Eyɔɔ 20

Eshe yɛ à mwɔ ekɛɛ ngɛ

1Â ne enchwenchwe ntwɛn, anji mbèmbè efwɔ ǹkyɛ̀, akwâ ma bli à di, Meri Magdalɛn à ngɔɔ atoshe è zɔ kpe etye yɛ à mwɔ enduʼeshe ngɛ a shi chi. 2Engɔ nyɛrɛ sa dɔrɔ ngɔɔ é kla Shimun Petoro, gho bɛ̀ɛrɛ abwa wɛ Yeso à me doʼo ghɛʼ ngɛ, ga ebe engɔ kpe, “Ebe zeʼe chi akudugho Masakɛ efwɔ eshe beʼ ngɔ̀ɔ. Mbyɛɛ ke nɛɛ afwɔ yɛ e me shi aŋu ngɛ bo.” 3Petoro mane gho bɛ̀ɛrɛ abwa wɛ klada sa dɔrɔ à ngɔɔ atoshe. 4Bɛʼngɛ gho bɛ̀ɛrɛ abwa we à dɔrɔ fɔɔ Petoro gɛrɛ dye bwɛn atoshe. 5Engɔ gunu amɔ kɔʼ gɛ̀rɛ̀ zɔ me eparandi byɛ â me fudu akudugho Yeso anyi ngɛ efwɔ aŋu. Bɛʼngɛ engɔ à ke nyii ngɔ̀ɔ efwɔ bo. 6Shimun Petoro zeʼe achim nyii efwɔ eshe. Engɔ à zɔ ǹdiri bli chɛ me naa afwɔ yɛ â me bwɛɛrɛ gho ku ngɛ. 7Ǹdi yɛ â me furu ato Yeso ngɛ à ne mwɔ ene amɔ afwɔ, ne me buumu nè ǹdiri tse bo. 8É ngùdù egho bɛ̀ɛrɛ abwa wè, wɛ à dye bwɛn atoshe ngɛ gɛ̀rɛ̀ nyii ngɔɔ efwɔ. Engɔ à zɔ gɛ̀rɛ̀ bɛ̀rɛ. 9Angɔ à da ke shi nɛɛ ebwa wɛ aŋwɛʼrɛ Ngwe me ga kpe Yeso yà zhwɛm ene ewu ngɛ bo. 10Éngɛ abɔ bɛɛrɛ abwa byɛ wu ngɔɔ achim afwɔ yɛ angɔ à ma tsɔmɔ ngɛ.

Yeso tee amɔ ebe Meri Magdalɛn

11Enjitsɔ Meri Magdalɛn à ne tsɔmɔ eba eshe ma ku̧u. Aŋu engɔ à ku̧u ngɛ, è gunu ato mɔ kɔʼ efwɔ eshe. 12Engɔ zɔ engere fyee e me ge ǹdiri bla. Angɔ à ne tsɔmɔ ene afwɔ yɛ â me bwɛɛrɛ akudugho Yeso ngɛ. Egho bi ato, egho wè ene elo. 13Angɔ biiri ebe engɔ kpe, “Aye, ngwo na ku̧u ayɛ?” Engɔ ga kpe, “E be zeʼe chi akudugho Masakɛ ngu beʼ ngɔɔ. Mmɛ ke nɛɛ afwɔ yɛ e me shi ngɛ bo.” 14Aŋu engɔ à ga énde ngɛ, è ghɛɛbɛ amɔ zɔ Yeso me tama aŋu, bɛʼngɛ engɔ à ke nɛɛ kpe na Yeso bo. 15Yeso biiri ebe engɔ kpe, “Aye, ngwo na ku̧u ayɛ? Ngwo na zɛʼɛ awɛ?” Aŋu engɔ à ma zhuŋu kpe ne egho wɛ à me le ǹtsà ngɛ, engɔ ga kpe, “Masa, mala ngwo me beʼe ngɔ̀ɔ, toʼro afwɔ yɛ ngwo me shi ngɛ, shi mmɛ ngɔɔ nu.” 16Éngɛ Yeso gâ ebe engɔ kpe, “Meri,” engɔ ghɛɛbɛ amɔ kɔʼ ene abɛɛ yɛ Yeso à me tama ngɛ, è ku̧u ekamakama ene atsoʼ Aramayk kpe, “Raboni,” ǹji me ga kpe, “Àtee abwa.” 17Yeso ga ebe engɔ kpe, “Ka angu mɔmɔ mbɔʼnga mmɛ ke shi kwaʼ ngɔɔ ebe àtɛ ngu bo. Bɛʼngɛ ngɔɔ ga ebe bwɔngwa mbu kpe mmɛ wa kwaʼ ngɔɔ ebe àtɛ ngu wɛ mwɔ àtɛ ngɔn ngɛ, ebe Ngwe ndza yɛ mwɔ Ngwe ndzɔn ngɛ.” 18Éngɛ Meri Magdalɛn ngɔɔ abwaʼ bɔ bɛɛrɛ abwa gɛ̀rɛ̀ mɛ̀nɛ̀ ekɔn wɛ kpe, “Mmɛ zɔ Masakɛ” gɛ̀rɛ̀ tòʼrò abwa yɛ Yeso à ga ebe engɔ ngɛ ebe angɔ.

