Jáaŋ 11
11
Yɛɛ́so a á ega ŋghʉ̄ɛ, ŋiŋ á zímɛ ánɛ lewhʉ̄
1Mmɔʼ ŋiŋ a lɛ éwú, lezēŋ tsí é gɔ́ lɛ Lazaa, ńnɔŋ ŋgɔ̄ɔ, ŋ́gɔ́ á ŋiŋ Betani. Betani a á si ŋgɔ́ á akap alāʼ zīi, Malía pɔ́ méŋ mɔ́ yi Mákta é naŋteé éwú. 2Mɛ́ lʉ́ɛ́ á Malía wɔ̄ yīi, a le lɔ̄k alamńda, ńzɔ́ʼ mekhu Atsyapuɔ, ńdɔ̄k ntsɔʼ zi ntsíʼne lā. Méŋ mɔ́ yi Lazaa mé le nɔ̄ŋ ŋgɔɔ. 3Epɔ̄ memía pí, é wɔnzwí pwɔ̄ mémpīa, é tó ŋ́gɛ, mɛ́ egʉɔ ndé á mbū Yɛɛ́so ŋ́gɛ: «Atsyapuɔ, esoó lepi wu, a á si ŋgɔ̄ɔ. »
4Yɛɛ́so á lɛ ŋgē ejúʼe, ńdé ŋ́gɛ: «Agɔ jʉɔ mɛ́t, á té agɔ lewhʉ̄ ɛ́. Mɛ́ e zápa éwú tɛ́ jʉ́ɔ mete Ndém. Epuɔ menɔŋ e zápa éwú, tɛ́ jʉ́ɔ mete Méŋ Ndém. » 5Yɛɛ́so a lɛɛ́ ŋkɔŋɔ á Mákta pɔ́ Malía, mbɔ Lazaa tɛʼ. 6A le zhɛ́ á légɛ, Lazaa a á si ŋgɔ̄ɔ páʼā, ńzéŋ nnáŋ eleʼé pīa, á ajʉʼ zīi, a á nzi ŋgɔ́ éwú. 7Tɛ́ mbiŋ ndé á mbū nnɔ yí ŋ́gɛ: «Ḿpɛ eswáŋ nnɛ̄t mé Yudéa. » 8Megaŋ nnɔ pí é lé á mbū yí ŋ́gɛ: «Mɔʼɔ́ wek, nɔ́ŋ ŋ́gɛ, á kɛ áa ezɔ́ ezɔ́, tɛ́ epuɔ Yúda é nɔŋ efāʼa á lelɔk metɔ́, ńtémte á wú nzwhí. O ó ega mbiŋɛ nzéŋɛ efāʼa á lepiŋ nzem éwú lɛ́?» 9Yɛɛ́so á pwɛt ŋ́gɛ: «Aleʼé alāʼ á té pɔ́ŋ meleŋ njhʉ̄ ntsɔp pīa mé legēm lɛ̄? Ŋiŋ a ziŋɛ ezokó, mbɔ a gɔ̄ le kwāte, melaʼ mīi, a á si njʉ́ɔ páʼ ejʉʼ é si efóko. 10Ŋiŋ a ké mbīŋ nzīŋ etsōʼ, mbɔ a a kwate, melaʼ mīi, ejʉʼ é té si efóko ó. »
11Yɛɛ́so á shúŋne páʼa mɛ́t, ńzéŋ ntswiʼne ndé ŋ́gɛ: «Esoó yímpɛ Lazaa a á lí, táʼ, meŋ a ké egʉɔ eziɛ á yí. » 12Megaŋ nnɔ pí é lé á mbū yí ŋ́gɛ: «Mɔʼɔ́ wek, a gɔ́ éyi, a á si ndíi, mbɔ á páʼa ndɔkɔ ŋ́gɛ, a a tee. » 13Yɛɛ́so a le gē elé épúp, ńdɔkɔ ndʉ́ɛ́ á Lazaa á lekwhʉ̄. Megaŋ nnɔ pí, é piŋ ŋkwāŋ ŋ́gɛ, a lɔkɔ ndʉ́ɛ́ á kwaʼ lelɔ̄k. 14Yɛɛ́so á lé á mbū pɔ́p ésia sia ŋ́gɛ: «Lazaa a á kwhʉ́. 15Ŋgɔŋ e é si ŋké mbiŋɛ mbɔ̄ŋɔ á gá tɛʼ páʼ, a á ge ekwhʉ́, meŋ gɔ́ te á ajʉʼ mɛ́t ɛ́. Pɛ gɔ efhó ánɛ lewhʉ̄ yi wuɔ mɛ́t, tɛ́ ejhʉ́ apɛ, étswiʼne efɛ́ nnɛ̄t, éyá mé meŋ. Táʼ, ḿpɛ eké ŋgʉɔ njʉ́ɔ á yí. » 16Tomási yīi mɛ́ zeéŋ ntɔ́ŋ á yí lɛ, Méŋ‑Lefāk, á lé á mbū emɔ̄ʼ megaŋ nnɔ Yɛɛ́so ŋ́gɛ: «Ḿpɛ epú ŋgʉ̄ɔ á azímpɛ, mɛ́ ekó mbú ńzwhí á yímpɛ a mɔʼɔ́ yímpɛ. »
