Eyɔɔ 16

1“Mmɛ à shi tòʼro abwa zɔnɔ gimkpaʼ endɔn mbɔʼtye mbɔn ne waʼ ebɛrɛtaa ndzɔn bo. 2Éngɛ e ba ngo chidi angɔn efwɔ ndɔ tsaʼra Ngwe bɔ Juu. Endzobo a sa zeʼe ebe abɔ e ma zhudu angɔn ngɛ, angɔ ba sa zhuŋu kpe na afwɛʼ ǹchwɔ̀ mbɔɔ me fwɛʼ ebe Ngwe. 3Bɔ ba ngo fwɛʼ abwa zɔnɔ akwa ndzɔn mbɔʼnga angɔ ke shi nɛɛ àtɛ kà mmɛ bo. 4Mmɛ na tòʼrò abwa zɔnɔ endɔn, mbɔʼtye ngɛ èndzobo chɛ angɔ zeʼe ngɛ, mbɔn ba ngo zhuŋu kpe mmɛ à shi gbeʼre eto mbɔn mbɔʼ angɔ. Mmɛ à ke toʼro abwa zɔnɔ endɔn atoto bo mbɔʼnga mmɛ à ne mwɔ nè mbɔn.”

Afwɛʼ Azhwɛɛrɛ pɛ

5“Bɛʼngɛ enjitsɔ, mmɛ wa ngɔ̀ɔ ebe engɔ wɛ à saa angu ngɛ. Gho deʼ abwaʼ ndzɔn ke biiri ena kpe ‘Ngwo ngɔɔ awe bo?’ 6Bɛʼngɛ mbɔn ba jù efwɔ ńtara ntsɔn mbɔʼnga mmɛ à ga abwa zɔnɔ endɔn. 7Bɛʼngɛ mmɛ na ga éŋwaʼa endɔn kpe ne ebwa ǹchwɔ̀ aŋu mmɛ ma nyɛ̀rɛ̀ ngɔ̀ɔ nɔ. Mala mmɛ ne ngɔɔ bo, ǹkpède ya ke endɔn zeʼ, bɛʼngɛ mala mmɛ ngɔɔ, shi mmɛ wa sàa engɔ endɔn. 8Èndzobo chɛ engɔ ma zeʼe ngɛ, è wa ngo tee ebe bɔ efwɔ ese, abwa bɔɔbɔɔ yɛ angɔ ma le apɛpɛ ngɛ. Engɔ gɛrɛ wa ngo tee abwa yɛ angɔ ma le a ne me koʼro efàarà Ngwe bo ngɛ ebe angɔ. Engɔ gɛrɛ wa ngo tee ebe angɔ aŋu Ngwe ma tsɛrɛ esɛʼ ngɛ. 9Engɔ wa ngo gà ebe bɔ kpe angɔ be go ebwa mbɔʼ abwa bɔɔbɔɔ, mbɔʼnga bɔ ke bɛrɛ ene mmɛ bo. 10Engɔ gɛrɛ wa ngo tòʼrò ebe bɔ mbɔʼ aŋu angɔ ne me fwɛʼ abwa yɛ a me koʼro efàarà Ngwe ngɛ bo, mbɔʼnga mmɛ wa ngɔɔ abwaʼ àtɛ wɛ mbɔn ne ma wu zɔ angu ekyɛ tsɛrɛ bo ngɛ. 11Engɔ gɛrɛ wa ngo tòʼrò ebe angɔ na aŋu Ngwe ma tsɛrɛ esɛʼ ngɛ, mbɔʼnga â shi sɛʼɛ ŋwɔ ǹtɔʼ efwɔ ese zɔnɔ. 12Mmɛ we le abwa tsɛrɛ akɛkɛ é ga endɔn, bɛʼngɛ mbɔn ke né kiri abwa yɛ enjitsɔ bo. 13Bɛʼngɛ èndzobo chɛ engɔ wɛ mwɔ azhwɛɛrɛ éŋwaʼa ma de zeʼe ngɛ, è wa ngo gbèe angɔn nyii ene éŋwaʼa gimkpaʼ. È ke ma ngo ga egha mɔ bo, è wa ngo ga ma abwa yɛ è shi zo mane abwa yɛ a ma ngo gli ngɛ. 14Engɔ wa ngo ndɛ̀ʼ eghɔ kɛ́ ena, mbɔʼnga engɔ na bwɛ abwa yɛ zeʼe ena shi sa tòʼrò endɔn. 15Ela àtɛ gimkpaʼ na a mbu. Ne ǹji yɛ mmɛ à ga kpe azhwɛɛrɛ pɛ ya bwɛ abwa zɔnɔ ena shi tòʼro endɔn ngɛ.”

