Jɔn 11

Lazarɔ̀s ku

1Wə̀d mɔ̀ʼɔ ne yaya chùghə a Betanì, ne ikum məd ya Lazarɔ̀s, yaya ghɔ̰̀. Wì yaya chùghə angu tì njàbi məd tibe, Mèri tì Màta. 2Mèri gho̰ ya àyi we ne ya tùti məwud àka inun, ne beri ifɔ chɔm chɔm, igun ighog ìmbi Anɔŋisəg, se fùghə ane ìti nyɔ̀ŋì atog. 3Njàbi ìti Lazarɔ̀s ya chà ikən abə Yeso gha, “Anɔŋisəg, ìwe ìsə̀ʼ we ne àghò taŋ kɔ̀ŋ we ghɔ̰̀.”

4Anyumə̀ ne Yeso ya zughi, wì ya gha, “Mə kyèri gha, aghɔn azo̰ abə Lazarɔ̀s, kayi àze ne biri zweti aməd. À ya aghɔn ne biri ghì gha bəd ghumni Ŋwiye bə̀ ghùmni Ŋwan Ŋwiye.” 5Yeso ya kɔ̀ŋ Màta tì ifi məd Mèri bə̀ kɔ̀ŋ Lazarɔ̀s. 6Yeso ya zug ikən imbə̀ʼ aghɔn ne yaʼi igun Lazarɔ̀s, si ya gha, chəyi wì ya gho ati ati. Wì ya ywìrì chùghi yi asiŋi ze, ineg chè ibe, bɔŋ wì si nɔ̀ʼ ghò.

7Wì ya si ghà abə ìmbi mə̀mə̀nənùg gha, “Mbə̀ ghiyə tì bəndə ghò a Jùdeyà.” 8Mə̀mə̀nənùg məd ya ghà ibo gha, “Àchwitìnùg, chəyi agha kə sa ne mə̀Ju mbe kə̀ kə̀bə̀ ni tumbi awe ane ateg. Àghò kə ywìrè gha tì bəndə ghò angu?”

9Yeso ya ywìrì bìri inɔb gha, “Imbə̀ʼ aneg afibì ya bèrè mbe awa ìghum chɔ̀b ibe, ne isiŋi mbe zḛ? Wə̀d ne yḛ̀ ane isiŋi mbe zḛ, chəyi we gùghə̀ imbə̀ʼ icheg ne, məd we bàrà isiŋi.” 10Àsi bəd ne yḛ̀ izimi, mbi ya tə̀ngə̀ gùghə̀ imbə̀ʼ icheg ne chəyi isiŋi mbe zḛ.

11Yeso ya ghàm ane, bə̀ ywìrì chè imbìghè ni gha, “Ìwa ìsə̀ʼ, Lazarɔ̀s, fə fen a ngwḛ. Si ya gha, mə̀ ya anìŋ ghò angu ni pè nɔ̰ məd a ngwḛ.”

12Mə̀mə̀nənùg məd ya ywìtì ibo gha, “Anɔŋisəg, àmə yaʼ ne wì fə fḛ a gwḛ, nji wì biri bɔti.” 13Yeso yaya ghà yaʼ gha, Lazarɔ̀s fə ku. Si ya gha, chəyi mə̀mə̀nənùg məd ya kyeri. Mbi yaya kɔ̀ndɔ gha wì ya ghà kwàʼ ngwḛ.

14Yeso ya si tòʼrì inɔb ghì ìmbɔb itog zen. Wì ya ghà inɔb gha, “Lazarɔ̀s fə ku. 15Mə we gyènde imbə̀ʼ awən, icheg ne chəyi kə̀ yi mo angu. Aton ne mə gyènde ya gha, anug azo̰ biri ghì mbə bèrì ibḛfiŋ. Tè gho bàd aməd.”

16Tòmas we ne mbi yaya kàrà ane Ànjiŋə, ya ghò ghà abə mbin tì mə̀mə̀nənùg gha, “Tè gho abɔ̀ʼ məd, ni gha, ze mə chwi tì fɔrɔ kùyə tì məd.”

Yeso ya wə̀d ne zwèmne bəd bə̀ nàʼà ìtḛ̀ abə bəd

17Anyumə̀ ne Yeso ya pe a Betanì, wì ya zug gha Lazarɔ̀s fə chughi inga iseg ineg ikwè. Iseg we ya ibighi ne mbi ya to inga igho 18Betanì ya asiŋi ne yaʼi icheg mə̀kìlometà mətad ni nɔ̀ʼ angu ghò pè a Jèrusalèm. 19Mə̀Ju nɔʼ nɔʼ ya nɔ̀ʼ a Jèrusalèm ghò ni ghàm abə Màta tì Mèri bə̀ nə̀ri ìtɔb fìŋ icheg ne ìzɔb nɔbi ku. 20Màta ya fə zug gha Yeso we yèʼe, wì nɔ̀ʼ ghò ni bɔ̀mbì tì məd. Àsi Mèri, wì ya chughi inga nəb.

