Makòrzì 2

Yerzù à mà wɔ̀wìrzɛ̀ è mòtò wà è nyàmbɛ yà njɛmbu

(Mat 9.1-8; Luk 5.17-26)

1O mburzà yà ŋgùrzù jà mèènyà, Yerzù à mà tìmba hvɛ ò mbòwà yà Kàpɛ̀nàwɔ̀mì, hwatò hwa mà hwèya nanù ema à mà jà ò mbòwà. 2Rzayì-rzayì ja hwatò hwa mà arzàŋganɛ ò èŋge ndawò ema Yerzù à mà hwɛ, natɛ̀ɛ ò rzi hwɛ hvɛ tɔ èhvòlò ò tenì nà ò èwòkà. À mà hwɛ lì hwa òhweyà Èya ya Lohwà. 3Ène hvònda ndi hwatò hwanì hwa mà jànè mòtò mɔ̀kɔ ema à mà ɔ̀kìrzɛ̀ e nyàmbɛ yà njɛmbu. 4Hwa rzi tanɛ̀yi lì mò jàneyà Yerzù èhwanja è ŋgìndì è mà aka lì kòka. Hwaŋga hwatò rzìi hwa agba ò ŋmanyu yà èŋge ndawò, hwa kɔ̀rzɔ̀ lìkààndò la èŋge ndawò lì ma hvòmɛ̀nɛ̀ èki ema Yerzù a mà hwɛ. Rzìi hwa rzìhwirzɛ òŋgò mòtò nà lìkɔ̀kɔ̀ ema òŋgò mòtò à mà naŋgeya ò wòrzò wò ama Yerzù. 5Nà òmà Yerzù a mà ɛnɛ̀ lìlòkɛ̀ la awu, rzìi a òhweyà òŋgò mòtò wà njɛmbu nanù ema, “Ŋmanà wà amì, nà ma ò làkìrzɛ̀ wòhwe wò aŋgɔ.” 6O ma hwɛ lòŋgò la hwà-òkòlèlì hwa mbenda aŋga, rzìi hwa wòteyà lì lùteyà na wɔ̀ mɛnɛ nanù ema, 7“Mamɛ ndeŋgatɛ ònò mòtò a àŋgàmɛ̀nɛ̀ lì òhwà nanù e? Ìrzìlakò ini. Njɛnɛ à tànɛyi lì làkìrzɛ̀ wòhwe, lì akà tɛ Lohwɛ̀ e?” 8O wòtɛmɛ̀tɛmɛ̀ Yerzù à mà hwiya ò ŋmèma mò eni ema nanù ndi hwanù hwatò hwa hwèlì lì lùteyà ò mèèmà me awu. Rzìi à hwa ijòwa nanù ema, “Mamɛ ndèŋgàtɛ̀ è lùteyà nanù e? 9Ì ma yɔ̀ e wɔ̀tɔ̀mèlì, ò lì òhwànà è mòtò wa njɛmbu nanù ema, ‘Nà ma ò làkìrzɛ̀ wòhwe wò aŋgɔ̀,’ ŋgà ò lì òhwà nanù ema, ‘Tɛ̀mɛ̀nɛ̀ ò ŋmanyu, wòwà lìkɔ̀kɔ̀ lì àŋgɔ ò ɛ̀ndɛ̀ e?’ 10Nà e uŋmɛ̀lɛ̀ nanù ema è Ŋmanà wà è Mòtò wà Hwènàmà a hweni wònjà ya lì làkìrzɛ̀ wòhwe ò rze.” Yerzù rzìi a òhweyà òŋgò mòtò hwa e nyàmbɛ yà njɛmbu nanù ema, 11“Nà ò òhwèlì nanù ema, tɛ̀mɛ̀ ò wòwè lìkɔ̀kɔ̀ lì àŋgɔ, ò ɛ̀ndɛ̀ ò mààndà ma aŋgɔ.” 12À mà tɛ̀mɛ̀ rzìi à wòwà lìkɔ̀kɔ̀ lì eni à anjiya ò èŋge ndawò ò hwɛ̀ɛ̀nèlì hwe hwaŋga hwatò hwa arzɛ. Ène eyà è mà tàmìrzɛ̀ hwatò hwa arzɛ rzìi hwa eka Lohwɛ̀ hwa òhwa nanù ema, “Ì rzi ɛni ène nyàyi yà eyà!”

