Matío 23
23
Pɛ epá epuɔ Falísia mbɔɔ wɔ kɛ́ʼte‑mbé Ndém
(Mlk 12.38-40; Lúk 11.39-52; 20.45-47)
1Yɛɛ́so á ghʉ eshúŋne á mbū atʉtʉ epuɔ, mbɔɔ á mbū nnɔ yí, ńdé ŋ́gɛ: 2«Wɔ kɛ́ʼte‑mbé Ndém mbɔɔ epuɔ Falísia é pɔŋteé á lekɛ̄ʼte lepé Mɔɔ́sɛ eshúŋ epuɔ. 3Púp, ajūɔ tsem zīi pɔ́ é si eshúŋɔ á wɛ́, pɛ ekúʼte, nzīŋ épúp. Ndɛ́ʼ pɛ eké mbɛ́ atswhī zɔ́p melaʼ mīi, pɔ́ é si eshúŋɔ, ḿbiŋ nnɔ̄ŋ te ŋghʉ̄ɛ épúp ɔ́. 4Pɔ́ é si ŋkwɛ́tɛ apiʼ zīi á zɛɛ̄t tɛʼ, ńtshíɛ á mekwɛ̄ epuɔ, ḿbiŋ nnɔ̄ŋ ndʉ̄ʼɛ á wɔ́p á lezāpa tsɔ thu‑apū éwú. 5Ajūɔ tsem zīi pɔ́ é si ŋghʉ̄ɛ, pɔ́ lɔkɔ efāʼa ŋghʉ̄ áa lɛ mɛ́ ejʉ́ɔ á wɔ́p. Á epúp tɛ́ pɔ́ ghʉʉ̄ azɔ́p atūʼ ashuŋne Ndém#23.5 Atūʼ ashuŋne Ndém á si ŋgɔ́ amɔ̄ʼ atūʼ zīi, epuɔ Yúda é lɛɛ́ ntíi emɔ̄ʼ metsém ashuŋne Ndém, ńnéŋɛ éwú, ŋ́kwɛ́tɛ á mvhɔ eshhʉ̄ ká á apū pɔ́p., á tswhi efáŋ. Á zéŋ ŋgɔ́ épúp tɛ́, pɔ́ ghʉʉ̄ melē nzhó mɔ́p, é tswhi esāk. 6Pɔ́ kɔɔ̄ŋ á wɔ́p á lekō ánɛ ajʉʼ lekāk, ŋ́kāŋ ajʉʼ mekuʼ tɛ́ nnáŋ éwú. Ŋ́kó á ŋgyā eswiŋte, ŋ́kāŋ ajʉʼ zɔ́p á mvhɔ. 7Ŋ́kɔ̄ŋ ŋ́gɛ, mɛ́ elɔ̄k mekuʼ, ńtsāʼte á wɔ́p á nnɔ alāʼ. Ŋ́kɔ̄ŋ ŋ́gɛ, epuɔ menɔŋ e etɔ́ŋ á wɔ́p lɛ “Nziʼnɛ”.
8Ŋ́ké ŋgɔ́ mé pɛ, ndɛ́ʼ pɛ eghʉ̄ʉ ŋ́gɛ, mɛ́ etɔ́ŋ á wɛ́ lɛ “Nziʼnɛ”, pɛ metsem é si ŋgɔ́ epɔ̄ memía, ḿbiŋ ŋgwɛ̄ áa taʼ Nziʼnɛ ndaʼ. 9Ndɛ́ʼ pɛ egɔ́ aleʼé, ńtɔ́ŋ á ŋiŋ á esī atsetsáʼ ega lɛ Mɔʼɔ́ wɛ, melaʼ mīi pɛ wɛɛ̄ áa taʼ Mɔʼɔ́ ndaʼ, á Mɔʼɔ́ yīi a á athʉ́ lephū. 10Ndɛ́ʼ pɛ eghʉ̄ʉ ŋ́gɛ, mɛ́ etɔ́ŋ á wɛ́ lɛ ntshi‑mvhɔ, melaʼ mīi pɛ wɛɛ̄ áa ndaʼ taʼ ntshi‑mvhɔ, á gɔ́ Klísto. 11Ŋiŋ yīi a á nnɔ pɛ ŋgɔ́ á mía ŋiŋ, a eghʉ̄ páʼ ŋgaŋ afaʼ wɛ lā. 12Ŋiŋ a nɔŋ ŋkɔ́ʼnɛ nnɛ̄t, mbɔ Ndém a a shʉʼ esóʼne á yí. Ŋiŋ yīi a á piŋ esóʼne nnɛ̄t zi mé esī, Ndém a a shʉʼ ekɔ́ʼne á yí. »
Yɛɛ́so a á ega nthúɔ́ alɔ́ʼ wɔ kɛ́ʼte‑mbé Ndém mbɔɔ epuɔ Falísia
(Mlk 12.40)
13Yɛɛ́so á zéŋ ndé ŋ́gɛ: «Pɛ wɔ kɛ́ʼte‑mbé Ndém, mbɔɔ epuɔ Falísia, ŋ́gɔ́ megaŋ ŋkɔŋ menēk, pɛ é wɔ eshhʉ̄ mbekɛ́. Pɛ é si ntsɛ́tɛ nzhɛ, á lelɔk ŋkó á ntē Lefɔ Ndém, á mbū epuɔ, pɛ méŋwɛ̄t é piŋɛ te ŋkúɔ́ éwú, ḿbiŋɛ te ncʉ́ʼɛ epuɔ pīi, pɔ́ é si ŋkɔ̄ŋɔ, é kúɔ́ éwú ú.
