Lúkási 20
20
Mekém é ega mbūŋnɛ á ŋiŋ yīi, a tswii tɛ́ Yɛɛ́so á zíʼnɛ epuɔ
(Mat 21.23-27; Mlk 11.27-33)
1Á lɛ ánɛ meleʼé mɛ́t, Yɛɛ́so á gɔ́ á Mía Ŋgyā Ndém nzíʼnɛ epuɔ, ńnɔŋ ntswīi ŋke mbɔŋ Ndém. Wɔ nɔŋ‑epɔʼ epi melʉɛ, ŋ́ghʉ̄ wɔ kɛ́ʼte‑mbé Ndém, mbɔɔ mekém alāʼ, é tɔ́kne á yí. 2Ńzɛ́tte á yí ŋ́gɛ: «O ghʉɛ ejʉɔ ntií menu páʼa, awɔ́ á tswi ī? Awɔ́ á yáa á wú mete, tɛ́ o lɔ̄kɔ ŋghʉ̄ɛ ɛ́? Shúŋ á wék. » 3Yɛɛ́so á pwɛt ŋ́gɛ: «Meŋ a zéŋ ezɛ́tte á wɛ́ azá á taʼ anu. Pɛ elɛ eshúŋ á gá: 4Jáaŋ a le gē enoʼ epuɔ á ntshi péʼe, mbɔ Ndém mé tswi, kɛ epuɔ menɔŋ ŋ̄?» 5Pɔ́ sap á tsetsɛlɛ pɔ́p ŋ́gɛ: «Ḿpɛ pwɛtɛ ŋ́gɛ: “Ndém mé le tswīī”, mbɔ a a túŋte á yímpɛ gɛ: “Tɛ pɛ pīiŋ te ŋke Jáaŋ véŋ melaʼ akɔ̄?” 6Ḿbīŋ mbwɛ̄t ŋ́gɛ: “Epuɔ menɔŋ mé le tswīī”, mbɔ alāʼ á lɔk metɔ́ etémte á yímpɛ, ézwhí. Melaʼ mīi, alāʼ á le kuʼté azɔ́p á légɛ, Jáaŋ a lɛ á kwaʼ ntswi‑ŋke Ndém. » 7Ńdɛ mbwɛ̄t azɔ́p ŋ́gɛ: «Pek ka zhɛ́ ajʉʼ zīi, mete é le fhó éwú, tɛ́ Jáaŋ á lɔk nnōʼ epuɔ á ntshi ɛ́. » 8Yɛɛ́so á tsɔ́ʼ ŋ́gɛ: «Mbɔɔ meŋ azá, meŋ gɔ le shúŋ á wɛ́ ajʉʼ zīi, mete é fhɔ́ɔ éwú, tɛ́ meŋ ndɔ̄kɔ ŋghʉ̄ɛ emuɔ menu ú. »
Ashuŋne lepúʼ ánɛ megaŋ afaʼ á lezwhī méŋ ŋgaŋ ŋkāʼ
(Mat 21.33-46; Mlk 12.1-12)