Yeso ga kpe eju bɔ bɛɛrɛ abwa ya ghɛɛbɛ shi egɛnɛ

16Éngɛ Yeso fɔɔ embè gà kpe, “Efwɔ antiriŋi endzobo deʼ, mbɔn ke ma wu zɔ angu bo, bɛʼngɛ à gɛrɛ sa bwɛn efwɔ antiriŋi endzobo tsɛrɛ, mbɔn zɔ angu.” 17Ene abwa zɔnɔ bɔ bɛɛrɛ abwa ngɔ adeʼ sa ga àmɔ̀ àmɔ̀ kpe, “Engɔ na ga abwa zɔnɔ ngɛ ǹji me ga kpe ayɛ ngà? È wa ga kpe ‘Efwɔ antiriŋi endzobo deʼ, mbɔn ke ma wu zɔ angu bo, efwɔ antiriŋi endzobo tsɛrɛ, mbɔn zɔ angu.’ Gɛrɛ wu ga kpe, ‘Na mbɔʼnga mmɛ ma ngɔɔ ebe àtɛ.’ ” 18Angɔ à dà ma biiri kpe, “Enji ene antiriŋi endzobo ne ga kpe ayɛ? Mbyɛɛ ke nɛɛ ebwa wɛ engɔ ma ga ngɛ bo.” 19Yeso zɔ kpe angɔ à na ke é biiri énde mbɔʼ ebwa wunɔ, éngɛ engɔ biiri ebe angɔ kpe, “Mbɔn na ga mbɔrɔmbɔn me ebwa wɛ mmɛ à ga kpe ‘Efwɔ antiriŋi endzobo, mbɔn ke ma wu zɔ angu bo, a gɛrɛ shi efwɔ antiriŋi endzobo tsɛrɛ, mbɔn zɔ angu’ ngɛ? 20Mmɛ na ga éŋwaʼa endɔn kpe, mbɔn ba ngo ku̧u ene ebwa wɛ e ma ngo gli ekwa ngu ngɛ, bɛʼngɛ bɔ efwɔ ese ma gɛnɛ amɔ. Mbɔn ba ngo jù, bɛʼngɛ eju ndzɔn ya ngo ghɛɛbɛ shi egɛnɛ. 21Aye na de kɛʼɛ é be ŋwɔ, è ma jù mbɔʼnga endzobo ǹgoʼ ngɔ a shi zeʼe. Bɛʼngɛ èndzobo chɛ engɔ shi be ŋwɔ mɔ ngɛ, è dzɛ̀d mbɔʼ ǹgoʼ mɔ, mbɔʼnga è ma sa gɛnɛ amɔ kpe è shi be ŋwɔ sàa efwɔ ese. 22Éngɛ enjitsɔ ne endzobo ndzɔn é jù. Bɛʼngɛ mmɛ wa wu zɔ angɔn ekyɛ tsɛrɛ, mbɔn sa gɛnɛ angɔn efwɔ ńtara ntsɔn. Éngɛ tsɛʼ gho deʼ ma wu nu egɛnɛ ndzɔn bo. 23Éngɛ efwɔ anji yɛ mbɔn yà ne wu biiri ala deʼ ena bo. Mmɛ na ga éŋwaʼa endɔn kpe, ka mwɔ m̀pè ala ze mbɔn biiri ebe àtɛ ene ekumu ngu, è wa ndɛʼ endɔn. 24Bwɛn enjitsɔ, mbɔn de ke shi biiri ala deʼ ene ekumu ngu bo. Mbɔn biiri mbɔn gɛrɛ ba le. Éngɛ egɛnɛ ndzɔn gɛrɛ ya shwe mɛ̀ɛrɛ̀. 25Enjitsɔ mmɛ na dye gà me ene aga timi. Endzobo ya zeʼe wɛ mmɛ ne ma wu ga ene aga timi bo ngɛ. Bɛʼngɛ mmɛ wa sa tòʼrò abwa endɔn apɛpɛ mbɔʼ àtɛ ngu. 26Efwɔ anji yɛ mbɔn ba sa biiri ela ene ekumu ngu. Mmɛ shi ke ma ga ngɛ kpe mmɛ wa ngo bii ebe àtɛ ene egha ndzɔn bo. 27Keʼ, àtɛ mɔmbwo we doʼo angɔn, mbɔʼnga mbɔn à shi doʼo angu gɛ̀rɛ̀ bɛ̀rɛ kpe mmɛ ne zeʼe ebe Ngwe. 28Mmɛ à zeʼe ebe àtɛ gɛ̀rɛ̀ nyii efwɔ ese. Enjitsɔ mmɛ wa sàarà ese, gɛ̀rɛ̀ ngɔ̀ɔ achim ebe àtɛ.” 29Bɔ bɛɛrɛ abwa Yeso gâ ebe engɔ kpe, “Enjitsɔ ngwo a sa ga apɛpɛ ne ma wa ga ene aga timi bo. 30Enjitsɔ mbyɛɛ shi zɔ kpe ngwo we nɛɛ abwa gimkpaʼ, e ne me koʼro kpe gho sa biiri abwa deʼ engɛ̂ bo. Ewunɔ shi le angbɛɛ mbyɛɛ bɛrɛ kpe ngwo ne zeʼe ebe Ngwe.” 31Yeso biiri ebe angɔ kpe, “Mbɔn shi ngùdu bɛ̀rɛ enjitsɔ? 32Endzobo a sa zèʼe, è gɛrɛ de shi zeʼe, yɛ mbɔn ma sàma, gho ŋwàʼaŋwàʼ ma ngɔɔ abɛ mɔ ngɛ. Mbɔn ba ngo waʼ angu gho zhiʼ. Bɛʼngɛ mmɛ shi ke ma ngo mwɔ zhiʼ éŋwaʼa bo, mbɔʼnga àtɛ ngu we mwɔ nè mmɛ. 33Mmɛ shi ga abwa zɔnɔ endɔn mbɔʼtye mbɔn me né le m̀bwarambwad achim ndza. Efwɔ ese zɔnɔ, mbɔn ba ngo zɔ ǹgoʼ. Bɛʼngɛ mbɔn klini etaa! Mmɛ shi fɔɔ ese.”

Currently Selected:

Eyɔɔ 16: nbt

Highlight

Copy