17Yɛɛ́so á nɔŋ ŋgʉ̄ɔ, ńjúʼ á légɛ, Lazaa a á nɔŋ á lesi, tɛ á gɔ́ eleʼé lekua. 18Páʼ lefhō á Yelósalɛm ŋkó á Betani, á lɛɛ̄ ŋgɔ́ áa ajūɔ mekílo métɛ́t lā, 19mbɔ epuɔ Yudéa tɛ nzáne é eshʉ̄ʼ á ntsíʼne ntshi nnēk Mákta pɔ́ Malía, ánɛ páʼ, méŋ mɔ́ wɔp a ke kwhʉ́ʉ̄. 20Mákta á júʼ á légɛ Yɛɛ́so a á shʉʼ, ńdū á esī, ŋ́gʉɔ nzáʼte á yí á mɛnzhɛ, Malía á cʉ́ʼ nzɛ́t ńnáŋ á ŋgyā. 21Mákta á lé á mbū Yɛɛ́so ŋ́gɛ: «Atsyapuɔ, o ke wíʼe ŋgɔ́ ega, mbɔ méŋ mɔ́ ga, a kɛ te kwhʉ́. 22Táʼ, tsetsɔŋɔ wuɔ, meŋ á zhɛ́ á légɛ, ajūɔ tsem zīi, o gɔ elɔ́ á mbū Ndém, a gɔ le néŋ té yá á mbū wu ú. » 23Yɛɛ́so á lé á mbū yí ŋ́gɛ: «Méŋ mɔ́ wu, a a zím ánɛ lewhʉ̄. » 24Á gɛ: «Meŋ á si nzhɛ́ɛ á légɛ, a a fú ezím ánɛ lewhʉ̄, á afʉʼ zīi, mepfhō é zímɛ ánɛ nzoknzem aleʼé. » 25Yɛɛ́so á tsɔ́ʼ ŋ́gɛ: «Meŋ á si ŋgɔ́ á ŋiŋ yīi a ghʉɛ, mɛ́ zímɛ ánɛ lewhʉ̄, ŋ́gɔ́ á ŋiŋ yīi a ghʉɛ, mɛ́ gɔ́ɔ éwú. Ŋiŋ a fíɛ́ nnɛ̄t zi ŋgyá á mbū meŋ, ńzī ŋkwhʉ́ kwhʉ́, mbɔ a a gɔ́ éwú. 26Ŋiŋ a piŋɛ ŋgē enáŋ á ŋgɔŋ ega, ńnɔŋ efíɛ́ nnɛ̄t zi ŋgyáa á mbū meŋ, mbɔ a te ndáʼa ŋkwhʉ́ ɛ́. Tɛ o ó véŋ épúp e?» 27Á lé ŋ́gɛ: «Ŋŋ me Atsyapuɔ, meŋ á véŋ á légɛ, o ó Nzaʼ‑Ŋkhʉ, ŋ́gɔ́ á Méŋ Ndém, á ŋiŋ yīi, Ndém a le laʼnē á letō á yí á ŋgɔŋ. »
Yɛɛ́so a á ega ndāa
28Mákta á lé épúp, ŋ́gʉɔ ntɔ́ŋ á méŋ mɔ́ yi Malía, ńdēmte á yí ŋ́gɛ: «Nziʼnɛ a á shʉʼ, a á si ntɔ́ŋɔ á wú. » 29Malía á júʼ épúp, ńdɛ ndū á esī, ŋ́gʉɔ ntswɛ́tte á yí. 30Á ge egɔ́ mbɔ, Yɛɛ́so a á nzɛ́t té kó á ntē akap alāʼ mɛ́t. Ńzɛ́t áa ajʉʼ zīi, Mákta a á shʉʼ ntswɛ́tte á yí éwú. 31Epuɔ Yudéa pīi, pɔ́ a Malía é ŋgɔ́ á ŋgyā, pɔ́ nɔŋ ntsíʼnɛ ntshi nnēk zí lā, pɔ́ jʉ́ɔ páʼ Malía a gáknɛ ndūu á esī ntúɔ́, ńzhɛ̄ne á yí, ńnɔŋ ŋkwāŋa ŋ́gɛ, a gʉɔ mé lesi á ndaā. 32Malía á gʉɔ tɛ ŋkó á ajʉʼ zīi, Yɛɛ́so