Mak 6

E tɔn Yeso a Nazarɛd

(Mat 13:53-58; Luk 4:16-30)

1Yeso nyɛrɛ afwɔ yɛ ngɔ̀ɔ efwɔ abɛ be mɔ ma zhiri nè bɔ bɛɛrɛ abwa mɔ. 2Anji ku̧ru bɔ Juu bwɛn, engɔ klada sa tee bɔ efwɔ etsam abɛ, bɔ akɛkɛ byɛ â zo engɔ ngɛ, â kɔ̂n ghɛʼ, sa bìiri kpe, “Engɔ ne bwɛ abwa zɔnɔ zeʼe awe? Awɛ me ndɛ̀ʼ azɔm zɔnɔ ebe engɔ, karadidi è ma le abwa zodo zodo zɔnɔ? 3Engɔ ke me àkwɔm ezɔd bo? Engɔ ke ma ŋwɔ Meri bo? È gɛrɛ mwɔ ghongwaanɔm Jems, Yɔsɛf, Judas mane Shimun bo? Tsɛ̀ʼ bwɔngwaaye ngɔ anɔ abwaʼ bɔ?” Éngɛ nɔ angɔ bɔɔ etaa. 4Yeso gâ ebe angɔ kpe, “E ba ndɛʼ eghɔ ebe àmɛnɛkɔn Ngwe akwâ gimkpaʼ, à tyetye efwɔ abɛ be mɔ, abwaʼ bwɔngwa mɔ mane efwɔ ndɔ mɔ wɛ Àmɛnɛkɔn Ngwe ne me le eghɔ bo.” 5Engɔ à ke me né wu le abwa zodo zodo deʼ aŋu bo, tyetye ga kpe a tɛʼ abwo mɔ edɔm m̀pùru bɔ aŋwan deʼ è gli angɔ. 6Yeso à di kɔ̀n ene kè lè ebɛrɛ angɔ.

Yeso tɔm bɔ bɛɛrɛ abwa wum ǹchwɔ̀ fyee

(Mat 10:5-15; Luk 9:1-6)

Yeso à ngɔɔ sa zhiri à sɛ̀ɛrɛ̀ ega Ngwe efwɔ ebɛ nè ebɛ. 7Yeso zɔʼ bɔ bɛɛrɛ abwa mɔ tɔm angɔ èfyee fyee è ndɛ̀ʼ ekama ebe angɔ é flì ezhwɛɛrɛ bɔɔbɔɔ. 8È gâ ebe angɔ kpe, “Mbɔn ka ala deʼ nu à tye atam, ka achwɔ̀ nu, ka ǹdi deʼ nu, ke ekɛb deʼ efwɔ akwo ndzɔn nu. 9Mbɔn ge eblanduʼ, mbɔn shi ke ǹdi tsɛrɛ nu. 10Mala mbɔn nyii efwɔ ndɔ deʼ, mbɔn tsɔmɔ aŋu bwɛrɛ anji yɛ mbɔn ma nyɛ̀rɛ̀ efwɔ abɛ yɛ ngɛ. 11Ma mbɔn nyii efwɔ abɛ deʼ e ne nu angɔn kà e zhuru angɔn bo, mbɔn sa nyɛ̀rɛ̀, mbɔn kudu angɔn é tee kpe ànkwɔ̀nɔ̀ angɔ we tye nè angɔ.” 12Angɔ ngɔɔ sɛ̀ɛrɛ̀ ega Ngwe ebe bɔ kpe angɔ kobo ńtara àmɔ̀. 13Angɔ à fli ezhwɛɛrɛ bɔɔbɔɔ efwɔ akwa bɔ, zhwaʼ bɔ aŋwan akɛkɛ ene ngud Olif è gli angɔ.

