Jáaŋ 5
5
Yɛɛ́so a á ega á Yelósalɛm, ŋghʉ̄ɛ, ŋkeluʼ é tʉɛ
1Á tɔ́k épúp, epuɔ Yúda é nɔŋ ŋghʉ̄ɛ emɔ̄ʼ lekāk tsɔ́p á Yelósalɛm, Yɛɛ́so á pe ŋgʉ̄ɔ mé éwú. 2Á lɛ á tésɔŋ Yelósalɛm mɛ́t, amɔ̄ʼ atʉɔ̄ʼ ntshi á gɔ́ éwú, á lezēŋ nchu tésɔŋ yīi mɛ́ tɔ́ŋɔ lɛ̄ɛ, Nchu Ŋgyā memvhō, mɛ́ tɔ́ŋ atʉɔ̄ʼ ntshi mɛ́t mé ashuŋne epuɔ Eble lɛ Bɛtzata. Mɛ́ le pɔ́ atʉɔ̄ʼ ntshi mɛ́t, tɛ ŋghʉ̄ epuúŋ á ajʉʼ éwú é tsɛ́táa. 3Megaŋ agɔ tɛ nzáne é lɛɛ́ eshʉʼɛ nnɔ̄ŋtɛ á ntē epuúŋ cʉɔ mɛ́t. Éwɔ apií‑menēk, éwɔ ŋiíʼ‑akhu, méŋkeluʼ. [Ńnɔŋ nzwíʼtɛ ŋ́gɛ, ntshi e ecʉ̄ʼne, 4melaʼ mīi, cɔʼ Atsyapuɔ a lɛɛ́ nnáŋa tɛ esóʼo eshʉ̄ʼɛ ŋkúɔ́ á ntē atʉɔ̄ʼ ntshi mɛ́t, ńcʉ̄ʼnɛ ntshi. Mvhɔ ŋgaŋ agɔ yīi, a á sóʼo ŋkó á ntshi, á afʉʼ zīi é si ncʉ̄ʼnɛ, a lɛ ntē, tɛ á láʼa ŋgɔ́ eziɛ́ ntií agɔ lɛ́.] 5Mmɔʼ ŋiŋ a lɛ éwú ŋgɔ́ ŋkeluʼ, tɛ mbɔ a á náŋ á ntē agɔ, ŋguʼ ntsɔp lefaá megēm tɛ́t. 6Yɛɛ́so á jʉ́ɔ á yí, á nɔŋ á esī, mɛ́ shúŋ á yí ŋ́gɛ, ŋiŋ mɛ́t a á ndáʼ nnáŋ á ntē agɔ, tɛ ntshí é zi esāk. Yɛɛ́so á lé á mbū yí ŋ́gɛ: «O ó si ŋkɔ̄ŋɔ á wú á lete e?» 7Ŋkeluʼ á pwɛt á mbū yí ŋ́gɛ: «Ndi, meŋ te wɛ̄ á ŋiŋ yīi, a gɔ esóʼne á gá nnéŋ á ntē atʉɔ̄ʼ ntshi á afʉʼ zīi, ntshi é si ncʉ̄ʼnɛɛ. Meŋ zɛɛ́t á nzhɛ ŋ́gɛ, meŋ gʉɔ mé esóʼo, mbɔ ŋiŋ ndɛʼɛ a á ndáʼ mbīk éwú. » 8Yɛɛ́so á lé á mbū yí ŋ́gɛ: «Lu á esī, ńtswíʼ á akō jú, ńzīŋ. » 9Ŋiŋ wɔ̄ á lɛ ntē. Ńtswíʼ akō zí, ńzī á leziŋ.
Ajʉɔ anu á le gē etɔ́k páʼa, á gɔ́ aleʼé aswite. 10Mekém epuɔ Yúda é jʉ́ɔ épúp, ńdé á mbū ŋiŋ yīi, a á te lā ŋ́gɛ: «Ayáʼa á si ŋgɔ́ aleʼé aswite, o pīiŋ te pɔŋté á wú á lepiʼ akō jú ú. » 11Á tsɔ́ʼ á mbū pɔ́p ŋ́gɛ: «Ŋiŋ yīi a á ghʉ meŋ ntēe, yí mé lé mé meŋ ŋ́gɛ: “Tswíʼ akō jú, ńzīŋ.”» 12Pɔ́ zɛ́tte á yí ŋ́gɛ: «Ŋiŋ yīi a á lé mé wu ŋ́gɛ: “Tswíʼ akō jú, ńzīŋ, a á awɔ́?”» 13Ŋiŋ wuɔ mɛ́t yīi, a á te lā, á nɔŋ te nzhɛ́ɛ á ŋiŋ yīi, a á ghʉ á te ɛ́. Á le gē egɔ́ mbɔ, Yɛɛ́so a á fhó á ajʉʼ zīi, nnɔ alāʼ é ŋgɔ́ éwú, ŋ́gʉ̄ɔ.