a á ŋgɔ́ éwú, ńdɛ ŋgē ejʉ́ɔ á yí, ŋ́gwhʉ̄ á mekhu yí, ńdé á mbū yí ŋ́gɛ: «Atsyapuɔ, o ke wíʼe ŋgɔ́ ega, mbɔ méŋ mɔ́ ga a kɛ te kwhʉ́. » 33Yɛɛ́so á jʉ́ɔ páʼ a á si ndāa épúp, mbɔɔ páʼ epuɔ Yudéa pīi, é nɔŋ nzhɛ̄nɛ á yí, é si ndāa azɔ́p épúp, mezeŋɛ é kú á yí, ntē yí é pú ntákte. 34Á zɛ́tte á wɔ́p ŋ́gɛ: «Pɛ ke féŋ á yí egɔ́?» Pɔ́ pwɛt ŋ́gɛ: «Atsyapuɔ, shʉʼɛ njʉ́ɔ. » 35Yɛɛ́so á lɛ ndā. 36Epuɔ Yudéa é lé á tsetsɛlɛ pɔ́p ŋ́gɛ: «Pɛ ejʉ́ɔ páʼ, a lɛɛ́ ŋkɔ̄ŋɔ á yí épúp. » 37Emɔ̄ʼ é piŋ nnɔ̄ŋ ndʉ́ɛ́ á azɔ́p ŋ́gɛ: «Ŋiŋ yīi a ke zɛ́ʼɛ menēk apií‑menēk, a kaá ŋkūʼ á yí á leghʉ, tɛ Lazaa a á le kwhʉ́ ɛ́ lɛ́?»
Yɛɛ́so a á ghʉ, Lazaa á zím ánɛ lewhʉ̄
38Mezeŋɛ é zɛ́t ŋkúɔ́ á Yɛɛ́so koó, á gʉɔ mé lesi. É gɔ́ mmɔ̄ʼ legʉɔpɔ́ tɔ́, mmɔʼ mía tɔ́ á kápte á nchu éwú. 39Yɛɛ́so á tswi ŋ́gɛ, mɛ́ epēkne á tɔ́ mɛ́t. Mákta, méŋ mɔ́ mpfhō á lé ŋ́gɛ: «Atsyapuɔ, a a gɔ́ tsetsɔŋɔ, ńnɔŋ elemɛ, melaʼ mīi, a á ndáʼ ŋghʉ̄ eleʼé lekua. » 40Yɛɛ́so á ké ntsɔ́ʼ á mbū yí ŋ́gɛ: «Nɔ́ŋ ŋ́gɛ meŋ á ndáʼ eshúŋ á wú ŋ́gɛ, o fíɛ́ nnɛ̄t jú ŋgyá á mbū meŋ, mbɔ o o jʉ́ɔ páʼ, Ndém a tswii mete mí. » 41Mɛ́ lɛ mbēkne á tɔ́ mɛ́t, Yɛɛ́so á pʉ́ʼɛ menēk mí mé lephū, ńdé ŋ́gɛ: «Mɔ́ʼɔ, meŋ á syákne á wú, páʼ o ó júʼ aswiŋte zá. 42Meŋ a si ŋké nzhɛ́ɛ á mbɔŋɔ́ á légɛ, o gɛ nzī njúʼɔ aswiŋte zá júʼe, táʼ, meŋ shúŋnɛ páʼa, melaʼ alāʼ epuɔ jʉɔ zīi, á pú ŋkɛ́ne á gá la, tɛ́ pɔ́ evéŋ á légɛ, wu mé le tó á gá. » 43Éswíŋte épúp, ńdé mé ŋghi teté ŋ́gɛ: «Lazaa, fhó egā ntó. » 44Mpfhō á lɛ ntó, mekhu mí pɔ́ mbū mí é gɔ́ nzémte zemté mé etsō nzhó, páʼ mɛ́ le túŋ á yi épúp, eshhʉ̄ yí é zéŋ ŋgɔ́ nzémte zemté. Yɛɛ́so á tswi mé epuɔ ŋ́gɛ: «Pɛ ekɛ́ʼte etsō nzhó ánɛ yí, ńtshī á yí néŋ. »
Mekém alāʼ é ega ntshíɛ ntāŋ Yɛɛ́so
(Mat 26.1-5; Mlk 14.1-2; Lúk 22.1-2)