9Yɛɛ́so á lé épúp, ḿbɛ́te ashuŋne lepúʼ jʉɔ á mbū alāʼ, ŋ́gɛ: «Mmɔʼ ŋiŋ a lɛ éwú, ŋ́kʉɔ́ʼ ŋkāʼ yí, ḿbhī methʉ́ lɛzɛŋ éwú. Ńtsékne á mbū wɔ kɛ́‑ntá athʉ́ mɛ́t ndɔk ncūŋte meluʼ, ŋ́gɛ ajū mīi á shʉʼ ntó éwú, pɔ́ a pɔ́p e egāp. Ńtsékne épúp, ńdɛ ŋgʉ̄ɔ mé atō, ékó éwú ézi enáŋ. 10Afʉʼ á lekāp ntá athʉ́ mɛ́t, á shʉʼ ŋkūʼ, á tó mmɔʼ ŋkwa zi á mbū wɔ cuŋte‑meluʼ pwɔ̄ ŋ́gɛ, a egʉ̄ɔ ntswí azí akim ánɛ ajū mīi, á ke tó á ŋkāʼ. Pɔ́ kó ntswá á yí, ńjūŋ á yí, á gʉɔ mbū ŋŋiké. 11Á kó nzéŋ ntó mmɔʼ ŋgaŋ afaʼ yi, pɔ́ kó nzéŋ ńtswá á yí, ḿmāʼ esē á athū yí, ńjūŋ á yí, á gʉɔ mbū ŋŋiké. 12Á zéŋ ntó mbáte tɛ́t, pɔ́ kó ŋgɔ̄ á yí, ńtswá á yí tɛ nnéŋ meféŋ ánɛ yí, éfhó á ŋkāʼ efók á yí. 13Ŋgaŋ ŋkāʼ á kó ndé ŋ́gɛ: «Meŋ a ghʉ páʼ lā? Kwaʼ méŋ ga, tɛ́ meŋ a tó á yí, mɔ́ wuɔ mɛ́t, meŋ kɔɔ̄ŋ á yí tɛʼ, ŋ́gɔ́ amɔ̄ʼ, pɔ́ kó ŋghʉ̄ mekuʼ mí. » 14Mɔ́ mɛ́t á gʉɔ, epuɔ pwɔ̄ é kó ŋgē ejʉ́ɔ á yí, ńdé á tsetsɛlɛ pɔ́p ŋ́gɛ: «Ŋiŋ yīi a a fú ejhʉ́ ŋgyā, a wuɔ yīi, a á shʉʼ la. Ḿpɛ ezwhí á yí, ńjhʉ́ ŋkāʼ. » 15Ńdé épúp, éfhó á ŋkāʼ eshūŋne á yí, ńdɔk ntó, ŋ́gʉ̄ɔ nzwhí.
Yɛɛ́so á pɛ́te páʼa, ḿbiŋ nzɛ́tte ŋ́gɛ: «Á páʼa, ŋgaŋ ŋkāʼ a shʉʼ ŋghʉ̄ páʼ lā, á mbū epuɔ puɔ mɛ́t é? 16A a shʉʼ egʉɔ egɔte epuɔ puɔ mɛ́t, ézwhíte á wɔ́p, étswí ŋkāʼ yí, étsékne á mbū epuɔ mendɛʼɛ. »
Alāʼ á júʼ épúp tɛ ndé ŋ́gɛ: «Ndɛ́ʼ ntií anu páʼa, é zi ndáʼ ŋghʉ̄. » 17Yɛɛ́so á tshí menēk ánɛ pɔ́p, ńzɛ́tte á wɔ́p ŋ́gɛ: «Tɛ anu zīi mɛ́ le tí á ntē aŋwaʼne Ndém lā, á páʼā, ńdɔkɔ ŋ́gɛ akɔ̄? Mɛ́ le tí ŋ́gɛ:
Tɔ́ yīi mepɔɔ‑ŋgyā,
é le kʉŋtē ŋgwáʼ,
ewiɛ́ mé le shʉ̄ʼ ncʉ́ʼ
á tɔ́ lezhō ŋgyā.
