Mak 8

Yeso ndee bɔ ètɔɔshin kwɛ̀

(Mat 15:32-39)

1À ne efwɔ antiri endzobo yɛ, ebaŋabɔ tsɛrɛ wu zeʼe abwaʼ Yeso. Aŋu angɔ à ne me le ala deʼ é nde bo ngɛ, Yeso zɔʼ bɔ bɛɛrɛ abwa mɔ gà ebe angɔ kpe, 2“Mmɛ we le eklasɔn ene abɔ bɔnɔ, mbɔʼnga angɔ shi tsɔmɔ nè mmɛ efwɔ enji tɛd ne me nde ala deʼ bo. 3Ma mmɛ saa angɔ abɛ nè chwɔ, angɔ ba da go anji mbɔʼnga adeʼ ne zeʼe ezhin dɔɔdɔɔ.” 4Bɔ bɛɛrɛ abwa biiri kpe, “Éngɛ, efwɔ antuʼru abɛ na azɔnɔ nɔ, ngwo wa ngo zɔ ende akɛkɛ awe é ndee bɔ anyi?” 5Yeso biiri kpe, “Mbɔn ne le ebɔʼ ǹgoŋ mò?” Angɔ gíì kpe, “Esàambyɛ.” 6Engɔ gâ ebe ebaŋagho wɛ kpe e tsɔmɔ a chwâ. Éngɛ, engɔ nu ebɔʼ ǹgoŋ esàambyɛ byɛ, è ndɛ̀ʼ ebɛrɛ ebe Ngwe, è bɔʼrɔ ndɛ̀ʼ ebe bɔ bɛɛrɛ abwa mɔ kpe e gɛbbɛ ndɛ̀ʼ ebe bɔ, angɔ gɛrɛ le éngɛ. 7Â gɛrɛ ne le bwo Shuuru deʼ, nkirinkin engɔ ndɛ̀ʼ ebɛrɛ ebe Ngwe gɛ̀rɛ̀ ga ebe bɔ bɛɛrɛ abwa mɔ kpe e gɛbbɛ ebe angɔ. 8Bɔ à nde zo, éngɛ bɔ bɛɛrɛ abwa shunu ènkàm sàambyɛ ene etseʼre yɛ â me tye ngɛ 9Abɔ byɛ â mwɔ aŋu ngɛ a ne bwɛrɛ na bɔ ètɔɔshin kwɛ̀ nɔ. Engɔ saa angɔ achim. 10Engɔ nyii efwɔ ekpe, mane bɔ bɛɛrɛ abwa mɔ gɛ̀rɛ̀ ngɔ̀ɔ abɛ Dalmanuta.

Bɔ Farisii ga kpe Yeso le anɛ̂ ebwa

(Mat 16:1-4)

11Bɔ Farisii zèʼ sa fɛ̀ɛrɛ abwa nè Yeso, é zhweʼre engɔ, angɔ biiri ebe engɔ kpe è tee anɛ̂ ebwa deʼ endɔɔ yɛ a me nyɛrɛ à zeʼe ezob ngɛ. 12Engɔ kwaʼ zhwɛ̀ɛrɛ̀ eghɛʼ è gà kpe, “Ekyɛ zɔnɔ na bìiri abwa mbɔʼ enɛ̂ ezob ene yɛ ngà? Mmɛ gà éŋwaʼa endɔn, tsɛʼ anɛ̂ deʼ mmɛ ma tee ene abiiri zɔnɔ bo.” 13Éngɛ engɔ saara angɔ gɛ̀rɛ̀ nyii efwɔ ekpe è kpɛ̀n ngɔ̀ɔ anjid angli ze.

Àfòo bɔ Farisii mane engɔ Hɛrɔd

(Mat 16:5-12)

14Éngɛ bɔ bɛɛrɛ abwa à ne dzɛrɛ é nu ǹgoŋ, à tye ma abɔʼ ŋwaʼ yɛ à mwɔ efwɔ ekpe ngɛ. 15Yeso gâ ebe angɔ kpe, “Mbɔn nu azɔm è zɔmmɔ angɔn ene àfòo ǹgoŋ bɔ Farisii mane engɔ Hɛrɔd.” 16Â na ga àmɔ̀ àmɔ̀ kpe, “Engɔ na gà mbɔʼnga ntsɔ ne le ǹgoŋ deʼ bo.” 17Yeso à nɛɛ abwa yɛ angɔ à ma gà ngɛ è bìiri ebe angɔ kpe, “Mbɔn na gà mbɔʼ ǹgoŋ yɛ mbɔn ne me le bo ngɛ? É bwɛrɛ endzobo zɔnɔ mbɔn ke shi nɛɛ ebwa bo? Mbɔn ne kaama ńtara ntsɔn ene yɛ? 18Mbɔn be le aghɔɔ shi ne ma zɔ bo, gɛ̀rɛ̀ le ètimi shi ne ma zo bo. Ayɛ me le mbɔn ne ma zhùŋù ebwa bo? 19Èndzobo chɛ mmɛ à bɔʼrɔ ebɔʼ ǹgoŋ tan ebe bɔ ètɔɔshin tan ngɛ, mbɔn à shunu ènkàm byɛ a me shwe ene etseʼre ngɛ emo?” Angɔ gíì kpe, “E wum ǹchwɔ̀ fyee.” 20“Éngɛ endzobo mmɛ à bɔʼrɔ ebɔʼ ǹgoŋ sàambyɛ ebe bɔ ètɔɔshin kwɛ̀ ngɛ, mbɔn à shunu ènkàm byɛ â me shwe ene etseʼre ngɛ emo?” Angɔ gíì kpe, “Esàambyɛ.” 21Engɔ gâ ebe angɔ kpe, “Mbɔn à dà ke shi nɛɛ bo?”

