Luk 22

Judas bɛ̀rɛ é fɛ̀n Yeso

(Mat 26:1-5; Mak 14:1, 2; Eyɔ 11:45-53)

1Endzobo a shi tini ene antara ǹgoŋ ketsɛʼ àfòo wɛ â ma zɔʼrɔ kpe antara fɔɔ ekere ngɛ. 2M̀fɔ̀rɔ̀ zhiri mane bàtee atsɛrɛ à na zɛʼɛ aghɛʼnji é zhudu Yeso, shi ma bumu bɔ. 3Éngɛ asatan à nyii efwɔ etaa Judas wɛ â ma zɔʼrɔ kpe Iskariyɔd, gɛ̀rɛ̀ mwɔ gho bi abwaʼ bɔ bɛɛrɛ abwa wum ǹchwɔ̀ fyee ngɛ. 4Éngɛ Judas ngɔ̀ɔ kla m̀fɔ̀rɔ̀ zhiri mane eto efwɔ ndɔngwe gɛ̀rɛ̀ tòʼrò ebe angɔ aŋu engɔ me né fɛ̀n Yeso ebe angɔ ngɛ. 5Â gɛnɛ amɔ gɛ̀rɛ̀ bɛ̀rɛ é ndɛʼ ekɛb ebe engɔ. 6Judas à bɛrɛ gɛ̀rɛ̀ klada sa zɛʼɛ aghɛʼ nchwɔnchwɔ é ndɛ̀ʼ Yeso ebe angɔ wɛ ebaŋabɔ ma ngo me tsɛʼ aŋu bo ngɛ.

Ende Ngudu

(Mat 26:17-25; Mak 14:12-21; Eyɔ 13:21-30)

7Anji à koʼ ene ǹgoŋ ketsɛʼ àfòo wɛ à ma ngo é kɛmɛ bwɔ ǹglɔ̀rɔ̀ na ala etɔ̧ɔrɔ ene Antara fɔɔ ekere ngɛ. 8Yeso saa Petoro mane Eyɔɔ ga kpe, “Mbɔn ngɔɔ ndèerè ende Antara fɔɔ ekere ebe bɔ wɛ ntsɔ ma ngo é nde ngɛ” 9Angɔ biiri ebe ngɔ kpe, “Ngwo na ke kpe mbyɛɛ ngɔ̀ɔ ndèerè awe?” 10Engɔ gii kpe, “Aŋu mbɔn ma nyiinyii efwɔ abɛ ngɛ, gho deʼ wa ngo kla angɔn me beʼe shuʼndim. Mbɔn kiri engɔ efwɔ ndɔ yɛ è ma nyii ngɛ; 11è ga ebe egho wɛ me le ndɔ ngɛ kpe ‘Atwɔndɔ àgɔn yɛ mmɛ ma ngo nde antara Fɔɔ ekere efwɔ nè bɔ bɛɛrɛ abwa mbu ngɛ a ze?’ 12È wa ngo tee angwa atwɔndɔ deʼ ekere efwɔ ndɔ yɛ a shi nɔɔ nè ela gimkpaʼ efwɔ. Mbɔn ndeere ela gimkpaʼ.” 13Angɔ ngɔ̀ɔ dù zɔ abwa gimkpaʼ aŋu Yeso à shi ga ngɛ, gɛ̀rɛ̀ ndèerè ende antara fɔɔ ekere.

Ende Ngwe

(Mat 26:17-25; Mak 14:12-21; Eyɔ 13:21-30)