14Yɛɛ́so á kó ŋgīŋ á yí á Mía Ŋgyā Ndém, ńdé á mbū yí ŋ́gɛ: «A wɔ̄ éyi, o ké ŋgɔ́ ntenté lā. Ndɛ́ʼ o ezéŋ ŋghʉ̄ mefa, ḿbɔ́k ŋgʉɔ̄ʼ á lezēŋ ŋkó á athū wu, ńzɛt ntɔ́k ezi o ke zī ŋgɔ́ éwú. » 15Ŋiŋ wɔ̄ á gʉɔ eshúŋ á mbū mekém epuɔ Yúda ŋ́gɛ, Yɛɛ́so mé ŋghʉ̄, yí te. 16Pɔ́ lɛ efhó épúp, ńzī á lepa á Yɛɛ́so, melaʼ mīi, a le ghʉ̄ ajʉɔ anu, á aleʼé aswite. 17Táʼ, Yɛɛ́so á tsɔ́ʼ á mbū pɔ́p ŋ́gɛ: «Mɔʼɔ́ ga, a ghʉʉ̄ mefaʼ té tswhi á afʉʼ, meŋ méŋwɛ̄t azá, meŋ zéŋ ŋghʉ̄ áa épúp. » 18Á fhó épúp, mekém epuɔ Yúda, é tswiʼne efāʼ eshhʉ̄ á lepū nzwhí á Yɛɛ́so zwhií. Éfhó ánɛ páʼ, a á lʉʼ á lezhɛ aleʼé aswite, á te ghʉ̄ épúp ndaʼá, ńzéŋ mbú ńtɔ́ŋ á Ndém lɛ, kwaʼ Mɔʼɔ́ yi, ńdɔkɔ ŋ́gɛ, pɔ́ Ndém é pú ŋgɔ́ á taʼ azō.
Yɛɛ́so Klísto a wɛɛ̄ mete Mɔʼɔ́ yi Ndém
19Yɛɛ́so á zéŋ ndé á mbū pɔ́p ŋ́gɛ: «Kwaʼ anuúnē anuúnē, meŋ shúŋɔ á wɛ́ ŋ́gɛ, Mɔ́ a gɔ le lɔ̄k á athū zí méŋwɛ̄t, ŋ́kūʼ á leghʉ azō ɔ́, a ghʉʉ̄ áa ajū mīi, a á si njʉ́ɔ Mɔʼɔ́ yi á ghʉɛ. Ajū mīi, Mɔʼɔ́ yi a á si ŋghʉ̄ɛ, Mɔ́ a zeéŋ ŋghʉ azí ndeŋ ndeŋ épúp. 20Mɔʼɔ́ ga a kɔɔ̄ŋ á gá, meŋ Méŋ yi, ńtswī á gá ajūɔ tsem zīi, yí é si ŋghʉ̄ɛ. A a shʉʼ ezéŋ etswi á gá emɔ̄ʼ mefaʼ mīi, é tseknēe, meŋ eghʉ̄ tɛ pɛ ejʉ́ɔ, ejʉʼ e ekʉ̄ʼne á wɛ́. 21Ndeŋ ndeŋ páʼ, Mɔʼɔ́ ga a ghʉʉ̄, mepfhō é lu á esī, ŋ́gɔ́ éwú lā, meŋ Méŋ yi, meŋ gɔ ezéŋ ŋghʉ̄ épúp, ánɛ ŋiŋ yīi meŋ á kɔŋ. 22Mɔʼɔ́ ga a te ntsaŋ ŋiŋ záʼ, a lē ŋgyá mete ntsem á lelɔk nzáʼ ntsaŋ á mbū meŋ Méŋ yi. 23A lɛɛ́ ŋghʉ̄ɛ épúp ŋ́gɛ, ŋiŋ ntsem a eyá mekuʼ á mbū meŋ Méŋ yi, ńdeŋ ndeŋ páʼ, mɛ́ yaá mekuʼ mí épúp. Ŋiŋ yīi a te mekuʼ má yá, a á páʼā ndɔ̄kɔ te ŋgyáa mekuʼ Mɔʼɔ́ ga á, mbɔ yí mé le tó á gá.