Aŋu Eyɔɔ Andɛʼndim à ku ngɛ

(Mat 14:1-12; Luk 9:7-9)

14M̀fɔ̀ Hɛrɔd zo abwa zɔnɔ mbɔʼnga ekumu Yeso à shi zhiri sɔ̀ akwâ. Abɔ deʼ ma bwaʼ kpe Eyɔɔ Andɛʼndim shi wu zhwɛm, ne ǹji yɛ è me le ekama ma lè abwa zodo zodo ngɛ. 15Abɔ deʼ ma gà kpe ne Elayja, adeʼ ma gà kpe na Àmɛnɛkɔn Ngwe sam deʼ. 16Èndzobo chɛ Hɛrɔd à zo ngɛ, è ga kpe, “Eyɔɔ wɛ mmɛ à tsɛrɛ ato ngɔ ngɛ shi wu zhwɛm!” 17Hɛrɔd à na zhuŋu éngɛ mbɔʼnga engɔ à shi ndɛʼɛ etsɛrɛ kpe e bere Eyɔɔ koro engɔ è gè a ndɔdzɔm. Engɔ à le éngɛ mbɔʼnga Eyɔɔ à kwɔnɔ engɔ kpe à chi Hɛrɔdyas eye ghongwaanɔm mɔ Firiboʼ. 18Eyɔɔ à na tsɔmɔ à gà ebe Hɛrɔd kpe, “Etsɛrɛ ke tee kpe ngwo chi eye ghongwaanɔm ngwɛ ene aye bo.” 19Éngɛ, Hɛrɔdyas sa wu̧ru Eyɔɔ ma ke é zhu engɔ shi me tsɛʼ aghɛʼ bo. 20Hɛrɔd à na bumu Eyɔɔ mbɔʼnga engɔ à ma gho wɛ à me koʼro efàarà Ngwe gɛ̀rɛ̀ me pɛ Ngwe ma kɔʼɔ engɔ. Engɔ à na doʼo é zo Eyɔɔ, ebwa shi me ga kpe à na dè zhuru engɔ, etaa ngɔ sa sɛ̀ʼɛ engɔ. 21À shi anji deʼ ato Hɛrɔdyas nɔm. À na anji be Hɛrɔd, aŋu à kɛ̂ʼ ebwa ngɛ, è zɔ̂ʼ bɔ kɛ́, eto ebe bɔ mane eto ene bɔ afwɛʼ a Galilii. 22Èndzobo chɛ ŋwɔaye Hɛrɔdyas à nyii a ndɔ chì abin ngɛ, etaa Hɛrɔd sɛnɛ mane àgɔn mɔ. Éngɛ m̀fɔ̀ gâ ebe eŋwɔaye wɛ kpe, “Biiri ka de ma ala ze yɛ ngwo ma ke ngɛ mmɛ wa ndɛ̀ʼ.” 23È kanna abwa ebe engɔ kpe, “Ka de ma ayɛ mmɛ wa ndɛʼ, ka de ma abɛɛ efwɔ abɛ m̀fɔ̀ ndza!” 24Aŋwɔaye wɛ ngɔ̀ɔ biiri ebe áʼɔ̧̀ mɔ kpe, “Mmɛ biiri yɛ?” Áʼɔ̧̀ kpe, “Ato Eyɔɔ Andɛʼndim.” 25Aŋwɔaye wɛ kùmù nyii gà ebe m̀fɔ̀ kpe, “Mmɛ na ke ato Eyɔɔ Andɛʼndim efwɔ m̀pɛ̀rɛ̀ aka enjitsɔ nɔ.” 26Awuu m̀fɔ̀ ku efwɔ. Aŋu à shi kanna efàarà bɔ kɛ mane àgɔn mɔ ngɛ, è ke aghɛʼnji é tɔrɔ tsɛ̀ʼ. 27M̀fɔ̀ saa bɔ ebiri mɔ ekyɛ ŋwaʼ kpe e ndɛʼ ato Eyɔɔ enjitsɔ. Egho wɛ ngɔɔ è tsɛrɛ ato Eyɔɔ efwɔ ndɔdzɔm, 28è ndɛ̀ʼ ebe engɔ efwɔ m̀pɛ̀rɛ̀ aka. À nu ndɛ̀ʼ ebe aŋwɔaye wɛ, è nu ndɛ̀ʼ ebe áʼɔ̧̀ mɔ. 29Aŋu bɔ bɛɛrɛ abwa Eyɔɔ à zo ngɛ, e zeʼ nu akudugho ngɔ è ge efwɔ eshe.

