Matiyò 8

Yerzù à wɔ̀wìrzɛ̀ è mòtò wà è nyàmbɛ yà mɔ̀lɔ̀ŋgɔ

(Mak 1.40-45; Luk 5.12-16)

1Nà òma Yerzù à mà rzihwe ò mòŋgò mòòlì, ŋgìndì ndɛnɛ yà hwatò è mà hwɛ lì mò nɔ̀ŋgɔ. 2Munyanà mɔ̀kɔ ema à mà ɔ̀kirzɛ̀ è nyàmbɛ yà mɔ̀lɔ̀ŋgɔ rzi à jà à rzùmeya Yerzù màwɔ̀ŋgɔ̀ŋgɔ̀ à mò òhweyà nanù ema, “Ìi Rzàŋgò ò lìŋgàni tɛ, ò gbèèye ema nà rzàŋge.”#8.2 Mònò mòtìla mò hwèlì ò è kààtì yà ama Lɛ̀hvìtikɔrzi lìyòme là hwèhvarzù nà hweyàwò ŋmɛ̀ŋgɛ̀ ema mè ùkirzɛ̀ mènìmènì nà meta natɛ̀ɛ nà mènìmènì nà mòtòhwa (Lɛ̀hvì 13.45-46). 3Yerzù à mà enyòwa lìya là eni à lì hwàkɛ òŋgò mòtò ò nyò yà eni, à òhwa nanù ema, “Nà lìŋgàni, rzàŋga!” O wòtɛmɛ̀tɛmɛ̀ è nyàmbɛ yà mɔ̀lɔ̀ŋgɔ è mà kuwa ò nyò yà eni. 4Yerzù rzìi à mò òhweyà nanù ema, “O rzìi keka lì òhweyà tɔ̀ mòtò tɔ̀ mɔ̀kɔ eyà ema è gbèyɛ̀nɛ̀. Ndi ò ɛ̀ndɛ wà awuŋmɛ̀lɛ̀ ò wà hwitì ò mà è Pìlìrzì à ò inje. Rzìi ò ŋgbe hvɛ jàhwèyà nàa è mbenda yà ama Mòrzè è òhwa ò lì uŋmɛ̀lɛ̀ nanù ema ò mà rzàŋga.”

Yerzù à mà wɔ̀wìrzɛ̀ è mògbèèlì wà ama è mɔ̀ɔ̀ŋgèlì wà hwàànà njùma

(Luk 7.1-10)