Yerzù à mà hwɛlɛ Lɛ̀hvì

(Mat 9.9-13; Luk 5.27-32)

13Yerzù à mà tìmba hvɛ ò rzàawà yà yùlu yà Galìlì. Ŋgindi ndɛnɛ̀ è mà mò jèeyà rzìi à wòteyà lì hwa òkòlɛ̀. 14Nà òmà à mà hwɛ lì akà ò njìya, à mà ɛnɛ mòrzàŋgèlì mɔ̀kɔ wà è njàŋge yà lìkànèyà ema à mà hwɛ̀lɛ̀hwɛ̀ Lɛ̀hvì, è ŋmanà wà àma Alìhvɔ̀rzì. Lɛ̀hvì à mà lìya ò lìyɛhvɛ ema à mà hwɛ lì rzàŋgìrzɛ̀ è njàŋge yà lìkànèyà. Yerzù rziì à mò òhweyà nanù ema, “O nò òŋgame.” Lɛ̀hvì rziì a tɛ̀mɛ̀ a mò òŋgama.

15O mburzà hvònda nà òmà Yerzù à mà hwɛ lì làa ò ndawò yà àma Lɛ̀hvì. Rzayì-rzayì ja hwàrzàŋgèlì hwa njàŋge yà lìkànèyà, nà hwahvɛhvɛ hwatò hwa wòhwe hwa mà hwɛ lì nɔ̀ŋgɔ̀ Yerzù. Hwà mà hwɛ lì làa na mɔ̀ nà hwà-òkòwèlì hwa eni ò tehwèlì. 16Lòŋgò la hwà-òkòlèlì hwa mbenda ema hwà mà hwɛ Hvalìrzàyì hwa mà ɛnɛ Yerzù à làa nà hwaŋga hwatò hwa wòhwe nà hwàrzàŋgèlì hwa è njàŋge yà lìkànèyà, hwa mà ijòwa hwà-òkòwèlì hwa eni nanù ema, “Mamɛ ndèŋgàtɛ̀ Yerzù à làa nà iŋgi nyàyi ja hwatò e?” 17Yerzù a mà hweye nanù, rzìi à hwa alàhwɛ̀ nanù ema, “Hwatò ema hwa lìyayi gbamù hwa rzà àrza ŋgàŋgà. Hwatò ema hwa ɔ̀kìrzɛ̀ wɔ̀ ndi hwa àrza è ŋgàŋgà. Nà rza jèlì ò ene rze ya mɔ̀nyɛ̀ lì hwɛlɛ è wɔ̀ ema hwa tɛmi ehve-ehve, ndi nà jɛ̀lɛ̀lɛ̀yi ndi è wɔ̀ hwa wòhwe.”

Mìijowelì lì hvòmɛ̀nɛ̀ è mòkìyà njàwò

(Mat 9.14-17; Luk 5.33-39)

