Matìyò 20
20
Ngam məgri imbə̀ʼ bəd ne fàʼà inga mben vayìn
1Yeso ya ghà abə ìmbi mə̀mə̀nənùg gha, “Anug ìfɔ̀n ikaŋ ya icheg ne wə̀d ne ya du isusu ghò kə̀b bəd àfàʼì gha mbe gho fàʼ inga mben vayìn#20:1 Azed vayìn ya mbe kàrà ichug mə̀kara gha vine. Ze ya nìpe ibəm azed ndəŋ, bə ko titam ne mbe tànga mənoʼ angu. məd. 2Anyumə̀ ne wì ya fə chuʼri inun ikab àfàʼì tì bəd mbe ane aneg àfàʼì afibì, wì ya chà awɔb inga mben vayìn ze.
3Wì ya bə̀ ywìrì dù icheg ane mə̀nyùmə̀ àbɔg ghò a sàmi iywin, pè bàd bəd ndəŋ ne ya yaʼi angu itəmbi ne chəyi mbe fàʼà aghi mɔ̀ʼɔ. 4Ane, wì ya ghà inɔb gha, ‹Mbə̀ bə ghò fàʼ inga ìmə mben vayìn. Mə biri bə nàʼ ikab ne koʼi inən.› 5Mbɔb ya zug ane nɔ̀ʼ ghò.
Wì ya bə̀ ywìrì dù icheg ane àngɔŋ tisi, bə̀ ywìrì dù icheg ane mə̀nyùmə̀ itad tisi bə̀ niŋ bəd àfàʼì ndəŋ bə̀ ghà məyi anug ze amɔʼ inɔb. 6Àsi icheg ane mə̀nyùmə̀ ita̰ ne achwi fə fḛ, wì ya ywìrì dù ghò bàd bəd ndəŋ ne ya yaʼi angu itəmi. Ane, wì ya biri inɔb gha, ‹Mbə̀ kə zi zi itəmi aŋa ne chəyi mbə̰ mbe fàʼà aghi mɔ̀ʼɔ ane aghə?›
7Mbɔb ya ywìtì ibo gha, ‹À ya imbə̀ʼ icheg ne chəyi wə̀d mɔ̀ʼɔ ne nàʼi àfàʼì ina.›
Icheg ne mbi ya ywìti ane, wì ya ghà inɔb gha, ‹Mbə̀ bə ghò fàʼ inga ìmə mben vayìn.›
8Àsi ikwikwiri, wə̀d mben vayìn we ya ghà abə wə̀d we ne nə̀ngə ìfàʼì məd gha, ‹Kàra bəd àfàʼì mbe, nàʼ ìwɔb ikab. Ko ane bəd mbe ne mə̀ kə si nwìyḛ̀ ni niŋ si ghò ane ìmbi mbègtog.›
9Ane, bəd mbe ne ya ko àfàʼì ane mə̀nyùmə̀ ita̰ ne achwi fə fḛ ya ghò ni gha mbe naʼa ìwɔb ikab. Mbi ya nàʼ ikab àfàʼì ane aneg afibì abə wə̀d imɔʼ imɔʼ abɔ̀ʼ inɔb. 10Ane, bəd mbe ne ya ko àfàʼì isusu ya ghò gha mbe naʼa ìwɔb tì ikab. Mbi yaya kɔ̀ndɔ gha mbɔb biri niŋ ikab ne nɔʼri, si ya gha, mbi ya bə̀ nàʼ məyi ikab àfàʼì ane aneg afibì abə wə̀d imɔʼ imɔʼ abɔ̀ʼ inɔb. 11Anyumə̀ ne mbi ya niŋi ikab we, mbi ya ko se ghàmbà wə̀d we ne beri mben vayìn ze. 12Mbi yaya ghàmbà gha, ‹Mbaŋà ìto̰ ne si nwḭ̀yḛ̀ kə̀ fàʼ məyi ane awà imɔ̀ʼ. Àghò nàʼ ikab inɔb andəŋ andəŋ icheg ne àghò nàʼi ina mba mbe ne zi zi ni fàʼ, achwi bə̀ zi zi ni zuʼ igun ina.›
13Wə̀d mben vayìn ze ya ywìtì abə mbaŋà mɔ̀ʼɔ abɔ̀ʼ inɔb gha, ‹Ìmə sə̀ʼ, chəyi mə̀ gughi anug mɔ̀ʼɔ ine. Imbə̀ʼ tì kə̀ chùʼri ìwe inun ikab àfàʼì ane aneg àfàʼì afibì? 14Niŋ ìwe ikab ghò awe. À ya mo kɔ̀ŋi ni nàʼ ikab abə mbaŋà ìto̰ ne si nwḭ̀yḛ̀ ni ghò a mben icheg ne mə naʼi ine. 15Àkə chəyi mə̀ beri ika ni ghì icheg ne mə̀ kəbi tì ìmə ikab? Kə̀ àghò wa kə ghìyə̀ àdeg imbə̀ʼ icheg ne mə ghìyə̀ ìchɔ̀mì nàʼà ighi abə bəd abu abu?›”
16Yeso ya si nwḭ̀yḛ̀ ghà inɔb gha, “Ane, bəd mbe ne si nwḭ̀yḛ̀ biri yaʼ imbìghè. Bəd ne yaʼi imbìghè biri si nwḭ̀yḛ̀.”
