Isaías 3
3
Bix bíin ja'adzac Judá yéetel Jerusalén tumen Yuumtzil
1¡P'ich ma'alob a wiche'ex! Yuumtzil u yuumil tuláacal páajtalile',
bíin u ca'aj u lukes ti' u caajil Jerusalén yéetel ti' Judá
tuláacal máaxo'ob taasic ba'axo'ob kabéet ti',
bey xan tuláacal waaj yéetel ja' kabéet ti'ob.
2Bíin u láaj tzel ichil caaj j xiixib máac, aj ba'atel,
aj u'uyaj tac pool, aj bóobat, j wáay, nuxib,
3náacom, dzuul, aj tzol xiquin, aj na'at yéetel j meen,
4u ti'al ca u dzáa xi'ipalalo'ob u beeto'ob u nuuquilo'ob;
chéen j p'eex paalal bíin méektáantico'ob.
5Sen ya'ab ba'ax bíin úuchuc ichil le caajo',
yaan u yúuchul paaclan ba'atel tac ichil éet bisajba'ob.
J táanquelem paalal, bíin líikico'ob u ba'atelto'ob le nuxibo'obo',
máaxo'ob mix ba'al u yila'alo'obo', bíin líikico'ob u ba'atelto'ob le dzuulo'obo'.
6Tac jun túul sucu'untzile', bíin u ya'al ti' u yíidzin: Quexi' teche' yaan nook a búuquinte;
beetabáa c nojochil; méektáant le tucub najo'oba'.
7Le íidzintzilo', bíin u núuc beya':
Tene' ma' tu páajtal in wutzquintic le kaaso'oba',
tin wotoche', mina'an ba'al in jaant, mix nook u ti'al in búuquinte.
Ma' a dzáiquene'ex in beet in nojchil te j caaja'.
8Tu jaajile' Jerusalene' táan ju'uju'utpajal,
Judae', táan u suut x lab caajil, tumen ichile', cu beeta'al yéetel cu ya'ala'al ba'ax kaas ti' Yuumtzil,
ba'alo'ob cu po'och'ic u nojbe'enil.
9U j ma' subtalo'ob taquic u poolo'ob; ma' tu balico'ob u kebano'ob;
jach beyo'ob Sodomae', cu ka'aytico'obo' tuláacal tu'ux, ba'ax cu beetico'ob.
¡Yaj yanilo'ob, tu juunalo'ob cu caxtico'ob u ja'adzalo'ob!
10Qui' u yóol aj ti'ibil bej, tumen bíin xi'ic utzil ti',
bíin u qui'iqui' jaant u yich u meyaj.
11¡Yaj yanil j loolob wíinic, tumen bíin xi'ic kaasil ti'!
Ku bíin bo'otic ti' ba'axo'ob tu beetaj.
12Jun túul p'eex paal máax yedzic in caajal;
u méektáanile' tu kab co'olelo'ob yaan.
In caajal, a nuuquile'ex tusique'ex,
ca bisa'al ti' yaanal bej.
13Yuumtzile', dzo'oc u nu'ucbesicubáa u ti'al p'is óol,
mix ba'al cu pa'atic u ti'al u xot kintic u caajal.
14Yuumtzile', bíin t'aanac u ti'al xot kiin,
bíin u ya'al; ti' u nuuquilo'ob caaj:
Te'exe', ma' je'eleque'ex ti' a wóotzilcuntique'ex in caajali';
dzo'oc a wocoltique'ex le óotzilo'obo',
ba'axo'ob ca wocoltique'exe' ca ta'acbesique'ex ta wotoche'ex.
15¿Máaxe'ex u ti'al ca yedze'ex in caajal
ca xiquique'ex xan u táan yich óotzilo'ob?
Lela', Yuumtzil u yuumil tuláacal páajtalil a'alic.
Jaadz u ti'al u co'olelilo'ob Jerusalén
16Yuumtzile', cu ya'alic xan: Ti' co'olelilo'ob Sión, le x ca'anal icho'ob,
cu máano'ob u tuch'maj u caalo'ob,
cu pooch'ilo'ob yéetel u paacato'ob,
cu cóomcom xíimbalo'ob, cu beetico'ob u juum xan u x qui' óotzilil u yooco'ob,
17u ti'al u yajtal tu yóolo'obe' bíin in beet u kolistalo'ob
bíin in beet u yila'al u chacnulilo'ob.
18Ti' le kiino', Yuumtzile', bíin u lukes tuláacal u x qui' óotzililo'ob:
bíin u lukes u x qui' óotzilil u yooco'ob, u x péet jo'olo'ob, u x ch'iquibo'ob,
19u tuupo'ob, u x bak kabo'ob, yéetel u bóoch'o'ob,
20u kax poolo'ob, u x jokenjokil u yooco'ob, u kaxnako'ob, u mejen chúujil u qui'iboc ja'ilo'ob, yéetel u páay ooquilo'ob,
21u x dzipit kabo'ob, u tuupil u ni'ob,
22u qui'ichquelem búuco'ob, u suyemo'ob, u bóoch'o'ob yéetel u jadzutz sáabucano'ob,
23u néeno'ob, u castláan nooko'ob, u pix jo'olo'ob, yéetel u jadzutz bóoch'o'ob.
24Tu'ile' bíin u jeelint qui'iboquil;
jun p'éel suum bíin u jeelint jun p'éel kaxnak;
kolisile' bíin u jeelint pool jadzutz tzíicta'anil;
to'och nook bíin u jeelint castláan nooko'ob;
u dzalabil chac jole'em fieroe' bíin u jeelint qui'ichpamil.
25U j xiibilo'ob a caajale', bíin lúubuco'ob ich ba'atel,
u aj ba'atelilo'ob a caajale', bíin quíimico'ob ich ba'atel.
26Caaje' bíin yokolnac, bíin xan u dzáa u okom nook quimeno'ob,
bíin jach xúunp'atta'ac.
Currently Selected:
Isaías 3: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992