[ 14«Pɛ wɔ kɛ́ʼte‑mbé Ndém, mbɔɔ epuɔ Falísia, ŋ́gɔ́ megaŋ ŋkɔŋ menēk, pɛ é wɔ eshhʉ̄ mbekɛ́. Pɛ é si ŋkúu etsō mepfók. Pɛ pwɔ̄ mé zéŋ nnɔ̄ŋ ŋghʉ̄ɛ mesisia meswiŋte, ŋ́gɛ mɛ́ ejʉ́ɔ ŋ́gɛ, pɛ é epuɔ membɔŋ. Ndém a a láʼ etswá á wɛ́ á mía ŋgʉɔ athʉ́ lepé.]
15«Pɛ wɔ kɛ́ʼte‑mbé Ndém, mbɔɔ epuɔ Falísia, ŋ́gɔ́ megaŋ ŋkɔŋ menēk, pɛ é wɔ eshhʉ̄ mbekɛ́. Pɛ é si nzīŋɛ á mejʉʼ mejʉʼ, éfāʼa á wɛ́ á leghʉ tɛ tsɔ taʼ te zhɛ́‑Ndém yīi, a á kʉɔ́ʼ eka Ndém, á tsé á nzem pɛ. Afʉʼ zīi a á gɔ́ tɛ ncʉ́ʼ á ŋiŋ nnɔ wɛ, pɛ eghʉ̄ʉ á cʉ́ʼ á ŋiŋ yīi, a a láʼ egʉɔ mé alāʼ mmók, tɛ epiŋ etɔ́k á wɛ́.
16«Pɛ é wɔ eshhʉ̄ mbekɛ́, pɛ pīi é wɔ efʉʉ́‑menēk, ḿbiŋ ŋgɔ́ si ntsāŋa emɔ̄ʼ epuɔ ánɛ nzhɛ mefa, pɛ é si ndʉ́ɛ́ ŋ́gɛ: “Ŋiŋ a lɔkɔ ajʉʼ Mía Ŋgyā Ndém ŋkā anu, mbɔ mmɔʼ ntsaŋ e te éwú ú. Ŋ́ké mbiŋ ndɔ̄k á gɔ́ɔl yīi, a á éwú ŋkā, mbɔ a pɔŋteé á leghʉ anu mɛ́t.” 17Pɛ gɔ́ áa metsetseŋ, ŋ́gɔ́ wɔ efʉʉ́‑menēk. Á shʉʉ̄ʼ ánɛ gɔ́ɔl pɔ́ Mía Ŋgyā Ndém péʼe, akɔ̄ á tshí mvhɔ ɔ̄? Mía Ŋgyā mé kaá ŋghʉ̄ gɔ́ɔl á cʉ́ʼ eyi Ndém ɛ́ lɛ̄? 18Pɛ é si nzéŋɛ ndʉ́ɛ́ ŋ́gɛ: “Ŋiŋ a lɔkɔ ajʉʼ nnɔɔ́ŋ‑epɔʼ ŋkā anu, mbɔ mmɔʼ ntsaŋ e te éwú ú. Ŋ́ké mbiŋ ndɔ̄k etsō epɔʼ tsīi, mɛ́ nnɔ̄ŋ éwú ŋkā, mbɔ a pɔŋteé á leghʉ anu mɛ́t.” 19Pɛ, wɔ efʉʉ́‑menēk, á shʉʉ̄ʼ ánɛ etsō epɔʼ, pɔ́ ajʉʼ nnɔɔ́ŋ‑epɔʼ, akɔ̄ á tshí mvhɔ ɔ̄? Ajʉʼ nnɔɔ̄ŋ‑epɔʼ mé kaá ŋghʉ̄ etsō epɔʼ, é cʉ́ʼ etsi Ndém ɛ́ lɛ̄? 20Púp, ŋiŋ yīi a á lɔk ajʉʼ nnɔɔ́ŋ‑epɔʼ ŋkā anu, a á páʼā, ḿbú ndɔ̄kɔ aziɛ́ ajʉʼ, mbɔɔ ajūɔ tsem zīi á nɔɔ̄ŋ éwú, tɛ́ ŋkāa. 21Ŋiŋ yīi a á lɔk ajʉʼ Mía Ŋgyā Ndém ŋkā anu, a á páʼā mbú ndɔ̄kɔ Mía Ŋgyā Ndém, mbɔɔ Ndém yīi a naáŋ éwú, tɛ́ ŋkāa. 22Ŋiŋ yīi a á lɔk lephū ŋkā anu, a á páʼā ndɔ̄kɔ akɔʼ lefɔ Ndém, mbɔɔ Ndém yīi a naáŋ éwú, tɛ́ ŋkāa.