14Endzobo à koʼ, Yeso nu afwɔ mɔ edɔm echud ende mane bèmpwɔnɔntɔm. 15È shi ga ebe angɔ kpe, “Mmɛ shi kidi ghɛʼ é nde ende antara fɔɔ ekere wunɔ nè mbɔn de sa ngo zɔ enyii? 16Mmɛ ga kpe endɔn, mmɛ yà ne wu nde ende wunɔ bo bwɛn èndzobo chɛ ǹji ene ende wunɔ ma yà gli éŋwaʼa efwɔ ebwa M̀fɔ̀ Ngwe ngɛ” 17Éngɛ, Yeso nu ǹtoʼ, tsàʼrà Ngwe, è ndɛʼ ebe bɔ bɛɛrɛ abwa mɔ ga kpe, “Mbɔn kwo mɛʼrɛ mbɔrɔmbɔn. 18Shi mmɛ ga endɔn kpe enyɛrɛ enjitsɔ sa ngɔ̀ɔ embè, mmɛ yà ne wu ŋwɔ amɔm mɔnɔ bo bwɛn èndzobo chɛ ebwa M̀fɔ̀ Ngwe ma yà zeʼe ngɛ.” 19Engɔ gɛrɛ nu ǹgoŋ, tsàʼrà Ngwe, gɛ̀rɛ̀ bɔʼ ndɛʼ ebe angɔ ga kpe, “Ewunɔ ne ekwa ngu mmɛ me ndɛʼɛ mbɔʼ mbɔn. Mbɔn sa le énde akyɛ gimkpaʼ sa zhuŋu angu.” 20Nkirinkin aŋu â mɛɛrɛ nde ngɛ, e ndɛʼ ǹtɔʼ ebe angɔ sa ga kpe, “Ǹtoʼ mɔm zɔnɔ ne etsɛrɛ fe yɛ Ngwe me shi ene anɔm ndza mbɔʼ mbɔn ngɛ. 21Mbɔn sa kɔʼ! Egho wɛ me fɛrɛ angu ngɛ we edɔm echud ende anɔ nè mmɛ! 22Ŋwɔ gho wa ngo ku aŋu Ngwe à shi tsɛrɛ ngɛ, bɛʼngɛ ànkwɔ̀nɔ̀ yà mwɔ ebe egho wɛ è me fɛrɛ engɔ ngɛ.” 23Angɔ klada sa biiri àmɔ̀ àmɔ̀ kpe egho wɛ me né le m̀pè ebwa zɔnɔ ngɛ na awɛ.

Efɛɛrɛ mbɔʼ afwɔ gho kɛ́

24Efɛɛrɛ à gɛrɛ gli abwaʼ angɔ mbɔʼ egho wɛ é me ne sa kede kpe è we fɔɔ bɔ gimkpaʼ ngɛ. 25Yeso gíì ebe angɔ kpe, “M̀fɔ̀rɔ̀ ebɛbɔ ba ngbèdè bɔ amɔ, eto gɛrɛ ma bɛ̀rɛ akumu kɛkɛ kpe mbɔɔ na asɔrɔ ebe bɔ! 26Bɛʼngɛ, e ke mwɔ ngɛ nè mbɔn bo. Ankɔmɔ ngɛ, gho kɛ́ abwaʼ ndzɔn mwɔ na adɔ̀kpara nɔ. Ato gɛrɛ mwɔ na gho afwɛʼ nɔ. 27Gho kɛ̀ ne engɔ wɛ è ma tsɔmɔ edɔm echud é nde ngɛ kà engɔ wɛ è ma zeʼe nè ende ngɛ? Ne engɔ wɛ ma tsɔmɔ edɔm echud é nde ngɛ. Bɛʼngɛ mmɛ na abwaʼ ndzɔn na gho afwɛʼ nɔ. 28Mbɔn na abɔ byɛ â mwɔ ebara mfu èndzobo chɛ â ma nyii angu ngɛ. 29Ebwa m̀fɔ̀ wɛ àtɛ ngu a ndɛʼ ena ngɛ, mmɛ gɛrɛ wa ndɛʼ endɔn. 30Mbɔn yà nde gɛ̀rɛ̀ ŋwɔ edɔm echud ende ndza efwɔ ebwa m̀fɔ̀ ngu, gɛrɛ ma tsɔmɔ edɔm etan m̀fɔ̀rɔ̀ sa klini akla wum ǹchwɔ̀ fyee bɔ lsrael.”

Yeso toʼro na aŋu Petoro ma ngo tɔn engɔ ngɛ

(Mat 26:31-35; Mak 14:27-31; Eyɔ 13:36-38)

31“Shimun! Shimun! Asatan a shi bii é kpèrè angɔn bɔ gimkpaʼ, é kuuru bɔ ǹchwɔ̀ chidi abwaʼ bɔ bɔɔbɔɔ na e ma kùurù ǹkùru gwo nɔ. 32Bɛʼngɛ, mmɛ shi tsàʼrà Ngwe ato njɛ, Shimun, kpe ebɛrɛtaa njɛ kam, endzobo ngwo shi bɛrɛ anyimabwa njɛ è wu zeʼe ena ngɛ, ngwo twaʼra bwɔngwaanɔm mbyɛ.” 33Petoro gii kpe, “Masakɛ, mmɛ we ndèerè angu é ngɔ̀ɔ dzɔm kà é ku nè ngwo.” 34Yeso gíì kpe, “Mmɛ ga ngɛ, Petoro, èkoʼo fa sa ngo tsoʼo ǹklì ànchwɔ̀, ngwo shi ga akyɛ tɛd kpe ngwo ke nɛɛ angu bo.”

