Jáaŋ 17
17
Yɛɛ́so a á ega eswíŋtɛ á Ndém á athū megaŋ nnɔ pí
1Yɛɛ́so á shúŋne épúp, ḿbʉ́ʼɛ menēk mí mé lephū, ńdé ŋ́gɛ: «Mɔ́ʼɔ, njhʉ̄ e é kuʼ, lɛ ŋghʉ̄ epuɔ menɔŋ e ejʉ́ɔ á légɛ, Méŋ wu a wɛɛ̄ á shʉ́shɔ́k, tɛ́ Méŋ wu a etswī azí á légɛ, o wɛɛ̄ á shʉ́shɔ́k. 2O le yá mete á mbū yí, ánɛ epuɔ menɔŋ metsem. A a fhó ánɛ mete mɛ́t, éyá á lefū ntā á lezēŋ Ndém, á mbū epuɔ metsem pīi, o le tsekné á mbū yí. 3Lefū ntā á lezēŋ Ndém, á gɔ́ á lezhɛ̄ wu, á wú, ndaʼ kwaʼ Ndém, ńzéŋ nzhɛ́ á ŋiŋ yīi, o le tó á yí á ŋgɔŋ ega, á gá Yɛɛ́so Klísto. 4Meŋ kɛ á esī atsetsáʼ, ŋ́gē eghʉ, mɛ́ ejʉ́ɔ á shʉ́shɔ́k wu, ḿmāk afaʼ zīi, o le tsekné ŋ́gɛ meŋ eghʉ̄. 5Tsetseŋɔ, Mɔ́ʼɔ, lɛ ŋghʉ̄ meŋ enáŋ á lezēŋ wu, ŋ́gwɛ̄ á shʉ́shɔ́k. Á shʉ́shɔ́k yīi, meŋ nde zī ŋgwɛ̄ á lezēŋ wu, tɛ́ o enɔ̄ŋ ŋgɔŋ.
6«Meŋ ke ghʉ̄ʉ̄, epuɔ menɔŋ é zhɛ́ á ŋiŋ yīi, o ó ewiɛ́. Épuɔ pīi, o ke fhó á ntē ŋgɔŋ, éfók á wɔ́p ŋgyá á mbū meŋ. Pɔ́ lɛ epuɔ pú, o eké ŋgyá á wɔ́p á mbū meŋ, pɔ́ ke júʼ ashuŋne jú, ńzīŋ páʼ á si ndʉ́ɛ́ épúp. 7Pɔ́ é tsetseŋɔ, ńnɔŋ nzhɛ́ɛ á légɛ, ajūɔ tsem zīi, o le yá á mbū meŋ, á fhɔ́ɔ áa mbū wu. 8Ńnɔŋ nzhɛ́ɛ á légɛ, ashuŋne ntsem zīi, meŋ ke ziʼné á wɔ́p, á gɔ́ áa azi o le yá á mbū meŋ. Pɔ́ le tswí ashuŋne mɛ́t, ńcuŋte nzhɛ́ á légɛ, meŋ fhɔ́ɔ áa mbū wu, ḿvéŋ á légɛ, wu mé le tó á gá á ŋgɔŋ.
9«Meŋ swíŋtɛ á wú ánɛ athū zɔ́p. Meŋ te eswíŋtɛ á wú ánɛ athū epuɔ ŋgɔŋ puɔ ɔ́. Meŋ swíŋtɛ áa ánɛ athū epuɔ pīi, o le yá me meŋ, pɔ́ é si ŋgɔ́ epuɔ pú. 10Ajūɔ tsem zīi á mbū meŋ, á si ŋgɔ́ ajú, ńdeŋ ndeŋ páʼ, ajūɔ tsem zīi á mbū wu, á si ŋgɔ́ azá. Pɔ́ mé ghʉʉ̄, epuɔ menɔŋ é jʉ́ɔ páʼ shʉ́shɔ́k ga, a á épúp. 11Te efhó tsetsɔŋɔ, meŋ cʉʉ́ʼ á ŋgɔŋ ega enáŋ á. Pɔ́ e cʉ́ʼ ezɛ́t á ŋgɔŋ ega. Ŋ́gɔ́ mé meŋ, mbɔ meŋ shʉʼɛ mé ntswɛ́tte wu. Mɔ́ʼɔ, ndaʼ Ndém, lɛ ndɔ̄k mete mú ŋkápte á wɔ́p. Méte mīi o ke yá me meŋ. Tɛ́ pɔ́ enáŋ efʉʼ metsem, ŋ́gɔ́ á taʼ, ńdeŋ ndeŋ páʼ pɔkɔ é taʼ lā. 12Pek a pɔ́p é ke zɛ́tē, meŋ nɔ̄ɔŋ ndɔ̄kɔ mete mú ŋkáptɛ á wɔ́p. Méte mīi o le yá me meŋ. Meŋ ke kapté á wɔ́p, tɛ tsɔ taʼ a te pí. Ńdaʼ ŋiŋ yīi, a le kāŋ á yí á lepī, tɛ́ anu zīi mɛ́ le tí á ntē aŋwaʼne Ndém, a elɔk mbō.