23«Pɛ, wɔ kɛ́ʼte‑mbé Ndém, mbɔɔ epuɔ Falísia, ŋ́gɔ́ megaŋ ŋkɔŋ menēk, pɛ é wɔ eshhʉ̄ mbekɛ́. Pɛ é si ŋgāptɛ á tsitsi nnāʼ wɛ nzhɛ legēm, ŋ́gyáa á taʼ nzhɛ á mbū Ndém. Ḿbiŋ nnɔ̄ŋ te nnéŋɛ athū, ánɛ mɛgém anu yīi, a á ánɛ lepé ɛ́. Menu mɛ́t é gɔ́, á legɔ̄ ndeŋ ndeŋ, ŋ́gɔ́ á lewɛ atsāmezeŋɛ, ŋ́gɔ́ á lejūʼ nchu Ndém. É páʼa ŋgɔ́ menu mīi, mɛ́ pɔŋteé á leghʉ, té piŋ ndēkne emi emɔ̄ʼ. 24Pɛ é wɔ efʉʉ́‑menēk, ḿbiŋ ŋgɔ́ si ntsāŋa emɔ̄ʼ epuɔ ánɛ nzhɛ mefa. Pɛ é si eswīkɛ ajūɔ tsem zīi pɛ núu, ńdɔkɔ mbɔ́kɔ á wɛ́ á lemi zézóʼ, ḿbiŋ ŋgɔ́ si mmī á mía mía azō, páʼ shamo lā.
25Pɛ, wɔ kɛ́ʼte‑mbé Ndém, mbɔɔ epuɔ Falísia, ŋ́gɔ́ megaŋ ŋkɔŋ menēk, pɛ é wɔ eshhʉ̄ mbekɛ́. Pɛ zhɛɛ́ á lecuŋte esōk mekwáŋ kwáŋ pɛ́, pɔ́ ndɔ̄ŋ meluʼ zɛ, páʼ lepé é si nzɛ́ttɛ, tɛ́ tsitsi etsɔ́ŋ mbɔɔ tsitsi yīi, pɛ é mbɔ̄p epuɔ ntswí, á gɔ́ á ntē éwú tɛ ndó. 26Pɛ epuɔ Falísia ŋ́gɔ́ wɔ efʉʉ́‑menēk, pɛ ezī mvhɔ esōk ntē ndɔ̄ŋ meluʼ zɛ, púp, nzem apɛ́ e ezéŋ ŋgɔ́ azí ndane lané.
27Pɛ, wɔ kɛ́ʼte‑mbé Ndém, mbɔɔ epuɔ Falísia, ŋ́gɔ́ megaŋ ŋkɔŋ menēk, pɛ é wɔ eshhʉ̄ mbekɛ́. Pɛ é si ŋgɔ́ páʼ mesi mīi, mɛ́ lē ncuŋte mbɔ́, ńtswɛ́t tɛ é nɔŋ efóko lā. É nzem apɛ́, ńchʉ́ nnɛ̄t mbɔ̄ŋ tɛʼ, ḿbiŋ ŋgɔ́ á ntē éwú, mekwɛ́ epuɔ é gɔ́ éwú tɛ ndó, mbɔɔ ntií ntiī ecū mīi é lē ndʉ́. 28Á mbū pɛ, ńzéŋ ŋgɔ́ ndeŋ ndeŋ épúp. Mɛ́ cʉteē á wɛ́ á nzem apɛ́, ńjʉ́ɔ pɛ gɔ́ epuɔ, ńjúʼ nchu Ndém, ḿbiŋ ŋgɔ́ á ntē éwú, pɛ gɔ́ wɔ fʉʼte‑mele anu, mepɔp é gɔ́ á ntē pɛ tɛ ndó.