45Epuɔ Yudéa tɛ nzáne pīi, pɔ́ le shʉ̄ʼ á njʉ́ɔ wɔ Malía lewhʉ̄, é le jʉ́ɔ ajū mīi Yɛɛ́so a á ghʉ, éfɛ́ nnɛ̄t ŋgyá á mbū yí. 46Táʼ, emɔ̄ʼ epuɔ é ké ŋgʉ̄ɔ njʉ́ɔ epuɔ nnɔ Falísia, ḿbɛ́te eshúŋ á wɔ́p, ajū mīi Yɛɛ́so a á ghʉ. 47Wɔ nɔŋ‑epɔʼ epi melʉɛ mbɔɔ epuɔ Falísia, é júʼ épúp, ńtɔ́ŋ Mía Acuʼte, ésap tɛ ndé ŋ́gɛ: «Ḿpɛ é páʼa, éghʉ lɛ akɔ̄? Ŋiŋ wuɔ a á si ŋghʉ̄ɛ meŋkʉʼne menu tɛ zánɛ. 48Ḿpɛ tshiɛ á yí néŋ, á lɔ̄k ŋgʉ̄ɔ mé mvhɔ, mbɔ epuɔ metsem e fɛ́ nnɛ̄t eyá á mbū yí, epuɔ Lóma e epiŋ ndū á esī, ńták á Mía Ŋgyā Ndém zímpɛ, ńzéŋ mbík alāʼ zímpɛ. » 49Mmɔʼ ŋiŋ nnɔ wɔp, lezēŋ tsí é gɔ́ lɛ Kayif, ŋ́gɔ́ á tɛŋgyā wɔ nɔŋ‑epɔʼ, ánɛ ŋguʼ alāʼ mɛ́t, á lé azí ŋ́gɛ: «Pɛ puú te si njúʼɔ ajū mīi á esī í. 50Pɛ te si njʉ́ɔ á légɛ, taʼ ŋiŋ a kwhʉ́ɛ á athū alāʼ, tɛ epuɔ alāʼ ntsem é pú te gɔ̄ʼɔ, pɛ mé lɔkɔ njhʉ́ɛ apɛ ɛ́ lɛ̄?» 51A le gē elé épúp, á té fhɔ́ɔ á mbū yí í. Páʼ a lɛ tɛŋgyā wɔ nɔŋ‑epɔʼ ánɛ ŋguʼ mɛ́t lā, Ndém á ghʉ, á té njhʉ̄ eshúŋ ŋ́gɛ, Yɛɛ́so a pɔŋteé á lekwhʉ̄ á athū alāʼ. 52Ŋ́ké le lɛ̄ ŋkwhʉ́ áa athū alāʼ ndaʼá, ŋ́kwhʉ́ épúp, ńdɔk ncúʼte epɔ̄ Ndém pīi, é ntē ŋgɔŋ ntsem, pɔ́ ecʉ́ʼ á taʼ nchu.
53Á le fhó aleʼé mɛ́t, tɛ́ mekém epuɔ Yúda, é zápa ŋ́gɛ, mɛ́ ezwhí á Yɛɛ́so. 54Melaʼ épúp tɛ Yɛɛ́so, a te zɛ́t ŋkɔ̄ŋɔ á yí á leziŋ esa saá á nnɔ epuɔ Yudéa á. Ŋ́gʉ̄ɔ mé eshhʉ̄ alāʼ yīi, é páte á késáatswɛt, á ntē mmɔʼ tésɔŋ, mɛ́ tɔ́ŋ lɛ Eflayim, pɔ́ a megaŋ nnɔ pí é náʼ nnáŋ éwú.
55Á le gē egɔ́ épúp, aleʼé lekāk Páska epuɔ Yúda á nɔŋ mbátɛ. Epuɔ Yúda tɛ nzáne é nɔŋ efhɔ́ɔ ánɛ mekap alāʼ, ḿbʉɛ ŋgʉ̄ɔ mé tésɔŋ Yelósalɛm, á esoók epe ánɛ pɔ́p. 56Ŋ́kó éwú Mía Ŋgyā Ndém, ńnɔŋ efāʼa á Yɛɛ́so, ŋ́gʉɔ ŋkó á Mía Ŋgyā Ndém, ńtshí éwú, ńnɔŋ ndʉ́ɛ́ á tsetsɛlɛ pɔ́p ŋ́gɛ: «Pɛ é kwaŋ á azɛ́ ŋ́gɛ akɔ̄? A gaá lɛ́ mbɔ a te shʉʼ lekāk cʉɔ ɔ́. » 57Mbɔ wɔ nɔŋ‑epɔʼ epi melʉɛ mbɔɔ epuɔ Falísia, é ntswī ŋ́gɛ, ŋiŋ a gɔ ŋké ńzhɛ́ á ajʉʼ zīi a á éwú, á shúŋ, mɛ́ gɔ á yí.
Currently Selected:
Jáaŋ 11: ybb
Highlight
Share
Copy
Want to have your highlights saved across all your devices? Sign up or sign in
© CABTAL