18Pɛ ezhɛ́ á légɛ, ŋiŋ a ŋémɛ ánɛ tɔ́ wuɔ mɛ́t, mbɔ a a pú epwɔ́ʼte. Tɔ́ wuɔ mɛ́t á pīŋ ŋgwhʉ̄ ánɛ ŋiŋ, á pú ŋkīne á yí. »
Mɛ́ é ega ntátɛ á Yɛɛ́so ánɛ anu lemaʼ ncup alāʼ
(Mat 22.15-22; Mlk 12.13-17)
19Yɛɛ́so á pɛ́te ashuŋne lepúʼ jʉɔ mɛ́t, wɔ kɛ́ʼte‑mbé Ndém pɔ́ a wɔ nɔŋ‑epɔʼ epi melʉɛ, é yiŋ, ńzhɛ́ á légɛ, a lɔkɔ ŋkēknɛ á wɔ́p, ńcʉ́ʼɛ efāʼa eshhʉ̄ á legɔ á yí, efʉʼ mɛ́t efʉʼ mɛ́t, ḿbiŋ mbɔ́k menēk alāʼ, ńtshī á yí nnéŋ. 20Ńdɛ nzī á lepīpne yí, ńtó epuɔ pīi é ge eshʉʼ á mbū yí, égɔ́ páʼ epuɔ membɔŋ lā, élɔk ashuŋne emɔ̄ á yí, ŋ́gɛ a té á eshúŋnɛ, éfāte, mɛ́ egɔ̄ á yí, ŋ́gyá á mbū wɔ sáʼ‑alāʼ.
21Epuɔ mɛ́t é lɛ ŋgʉ̄ɔ, ŋ́kó ndé á mbū Yɛɛ́so ŋ́gɛ: «Ńziʼnɛ, pek zhɛɛ́ á légɛ, akɔ̄ lɛ́ zīi o ó si eshúŋɔ, ńdɔkɔ ntékɛ epuɔ lɛ́, á gɔ́ áa ndeŋ ndeŋ. O te epuɔ tɛ̄ʼte, o ó si ntswīi epuɔ á kwaʼ mɛnzhɛ yīi, Ndém a á si ŋkɔ̄ŋɔ ŋ́gɛ, mɛ́ ezīŋ éwú. 22Lɛ eshúŋ á wék, lepé tsímpɛ é veéŋ ŋ́gɛ, ḿpɛ emāʼ ncup á mbū ŋwɛ́t ŋgɔŋ Lóma, kɛ ŋgáŋ ŋ́?» 23Yɛɛ́so á gɔ leghi tsɔ́p, ńdé á mbū pɔ́p ŋ́gɛ: 24«Pɛ efāʼ apak ŋkāp#20.24 Ŋkāp jʉɔ mɛ́t, e é ezi epuɔ Lóma, mbɔ epuɔ Yúda é lɛɛ́ ndɔkɔ mmāʼa ncup á mbū ŋgɔpna Lóma., ńdɔk eshʉ̄ʼ. » Mɛ́ faʼ ndɔ̄k eshʉ̄ʼ. Á zɛ́tte ŋ́gɛ: «Athū ŋiŋ zīi á éwú la, á azi awɔ́?» Pɔ́ tsɔ́ʼ ŋ́gɛ: «Á azi ŋwɛ́t ŋgɔŋ Lóma. » «Lezēŋ é gɔ́ etsi awɔ́?» Pɔ́ gɛ: «É zéŋ ŋgɔ́ etsí. » 25Yɛɛ́so á lɛ ndé ŋ́gɛ: «Á gɔ́ épúp, ajū mīi á azi ŋwɛ́t ŋgɔŋ Lóma, pɛ eyá á mbū yí. A zīi á azi Ndém, pɛ eyá á mbū Ndém. » 26Pɔ́ tapne, ndɛ mbú ndáŋte. Pɔ́ té kūʼ á letsia ánɛ ashuŋne Yɛɛ́so, ŋ́ghʉ̄ á fate á mvhɔ alāʼ á.
