Miqueas 3
3
U péectzilil tac pool u ti'al j loolob aj méektáano'ob
1U aj méektáane'ex yéetel u nuuquile'ex Israel, bejela'e' u'uye'ex,
¿ma' wa te'ex u najmal a wojéeltique'ex ba'ax u káat u ya'al ti'ibil bejil?
2U jela'anile', ca p'ectique'ex ba'ax utz, ca yaabiltique'ex ba'ax kaas;
ca p'e'estique'ex in caajal,
ca p'atique'ex dzíilpaja'an u baaquelo'ob.
3Ca jaantique'ex cuxa'an in caajal;
ca dzíilique'ex u yoot'el ca ca'acachique'ex xan u baaquelo'ob;
ca máaka'antique'ex bey bak u ti'al cha'acal ti' cuume'.
4Jun p'éel u kiinile' bíin a t'ane'ex Yuumtzil,
ba'ale' ma' bíin u núuque'exi'.
Ti' le kiino' bíin u ta'acbesubáa ti' te'ex
tu yo'olal le loolob ba'alo'ob ta beetaje'exo'.
5In caajale' cu bin ti' u ma' jaajil bejo'ob
tu yo'olal cu tu'usulo'ob tumen le aj bóobato'obo',
Cu tze'ectico'ob jéedzel ti' máaxo'ob dzáic ba'al u jaanto'ob,
ba'ale' cu ya'alico'ob u ba'ateltico'ob le máaxo'ob
ma'atech u dzáico'ob janal u ti'al u na'ajcunticuba'ob.
Yuumtzile' cu ya'alic ti' le aj bóobato'obo':
6Ma' bíin ca'a yanac ti' te'ex u náayilo'ob bóobatil yéetel áakabi',
mix bíin a caxante'ex éekjoch'e'enil u ti'al wa'alique'ex ba'axo'ob cu taal u kiinil.
Le kiino' bíin t'úubuc u ti'al le aj bóobato'obo',
bíin éekjoch'e'enchjac kiin ti'obo.
7Le aj náayo'ob yéetel le aj chuchuc na'ato'obo' bíin p'áataco'ob paja'an u subtalo'ob.
Tuláacalo'ob bíin p'áataco'ob maacal u chi'ob
le quéen jáawac u núuca'al u káat chi'ob tumen Ku.
8Ba'ale' tene', u pixan Yuumtzil cu chupiquen yéetel Muuk,
yéetel ti'ibil cuxtal bey xan xiixib máaquil,
u ti'al ca in wa'al tu táan u yich Israel u dzu'uy óolal yéetel u keban.
9U j méektáane'ex yéetel u nuuquile'ex Israel u'uyene'ex bejela'e',
te'exe' a p'ectmaje'ex ti'ibil cuxtal ca kechique'ex xan ba'ax no'oja'an,
10ca líiksique'ex u pakilo'ob Jerusalén, u noj caajil u pu'uquil Sión
tu yóokol quíimsaj wíinico'ob yéetel tu yóokol x ma' ti'ibil cuxtalil.
11U aj ilaj ba'atelo'obo' cu p'is óolo'ob tu yo'olal taakin
le aj kiino'obo' cu ca'ansajo'ob chéen tu yo'olal cu bo'otalo'ob
bey xan le aj bóobato'obo' cu beetico'ob u bo'otalo'ob
u ti'al ca u yaalo'ob ba'axo'ob cu taal u kiin
cu ya'alico'ob táan u yáanta'alo'ob tumen Yuumtzil,
cu ya'alico'ob: Yuumtzile' ti' yaan t éetele';
mix jun p'éel loob bíin úuchuc ti' to'on.
12Bey túuno' ta wo'olale'exe',
Jerusalén, u caajil u pu'uquil Sione'
bin u ca'aj suut pocche'il, bin u ca'aj suut jun tucub jeenel najo'ob,
u pu'uquil le kulnajo' bin u ca'aj lo'obol.
Currently Selected:
Miqueas 3: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992
