Luk 20

Bɔ biiri mbɔʼ ekama Yeso

(Mat 21:23-27; Mak 11:27-33)

1Anji deʼ Yeso à na tee abwa gɛ̀rɛ̀ ma sɛ̀ɛrɛ̀ ekɔn ǹchwɔ̀ efwɔ ndɔngwe kɛ̀, m̀fɔ̀rɔ̀ zhiri, bàtee atsɛrɛ mane bɔ tɛbɛ zeʼ biiri ebe engɔ 2kpe, “Toʼro endyɛɛ ngwo ne le ekama ze é ma fwɛʼ abwa zɔnɔ? Awɛ me ndɛʼ ekama zɔnɔ engɛ̂?” 3Éngɛ Yeso gíì kpe, “Shi mmɛ biiri ebwa deʼ endɔn. Mbɔn toʼro ena. 4Ekama Eyɔɔ Andɛʼndim a zeʼe ebe Ngwe ekere kà ebe bɔ?” 5Angɔ à klada sa zhuŋu àmɔ̀ àmɔ̀ kpe, “Ntsɔ ga kpe ayɛ ngà? Mala ntsɔ ga kpe à zeʼ ekere ebe Ngwe shi engɔ wa ngo ga kpe, éngɛ ayɛ le kpe mbɔn ke bɛrɛ Eyɔɔ bo? 6Bɛʼngɛ mala ntsɔ ga kpe à zeʼe ebe bɔ shi ebaŋabɔ wunɔ wa ngo timi abɔ ene atye mbɔʼnga angɔ be bɛrɛ anchwɔnchwɔ kpe Eyɔɔ à na Àmɛnɛkɔn Ngwe” 7Éngɛ angɔ gii kpe, “Mbyɛɛ ke nɛɛ afwɔ yɛ ekama ngɔ à zeʼ ngɛ bo.” 8Yeso ga ebe angɔ kpe, “Éngɛ mmɛ gɛrɛ ke né tòʼrò endɔn ká mmɛ na fwɛʼ abwa zɔnɔ ene ekama wɛ bo.”

Nklama timi mbɔʼ bɔ afwɛʼ efwɔ ǹtsà vana

(Mat 21:33-46; Mak 12:1-12)

9Éngɛ Yeso sɛɛrɛ nklama timi fɔnɔ ebe angɔ kpe, “Gho deʼ à ne kɔrɔ eke vana mɔ, gɛ̀rɛ̀ to ebe bɔ afwɛʼ, éngɛ nyɛrɛ ngɔ̀ɔ ese abɛ tsɛrɛ tsɔmɔ ene endzobo dɔɔdɔɔ. 10Endzobo koʼ é dza ela, engɔ saa gho afwɛʼ mɔ ebe abɔ afwɛʼ bɔnɔ kpe angɔ ndɛʼ ambe eku. Bɛʼngɛ abɔ afwɛʼ bɔnɔ â sɔm gho afwɛʼ wɛ fli engɔ sàa achim nè ebwo kɛɛ. 11Éngɛ engɔ saa gho afwɛʼ tsɛrɛ abɔ afwɛʼ bɔnɔ gɛrɛ sɔm engɔ, ndɛʼ eju ebe engɔ gɛ̀rɛ̀ fli engɔ sàa achim nè ebwo kɛɛ. 12Engɔ saa gho afwɛʼ nùrù tɛd, abɔ afwɛʼ bɔnɔ gbɛdɛ gè ebyɛ ekwa engɔ gɛ̀rɛ̀ beʼ engɔ ndwa ese. 13Éngɛ egho kɛ̀ wɛ à me le ǹtsà vana ngɛ ga kpe ‘Mmɛ wa le ene ngà? Mmɛ wa ngo sàa ŋwɔanɔm etaa ngu, ngadeʼ angɔ ba ngo ndɛʼ eghɔ ebe engɔ!’ 14Bɛʼngɛ èndzobo chɛ abɔ afwɛʼ bɔnɔ â zɔ engɔ ngɛ, angɔ gà àmɔ̀ àmɔ̀ kpe ‘Na ànde etiʼi gho eke vana ngɛ wunɔ, ntsɔ zhudu engɔ shi àfɔ̀n ngɔ gimkpaʼ wa ngo tyè ebe bɔ!’ 15Éngɛ angɔ à zhudu engɔ beʼ ndwa ese achim ǹkɛmɛ.” Yeso biiri kpe, “Enjitsɔ, egho kɛ̀ wɛ a me le ǹtsà vana ngɛ wa ngo le ene nè abɔ afwɛʼ bɔnɔ ngà? 16Engɔ wa ngo zeʼ é zhudu anɔm bɔnɔ gɛ̀rɛ̀ nu ǹtsà mɔ ndɛ̀ʼ ebe abɔ tsɛrɛ.” Èndzobo chɛ bɔ à zo nklama timi fɔnɔ ngɛ, e ga kpe, “Éŋwaʼaŋwâʼ e ke né gli éngɛ bo!” 17Yeso kede angɔ biiri kpe, “Etɛʼɛ ega Ngwe wunɔ na tee kpe ayɛ? Etye yɛ àbyɛndɔ à tɔn chi waʼ kpe e ke koʼro bo ngɛ, ne engɔ e ma ngo mwɔ etye ndɔʼ ndɔ abwaʼ atye gimkpaʼ!” 18Gho wɛ è ma go edɔm atye zɔnɔ ngɛ wa ngo tsɛddɛ ekwa mɔ ene akloklo, kà egho wɛ etye zɔnɔ ma turu ekwa engɔ ngɛ e ya ngo gwodo engɔ shi ne ebun nɔ.