18Hvònda hvɔ̀kɔ hwà-òkòwèlì hwa ama Yòwanìrzɛ̀ è Mòlùhwìrzèlì nà hwà-òkòwèlì hwa Ihvàlìrzàyì hwa mà hwɛ ò mòkìyà njàwò. Lòŋgò la hwatò rziì hwa jèeyà Yerzù ò lì mò ijòwà nanù ema, “Mamɛ ndèŋgàtɛ̀ hwà-òkòwèlì hwa ama Yòwanìrzɛ̀ è Mòlùhwìrzèlì nà hwà-òkòwèlì hwa ì Hvàlìrzàyì hwa lìyà mòkìyà njàwò, ndi è hwa aŋgɔ hwa rzà lìya mòkìyà njàwò e?” 19Yerzù rzìi a hwa alàhwɛ̀ nanù ema, “Nɛ hwatò ema hwa yòhwɛ̀hwɛ̀yi ò ndèma yà lìhwa, hwà tànɛyi lì lìya mòkìyà njàwò, wɔ̀ hwa hwèlì tɛ na e mòhwɛnɛ wa mɔ̀ɔ̀mbì e? Jàyɛ̀ hwa rzà tànɛ̀yi! 20Ndi o ò ja wùnyà ema hwa ò hwa wòwàna e mòhwɛnɛ wa mɔ̀ɔ̀mbì. O wòŋgò wùnyà ndi hwa ò lìya e mòkìyà njàwò ò màkanɛ̀. 21Mòtò à rzèeyà tɛ mbɔti, à rza wòwà èhvàhve ya lìhwatù lì hvènya ò lì rzèeyànà e mbòlòwa yà mbɔti. Èhwanja èŋge èhvàhve ya lìŋgi lìhwàtù lì hvènya lì wòtèlì tɛ lì nyàhweyà, lì nyààwà hvɛ èŋge mbòlòwa yà lìhwàtù. Ò ma lìŋgi lìhvɔ̀ndi lì ma teyama lì akà lìmɛ̀nì. 22Nànù mɛnɛ hvɛ ndi e hwèlì, ema mòtò a rza tànɛ̀yi lì wòwà mòkàkò mò mimba rzìi à mà rzɔ̀lɛ̀ ò tenì yà èlùnì ja kòhwà. Òŋgò mòtò à gbèyi tɛ nanù, mòŋgò mòkàkò mò hvùhvà, natɛ̀ɛ è kòhwà e kandeyà, òma maŋga mimbà ma mà rzòweyà, òma è kòhwà yɔ hvɛ e ma hvaŋgeyà. È hwɛ ndi ema mòkàkò mò mimba mò rzɔ̀lɛ̀hwɛ̀ ndi ò tenì ya kòhwà hvènya.”

Mììjòwèlì me Wùnyà wò lì Arzìyòlɛ̀

(Mat 12.1-8; Luk 6.1-5)

23Wùnyà wɔ̀kɔ wò lì Arzìyòlɛ̀, Yerzù à ma hwɛ lì akeyà mòònda mò mbàrzì. Hwà-òkòwèlì hwa eni hwa mà hwɛ nà mɔ̀. Nà òmà hwa mà hwɛ lì ɛ̀ndɛ̀, hwà-òkòwèlì hwa eni rziì hwa wòteya lì hvatà hwèrzòŋgò hwe mbàrzì. 24Ihvàlìrzàyì rziì jì ijòwa Yerzù nanù ema, “Ɔ̀ŋgɔ tɛ! Mamɛ ndeŋgàtɛ hwà-òkòwèlì hwa aŋgɔ hwa gbeyà eyà ema è mbenda e rzà ŋgbèlɛ wònjà ò lì gbeyà ò Wùnya wò lì Arzìyòlɛ e?” 25Yerzù à mà hwa alàhwɛ̀ nanù ema, “È rzi làŋgi ò Kààtì ya Lohwà mamɛ ema Kìŋgɛ Dàhwitì à mà gbèyè na hwatò hwa eni e hvònda ema hwa mà hweye è njàwò hwa rzi òhvɛ mòlèlì e? 26Mɔ̀ à mà ɛ̀ndɛ ò Ndawò yà Lohwà, è hvònda ema Abìyatà a mà hwɛ è Pìlìrzì e kàrzàmi. À mà làa hwèhvòòtò ema hwe ma hwɛ làhweyà la ama Lohwɛ̀. Ndi è mbenda yà àrzu è rza ŋgbèlì tɔ̀ mòtò tɔ̀ mɔ̀kɔ wònjà ò lì làa hwèŋge hwèhvòòtò lì aka tɛ Ipìlìrzì. Kiŋgɛ̀ Dàhwitì mɔ̀ ŋmìti à mà hwe làa, natɛ̀ɛ à mà ŋgba hvɛ hwatò ema hwà mà hwɛ nà mɔ̀.” 27O lìrzukù Yerzù rziì a hwa òhweyà nanù ema, “Lohwɛ̀ à mà lòma lì weka è mòtò, ndèŋgàna a ika menya mò lì Arzìyòlɛ̀. À rzi lòmè lì ika Wùùnyà wò lì Arzìyòlɛ̀ ndèŋgànà a e weka è mòtò. 28O èŋgànɛlɛ rzɔ, è Ŋmanà wà è Mòtò wà Hwènàmà, a òhvi wònjà ò lì kànèyà hvɛ tɔ̀ Wùùnyà wò lì Arzìyòlɛ̀.”

Currently Selected:

Makòrzì 2: bri

Highlight

Copy