Yeso ghàm imbə̀ʼ ìwi iwu ane ighəm ne pè ane itad
(Mag 10:32-34; Lug 18:31-34)
17Anyumə̀ ne Yeso yaya kɔ̀ʼɔ ghò a Jèrusalèm, wì ya niŋ ìmbi mə̀mə̀nənùg mbe ìghum chɔ̀b ibe mbi se fɔrɔ kɔ̀ʼɔ ghò. Anyumə̀ ne mbɔb yaya kiri inɔnjì, wì ya niŋ awɔb mbi tindi ghò iban, wì si ghà inɔb gha, 18“Mbə̀ nḛ, tì ya anìŋ kɔ̀ʼɔ ghò a Jèrusalèm. Anyumə̀ ne tì biri pè angu, mbi biri gwì Ŋwan Wə̀d nàʼ abə itog bəd mbàn Ŋwiye tì mə̀chwitì mə̀nɔ̀ʼɔ̀. Bəd mbo̰ biri sɔb isaʼi gha mbe zweti aməd. 19Mbi biri ghì ane, nàʼ aməd abə bəd ne kayi mə̀Ju gha mbe chapa aməd, ywìri aməd ane fìngwàn, bə̀ kɔ̀mbì aməd igun azed abaʼri. Si ya gha, ineg mə̀ pè ane itad, Ŋwiye zwemni aməd.”
Ngɔb bɔn ìmbi Zebedì bìri anug mɔ̀ʼɔ abə Yeso
(Mag 10:35-45)
20Ngɔb bɔn ìmbi Zebedì ya ghò abə Yeso tì ìmbi bɔn. Wì ya pè gɔ̀m itog inwḭ aseg ibo imbìghè si bìri anug mɔ̀ʼɔ ibo.
21Yeso ya biri ibo gha, “Aghi ne àghò kə̀bi gha mə̀ ghiyə ine àkə aghə?”
Wì ya ywìtì ibo gha, “Àghò bḛ inum gha ìmbum bɔn mbo̰ məbe biri chughi tì ine inga àze anug ìfɔ̀n. Wə̀d ifibì biri chughi ane àze aba abo jəghi, ìywin chughi ane àze aba abo təŋ.”
22Yeso ya ywìtì gha, “Chəyi mbə̀ kyeri anug ne mbə̰ mbe bìre!” Anyumə̀ ne wì ya ywìtì ane, wì ya biri inɔb gha, “Tì mbə̰ zən iku ngəʼ ze ne mə̀ biri zən?”
Mbɔb ya ywìtì gha, “Tì we tì tì zə̰ ngəʼ ze.”
23Yeso ya ghà inɔb gha, “Mbə̰ biri zən iku ngəʼ ze ne mə̀ biri zən, si ya gha, kayi àmə ati ni chɔʼ wə̀d ne biri chughi ane àmə aba abo jəghi kə̀ wə̀d ne biri chughi ane àmə aba abo təŋ. Iti mbo̰ ya ìmbi bəd mbe ne ìmə Mbaʼ ya fə chuʼri nɔ̀ŋì inɔb.”
24Anyumə̀ ne mə̀mə̀nənùg mbin ìghum ya zughi anug ze, mbɔb ya gaŋ abə məfi mbe məbe. 25Si ya gha, Yeso ya tɔŋi awɔb ghà inɔb gha, “Mbə̀ kyeri gha bəd mbe ne tùmbə̀ bəd mbe ne kayi mə̀Ju ya nyə̀mə̀ inug nyəmi igun inɔb. Bəd kyen abɔ̀ʼ inɔb ya bə̀ tùmbə̀ awɔb ane inug ijìm. 26Imbə̀ʼ ze yaʼ yi ane tì inən. Tesiʼ ya gha, wə̀d ne kə̀bi ni yaʼ wə̀d kyen inga inən, tengàŋ bèrì ni yaʼ wə̀d ne fàʼà inən. 27Wə̀d ne kə̀bi ni yaʼ imbìghè inga inən, tengàŋ bèrì ni yaʼ àbòʼì inən. 28Chəyi Ŋwan Wə̀d ya yeʼe gha bəd faʼa ibo. Wì ya yeʼe ni fàʼ abə bəd. Wì ya bə̀ yèʼe ni ku si nàʼ ìwi ìtḛ̀ ni zeri bəd nɔʼ nɔʼ.”
Yeso ghù məfəg məbe
(Mag 10:46-52; Lug 18:35-43)
29Anyumə̀ ne Yeso tì mə̀mə̀nənùg məd yaya dùwə̀ inga Jèrikò, inɔ̰ bəd yaya bène abɔ̀ʼ inɔb. 30Mbaŋà mɔ̀ʼɔ tibe ne ya fə̀ghə yaya chùghə iban inɔnjì. Anyumə̀ ne mbɔb ya zughi gha Yeso we chè, mbi ya kyen kwàʼ ane gì ka ka gha, “Anɔŋisəg, Ŋwan ifɔn Dèvid, dìgre igun ina!”
31Inɔ̰ bəd we ya ghàm inɔb gha, “Mbə̀ chim tizi!” Si ya gha, mbɔb ya ywìrì taŋ kyen yètì gì gha, “Anɔŋisəg, Ŋwan ifɔn Dèvid, dìgre igun ina!”
32Yeso ya təm, kàrì awɔb bìri inɔb gha, “Mbə̀ kə kə̀bə̀ gha mə ghənə inən?”
33Mbɔb ya ywìtì ibo gha, “Anɔŋisəg, tì kə̀b gha àghò ghiyə tì se bàrà isiŋi.”
34Yeso ya bèrì àsɔ̀mnəfiŋ igun inɔb, si bètì àzɔb aghə. Kwàʼ anyumə̀ we, mbɔb ya ywìrì ko se bàrà isiŋi bə̀ si nɔ̀ʼ bèni abɔ̀ʼ Yeso.
Currently Selected:
Matìyò 20: MBTP
Highlight
Share
Copy
Want to have your highlights saved across all your devices? Sign up or sign in
© 2019 CABTAL