24Kwaʼ anuúnē anuúnē, meŋ shúŋɔ á wɛ́ ŋ́gɛ, ŋiŋ a júʼɔ ashuŋne zá ŋkúʼte, éfɛ́ nnɛ̄t ŋgyá á mbū Ndém páʼ, a le tó á gá, mbɔ ŋgaŋ a á ndáʼ nzī á leta á lezēŋ yí. Ŋgaŋ a te e láʼ epí asāʼ á, a á ndáʼ ntswɛ́t á lewhʉ̄, tɛ nzī á leta á lezēŋ Ndém. 25Kwaʼ anuúnē anuúnē, meŋ shúŋɔ á wɛ́ ŋ́gɛ, afʉʼ á si eshʉ̄ʼɛ, tɛ á nzi ndáʼ eshʉ̄ʼ, ázi mepfhō, e júʼ anu zīi, Méŋ Ndém a á lé. Epuɔ pīi pɔ́ é júʼ ŋkúʼte, pɔ́ egɔ́ éwú. 26Páʼ Mɔʼɔ́ ga méŋwɛ̄t mé wɛɛ̄ á leghʉ, mɛ́ gɔ́ éwú lā, ndeŋ ndeŋ épúp, a lē ŋgyá mete á lelɔk ŋghʉ̄ mɛ́ gɔ́ éwú, á mbū meŋ Méŋ yi. 27A le yá mete á lelɔk nzáʼ ntsaŋ á mbū Méŋ yi. Ŋ́gyáa épúp melaʼ mīi, Méŋ yí mɛ́t, a á Méŋ‑Ŋiŋnɔŋ. 28Ndɛ́ʼ emuɔ menu é zéŋ á wɛ́ ŋkʉ̄ʼne. Afʉʼ á si eshʉ̄ʼɛ, ázi mepfhō, e júʼ ŋghi za. 29Epuɔ pīi, pɔ́ lɛɛ́ ŋghʉɛ anu mbɔŋ, e ezím ánɛ lewhʉ̄, ńtā á lezēŋ Ndém. Epi, pɔ́ lɛɛ́ ŋghʉ̄ɛ anu tepɔŋ, e ezím azɔ́p ánɛ lewhʉ̄, Ndém a eghʉ̄ pɔ́ elákne. 30Meŋ méŋwɛ̄t é gɔ le kūʼ á leghʉ tsɔ azō ɔ́. Meŋ gē ezáʼ ntsaŋ, éfhó ánɛ páʼ, Ndém a á shúŋ á gá. Ḿbiŋ nzáʼ ntsaŋ ndeŋ ndeŋ melaʼ mīi, meŋ te si efāʼa á leghʉ páʼ, meŋ mé kɔŋ ɔ́. Meŋ á si efāʼa áa leghʉ ajū mīi, ŋiŋ yīi, a le tó á gá, a á si ŋkɔ̄ŋɔ.
Menu mīi é tswii á légɛ Yɛɛ́so a á Méŋ Ndém
31«Á ŋgwíʼe ŋgɔ́ eyi, meŋ méŋwɛ̄t é si ntswíi ntāŋ za, mbɔ mɛ́ gɔ egaá tɛ́ nzhɛ́ á légɛ, meŋ shúŋɔ anuúnē é? 32Ŋiŋ ndɛʼɛ mé si ntswíi ntāŋ za, ŋ́gɔ́ á Mɔʼɔ́ ga. Meŋ mbīiŋ nnɔ̄ŋ nzhɛ́ɛ á légɛ, ajū mīi a shúŋɔ ánɛ meŋ, á si ŋgɔ́ anuúnē. 33Pɛ le tó epuɔ á mbū Jáaŋ, á kó eshúŋ á anuúnē zīi, a á si nzhɛ́ɛ ánɛ meŋ. 34Ŋ́gɔ́ mé meŋ, mbɔ meŋ te si ntsáa ŋ́gɛ, ŋiŋnɔŋ a etswí ntāŋ za á. Meŋ ké eshúŋɔ emuɔ menu páʼa, tɛ́ Ndém a eghʉ̄, pɛ eláʼ ntsīa éwú ntswɛ́t. 35Jáaŋ a lɛ páʼ, ŋkaʼ yīi, mɛ́ é kók tɛ é nɔŋ ŋkɛ̄ʼɛ lā. Anu zīi a le nɔ̄ŋ eshúŋɔ, á gɔ́ páʼ ŋkaʼ lā. Á lɛ si