Kəfwaʼ 10

Kɔnilus dza nə̀ ghə tɔŋɔ fuu bə wi n Pita

1Wù loʼ â loʼnu n naʼ i Kayserya zəd i wi zə â loʼnə nə̀ a loʼ Kɔnilus. Tə n loʼ kətow tə̀ saʼ kə sawgoʼ tə Roma tən tə loʼnə fəbɔm, ghə â tɔŋŋə nə̀ aloʼ “Saʼ kə təsawgoʼ kə Itali.” 2Tə â ngii gaʼ fə̀ŋ n ghəə a Kəzə̀. Wi ghi ghə̂ a wi ghə n ndaw adzəm n ngɔɔmə tsə Kəzə̀. Tə n buu n wɔɔ kə ni gaamə ghə̂ a Təjuu a laa ghə, gɔŋŋə soʼo tə Zə̀ kə nəŋə tədzəm. 3N tsuʼ fə loʼ fə, nə a kɔʼɔ ndow tənəŋə tətəghə n tsə tə, jim wə n bə wi nə tə mə koʼ ndow tsəndəghə ə Kəzə̀ i nyi bənə, dza tə wi nə̀, “Kɔnilus!”

4Tə n sɔʼ laalə ndow tsəndəghə ə Kəzə̀ zey nə itsəŋ, bəb ndow tə wi nə̀, “À loʼ kee a mûkəbii?”

Tsəndəghə zey n beeli ndow wi nə̀, “Gɔŋŋə zə nsə fə wən wə fuunə tə ghə̂ a laa ghə, Zə̀ kə n ney ləghə, tə nya tey ni beeli bə wɔ. 5Nya, tûm ndow ghə̂ ghə n Jopa, ghə ney bə Shimun wən ghə tɔŋŋə nə̀ a loʼ Pita. 6Tə nyi n ndaw Shimun wən tə fwaʼanə n gow tə tənyam. Ndaw wi loʼ n nguŋ ə dzuu i nii zə.”

7Tə tsəndəghə ə Kəzə̀ zey nuulə ndownə sa, Kɔnilus n daŋŋə tɔŋɔ tsu ghə̂ a kəfwaʼ a wi abəghə nsə sawgoʼ u loʼ wə tə â ngii gaʼnə fə̀ŋ n ghəə Kəzə̀, loʼ wù umɔʼ n sawgoʼ tey tə keyyənə wi. 8Tə n tiilə dza ndow ghəə ghən i shinə ghi wi adzəm, tûm ndow ghə n naʼ i Jopa.

Pita keeli ujim bòʼ Kɔnilus

9Ambə tsətsə wey tə a loʼ n fə̀ŋ ə tsə tə, nə ghə̂ ghey Kɔnilus mə tûmnə sə kuʼlə ndow n Jopa, Pita n nuu kɔʼ ndow n gɔŋ kə ndaw ni ndow gɔŋŋə. 10Dzəŋ n kaʼ wi ni zab, tə n ləghə ni zə kəfə. Nghee ghə nam khəələnə fəzəə wə, jim wə n bə wi. 11N jim u tii wə tə n koʼ ndow bikighow kə chi shi ndownə, fə kə loʼ kə tə a loʼ igham n shiə tsuu bə aghəlitsə, nə̀ ghə zəghə tsuu bə n ngaŋŋə tə tii tə təkaykə. 12N fə kə tii kə, nyam tən tədzəm tə bweynə, tə tən tə ghaŋŋənə, nsə nən mən n zəʼlə idəŋ n loʼ tii.

13Tə n zow dzə i loʼ i dza bənə tə wi nə̀, “Nuu kɔʼ a Pita, wə wey i loʼ zə wə fə.”

14Pita n beeli ndow wi nə̀, “Ngaŋ a Mûkəbii, n ka kam zə̂ koʼ tsə fə kə loʼ kə nə̀ kə dzəənu nkee kə key laŋ kə ghə̂ Təjuu kə tuunə nə̀ kə ghə nə̂ zə̂ənə.”

15Dzə̀ ə tii n ghɔɔmə kpiʼi bə tə wi nə̀, “Fə key Zə̀ kə sòw naŋa tsunə, ka tɔŋɔ dzə nə̀ à loʼ fə kə dzəə kə.” 16Dzə̂ ə tii n dza kuulə kə ghə i mɔ̀ʼɔ zə tə wi tənəŋə tətəghə, gham i tii zə n daŋŋə nuu dzəŋŋə kɔʼ ndow idəŋ n bikighow.

17Nghee tow kə nam kpuunə Pita, tə n məʼlə kii ghəə zey jim wən diinə. N nəŋə i tii zə, ghə̂ ghey Kɔnilus mə tûm bənə, n kəŋ koʼ tsu ndaw Shimun, ghə n tey fu n fuʼ u mbàa. 18Ghə n bəb nyi ndow n dzə̀ i taw zə nə̀, “Shimun wən ghə tɔŋŋə nə̀ a loʼ Pita, muunu fa n ndaw ə?”