Ǹtɛʼ mane ebyeŋwɔ̀

35Éngɛ Yeso biiri ebe angɔ kpe, “Endzobo mmɛ à tɔm angɔn tɔrɔ ǹtɛʼ ekɛb, tɔrɔ achwɔ̀, tɔrɔ ebla ngɛ mbɔn a ke ala deʼ tsɛ̀ʼ?” Angɔ à gii kpe, “Gbaʼ” 36Engɔ ga eba angɔ kpe, “Enjitsɔ egho wɛ me le achwɔ̀ ekɛb kà ǹtɛʼ ngɛ, è nu! Egho wɛ ne me le ebyeŋwɔ̀ bo ngɛ, è fɛrɛ ǹdi mɔ è zɔn edeʼ anyi. 37Mmɛ ga endɔn kpe ega Ngwe wɛ à me ŋwɛʼrɛ kpe, ‘Â ta engɔ abwaʼ bɔ nyimabwa ngɛ, e gli éŋwaʼa, mbɔʼnga à ne ŋwɛʼrɛ mbɔʼ mmɛ.’ ” 38Bɔ bɛɛrɛ abwa ga kpe, “Koʼo! Masakɛ, abyeŋwɔ fyee zɔ?” Engɔ gii kpe, “Aye koʼo.”

Yeso tsaʼra Ngwe edɔm Egu Olif

(Mat 26:36-46; Mak 14:32-42)

39Yeso à ngɔ̀ɔ ese aŋu à ma doʼo à ngɔ̀ɔ ngɛ edɔm egu olifs nè bɔ bɛɛrɛ abwa mɔ. 40Aŋu angɔ à bwɛn afwɔ yɛ ngɛ è ga ebe angɔ kpe, “Mbɔn tsàʼrà Ngwe kpe mbɔn ke turu efwɔ akwa̧ʼra bo.” 41Engɔ dana ngɔ̀ɔ mpiʼ, è chwɔ̀n etongu mɔ a chwâ tsàʼrà Ngwe kpe, 42Àtɛ, me ezhuŋu njɛ, nu ǹtoʼ enyii zɔnɔ ena, ke me ezhuŋu ndza bo, à mwɔ me ènjɛ̂. 43Angere kla ezob, tam efàarà ngɔ gɛ̀rɛ̀ kaama engɔ. 44Efwɔ ǹgoʼ kamakam, è twaʼra amɔ tsàʼrà Ngwe ekamakama, eŋlimi ngɔ sa dɔ̀ŋɔ a chwâ na anɔm nɔ. 45Èndzobo chɛ engɔ à tam ene atsaʼra Ngwe ngɛ è ngɔ̀ɔ kla bɔ bɛɛrɛ abwa mɔ e me fuumu m̀bwɛrɛ ene èklɔ̀. 46Engɔ biiri ebe angɔ kpe, “Mbɔn bwɛnɛ ayɛ? Mbɔn tamma ekere tsàʼrà Ngwe mbɔʼtye mbɔn ne turu efwɔ akwa̧ʼra bo.”

E bere Yeso

(Mat 26:36-46; Mak 14:32-42)

47Aŋu engɔ à ma bli à ga ngɛ, enɔrɔ bɔ bwɛn me tyɛ achim Judas wɛ à me egho bi abwaʼ bɔ bɛɛrɛ abwa ngɔ ngɛ. Judas tam efàarà Yeso, è bàa engɔ. 48Éngɛ Yeso shi biiri ebe ngɔ kpe, “Judas, ngwo wa ngo fɛrɛ Ŋwɔ Gho ene ebaa?” 49Èndzobo chɛ abɔ byɛ â mwɔ nè engɔ ngɛ â zɔ ebwa wɛ à ma ngo gli ngɛ, e biiri ebe engɔ kpe, “Masakɛ, mbyɛɛ chwaʼra abyeŋwɔ njɛɛ?” 50Egho bi abwaʼ angɔ fɔ̀rɔ̀ àtimi abwo anɔm gho afwɛʼ angwa zhiri. 51Yeso ga kpe, “E koʼo engɛ̂.” È nu àtimi ngɔ mɛ̀ɛrɛ̀ aŋu, gli engɔ. 52Yeso ga ebe m̀fɔ̀rɔ̀ zhiri, bɔ kɛ́ efwɔ ndɔngwe kɛ̀ mane eto efwɔ abɛ byɛ â me zeʼ é bèrè engɔ ngɛ kpe, “Mbɔn ne zeʼ nè abyeŋwɔ mane entiritam é bèrè angu na mmɛ mwɔ gho kèzobwa nɔ. 53Mmɛ à na mwɔ nè mbɔn efwɔ ndɔngwe kɛ̀ enji gimkpaʼ mbɔn ne zhweʼre é bere angu bo. Bɛʼngɛ ne endzɔn endzobo zɔ̀ é le ebwa mbɔn ma ke ngɛ aŋu ekama efwɔ ǹklì shi nu afwɔ ngɛ.”