Yeso tee amɔ ebe bɔ bɛɛrɛ abwa mɔ

19À shi etiʼdi anji Sɔji, anji mbèmbè efwɔ ǹkyɛ̀, bɔ bɛɛrɛ abwa me tsɔmɔ afwɔbi me gwɔbɔ anduʼndɔ, mbɔʼnga â ma bumu eto bɔ Juu. Yeso zeʼe tam abwaʼ angɔ, è ga ebe angɔ kpe, “M̀bwarambwad mwɔ nè mbɔn!” 20Aŋu engɔ à shi mɛ̀ɛrɛ gà ebwa wunɔ ngɛ, engɔ tee ebwo mɔ mane abɛɛ ebara mɔ ebe angɔ. Bɔ bɛɛrɛ abwa â gɛnɛ amɔ ghɛʼ aŋu angɔ à zɔ Masakɛ ngɛ. 21Yeso ga ekyɛ tsɛrɛ kpe, “M̀bwarambwad mwɔ nè mbɔn. Aŋu àtɛ à tɔm angu ngɛ, mmɛ gɛrɛ tɔm angɔn.” 22Engɔ zhwɛ̀ɛrɛ sàa ekwa angɔ gɛ̀rɛ̀ ga kpe, “Mbɔn nu azhwɛɛrɛ pɛ. 23Mala mbɔn dzɛrɛ abwa bɔɔbɔɔ bɔ, Ngwe dzɛrɛ abwa bɔɔbɔɔ angɔ. Mala mbɔn ne dzɛrɛ abwa bɔɔbɔɔ angɔ bo, shi Ngwe ke ma ngo dzɛrɛ bo.”

Yeso tee amɔ ebe Tɔmas

24Enjitsɔ Tɔmas wɛ â gɛrɛ ma zɔʼrɔ ŋwɔ Ngwe ngɛ, gho bi abwaʼ bɔ bɛɛrɛ abwa wum ǹchwɔ̀ fyee, à ne tsɛʼ èndzobo chɛ Yeso à tee amɔ ebe bɔ bɛɛrɛ abwa ngɛ bo. 25Éngɛ abɔ bɛɛrɛ abwa abê toʼro ebe engɔ kpe, “Mbyɛɛ à shi zɔ Masakɛ.” Bɛʼngɛ Tɔmas ga ebe angɔ kpe, “Atye ma aŋu mmɛ ma de zɔ enɛ̂ endzɛrɛ chɛ ebwo ngɔ ngɛ gɛrɛ gè etoobwo mfu ene akwâ yɛ endzɛrɛ â mwɔ ngɛ. Mmɛ ne ge abwo ndza efwɔ ebara ngɔ bo, shi mmɛ wa kà bɛ̀rɛ.” 26Aŋu ǹkyɛ̀ ŋwaʼ à fɔɔ ngɛ, bɔ bɛɛrɛ abwa ngɔ me wu tsɔmɔ afwɔbi efwɔ ndɔ, éngɛ Tɔmas mwɔ abwaʼ angɔ. Â ne gwɔbɔ anduʼndɔ. Yeso zeʼ dù tam abwaʼ angɔ gɛ̀rɛ̀ ga kpe, “M̀bwarambwad mwɔ nè mbɔn.” 27Engɔ ga ebe Tɔmas kpe, “Ge etoobwo mfyɛ efwɔ anɔ, kede ebwo mbu, ngà ndɛrɛ abwo njɛ gɛ̀rɛ̀ gè efwɔ ebara mfu. Ke di bo, bɛrɛ.” 28Tɔmas gii ebe engɔ kpe, “Masakɛ mane Ngwe ndza!” 29Yeso ga ebe engɔ kpe, “Ngwo bɛ̀rɛ mbɔʼnga ngwo zɔ angu. Ǹchwɔ̀ ye ebe abɔ byɛ e ma bɛ̀rɛ ne zɔ angu bo ngɛ.”

Enji ene aŋwɛʼrɛ Eyɔɔ

30Éngɛ Yeso à le enɛ̂ abwa tsɛrɛ akɛkɛ efàarà bɔ bɛɛrɛ abwa mɔ yɛ e ne me ŋwɛʼrɛ efwɔ aŋwɛʼrɛ zɔnɔ bo ngɛ. 31Bɛʼngɛ e ne ŋwɛʼrɛ aŋwɛʼrɛ zɔnɔ mbɔʼtye mbɔn bɛrɛ kpe Yeso na Ǹtɔmzhwaʼa, mwɔ Ngwe. Gɛrɛ kpe nyɛ̀rɛ̀ zèʼe ene ebɛrɛtaa ndzɔn, mbɔn le etyê ene ekumu ngɔ.

Currently Selected:

Eyɔɔ 20: nbt

Highlight

Copy