Yeso glì àfò aghɔɔ deʼ a Bɛtsayda

22Yeso mane bɔ bɛɛrɛ abwa mɔ bwɛn Bɛtsayda, bɔ deʼ nu àfò aghɔɔ deʼ zeʼe bii kpe Yeso mɔmɔ engɔ. 23Engɔ nu egho wɛ abwobwo gli efwɔ abɛ. Èndzobo chɛ Yeso à tudu emɛn aghɔɔ gɛ̀rɛ̀ tɛʼ ebwo mɔ ekwa egho wɛ ngɛ, è biiri ebe engɔ kpe, “Ngwo wa zɔ ala deʼ?” 24Egho wɛ kɔ̀ʼ ekere è gà Kpe, “Mmɛ wa zɔ bɔ, bɛʼngɛ e me mwɔ ne ezɔd e ma zhìrì nɔ.” 25Yeso wu tɛ̀ʼ ebwo mɔ ene aghɔɔ egho wɛ, aghɔɔ ngɔ pɛ, è klàda sa zɔ akwâ anchwɔnchwɔ. 26Yeso sàa engɔ abɛ mɔ, gà ebe engɔ kpe, “Ke wu ngɔɔ efwɔ abɛ bo.”

Petoro gà apɛpɛ mbɔʼ Yeso

(Mat 16:13-20; Luk 9:18-21)

27Yeso mane bɔ bɛɛrɛ abwa mɔ sa ngɔ̀ɔ efwɔ ashimabɛ ebara Kaysarya Filipi. Aŋu â ma ngɔ̀ɔ ngɛ, Yeso biiri ebe angɔ kpe, “Bɔ na ga kpe mmɛ na awɛ?” 28Angɔ gíì kpe, “Abɔ deʼ kpe ngwo ne Eyɔɔ Andɛʼndim, adeʼ kpe ngwo na Elayja, abɔ tsɛrɛ kpe ngwo na Àmɛnɛkɔn Ngwe bi” 29Engɔ biiri ebe angɔ kpe, “Bɛʼngɛ mbɔn mɔ nyɛ? Mbɔn gà mbɔn kpe mmɛ na awɛ?” Petoro gíì gà kpe, “Ngwo na Kristo Ǹtɔmzhwaʼa” 30Yeso gbeʼre eto angɔ kpe e ke sɛɛrɛ ebe gho deʼ mbɔʼ mbè bo.

Yeso gà mbɔʼ ǹgoʼ mane ewu mɔ

(Mat 16:21-28; Luk 9:22-27)

31Yeso gɛrɛ shi klàda aŋu sa tee angɔ kpe Ŋwɔ Gho wa ngo zɔ ǹgoʼ ene abwa akɛkɛ. Bɔ tɛbɛ efwɔ abɛ, m̀fɔ̀rɔ̀ zhiri mane bàtee atsɛrɛ ma bɛ̀ʼrɛ̀ è waʼa engɔ, e ba ngo zhudu engɔ bɛʼngɛ enji sa bwɛn tɛd engɔ wu Zhwɛmɛ. 32Engɔ à ga mbɔʼ ewunɔ apɛpɛ, Petoro nu engɔ tini ngɔ̀ɔ è klàda sa bwe ebe engɔ. 33Bɛʼngɛ, èndzobo chɛ Yeso à ghɛɛbɛ amɔ kede bɔ bɛɛrɛ abwa mɔ ngɛ, è bwe ebe Petoro gà kpe, “Nyɛrɛ efàarà ndza, asatan. Ezhuŋu njɛ ke me zeʼe ebe Ngwe bo, e ne zeʼe ebe bɔ!” 34Yeso zɔ̂ʼ enɔrɔ bɔ mane bɔ bɛɛrɛ abwa mɔ ebara mɔ è gà ebe angɔ kpe, “Mala gho deʼ ma ke é kìrì angu, è tɔrɔ ekwa mɔ beʼ azɔd baʼra mɔ kìrì angu. 35Enga egho wɛ ma ke é pwèerè amɔ ngɛ wa ngo nyim bɛʼngɛ, engɔ wɛ nyiimi etyê mɔ ene egha ndza mane ekɔn ǹchwɔ̀ ngɛ wa ngo tsɔmɔ ekɔʼɔ. 36Ǹtsara deʼ ya ngo mwɔ mala ngwo le ese zɔnɔ gimkpaʼ è nyiimi etyê ngwɛ? 37Na ayɛ gho deʼ me né ndɛ̀ʼ é kobo ene etyê mɔ? 38Mala gho deʼ ma jù mbɔʼ mmɛ mane ega ngu efwɔ ese mane ekyɛ bɔɔbɔɔ zɔnɔ, shi Ŋwɔ Gho gɛrɛ yà jù mbɔʼ engɔ èndzobo chɛ Ŋwɔ Gho ma zeʼe efwɔ enɛŋɛrɛkɛ àtɛ mɔ mane engere pɛ ngɛ.”

Currently Selected:

Mak 8: nbt

Highlight

Copy