19Nghee Pita nam kəŋə tow kə ni zowkeeli ghəə zey jim wey diinə, Zay kə Zow kə n dza ndow tə wi nə̀, “Ghə̂ a tey bii atəghə, ghə kəŋŋə bənə wɔ. 20Sey, nuu kɔʼ, wə tsu ndow itən, bɔɔmə dzûmə ndow ghə, kə wə nə səmənə, n təŋkey, a loʼ mə n tûm bənə ghə.”

21Sey, Pita n nuu tsu ndow itən, dza ndow tə ghə̂ a tii ghə nə̀, “N loʼ wù wey ghaa kəŋənə, ghaa fa bə kee?”

22Ghə n beeli ndow wi nə̀, “Wù wey tə loʼnə tow kə sàʼ kə təsawgoʼ tən tə loʼnə fəbɔm wən ghə tɔŋŋə nə̀ a loʼ Kɔnilus tûm bə ghey n səə wɔ. Tə loʼ wù dzuŋu, ngɔɔmə Kəzə̀, tə u khə soʼo kɔʼlə mə n wɔ ghə̂ a naʼ i Təjuu adzəm. Tsəndəghə Kəzə̀ â dza tə wi nə̀ tə tɔŋɔ bə wɔ n ndaw wi, sey, tə̀ tə loʼ ni zow ghəə zey wə khənə ni dza.” 23Pita n ney nyi ndow ghə n ndaw, dza nə̀ ghə gaʼ bweeli tsu fu.

Pita ndow n ndaw Kɔnilus

Tsətsə wey, Pita nsə dzûmə tə Klisto tə loʼ tə n Jopa n nuu dzəŋi ndow ghi ghə. 24Ghə n nyiə ndow n Kayserya n tsuʼ fə loʼ fey. À n loʼ nə̀ Kɔnilus n tɔŋɔ zuŋŋə bə tyim a wi ghə nsə fə a wi ghə, ghə ləmmənə ghə Pita. 25Nghee Pita nyiə ndownə n ndaw, Kɔnilus n kpii ney bə wi, təm ndow tənguʼ n tənnə wi, fuu ndow wi n ngɔɔmə zə. 26Pita n kee ney nuu kɔʼ wi, dza nə̀, “Nuu kɔʼ idəŋ, n loʼ soʼo wù sɔŋtsuʼ tə a loʼ wɔ.” 27Nghee Pita ghɔɔmənə ghi wi, ghə n tsəghə nyi ndow ndaw, Pita n koʼnə ghə̂ ghə n tsuŋ fu tii. 28Tə n dza tə ghə nə̀, “Ghaa tɔʼ khənu nə̀ laŋ kə ghey kə ka bəghəm dzə nə̀ wù Juu təmdzəŋi ghi wù wən tə way wù Juu, nkee ni bwey koʼ wi. Zə̀ kə n kee dii bə tə mə nə̀ kə n nə neynə wù loʼ tə a loʼ wù wey tə dzəənə nkee tə a loʼ wù wey wù Juu way ni təmdzəŋi ghi wi. 29À wey loʼ zuŋ key nghee wə tûm tɔŋɔ bənə mə, mə n bənə nə̀ n ka səm dzə. N loʼ ni kpaʼi keeli ghəə zey wə tɔŋɔnə mə fa tii ə?”

30Kɔnilus n beeli ndow wi nə̀, “A feeli u loʼ wey, n nəŋə izən soʼo n tsə tə, nə tənəŋə tətəghə, nə n gɔŋŋə n ndaw zuŋ, wù loʼ n gbələ bən shi kɔʼ n sə̂ kuŋ nə̀ tə dzəŋə keeli ndzə̂ tə nyiələ tə nə uwû. 31Wù wey n dza tə mə nə̀, ‘Kɔnilus, Zə̀ kə n zow gɔŋŋə zə zə̀, tə u koʼ soʼo jìi zey wɔɔ kə kə̀ buunə tii ni fuu gaamə zə tə ghə̂ a laa ghə. 32Tûm ndow ghə̂ ghə n Jopa, ghə ney bə Shimun wən ghə tɔŋŋə nə̀ a loʼ Pita. Tə muu n ndaw Shimun wən tə fwaʼanə fə wə n gow tə tənyam, ndaw wi loʼ n nguŋ ə nali kə dzuu zə.’ 33Mə n daŋŋə tûm tɔŋɔ bənə wɔ. Wə ghəŋŋə dzɔbnu ni bə. Nya ghey n təmdzəŋi bə n sə̂ K-a-zə̀ ni zəllə ghəə ghey Mûkəbii tûm nə wɔ nə̀ wə bə naʼa tə ghey.”