21Màta ya pè bɔ̀mbì tì Yeso, ghà ibo gha, “Anɔŋisəg, àghò kə kə̀ aŋa, nji chəyi ìmə nɔbi ku. 22Si ya gha, mə kyèri gha, ka bèyi amad anìŋ, anug ne àghò bìri abə Ŋwiye, wì biri ghì ine.”

23Yeso ya ywìtì ibo gha, “Ìze nɔbi biri ywiri zweme ane iwu.”

24Màta ya ywìtì gha, “Mə kyèri gha, wì biri ghum zweme ane aneg ìnwḭ.”

25Yeso ya ghà ibo gha, “Mo ya wə̀d we ne zwèmne bəd iwu bə̀ nàʼà ìtḛ̀ abə bəd. Wə̀d ne nɔŋi ibḛfiŋ igun inum biri yaʼ izɔm, ka wi ku.” 26Wə̀d ne yaʼi izɔm ne nɔŋi ibḛfiŋ igun inum, chəyi wì biri nɔ̀ʼ ku. Àghò bḛ anug azo̰?

27Màta ya ywìtì gha, “E! Anɔŋisəg, mə bḛ gha àghò ya wə̀d we ne Ŋwiye zɔ̀ʼi. Àghò ya Ŋwan Ŋwiye we ne ya beri ni yeʼe igun isəg.”

Yeso dèg

28Màta ya ghàm ane, nɔ̀ʼ bə̀ndì ghò kàrì ìwi ifi, Mèri, jìti ibo gha, “Àchwitìnùg we aŋa. Məd we kə̀bə̀ awe.” 29Mèri ya zug ane, nɔ̀ʼ sḛ ghò ni bàd aməd. 30Chəyi Yeso ya kiri pè a Betanì. Wì ya kiri biri ane asiŋi ze ne Màta ya gho kɔ̀ti aməd angu. 31Mə̀Ju mbe ne ya yaʼi inga nəb tì Mèri nə̀rə məd, ya bàd icheg ne wì sḛ dù isəg, mbi kɔndi gha, wì ya ghò atog iseg nɔbi məd ni dèg. Ane, mbi ya bə̀ du bèni ibo anjìm.

32Mèri ya pè asiŋi ze ne Yeso ya yaʼi angu, bàd aməd, si gùg ibo imbìghè, se ghà ibo gha, “Anɔŋisəg, àghò kə kə̀ aŋa, nji chəyi ìmə nɔbi ku.”

33Anyumə̀ ne Yeso ya bàri icheg ne Mèri dèghi, fɔrɔ icheg ne mə̀Ju mbe ne ya yeʼe abɔ̀ʼ məd yaya bə̀ dèghè, anug ze ya bètì fìŋ məd, bə̀ taŋ nàʼ ngəʼ ibo. 34Wì ya si bìri inɔb gha, “Mbə̀ kə twə̀ŋi məd aya?” Mbi ya ghà ibo gha, “Anɔŋisəg, yeʼe bàd”

35Yeso ya dèg. 36Mə̀Ju mbe ne ya bàri icheg ne Yeso ya dèghi, mbi ya gha, “Mbə̀ nḛ icheg ne wì taŋ kɔ̀ŋ Lazarɔ̀s.” 37Bəd mɔ̀ʼɔ abɔ̀ʼ inɔb yaya chàpà aməd gha, “Wì yaya ghìyə̀ məfəg se bàrà isiŋi. Aghə si ghì, chəyi wì ghi gha imbə̀ʼ Lazarɔ̀s ku yi?”

Yeso zwèmne Lazarɔ̀s ane iwu

38Anug ze ya ywìrì taŋ nàʼ ngəʼ abə Yeso. Ane, wì ya si ghò atog iseg Lazarɔ̀s. Iseg we ya ibighi ne mbi ya to inga igho, si kə̀ndi ichug ane iteg kyen. 39Yeso ya ghà abə bəd mbe ne ya yaʼi angu gha, “Mbə̀ chiye iteg gho̰.” Màta, ne ya njàbi Lazarɔ̀s, ya ywìtì gha, “Anɔŋisəg, Lazarɔ̀s fə chughi inga iseg aŋa ineg ikwè. Ifɔ we anìŋ se dùwə̀ angu.”

40Yeso ya ghà ibo gha, “Àkə chəyi mə̀ kə gha ine gha, àghò mə nɔ̀ŋì ibḛfiŋ igun Ŋwiye, àghò biri bàd ika Ŋwiye?” 41Mbi ya chì iteg we. Ane, Yeso ya nɔ̀rì atog, nèn ikaŋ, gha, “Ìmə Mbaʼ, mə nàʼ məyakà ine, icheg ne àghò fə zug anug ne mə̀ gha ine. 42Mə kyèri gha, àghò we kà zùghə mə mà nyumə̀ ijìm. Mə ya ghàmà anìŋ ni ghì gha bəd mbo̰ ne aŋa asiŋi, mbe bḛ gha, à ya àghò cha amə.”

