Binukaj tar u k'ini a mok a ku p'aktike'x, ku bin u ts'ʌrkintik tunich ti' ma' tuba a puts'e'x tu woro tu ti'ech, ku ki bin u sutmʌktikech ti' u kinsikech. 44Binukaj laj kinse'x a teche'x yete a ti'e'x ku bin u laj jubso' u tunichi a kʌjta ku bin u laj tech'intik a tunich. Bex ku bin u meta' teche'x tu ma' ta wakse'x ta wore'x ti' K'uj tu maj k'o'oten a tu tuchi'ten K'uj, ti' teche'x in wʌntike'x.»

Jesús ku laj jarik tu woro a mok tiʌ u kane u ba' yok'o yatoch K'uj

(Mt. 21.12-17; Mr. 11.15-19; Jn. 2.13-22)

45Kaj okij Jesús ix u yaj nʌji tu ku naj uiko' u t'ʌn K'uj u winiko' judío, chu'mpʌ u laj jarik tu woro a mok tʌn u kanik u ba' u bʌj tu jamni u yaj yatoch K'uj, bexi' ket a mok a ku mʌniko' ba'. 46Jesús tu ya'tio':

—Ti' ts'ibʌ' ix u t'ʌn K'uj, Ku yei'k: “In watoch lʌji' u nʌji ti'u t'ʌna K'uj”, chen teche'x ta wayse'x in watoch ti' u much'ik u bʌj a mok ku yakra ba':

47Kaj ts'o'k u jarik Jesús a mok a ku kanko' u ba' ix yaj nʌji tu ku naj uiko' u t'ʌn K'uj u winiko' judío; Jesús kʌ'sʌnʌj sastuka' ix u yatoch K'uj; chen u t'ojio' a moko' ku meajo' yok'o u yatoch K'uj yete a ku kʌ'sko' u t'ʌn K'uj a toj u ts'ibtamʌ a Moisés uchik yete u jach ts'uri u winiko' judío tʌn u kʌxtiko' bik u kinsiko' a Jesús. 48Chen ma' yue bik ku bin u kinso', tu ne pim winik u ne k'ato' u yu'iko' u tsikba a Jesús.

Currently Selected:

San Lucas 19: PLacNaha

Highlight

Copy