29«Pɛ, wɔ kɛ́ʼte‑mbé Ndém, mbɔɔ epuɔ Falísia, ŋ́gɔ́ megaŋ ŋkɔŋ menēk, pɛ é wɔ eshhʉ̄ mbekɛ́. Pɛ é si mbɔ́ɔ mesi metswi‑ŋke Ndém pīi, pɔ́ lē ŋkwʉ́te, ńnɔŋ ntswīŋɛ emi epuɔ pīi, é lɛ wɔ júʼ‑nchu Ndém. 30Pɛ é si mbīŋɛ ndʉ́ɛ́ ŋ́gɛ: “Pɛ le wíʼe ŋgɔ́ á ŋgɔŋ, á efʉʼ wɔ maŋgānjʉʼ pɛ́, mbɔ pɛ a pɔ́p é lɛ te kwɛ́t nzwhíte metswi‑ŋke Ndém ɛ́.” 31Ḿbiŋ nnɔ̄ŋ ndɔ̄kɔ atswhī zɛ́, ńtswīi á légɛ, pɛ é si ŋgɔ́ ndhu epuɔ pīi, pɔ́ le zwhité metswi‑ŋke Ndém. 32Púp, pɛ elɔ̄k afaʼ zīi, wɔ maŋgānjʉʼ pɛ́ é le zīī, ŋ́gʉ̄ɔ mé mvhɔ. 33Pɛ é páʼ menū lā, ŋ́gɔ́ nzwɛt menū, pɛ gɔ gaá, ńdáʼ nnéŋ té lákne á ntē mmók é? 34Melaʼ épúp, pɛ eké njúʼ, meŋ a shʉʼ etó metswi‑ŋke á mbū pɛ, étó megaŋ azhɛ̄‑anu á mbū pɛ, mbɔɔ kwaʼ wɔ kɛ́ʼte‑mbé Ndém. Pɛ ezwhíte emɔ̄ʼ, ŋ́kwɛ̄te emɔ̄ʼ ánɛ mbaŋne paŋné, ńdɔ̄k ntɛ̄ ntswá emɔ̄ʼ á meŋgyā aswiŋte pɛ, ḿmāʼ ŋgʉɔ̄ʼ á athū emɔ̄ʼ, á ntē metésɔŋ. 35Púp, metshi wɔ júʼ‑nchu Ndém metsem mīi, é le pfɛttē á esī atsetsáʼ, e egʉ̄ɔ á athū pɛ, tɛ efhó ánɛ emi Abɛl njuʼ‑nchu Ndém, ŋ́gʉɔ ŋkó ánɛ emi Sakalía méŋ Balaki, páʼ pɛ le zwhí á yí á tsetsɛlɛ ajʉʼ nnɔɔ́ŋ‑epɔʼ pɔ́ nchu Mía Ŋgyā Ndém. 36Meŋ eké eshúŋɔ á wɛ́ á kwaʼ anuúnē ŋ́gɛ, apiŋ menu muɔ mɛ́t ntsem, á gʉɔ á athū epuɔ ŋguʼ puɔ.
Yɛɛ́so a á ega ndāa ánɛ athū epuɔ Yelósalɛm
(Lúk 13.34-35)
37Yɛɛ́so á ghʉ ndé ŋ́gɛ: «Yaāa me pɛ epuɔ Yelósalɛm, yaāa me pɛ pīi pɛ zwhítɛ metswi‑ŋke Ndém, ńdɔ̄kɔ metɔ́ ntémtɛ epuɔ metsem pīi, Ndém a á tó á mbū pɛ, ńzwhítɛ. Meŋ á faʼ lɛ akɔ̄ lɛ́, á lecūʼte á wɛ́ á lezēŋ meŋ, páʼ mía ŋgāp yīi a júptɛ epɔ̄ pí á ntē mbap yí lā, pɛ pīiŋ te véŋ? 38Pɛ eké nzhɛ́ á légɛ, Ndém a a shʉʼ ewáʼ á Mía ŋgyā wɛ mɛ́t, tɛ a etshí efemm. 39Aziɛ́ tɛ́ meŋ shúŋɔ á wɛ́ ŋ́gɛ, tɛ efhó tsetsɔŋɔ, pɛ cʉʉ́ʼ á gá jʉ́ɔ ɔ́, tɛ eláʼ etshí afʉʼ zīi, pɛ é yá lepɛ ndé ŋ́gɛ: “Mbwɛ́né e egɔ́ á mbū ŋiŋ yīi, a shʉʼɛ, mbɔ Ndém mé chʉ́ á yí, ńtó á mbū pek.”»
Currently Selected:
Matío 23: ybb
Highlight
Share
Copy
Want to have your highlights saved across all your devices? Sign up or sign in
© CABTAL