Ebiiri mbɔʼ é nɛ̀rɛ̀ aŋwɛ

(Mat 22:15-22; Mak 12:13-17)

19Bàtee atsɛrɛ mane m̀fɔ̀rɔ̀ zhiri â kpe mbɔɔ bere Yeso aŋu mbɔʼnga nklama timi fɔnɔ â bɛrɛ angɔ e shi ma bumu bɔ. 20Éngɛ bàtee atsɛrɛ mane m̀fɔ̀rɔ̀ zhiri ndooro ndèerè nè àkɔʼ akwâ deʼ kpe mbɔɔ na bɔ bɛɛrɛ abwa ngɔ. Éngɛ angɔ sàa abɔ byɛ kpe e ngɔɔ kpèrè Yeso ene à biiri deʼ yɛ a me né le e ndɛʼ engɔ ebe eto abɛ Rom ngɛ. 21Abɔ andɔɔ bɔnɔ ga ebe Yeso kpe, “Àtee abwa, mbyɛɛ be nɛɛ kpe abwa yɛ ngwo ma ga gɛ̀rɛ̀ ma tee ngɛ ye koʼro. Ngwo gɛrɛ ma tee abwa éŋwaʼaŋwâʼ mbɔʼ Ngwe. 22Toʼro endyɛɛ kpe ka etsɛrɛ njɛɛ ye tee kpe mbyɛɛ nɛrɛ aŋwɛ ebe Kaasa kà keʼ” 23Éngɛ Yeso zɔ enduʼru angɔ ga ebe angɔ kpe, 24“Mbɔn tee ekɛb deʼ ena nɔ. Ezɔnɔ ne efàarà mane ekumu wɛ?” Angɔ gii kpe, “Efàarà mane ekumu Kaasa.” 25Éngɛ Yeso ga kpe, “Ndɛʼ ebe Kaasa ala yɛ a mwɔ angɔ Kaasa ngɛ, gɛrɛ ndɛʼ ebe Ngwe ala yɛ a mwɔ angɔ Ngwe ngɛ.” 26Éngɛ angɔ à ke le aghɛʼ deʼ é bere engɔ ene ebwa wɛ engɔ à ga ngɛ bo. Angɔ à kɔ̂n ene aghɛʼ yɛ engɔ à ma gii abwa ebe angɔ ngɛ.

Ebiiri mbɔʼ é zhwɛm ene ewu

(Mat 22:23-33; Mak 12:18-27)