Mɛ́ é ega ntátɛ á Yɛɛ́so ánɛ anu lezīm ánɛ lewhʉ̄
(Mat 22.23-33; Mlk 12.18-27)
27Emɔ̄ʼ epuɔ Sadúsia é shʉʼ azɔ́p, ŋ́gɔ́ nnɔ epuɔ pīi, pɔ́ gɛ ndʉ́ɛ́ ŋ́gɛ, mɛ́ té fú ezím ánɛ lewhʉ̄ ɛ́, ńzɛ́tte á Yɛɛ́so ŋ́gɛ: 28«Ńziʼnɛ, Mɔɔ́sɛ a le tí lepé ŋgyá á mbū pímpɛ ŋ́gɛ, ŋiŋ a wiɛ á nzwí yi, ŋ́kwhʉ́ té wɛ á mɔ́, ntsiʼnzem yi á cʉ́ʼ esōk á mpfók, ńzhí ewɔŋkhʉ̄, ńdɔk mbwɛ̄t ŋgyā ŋgik yi mɛ́t. 29Á épúp tɛ́, epɔ̄ ŋiŋ epi mbaŋa, é lɛ éwú esambīa, ŋgaŋ mvhɔ á lá ŋgyā, éshʉʼ ŋkwhʉ́ té mɔ́. 30Páte á cʉ́ʼ esōk á mpfók, éshʉʼ nzéŋ ŋ́kwhʉ́ té mɔ́. 31Mbáte ntɛ́t pɔ́ mvuʼ, é láʼ ncʉ́ʼ nzéŋ ésōk á ntswi mpfók wɔ̄, tɛ ndáʼ ŋkó ánɛ mbáte esambīa, ŋ́gē ekwhʉ́, ŋiŋ a te á mɔ́ wɛ. 32Á shʉʼ ŋgē emakne, mpfók á pú ŋkwhʉ́ azí. 33Páʼ epuɔ puɔ esambīa, é le pú ŋgɔ́ melō menzwí wuɔ lā, a láʼ aleʼé zīi mɛ́ zímɛ ánɛ lewhʉ̄, menzwí wuɔ mɛ́t, a egɔ́ eyi awɔ́ á nnɔ pɔ́p é?»
34Yɛɛ́so á pwɛt á mbū pɔ́p ŋ́gɛ: «Mbaŋa pɔ́ a wɔnzwí é ndo esī atsetsáʼ ega, ńdáa ŋgyā. 35Táʼ, wɔnzwí pɔ́ a mbaŋa zīi, Ndém a á jʉɔ ŋ́gɛ pɔ́ é kuʼ, pɔ́ e shʉʼ ezím ánɛ lewhʉ̄, ékó ánɛ ŋgɔŋ eswhī, alaá‑ŋgyā á le éwú ú. 36A gɔ́ épúp melaʼ mīi, pɔ́ é si ŋgɔ́ páʼ mecɔʼ Ndém lā, pɔ́ té shʉʼɛ nzɛ́t ŋgɔ̄ á ŋkwhʉ́ ɛ́. Páʼ Ndém a á ghʉ pɔ́ zím ánɛ lewhʉ̄ lā, pɔ́ é si ŋgɔ́ epɔ̄ pí tɛ ntsékne. 37Éshʉ̄ʼ ánɛ lezīm ánɛ lewhʉ̄, mbɔ Mɔɔ́sɛ yí méŋwɛ̄t a le ghité á ntē aŋwaʼne yí, ájʉʼ zīi a á éwú mbɛ́tɛ anu athʉ́ zīi, alē mmók á lɛ éwú lā. Á ánɛ ajʉʼ aŋwaʼne mɛ́t, á tɔ́ŋ á Ndém lɛ, Ndém Ablaham, ŋgɔ́ á Ndém Izak, ńzéŋ ŋgɔ́ á Ndém Yakɔ́p#20.37 Jʉ́ɔ́ Aŋwaʼne Letō. 3.2, 6.. 38A lɛɛ́ ntɔ́ŋɔ épúp, mbɔ epuɔ mɛ́t é lē ŋkwhʉ́te. Táʼ, páʼ Ndém a te si ŋgɔ́ á Ndém mepfhō ɔ́, ŋ́gɔ́ áa Ndém epuɔ mete lā, epuɔ mɛ́t é zɛɛ́t nte, melaʼ mīi epuɔ metsem é mvhɔ Ndém, ŋ́gɔ́ nte. »
39Yɛɛ́so a le pwɛ̄t épúp, emɔ̄ʼ wɔ kɛ́ʼte‑mbé Ndém é lé ŋ́gɛ: «Ńziʼnɛ, o ó tsɔ́ʼ á mbɔŋɔ́ tɛʼ. » 40Á zhɔ páʼa, ŋiŋ a te zéŋ ŋkūʼ á lelɔk amɔ̄ʼ anu, ḿmɔ̄ á yí í.