5Lìrzakò ema Yerzù à mà kpèeyà ò mbòwà yà Kàpɛ̀nàwɔ̀mì, mɔ̀ɔ̀ŋgèlì mɔ̀kɔ wà hwàànà njùma wà Ròmànì ema à mà hwɛ lì kànèyà egbe yà hwàànà njùma, rzìi à mò jèeyà à mò rzòrzòmeyà nanù ema, 6“Rzàŋgò kòkò, è mògbèèlì wà ami à ɔ̀kirzɛ̀ à nàŋgayi ò lìnɔ̀ŋgɔ. À rza lùwa tɔ̀ lì tɛ̀mɛ̀ ndèŋgànɛ̀lɛ̀ à atàkìrzɛ̀ rzayi-rzayi.” 7Yerzù rzìi à mò òhweyà nanù ema, “Nà ɛ̀ndɛ, lì mò wɔ̀wìrzɛ̀.” 8Oŋgò mɔ̀ɔ̀ŋgèlì wà hwàànà njùma rzìi à alàhwɛ̀ Yerzù nanù ema, “Ìi Rzàŋgò nà rza uki tɔ̀ mòtò ema nà tànɛyi lì ò arzàŋgànɛ̀lɛ̀ nàa ŋmɛ̀nì ò ndawò yà ami, ndi òhwa mbɔrzi hvɔ̀kɔ òma è mògbèèlì wà amì à mà wɔ̀wɔ̀. 9Imba mbiti nà hwèlì ndi mòtò ò rze yà lìkànèyà. Nà kànèyà hvɛ hwàànà njùma. Nà òhweyà ŋmànèlì mɔ̀kɔ wà njuma nanù ema, ‘Ɛ̀ndɛ,’ ndèŋgànɛ̀lɛ̀ à ɛ̀ndɛ. Nà òhweyà hvɛ ɔ̀nɛyi nanù ema, ‘Jà,’ mɔ̀ hvɛ à jà. Nà òhweyà hvɛ è mògbèèlì wa ami nanù ema, ‘Gbeyà ene eyà,’ mɔ̀ hvɛ à è gbeyà.” 10Nà òma Yerzù à mà hweye hwenè hwèyòhwèlì, à mà tàmà rzayi-rzayi, rzìi à òhweyà hwaŋga ema hwa mà mò nɔ̀ŋgɔ nanù ema, “Nà è òhweyà ndi è jɔ̀kɛ̀, nà rzì ɛnì tɔ̀ mòtò tɔ̀ mɔ̀kɔ ò èkòmè ya arzɛ yà Irzàyɛ̀lì ema à òhvi ene tumba ya lìlòkɛ̀ ema ònò ŋmɛ̀nì à òhvi. 11Nà è òhweyà ndi nanù ema, è hvònda ema o ò hwɛ ndèma ò lìkànèyà là ama Lohwɛ̀, rzayì-rzayì ja hwatò ema hwa rza kànɛ̀yi ò lì hwɛ aŋga hwa ò uhwɛ̀lɛ̀lɛ ɔ̀nɛyi nà wàteŋyi, ema hwa ò wòwɛ hwèki hwe awu hwe hwèlìyelì ò eŋge ndèma yà lìkànèyà là ŋmanyu yà lohwà nà imbamba ja arzu Abràhamù, Irzàkì, nà Jèkɔ̀bù. 12Ndi hwaŋga ema hwa kànɛ̀yi lì hwɛ i wònjà ò lìkànèyà là ama Lohwɛ̀ hwa ò aŋgbahwa ò èwòka ò tenì ya jìtìtì. Aŋga rzɔ ndi wɔ̀ hwa ò kɔ̀kɔ̀ mehvehve me awu, na lì ahvahvɛ.” 13Yerzù rzìi à òhweyà òŋgò ŋmanèlì wà njùma nanù ema, “Ɛndɛ! Yò ò gbèyɛnɛ̀ nà òma ò lòkɛ̀ nanù.” Ò lìŋgi lìrzàkò mɛnɛ, è mògbèèlì wà ama òŋgò mòkànèlì à mà wɔ̀hweyà.

Yerzù à mà wɔ̀wìrzɛ̀ rzayì-rzayì ja hwatò

(Mak 1.29-34; Luk 4.38-41)

14Nà òma Yerzù à mà uke ò è ndawò yà ama Pètrò, à mà ɛnɛ Pètrò nyàŋgò wà eni wà lìhwa, à naŋgani è ŋgɔwu ò lìnɔ̀ŋgɔ. 15Nà òma Yerzù à mà lɛ̀mbɛ̀ lìya là eni, rzìi eŋge ŋgɔwu è mò hwɛ̀mɛ̀. Rzìi à tɛ̀mɛ̀ à hwa kàrzɛ̀. 16È hvònda yà è ŋgòmbe yà lohwà, hwatò hwa mà jàneyà Yerzù rzayì-rzayì ja hwatò ema hwa mà òhva hwèlìŋgɛ̀ hwe wòhwe ò tenì ja awu. Yerzù à mà gbeyànà è mbɔrzi yà eni yà wàna ò lì ulɛ̀ hweŋge hwèlìŋgɛ̀ hwe wòhwe, rzìi à wɔ̀wìrzɛ̀ hvɛ hwaŋga hwatò hwa arzɛ ema hwa mà ɔ̀kìrzɛ̀. 17Yerzù à mà gbeyà ndi hwene hweyà hwe arzɛ nanù, ò lì òndìrzɛ̀ ŋmɛ̀ndì ema Lohwɛ̀ à mà òme lì akeyà nà è mòòhwèlì wà èlìŋgɛ̀ Àyìrzayà nanù ema,

“À mà jò wòwàna inyambɛ ja arzu ja arzɛ. À mà wòwà hvɛ mètàkà mè arzu mè arzɛ.”