27Éngɛ bɔ Sadusii deʼ byɛ â ma ga kpe bɔ ke ma ngo zhwɛm ene ewu bo ngɛ zeʼ ga ebe Yeso kpe; 28Àtee abwa, Mose à aŋwɛʼrɛ etsɛrɛ zɔnɔ endyɛɛ kpe, “Mala gho deʼ ku shi eye mɔ ne le bwɔ deʼ nè engɔ bo, ghongwaanɔm ngɔ nu eyeti wɛ be bwɔ byɛ e ma ngo bɛrɛ ekumu ghongwa ngɔ ngɛ. 29À ne endzobo deʼ bwɔngwaanɔm deʼ sàambyɛ â na aŋu, eghongwa mbèmbè ngɛ à nu aye, e ku ne be bwɔ deʼ bo. 30Éngɛ ǹtɛʼchim ngɔ nu aye wunɔ; 31éngɛ tɛʼ nùrù tɛd. Ebwa ŋwaʼ wɛ gli ekwa àbwɔngwa sàambyɛ bɔnɔ, angɔ à kudu ne be bwɔ deʼ nè aye wunɔ bo. 32É ngùdù aye wɛ gɛrɛ ku. 33Anji ngùdu yɛ bɔ kudu ma yà zhwɛm ene ewu ngɛ, aye wɛ yà mwɔ me eye wɛ, wɛ àbwɔngwa sàambyɛ byɛ â shi nu engɔ ene aye ngɛ?” 34Yeso gíì ebe angɔ kpe, “Anɔm mane aye efwɔ ekyɛ zɔnɔ ba le ebwa elô, 35bɛʼngɛ anɔm mane aye byɛ e me koʼro é zhwɛm ene ewu ene ekyɛ yɛ e ma ngo zeʼ ngɛ yà ne ebwa elô deʼ le. 36Angɔ yà mwɔ na engere byɛ e ne ma ku bo nɔ. Angɔ ba ngo mwɔ bwɔ Ngwe mbɔʼnga angɔ a shi zhwɛm ene ewu. 37Éngɛ Mose à ga apɛpɛ kpe bɔ kudu ba ngo zhwɛm ene ewu. Efwɔ antiri aŋwɛʼrɛ ega Ngwe yɛ a me ga mbɔʼ afwɔ ǹgɛ̀ yɛ à ma bɛ̀rɛ éwu ngɛ, Mose ga mbɔʼ Masakɛ na Ngwe Abraham, Ngwe Ayzik, mane Ngwe Yakɔb nɔ. 38Engɔ na Ngwe bɔ kɔʼɔ, ne mwɔ Ngwe bɔ kudu bo, mbɔʼnga bɔ gimkpaʼ ebe engɔ na bɔ kɔʼɔ.” 39Bàtee atsɛrɛ deʼ ga apɛpɛ kpe, “Ngwo gii anchwɔnchwɔ àtee abwa!” 40Éngɛ angɔ a ke wu le ebwa deʼ é biiri ebe engɔ bo.

Ebiiri mbɔʼ Ǹtɔmzhwaʼa

(Mat 22:41-46; Mak 12:35-37)

41Yeso biiri ebe angɔ kpe, “E be né ga kpe Ǹtɔmzhwaʼa na ŋwɔ ekla Devid ene? 42Mbɔʼnga Devid mɔmbwo we ga efwɔ aŋwɛʼrɛ Mban Yawe kpe, Masakɛ à ga ebe Masakɛ ngu kpe, Tsɔmɔ a chwâ abwo anɔm ndza, 43bwɛn èndzobo chɛ mmɛ ma ngo ge bɔ m̀pɛ̀ʼ mbyɛ enji elo mbyɛ ngɛ. 44Devid à zɔʼrɔ engɔ kpe Masakɛ, e wa ngo mwɔ ene kpe Ǹtɔmzhwaʼa na ŋwɔ ekla Devid?”

Yeso ga mbɔʼ àtee atsɛrɛ

(Mat 22:41-46; Mak 12:35-37)

45Aŋu bɔ gimkpaʼ â ma zhuru ebe engɔ ngɛ, Yeso ga ebe bɔ bɛɛrɛ abwa mɔ kpe, 46“Mbɔn sa nu azɔm ene bàtee atsɛrɛ byɛ e ma doʼo à zhiri me ge ǹdiri dɔɔdɔɔ, gɛrɛ ma ke kpe e ma gamma ebe angɔ ene eghɔ ati ewu̧ ngɛ, byɛ e ma ke akwâ kɛkɛ efwɔ ndɔrɔ tsaʼra Ngwe mane akwâ yɛ e ma kɛʼ abwa ngɛ. 47Angɔ ba doʼo é ngbèdè ayeti efwɔ ndɔ gɛrɛ ma fèerè ela angɔ, gɛrɛ ma bèʼrè akwâ amɔ aŋu e ma tsàʼrà Ngwe e dɔɔdɔɔ ngɛ! Enyii angɔ yà me bɔɔ ghɛʼ!”

Currently Selected:

Luk 20: nbt

Highlight

Copy