Yeso ndee bɔ ètɔɔshin tan

(Mat 14:13-21; Luk 9:10-17; Eyɔ 6:1-14)

30Bèmpwɔnɔntɔm ghɛɛbɛ klo dù sɔ̀ŋɔ̀ nè Yeso, tòʼrò abwa yɛ angɔ à fwɛʼ gɛ̀rɛ̀ tee ngɛ. 31Abɔ deʼ à na zeʼe, adeʼ ma ngɔ̀ɔ, me tsɛʼ endzobo ebe Yeso mane bɔ bɛɛrɛ abwa mɔ é nde bo. Éngɛ engɔ ga ebe angɔ kpe, “Ntsɔ nyɛrɛ egha bɔ ngɔ̀ɔ afwɔ deʼ yɛ ntsɔ me né mwɔ̀ ntsɔntsɔ ngɛ mbɔʼtye mbɔn ku̧ru mpiʼ.” 32Éngɛ angɔ nyɛnnɛ egha àmɔ̀ efwɔ ekpe è ngɔɔ afwɔ zhiʼ deʼ. 33Bɔ akɛkɛ zɔ aŋu angɔ à nyɛnnɛ ngɛ gɛ̀rɛ̀ nɛ̀ɛ angɔ ekyɛ ŋwaʼ. Éngɛ bɔ zhiri efwɔ ebɛ gimkpaʼ gɛ̀rɛ̀ dɔrɔ ngɔɔ embè gɛ̀rɛ̀ bwɛ̀n afwɔ yɛ dye Yeso sa bwɛrɛ nè bɔ bɛɛrɛ abwa mɔ. 34Èndzobo chɛ Yeso à gli efwɔ ekpe ngɛ, è zɔ angwa enɔrɔ bɔ wunɔ, eklasɔn shwe efwɔ etaa ngɔ ene angɔ mbɔʼnga â ne mwɔ na ǹglɔ̀rɔ̀ kè tsɛʼ ǹkɔʼ nɔ. Éngɛ è klàda sa tee abwa akɛkɛ ebe angɔ. 35Aŋu endzobo à sa fɔɔ ngɛ, bɔ bɛɛrɛ abwa ngɔ zeʼ gà ebe engɔ kpe, “Endzobo shi fɔɔ, afwɔ zɔnɔ gɛrɛ mwɔ zhiʼ. 36Saa bɔ shi ngɔɔ efwɔ asɔmɔ mane ebɛ byɛ ebara ngɛ mbɔʼtye e zɔn ala deʼ nde.” 37Yeso gíì ebe angɔ kpe, “Mbɔn mɔmbwo ndɛʼ ala deʼ shi angɔ nde.” Angɔ biiri kpe, “Ngwo na ke kpe mbyɛɛ ngɔɔ nu ètɔɔshin fyee zɔn ǹgoŋ é ndee angɔ anyi?” 38Yeso gâ ebe bɔ bɛɛrɛ abwa mɔ kpe mbɔn ngɔɔ biiri ebe angɔ kpe, “E ne le ebɔʼ ǹgoŋ mo?” Èndzobo chɛ angɔ à ngɔɔ kɔ̀ʼrɔ̀ ngɛ, e ga kpe, “Ebɔʼ ǹgoŋ tan mane shuuru fyee.” 39Éngɛ Yeso gâ ebe bɔ bɛɛrɛ abwa mɔ kpe mbɔn le shi angɔ bɔ gimkpaʼ gɛbbɛ àmɔ̀ ene ǹtìmìri, e tsɔmɔ a chwâ edɔm egɛ. 40Éngɛ abɔ byɛ tsɔmɔ a chwâ ene ǹtìmìri, adeʼ me ekoko, adeʼ èsama fyee tɛʼ wum. 41Éngɛ Yeso nu ebɔʼ ǹgoŋ byɛ mane Shuuru chɛ è kɔ̀ʼ ekere ezob ndɛ̀ʼ ebɛrɛ ebe Ngwe, è bɔ̀ʼrɔ ndɛ̀ʼ ebe bɔ bɛɛrɛ abwa mɔ kpe e gɛbbɛ ndɛ̀ʼ ebe angɔ. È gɛrɛ gɛ̀bbɛ̀ Shuuru fyee chɛ ndɛ̀ʼ ebe angɔ. 42Éngɛ bɔ gimkpaʼ à nde e zo. 43Éngɛ bɔ bɛɛrɛ abwa bwɛ atseʼre ǹgoŋ mane Shuuru e shwe efwɔ ènkàm wum ǹchwɔ̀ fyee. 44Nùrù bɔ byɛ â ndee ngɛ a na bɔ ètɔɔshin tan.

