Miqueas 4
4
U jeedzel ajawil Yuumtzil
(Is 2.2-4)
1Ti' u pachalil le kiino'obo' bíin p'áatac ma'alob jeedzelil
le pu'uc tu'ux yaan u kulnaj Yuumtzilo'.
Leti' bíin u beet u asab ca'anal witzil ti' u láak witzo'ob.
Tuláacal múuch' caajo'ob bíin talac tu yicnal;
2ya'abcach caajo'ob bíin kuchuco'ob táan u ya'alico'ob:
Co'otene'ex u ti'al ca na'acacone'ex tu witzil Yuumtzil,
tu kulnaj u Ku Jacob,
u ti'al ca u ca'anbes ti' to'on u beelo'ob
u ti'al ca páatac xíimbal tu beelo'ob.
Tumen tu witzil Sión bíin jóokoc u ca'anbesaj Yuumtzile',
tu caajil Jerusalén bíin taalac u t'aan.
3Yuumtzil bíin p'is óolnac ichil múuch' caajo'ob
leti' bíin u dzáa u xuul ti' u ba'atelo'ob ya'abcach caajo'ob,
tac le u asab náachtaquilo'obo'.
Leti'obe' bíin u yibo'ob u máascabil u ba'atelo'obe'
uti'al u sutico'ob nu'uculil u meyajta'al lu'um
bey xan bíin u suto'ob lóobche'ilo'ob u lóomte'ob.
Mix jun p'éel caaj bíin u ca mach u nu'ucul u ba'atel u ti'al u bin u ba'atelt u láak caaj,
mix xan bíin nu'ucta'ac bix cu bin úuchuc ba'ateli'.
4Tuláacalo'ob bíin cajlaco'ob x ma' sajaquil,
tuláacalo'ob bíin páatac u je'elelo'ob
tu bo'oy u pakal uva yéetel tu bo'oy u pakal higo.
¡Lelo'oba' u t'aano'ob Yuumtzil, u yuumil tuláacal páajtalil!
5U chuucáan caajo'obo' cu yu'ubaj t'antico'ob u kuob,
ba'ale' to'one' mantadz bíin c u'uyaj t'aant Yuumtzil c Ku.
Yuumtzile' bíin u toc u caajal
6-7Yuumtzile' cu ya'alic:
Ti' le kiino' bíin in much'quint in j tamano'ob,
le máaxo'ob tin jadzajo'ob ca'acho':
le móochtaco'obo', le ca'anantaco'ob yéetel le ki'itpaja'ano'obo'.
Tu yéetelo'obe' le je'enque'ex j p'aatalo'obo',
bíin in beet jun p'éel mu'uka'an múuch' caajo'ob.
Teen Yuumtzil, teen bíin in méektáant in caajal
likbal tu witzil Sión, bejela'e' tac tu mina'an u xuul kiino'ob.
8Teech túune', Jerusalén u witzil najil yéetel u tuulumil Sione',
teche' bíin ca'a suunaquech a beet u noj caajil le ajawila',
jun p'éel noj caaj je'el bix ca'ache'.
9Bejela'a' túune' ¿ba'ax o'olal ca wawat
bey jun túul co'olel yaan u ki'inamil síijsaje'?
¿Tu yo'olal wa mina'an ajaw ichil a cajtalil?
¿Wa tumen dzo'oc u láaj quíimilo'ob a aj tzol xiquino'ob?
10U caajil Sión ch'o'och'otabáa yéetel awatnen
je'el bix jun túul co'olel cu ch'o'och'oticubáa tu yo'olal u ki'inamil u síijsaje',
tumen a cajnáalilo'obe' bíin jóokoco'ob cajtal ti' jéechcab cúuchil,
cu dzo'ocole' bíin kuchuco'ob tac Babilonia.
Ba'ale' Yuumtzile' bíin u toc u caajal te'elo';
bíin u toc tu kab u aj p'eeco'ob.
11Bejela'e' ya'abcach caajo'ob dzo'oc u much'icuba'ob u beeto'ob loob ti' teech,
táan u ya'alico'ob: ¡Cone'ex c dzáic utz ti' c iche'ex
le quéen ila'a u manba'alcunajil Jerusalén!
12Ba'ale' le múuch' caajo'obo',
ma' u kaj óolo'ob u tuuculo'ob yéetel jok tuuculo'ob Kui';
ma' u yojelo'ob wa bin a ca'aje'ex much'quintbil
je'el bix u much'quinta'al u kaxabilo'ob i'inaj ich coole'.
13¡U caajil Sión líiken u ti'al ca xanabcha'anaquech!
Tumen Yuumtzile' cu ya'alic:
Tene' bíin in dzáa ti' teech u muuk jun túul wacax
yéetel baaco'ob fierro u ca'ajo'ob yéetel maayo'ob bronce u ca'ajo'ob,
u ti'al ca a xe'exe'et' ya'abcach caajo'ob.
Teche' bíin a lukes ti'ob le ayikalilo'ob yocoltajo'obo',
u ti'al ca a jun páaycunto'ob ti' teen,
u Yuumtzilil tuláacal u yóokolcaab.
Currently Selected:
Miqueas 4: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992