Yɛɛ́so a á ega nzwíʼɛ wɔ kɛ́ʼte‑mbé Ndém, ńtswī ŋ́gɛ Nzaʼ‑Ŋkhʉ a tɔɔ́k á Ndavít
(Mat 22.41-46; Mlk 12.35-37)
41Yɛɛ́so á náŋ tɛ nzɛ́tte á wɔ́p ŋ́gɛ: «Pɛ kʉʼneé ndé ŋ́gɛ, Nzaʼ‑Ŋkhʉ á ntɔ̄ŋ apuʼ, a á méŋ Efɔ Ndavít péʼe, á ziŋ lɛ akɔ̄? 42Pɛ é si nzhɛ́ɛ azɛ́ páʼ Efɔ Ndavít yí méŋwɛ̄t, a le lé á ntē aŋwaʼne azɔp ntshi ŋ́gɛ:
Atsyapuɔ Ndém a á lé á mbū mɔʼɔ́ ga ŋ́gɛ,
Shʉʼɛ nnáŋ ánɛ
ŋkɔʼɔ́ apū ete gá.
43Púp, meŋ eghʉ̄, megaŋ mbo pú,
e eshʉʼ nnɔ̄ŋte á mvhɔ wu,
o etshíte mekhu mú ánɛ pɔ́p.
44 Ndavít a á ega ntɔ́ŋɔ á Nzaʼ‑Ŋkhʉ lɛ, mɔʼɔ́ yi, púp, Nzaʼ‑Ŋkhʉ mɛ́t a gɔ egaá, ńzéŋ ŋgɔ́ á méŋ yi ī?»
Pɛ epá wɔ kɛ́ʼte‑mbé Ndém
(Mat 23.1-36; Mlk 12.38-40)
45Epuɔ é le nɔ̄ŋ nzwíʼtɛ ashuŋne Yɛɛ́so, á pekne nnɛ̄t ndé á mbū nnɔ yí ŋ́gɛ: 46«Pɛ epá á lefʉʼne wɔ kɛ́ʼte‑mbé Ndém, pɔ́ kɔɔ̄ŋ á wɔ́p á lemaʼ mesisia menzhó, ńdɔk ŋkʉ́ʼne á nnɔ alāʼ, ŋ́gɛ mɛ́ elɔ̄k mekuʼ, ńtsāʼte á wɔ́p. Ŋ́kɔ̄ŋ á wɔ́p á lekō á ntē ŋgyā aswiŋte, ŋ́kāŋ ajʉʼ zɔ́p á mvhɔ. Ŋ́gʉ̄ɔ lekāk, ŋ́kāŋ ajʉʼ mekuʼ. 47Pɔ́p puɔ mé si nzéŋɛ ŋkʉ́ʼnɛ mbɔ̄pɔ mepfók wɔnzwí, ŋ́kúu etsō tsɔ́p, ḿbiŋɛ ŋghʉ̄ɛ mesisia meswiŋte, ńdɔkɔ mbɔ̄pɔ menēk epuɔ. Ndém a a ké eláʼ etswá á wɔ́p á mía ŋgʉɔ athʉ́ lepé.
Currently Selected:
Lúkási 20: ybb
Highlight
Share
Copy
Want to have your highlights saved across all your devices? Sign up or sign in
© CABTAL