Yeso zhin edɔm ndim

(Mat 14:22-33; Eyɔ 6:15-21)

45Yeso à le bɔ bɛɛrɛ abwa mɔ ngɔɔ nyii efwɔ ekpe ekyɛ ŋwaʼ, gɛ̀rɛ̀ ngɔɔ embè ngɔ a Bɛtsayda aŋu engɔ à sa sàa bɔ achim ngɛ. 46Aŋu engɔ à gamma ebe bɔ ngɛ, engɔ ngɔɔ edɔm egu é tsàʼrà Ngwe. 47Endzobo afub à sa koo ngɛ, ekpe à ne mwɔ efwɔ aghɛɛghɛɛ angli, engɔ me tye a chwâ ewee eji gho zhiʼ. 48Yeso zɔ kpe bɔ bɛɛrɛ abwa mbè ebe efwɔ enyii, mbɔʼnga awawa à ma tiri ekpe angɔ. À sa bwɛrɛ ne enyɔ̀m tɛd é ngo bwɛrɛ ne enyɔ̀m mfo enchwenchwe nɔ, è zeʼe ebe angɔ mà zhiri edɔm ndim, engɔ à na ke fɔɔ angɔ é ngɔ̀ɔ. 49Bɛʼngɛ angɔ zɔ engɔ ma zhìrì edɔm ndim, angɔ tsɛɛ mà zhùŋù kpe ne ezô. 50Èklɔ̀ bere angɔ aŋu endzobo â zɔ́ engɔ ngɛ, Yeso gâ ebe angɔ egha ŋwaʼ kpe, “Mbɔn klini etaa! Na mmɛ! Mbɔn ka bum!” 51Éngɛ engɔ nyii efwɔ ekpe nè angɔ, awawa wɛ gɛrɛ ba tuuu. Bɔ bɛɛrɛ abwa à kɔ̂n, 52mbɔʼnga angɔ à ke shi nɛɛ ǹji ene é ndee bɔ ètɔɔshin tan bo, e kaama ńtara àmɔ̀.

Yeso gli bɔ aŋwan a Gɛnɛsarɛd

(Mat 14:34-36)

53Aŋu angɔ à kpɛn angli bwɛrɛ efwɔ chwâ Gɛnɛsarɛd ngɛ, angɔ tyɛ ekpe àmɔ̀ aŋu. 54Aŋu angɔ à sa gli efwɔ ekpe ngɛ, bɔ nɛ̀ɛ Yeso egha ŋwaʼ. 55Éngɛ, angɔ dɔrɔ ngɔ̀ɔ efwɔ antiri abɛ yɛ gimkpaʼ, bwɛ bɔ aŋwan edɔm akwaʼa zeʼe ebe engɔ akwâ yɛ engɔ à mwɔ ngɛ. 56Éngɛ, akwâ gimkpaʼ yɛ engɔ à ngɔ̀ɔ ngɛ, ka me efwɔ antiri abɛ, kà me efwɔ abɛ, kà akwâ ze, bɔ à naa bɔ aŋwan ati ewu̧ gɛ̀rɛ̀ buʼ ebwo ebe engɔ kpe è le shi angɔ mɔmɔ adzɔ ǹdi ngɔ, éngɛ bɔ gimkpaʼ byɛ à mɔmɔ ǹdi ngɔ ngɛ, bwada.

Currently Selected:

Mak 6: nbt

Highlight

Copy