13«Tsetsɔŋɔ, meŋ á si eshʉ̄ʼɛ mé lezēŋ cú. Meŋ zɛɛ́t á esī atsetsáʼ eshúŋnɛ páʼa, tɛ́ pɔ́ elɔk ŋgwɛ̄ lekāk á ntē pɔ́p, lékāk tsīi é fhɔ́ɔ á mbū meŋ. Ŋ́gwɛ̄ lekāk mɛ́t tɛ ntsékne. 14Meŋ ke ziʼné á wɔ́p ashuŋne jú, epuɔ ŋgɔŋ puɔ é piŋ mbā á wɔ́p, melaʼ mīi pɔ́ té si ŋghʉ̄ɛ páʼ, epuɔ ŋgɔŋ puɔ é si ŋghʉ̄ɛ épúp ɔ́, ńdeŋ ndeŋ páʼ, meŋ te si ŋghʉ̄ɛ páʼ epuɔ ŋgɔŋ puɔ, é si ŋghʉ̄ɛ épúp ɔ́. 15Meŋ te ndʉ́ɛ́ ŋ́gɛ, o efhó á ŋgɔŋ ega efók á wɔ́p ɔ́. Táʼ, ŋ́ké ŋ́gɛ o ekʉ̄ŋɛ á wɔ́p, ánɛ Efɔ menu tepɔŋ. 16Pɔ́ té si ŋghʉ̄ɛ páʼ epuɔ ŋgɔŋ puɔ é si ŋghʉ̄ɛ épúp ɔ́, ńdeŋ ndeŋ páʼ, meŋ te si ŋghʉ̄ɛ páʼ epuɔ ŋgɔŋ puɔ, é si ŋghʉ̄ɛ épúp ɔ́. 17Lɛ ndɔ̄k ashuŋne jú, páʼ á si ŋgɔ́ anuúnē lā, ŋ́ghʉ̄ pɔ́ ecʉ́ʼ epuɔ pú tɛ ntsékne. Ashuŋne jú á si ŋgɔ́ anuúnē. 18Ndeŋ ndeŋ páʼ o le tó á gá á ŋgɔŋ lā, meŋ a zéŋ etó á wɔ́p azá á ŋgɔŋ. 19Éshʉ̄ʼ ánɛ meŋ, mbɔ meŋ á pú ŋgyá nnɛ̄t za á lelɔk ŋghʉ̄ mefaʼ mú melaʼ mɔ́p. Tɛ́ pɔ́ epú nzápa ánɛ ashuŋne jú, páʼ á si ŋgɔ́ anuúnē, ŋ́gyá nnɛ̄t zɔp á lelɔk ŋghʉ̄ mefaʼ mú.
20«Meŋ te ndɛ̄ eswíŋtɛ á wú, ánɛ athū zɔ́p ndaʼ á. Meŋ zéŋɛ eswíŋtɛ á wú, tɛ mbɔɔ ánɛ athū epuɔ pīi, pɔ́ e shʉʼ efhó ánɛ ashuŋne zɔ́p, éfɛ́ nnɛ̄t eyá mé meŋ. 21Meŋ swíŋtɛ á wú ŋ́gɛ, o elɛ̄ ŋghʉ̄, pɔ́ metsem e egɔ́ á taʼ, ńdeŋ ndeŋ páʼ wu Mɔʼɔ́ ga, o ó ntē nnɛ̄t meŋ, meŋ gɔ́ á ntē nnɛ̄t wu lā. Ŋ́gɛ pɔ́p azɔ́p, e egɔ́ á ntē nnɛ̄t pɔkɔ, tɛ́ epuɔ menɔŋ e ejʉ́ɔ épúp, ńzhɛ́ á légɛ, wu mé le tó á gá á ŋgɔŋ ega. 22Ŋ́gɔ́ mé meŋ, mbɔ shʉ́shɔ́k yīi, o ke yá me meŋ, meŋ ke yá á mbū pɔ́p. Tɛ́ pɔ́ elɔk ŋgɔ́ á taʼ, ńdeŋ ndeŋ páʼ pɔkɔ é si ŋgɔ́ á taʼ lā. 23Meŋ ŋgɔ́ á ntē nnɛ̄t pɔ́p, ńdeŋ ndeŋ páʼ, o ó ntē nnɛ̄t meŋ, tɛ́ pɔ́ elɔk ŋgɔ́ á taʼ nchu tɛ ntsékne. Púp, epuɔ ŋgɔŋ e ejʉ́ɔ, ńzhɛ́ á légɛ, wu mé le tó á gá á ŋgɔŋ, ńzhɛ́ á légɛ, o kɔɔ̄ŋ á wɔ́p, ńdeŋ ndeŋ páʼ o kɔɔ̄ŋ á gá lā. 24Mɔ́ʼɔ, meŋ á si ŋkɔ̄ŋɔ ŋ́gɛ, ajʉʼ zīi, meŋ a shʉʼ egɔ́ éwú, o elɛ nzéŋ ŋghʉ̄ pek a epuɔ pīi, o le yá me meŋ mé epú ŋgɔ́ éwú, ḿbēte á shʉ́shɔ́k yīi, o le yá me meŋ. O le kɔ̄ŋ á gá, tɛ nzī nzɛ́t té nɔŋ ŋgɔŋ. 25Mɔ́ʼɔ, wu ŋgaŋ anuúnē, epuɔ ŋgɔŋ puɔ é lɛ te á wú zhɛ́, meŋ ké nzhɛ́ á wú. Epuɔ puɔ é piŋ nzhɛ́ á légɛ, wu mé le tó á gá á ŋgɔŋ. 26Meŋ ke ghʉ̄ pɔ́ zhɛ́ á ŋiŋ yīi, o ó ewiɛ́. Meŋ a shʉʼ ezéŋ eghʉ, pɔ́ etswiʼne nzhɛ́, tɛ́ ŋkɔŋ zīi, o wɛɛ̄ ánɛ meŋ, e egɔ́ á tsetsɛlɛ pɔ́p azɔ́p, meŋ egɔ́ á ntē nnɛ̄t pɔ́p. »
Currently Selected:
Jáaŋ 17: ybb
Highlight
Share
Copy
Want to have your highlights saved across all your devices? Sign up or sign in
© CABTAL