Petoro tɔn Yeso

(Mat 26:57, 58, 69-75; Mak 14:53, 54, 66-72; Eyɔ 18:12-18, 25-27)

54Angɔ à bèrè Yeso nu engɔ ngɔ̀ɔ a ndɔ angwa zhiri. Petoro à na kìrì à zeʼ achim. 55Â ne ge éwu aghɛɛghɛɛ emwɔ m̀pàrà bɔ ma zhwa. Petoro à gɛrɛ ngɔ̀ɔ kla abɔ byɛ â me kɛɛrɛ ma zhwa éwu ngɛ. 56Èndzobo chɛ aŋwɔaye afwɛʼ bi à zɔ Petoro ngɛ, engɔ nɔm aghɔɔ ene engɔ gà kpe, “Egho wunɔ à gɛrɛ ne mwɔ nè Yeso.” 57Bɛʼngɛ Petoro à tɔn gà kpe, “Aye, mmɛ de ke nɛɛ engɔ bo” 58Afwɔ sa ndada mpiʼ gho deʼ nɛɛ Petoro gɛrɛ gà ebe engɔ kpe, “Ngwo gɛrɛ ne egho bi abwaʼ engɔ.” Bɛʼngɛ Petoro gii kpe, “Anɔm, mmɛ ke mwɔ egho bi bo.” 59Enyɔ̀m ŋwaʼ fɔɔ anɔm tsɛrɛ fɛɛrɛ ekamakama gà kpe, “Tsɛ̀ʼ ebwa deʼ e wu sa di kpe egho wunɔ à ne tsɛʼ nè Yeso bo bo mbɔʼnga engɔ gɛrɛ na gho Galilii.” 60Bɛʼngɛ Petoro gii kpe, “Anɔm, mmɛ de ke nɛɛ ebwa ngwo ma gà ngɛ bo.” Aŋu Petoro à ma bli à gà ngɛ, ekyɛ ŋwaʼ èkoʼo tsoʼ. 61Yeso ghɛ̀ɛbɛ amɔ kede Petoro efwɔ aghɔɔ. Petoro gɛrɛ zhuŋu kpe Yeso à shi ga énde kpe, “Èkoʼo fa sa ngo tsoʼo ǹklì ànchwɔ̀ ngwo shi ga akyɛ tɛd kpe ngwo ke nɛɛ angu bo.” 62Petoro à ngɔɔ ese kù̧u karadidi!

E tsɔʼ Yeso gɛ̀rɛ̀ sɔm engɔ

(Mat 26:67, 68; Mak 14:65)

63Abɔ byɛ â ma kɔʼ Yeso ngɛ sere gɛ̀rɛ̀ sɔm engɔ. 64Angɔ à koro aghɔɔ ngɔ gɛ̀rɛ̀ wuru engɔ sa biiri ebe engɔ kpe, “Toʼro kpe awɛ à wuru awɛ?” 65Angɔ ndwaʼa engɔ ene abwa tsɛrɛ akɛkɛ.

E nu Yeso ngɔɔ efàarà m̀pàrà

(Mat 26:59-66; Mak 14:55-64; Eyɔ 18:19-24)

66À shi endzobo nchi eto efwɔ abɛ, m̀fɔ̀rɔ̀ zhiri mane bàtee atsɛrɛ sɔŋɔ nu Yeso ngɔ̀ɔ efwɔ ndɔ m̀pàrà. 67Angɔ ga ebe Yeso kpe, “Toʼro endyɛɛ, ngwo na Ǹtɔmzhwaʼa?” Yeso gíì kpe, “Mala mmɛ toʼro endɔn mbɔn ke ma ngo bɛrɛ bo. 68Mala mmɛ gɛrɛ biiri ebwa deʼ endɔn mbɔn ba kà gii. 69Bɛʼngɛ enyɛrɛ enjitsɔ sa ngɔ̀ɔ embè, Ŋwɔ Gho wa ngo tsɔmɔ afwɔ eghɔ kɛ́ ebara Angwanìm Ngwe.” 70Angɔ bɔ gimkpaʼ biiri ebe engɔ kpe, “Éngɛ ga kpe ngwo na ŋwɔ Ngwe?” Engɔ gii ebe angɔ kpe, “Mbɔn a gà engɛ̂.” 71Angɔ shi gà kpe, “Ntsɔ ke ma wa ke entsɛ deʼ bo. Ntsɔ bɔ gimkpaʼ shi zo ebwa wɛ engɔ shi ga ngɛ!”

Currently Selected:

Luk 22: nbt

Highlight

Copy