Génesis 22
22
Kue' cu dzáic túuntajil u yocsaj óolal Abraham
1Cu dzo'ocol u máan wa jay p'éel kiino'obe' tu túuntaj u yocsaj óolal Abraham. Tu t'aanaj tu kaaba'e', leti'e' tu núucaj:
Je'elena'.
2Ca j a'ala'ab ti' tumen Ku:
Ch'a'a' Isaac le a jun cóot paal máax a sen yabilmajo', xeen tu lu'umil Moriah. Le quéen kuchuquech te'elo', kub Isaac láaj tóocbil,#22.2 Láaj tóocbil, le t'aana' ti' u taal ti' u láak t'aan cu ya'ala'al holocausto. U kaaba'a' jun p'éel ti'ibil óolal, iquil u ku'ubul jun túul aalak ti' Ku, cu dzo'ocol u quíimsa'ale' cu láaj tóoca'al yóokol u multuunil kultaj. yóokol le jo'ol lu'um quin in we'es techo'.
3Tu jach ja'atzcabil u láak kiine', Abrahame' j líike' ca tu dzaj u jaalma#22.3 Jalma, jun p'éel u nu'ucul u cuuch tzíimin, cu ka'axal yóokol u táas paach, cu meyaj xan u ti'al j na'at'al. u burro, tu ch'acaj si' u ti'al le tóocbil ti'ibil óolalo' ca j bin te j c úuchil tu'ux a'ala'ab ti' tumen Kuo', pa'ate' yéetel Isaac u paal yéetel xan ca'a túul u palitzilo'ob. 4Tu yóox p'éel kiine' Abrahame' quex náach yanil ti' le cúuchilo' páatchaj u yilic. 5Ca túun tu ya'alaj ti' u palitzilo'ob:
P'áatene'ex yéetel le burro waye', le j xi'ipal tin wéetele' binel ca'ajo'on j kult Ku te táanilo' cu dzo'ocole' c suut.
6Abrahame' tu ch'a'aj le si' u ti'al le tóocbil ti'ibil óolalo' ca tu dzaj tu queléembal Isaac; cu dzo'ocole' tu ch'a'aj le xotob yéetel le káako' ca j bino'ob tu ca'a túulalo'ob. 7Cu dzo'ocol jun súutuque' Isaaque' tu ya'alaj ti' Abraham: ¡Taat!
Abrahame' tu núucaj ti': ¿Ba'ax a káati in paal?
Ca j t'aanaj Isaac: Wa ca wile'; yaan to'on si' bey xan káak, ba'ale' ¿tu'ux yaan le j taman u ti'al le tóocbil ti'ibil óolalo'?
8U taatae' tu núucaj: In chichan paal Ku bíin u beet u yantal jun túul j taman u ti'al le quíimsbil ti'ibil óolalo'.
Ca j líik tu ca'a téen u núup xíimbalo'ob. 9Le ca j kucho'ob te cúuchil tu'ux a'ala'ab ti' tumen Kue'; Abrahame' tu beetaj jun p'éel u multuunil kultaj, ca tu tzolaj le si'o', cu dzo'ocole' tu kaxaj Isaac u paal ca tu dzaj te j multuunil kultajo' yóokol le si'o'; 10ba'ale' ca'aliquil táan u ch'a'ic le xotob u ti'al u quíimsic u paale', 11u ángel Yuumtzile' tu t'anaj te j ca'ano': Abraham, Ambraham.
Leti'e' tu núucaj: Je'elena'.
12U ángel Yuumtzile' tu ya'alaj ti': Ma' a beetic mix jun p'éel loob ti' le j xi'ipalo', tumen dzo'oc in wilic yaan teech u tziiquil Ku, ma' ta dzu'utquintaj a dzic teen a jun túul paali'.
13Abrahame' tu jach pactaj, ca tu yilaj jun túul j taman t'iilil u baac ichil u kabo'ob jun cúul caabal che'; ca túun j bin u ch'a'a le j tamano' ca tu kubaj láaj tóocbil tu cúuchil u paal. 14Cu dzo'ocole' Abrahame' tu dzaj u kaaba'int le cúuchilo': Yuumtzil dzáic le ba'ax kabéeto'. Let o'olale' tac bejela'e' cu ya'ala'al: Jo'ol lu'ume', Yuumtzil dzáic ba'ax kabéet.
15Te j ca'ano' u ángel Yuumtzile', tu ca'a t'aanaj Abraham, 16ca tu ya'alaj ti':
Yuumtzile' dzo'oc u ya'alic: Bey tumen dzo'oc a beetic lela' mix ta dzu'utquintaj teen a jun cóot paale', quin jalach t'antic tin kaaba'e' 17bíin in sen qui' t'aan teech. Bíin in beet u táaj ya'abtal a ch'i'ibal bey je'el bix sen ya'abil u eekilo'ob le ca'ano', je'el bix xan ya'abil u sa'am lu'umil u jáal ka'anabe'. U láak ba'ale' leti'obe' mantadz bin u dzáanche'etico'ob u aj p'eeco'ob, 18tuláacal xan u múuch' caajilo'ob yóokolcaabe' bíin qui' t'anta'aco'ob tu yo'olalo'ob, tu yo'olal ta wu'uyaj t'antajen.
19Abrahame' suunaj te j cúuchil tu'ux p'áato'ob u palitzilo'obe'. Cu dzo'ocole' tuláacalo'ob jun múuch'il j binico'ob Beersebaa, tu'ux j p'áat cajtal Abraham.
U paalal Nacor
20Cu dzo'ocol dze'edze'ec kiino'obe', Abrahame' tu yojéeltaj dzo'oc xan u dzáic paalal Milca ti' Nacor u yíidzin. 21Máax síij táanile' Uz, cu dzo'ocole' síij Buz u yíidzin, cu dzo'ocole' Kemuel u taata Aram. 22Cu dzo'ocole' j síijo'ob Quesed, Hazo, Pildas, Jidlaf yéetel Betuel. 23Le Betuela' u taata Rebeca. Lelo'oba' u ocho paalal Milca yéetel Nacor, u yíidzin Abraham.
24Yanchaj u láak u paalal Nacor yéetel Reuma u x keech, lelo'oba': Teba, Gaham, Tahas yéetel Maaca'.
Currently Selected:
Génesis 22: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992