Ghə̂ ghey ghə way ghə̂ a Təjuu a zow tûm i dzuŋu zə n wɔ Pita

34Ambə Pita zow tsunə ghəə ghən, tə n zey tsu ni ghɔɔmə nə̀, “Mə n ndzəm koʼ nya nə̀ Zə̀ kə badla way kpey wə, 35tə bəghəm naŋŋə aghə̂ adzəm, abə wù tii ngɔɔmə dzənə wi ghəŋŋə soʼo ghəə ghey a loʼnə tsətsəghə. Tə ney way n taŋ nə̀ wù tii shi n naʼ i ghaa zə. 36Ghaa khənu nə̀, Zə̀ kə â tûm bə tûm wi tə ghə̂ ghə Izree ghə, naʼlə ndow tûm i dzuŋu zə bòʼ ibuulə n bam i Yeso Klisto. Tə loʼ Mûkəbii tə ghə̂ ghə adzəm. 37Ghaa khənu ghəə a səŋi ghey ghə â neynə bənə kə n naʼ i Judeya idzəm, ni ney nuu tsu n Galili nghee Jɔn â naʼa may tsunə tûm nə̀ ghə̂ a kweyyə nuu bə fə̀ŋ tə ghə n ghəə a bəbə ghə, ghə ney mmuu n Kəzə̀. 38Ghaa khənu nghee Zə̀ kə â tsuʼ naŋanə Yeso, wù Nazaled, fuu tsu wi n Zay kə Zow kə nsə daʼa kə. Ghaa khə soʼonu nghee tə â bwey kaabənə, ghəŋŋə ndzuŋ, baŋŋə ghə̂ ghən adzəm ghə a loʼ nə n tənnə daʼa kə avəətsəə, n təŋkey, Zə̀ kə â loʼ ghi wi. 39Ghey loʼ ghə təmi tiilə n ghəə ghən adzəm tə â ghəŋənə n naʼ i ghə̂ a Təjuu nsə n Yerosalem. Ghə n wey tsu wi nə ghə baa n zat kə fəkaʼ. 40Zə̀ kə n kee zhəm dzəŋŋə bə wi nə ntsuʼu ntəghə, tə n ghəŋə soʼo nə̀ tə dii bə uwû. 41Tə â ka dii dzə wû wə tə ghə̂ ghə adzəm, tə â dii bə kə tə ghə̂ ghən Zə̀ kə â say naŋanə, tɔŋɔ ghey ghən ghey â zə̂nə, mə̂ dzəŋi soʼo ghi wi nghee tə â zhəm dzəŋŋə bənə nə ivə. 42Tə n dza nə̀ ghey i naʼlə ndow tûm i dzuŋu zə tə ghə̂ ghə, təmi tiilə ndow soʼo tə̀ ghə̂ ghə nə̀ tə loʼ wù wən Zə̀ kə naŋa nə̀ tə i saʼa ghə̂ ghən ghə loʼnə utaw nsə a ghən ghə kpu dzənə. 43Tûm tə Kəzə̀ tədzəm tə mâ ghɔɔmə bòʼ wi dza nə̀ ghə̂ ghey ghə bəghəm nə tə wi, Zə̀ kə i neyzəənu ghəə a ghə a bəbə ghə n bam i zəd i wi.”

Ghə̂ ghey ghə way ghə̂ a Təjuu a keeli Zay kə Zow kə

44Nghee Pita nam ghɔɔmənə, Zay kə Zow kə n tsu bə n kow ghə̂ ghey adzəm ghə zəllənə tûm wi. 45Dzuu zə n zum ghə̂ a Təjuu ghən ghə bəghəmnə tə Klisto, ghə â nuu dzəŋi bənə ghi Pita n naʼ i Jopa ni koʼ nə̀, Zə̀ kə n fuu soʼo Zay kə Zow kə tə ghə̂ ghən ghə way ghə̂ a Təjuu ghə. 46N təŋkey ghə â zow ghə, ghə ghɔɔmənə lii tə təghɔɔmə tə, fuu ukali tə Zə̀ kə.

Pita n daŋŋə ghɔɔmə shi kɔʼ nə̀, 47“N khənu nə wù loʼ way dzə fa tə loʼ ni tuu nə̀ ghə̂ ghən ka ney mmuu n Kəzə̀ mə nə mmuu n təŋkey, ghə n keeli soʼo Zay kə Zow kə tə a loʼ saa.” 48Sey, tə n dza nə̀ ghə fuu ghə n mmuu n Kəzə̀ mə n zəd i Yeso Klisto. Nghee tə ghə̂ ghey ney kɔʼnə mmuu n Kəzə̀ mə, ghə n daŋŋə dza nə̀ Pita doʼo kəŋə ndow ghi ghə n tsuʼu n loʼ mə.

Currently Selected:

Kəfwaʼ 10: WEH

Highlight

Copy