43Anyumə̀ ne wì ya màni ni ghàm ane, wì ya si ghàbri kàrì Lazarɔ̀s ane gì ka ka gha, “Lazarɔ̀s, duwə yèʼe!” 44Lazarɔ̀s ya gàd nɔ̀ʼ, dù inga iseg we. Ibo məd tì ìfe məd fɔrɔ ighog məd yaya kiri biri inipi ane ndwi linèn ze ne mbi ya nipi awu məd inga. Yeso ya si ghà abə bəd mbe ne ya yaʼi angu gha, “Mbə̀ zara aməd sàŋì, wì gho.”

Bəd chùʼri ni zweti Yeso

(Mat 26:1-5; Mag 14:1-2; Lug 22:1-2)

45Bəd ndan ndàn abɔ̀ʼ mə̀Ju mbe ne ya gho ni sɔ̀mnɔ̀ tì Mèri, ya bàd anug ne Yeso ya fàʼi, si nɔ̀ŋì ìwɔb ibḛfiŋ igun Yeso. 46Si ya gha, mbi mɔ̀ʼɔ ya bə̀ndì ghò ghà abə Mə̀farìsi anug ne Yeso ya fàʼi. 47Mə̀farìsi mbe tì itog bəd mbàn Ŋwiye fɔrɔ bəd mbe ne sàʼa aben ya chughi aseg, nyìmi ifeti, se bìre gha, “Ze kə anìŋ, tì ghə̀nə tì wə̀d gho̰? Mbə̀ nḛ iyeti inug ne wì ya fàʼà. 48Tì mə sàŋì aməd gha wì che imbìghè ni fàʼ iyeti inug mbo̰ ne wì ya fàʼà anìŋ, nji bəd məjìm biri zì ìwɔb ibḛfiŋ igun məd. Ane, ze biri ghì məRom yeʼe chìkì ìza mbàn Ŋwiye bə̀ nìmni àza aben.”

49Wə̀d mɔ̀ʼɔ abɔ̀ʼ inɔb ne ikum məd ya Kayifàs, ne ya yaʼi atog wə̀d igun bəd mbàn Ŋwiye inga fituʼ fe, ya nɔ̀ʼ ghàm gha, “Chəyi mbə̀ kyeri anug ne mbə̰ mbe ghà! 50Chəyi mbə̀ kyeri gha, ze bɔ̀ŋ gha wə̀d imɔʼ ku atog abə bəd məjìm chè icheg ni gha mbe nimni àza aben ajìm?”

51Tesiʼ ya gha, chəyi wì ya gha anug ze inga ìwi ighəm. Icheg ne wì ya yaʼi atog wə̀d igun bəd mbàn Ŋwiye, wì ya ghàm yaʼ ikən Ŋwiye gha, Yeso biri ku atog abə mə̀Ju məjìm. 52Ane, kayi məyi atog abə mə̀Ju. À ya fɔrɔ ni ghì gha bəd Ŋwiye mbe ne saka inga isəg ijìm, mbe si yaʼ bəd anug amɔʼ. 53Ni ko ane aneg ze se ghò imbìghè, mbi ya se chùʼrə icheg ne mbi biri zwete Yeso.

54Nɔ̀ʼ ane aneg ze, chəyi Yeso ya ywìrè yḛ̀ asaŋ asaŋ inga Jùdeyà. Wì ya si nɔ̀ʼ ghò a asiŋi mɔ̀ʼɔ ne mbe kàrà ane Efrèm, iban ibad zɔbi. Wì ya si chùghi angu tì ìmbi mə̀mə̀nənùg.

55Anyumə̀ ne Iteri Chègun mə̀Ju ya se tìnde, bəd nɔʼ nɔʼ ya nɔ̀ʼ inga isiŋi ijìm mbe ne yaʼi iban iban, kòʼ ghò a Jèrusalèm ni sò nyɔd icheg ne mə̀nɔ̀ʼɔ̀ Muse chwi. 56Mbi yaya se kə̀bə̀ Yeso. Anyumə̀ ne mbi fete inga mbàn Ŋwiye, mbi yaya se bìre abə mə̀mbin gha, “Mbə kə kɔ̀ndɔ gha? Kə̀ wì biri yeʼe aŋa ane iteri?” 57Ane, itog bəd mbàn Ŋwiye fɔrɔ mə̀Farìsi ya fə ghà abə bəd gha, wə̀d mɔ̀ʼɔ mə̀ kyeri asiŋi ne Yeso yaʼi angu, tengàŋ ghò ghà inɔb, imbə̀ʼ mbi gho gwì aməd.

Currently Selected:

Jɔn 11: MBTP

Highlight

Copy