mbɔ̄ŋɔ á wɛ́, ŋ́ké mbɔ̄ŋɔ áa ánɛ méŋ afʉʼ ndaʼ. 36Meŋ ké ŋgwɛ emɔ̄ʼ menu mīi, é tswii á ŋiŋ yīi, meŋ á ewiɛ́. Menu mɛ́t é fáŋ ntsyā anu zīi, Jáaŋ a le shúŋ ánɛ meŋ. Menu mɛ́t, é gɔ́ mefaʼ mīi, Mɔʼɔ́ ga a tswii ŋ́gɛ meŋ eghʉ̄. Meŋ á si ŋghʉ̄ɛ mefaʼ mɛ́t, emiɛ́ mé nɔŋ ntswīi á légɛ, Mɔʼɔ́ ga mé le tó á gá á ŋgɔŋ ega. 37Mɔʼɔ́ ga, páʼ a le tó á gá lā, yí méŋwɛ̄t azí a tswií ntāŋ za. Táʼ, pɛ laá njúʼ ŋghi zi í, pɛ te yí jʉ́ɔ. 38Pɛ te cʉ́ʼ, ashuŋne zí á tseŋɛ meŋgaŋ á ntē pɛ ɛ́, melaʼ mīi pɛ te si efíɛ́ nnɛ̄t ŋgyáa á mbū ŋiŋ yīi, a le tó á yí í. 39Pɛ é si ntúŋɔ atseŋ aŋwaʼne Ndém, melaʼ mīi, pɛ é si ŋkwāŋa ŋ́gɛ, pɛ gɔ ezápa éwú, tɛ́ efú ntā á lezēŋ Ndém. Aŋwaʼne Ndém á ké ŋgɔ́ si eshúŋɔ azí á ŋiŋ yīi, meŋ á ewiɛ́. 40Pɛ piīŋ te si ŋkɔ̄ŋɔ á letsē á nzem meŋ, ńdáʼ ntā á lezēŋ Ndém ɛ́.
41Meŋ te si efāʼa ŋ́gɛ, epuɔ menɔŋ e eyá mekuʼ á mbū meŋ ɛ́. 42Meŋ nzi ŋké nnɔŋ nzhɛ́ɛ á wɛ́. Pɛ é ntē pɛ, pɛ te Ndém kɔŋ. 43Meŋ ke shʉ̄ʼ á ŋgɔŋ ánɛ lezēŋ Mɔʼɔ́ ga, pɛ pīiŋ te gá véŋ. Ŋiŋ ndɛʼɛ a piŋɛ eshʉ̄ʼ ánɛ lezēŋ tsí méŋwɛ̄t, mbɔ pɛ e véŋ á yí. 44Pɛ ghʉʉ̄ mekuʼ á nnɔ pɛ nzeŋne zeŋné, á pɔŋ á wɛ́ tɛʼ, ńnɔŋ te efāʼa á leghʉ ajū mīi, Ndém ndaʼ a gɔ elɔ̄ɔk ŋgyá mekuʼ mɛ́ ɛ́. Pɛ gɔ epīiŋ ŋgāa, éfɛ́ nnɛ̄t ŋgyá á mbū meŋ ŋ̄? 45Ndɛ́ʼ pɛ ekwāaŋ ŋ́gɛ, meŋ mé láʼ eswiŋ á wɛ́ á mvhɔ Mɔʼɔ́ ga. Ŋiŋ yīi a a láʼ eswiŋ á wɛ́, a á si ŋgɔ́ á Mɔɔ́sɛ, á ŋiŋ yīi pɛ le néŋ á ntē pɛ ŋ́gɛ, a a shʉʼ etswíte á wɛ́. 46Pɛ le wíʼe mvéŋ á anu zīi, Mɔɔ́sɛ a le tíī, mbɔ pɛ zeéŋ mvéŋ azi meŋ ndʉ́ɛ́, melaʼ mīi, menu mīi a le tíī, a lɛɛ́ ntí ánɛ meŋ. 47Páʼ pɛ te si mvéŋɛ anu zīi, a le tí lāa, pɛ gɔ epīiŋ ŋgāa ḿvéŋ anu zīi, meŋ ndʉ́ɛ́ ɛ̄?»
Currently Selected:
Jáaŋ 5: ybb
Highlight
Share
Copy
Want to have your highlights saved across all your devices? Sign up or sign in
© CABTAL