Hwatò ema hwa mà òhva ŋmèma ò lì nɔ̀ŋgɔ Yerzù

(Luk 9.57-62)

18È hvònda ema Yerzù à mà ɛnɛ è ŋgìndì ema è mà mò tòŋga, rzìi à òhweyà hwà-òkòwèlì hwa eni nanù ema, hwa ɛndɛ ò ɛnɛyi èhvarzù yà yulu. 19Mòòkòlèlì mɔ̀kɔ wà è mbenda rzìi à mò jèeyà, à mò òhweyà nanù ema, “Ìi Mòòkòlèlì, nà ò òŋgama tɔ̀ ima èki ema ò ɛ̀ndɛ.” 20Yerzù rzìi à mò alàhwɛ̀ nanù ema, “I njùhwɛ̀ ja òhvi hvòkò ema i nàŋgeya. Hwenɔ̀ni hwe ŋmanyu hwèyɔ̀hvɛ hwe òhvi màwùmbù, ndi è Ŋmàna wà è Mòtò wà Hwènàmà mɔ̀ à rza òhvi tɔ̀ èki ema à nàŋgɛlɛ mòòhvò mò eni.” 21Òhvɛhvɛ mòtò mɔ̀kɔ ema à mà hwɛ lì òŋgama Yerzù rzìi à mò òhweyà nanù ema, “Ìi Rzàŋgò kòkò, ambɛ̀lɛ nà lòma lì ɛ̀ndɛ lì imeyà è rzàŋgò yà amì.” 22Ndi Yerzù à mà mò alàhwɛ̀ nanù ema, “Ò nò òŋgame, hwɛ̀mɛ̀ hwaŋga hwatò ema hwa mà ŋwɛ, hwa ìmeyà hwaŋga hwatò ema hwa ŋwelì.”

Yerzù à mà lɔ̀kɔ mùùlì

(Mak 4.35-41; Luk 8.22-25)

23O eŋge hvònda, Yerzù à mà kpèeyà ò tenì yà wɔ̀lɔ̀ nà Hwà-òkòwèlì hwa eni rzìi hwa wòteyà lì luka wɔ̀lɔ̀. 24Nà òma hwa mà uke ò tenì yà malìhwa, è mbɛ̀hvɛ̀nì rzìi è wòteyà lì uŋgɛlɛ. È mà imbama nyayi ema è mà arze lì indirzɛ wɔ̀ɔ̀lɔ̀, ndi Yerzù mɔ̀ à mà hwɛ ndi ò ijɔ̀. 25Hwà-òkòwèlì hwa eni rzìi hwa ɛ̀ndɛ lì mò ìmòlɛ̀ hwa mò òhweyà nanù ema, “Ìi Rzàŋgò kòkò, ò jò rzùŋge! Kàà irzɔ ja à ŋwa!” 26Yerzù rzìi a hwa alàhwɛ̀ nanù ema, “Mamɛ ndèŋgatɛ̀ è òka wɔ̀ŋgɔ̀ nanù e? Mamɛ ndeŋgatɛ lìlòkɛ̀ la anyu lì tùù nanù e?” Rzìi à tɛ̀mɛ̀ ò ŋmanyu, à lòmeyà è mbɛ̀hvɛ̀nì ema e ma hwɛ lì hvɛhvɛ na hwèmùnɛ̀. O wòtɛmɛ̀tɛmɛ̀ e mbɛ̀hvɛ̀nì e ma kɛ̀ɛ̀yà rzìi hwèmùnɛ̀ hvɛ hwe lɔ̀kɔ̀meyà. 27Hwà-òkòwèlì hwa eni hwa ma tàmà rzayi-rzayi, rzìi hwa ijòwa nanù ema, “Ima ŋgàna mòtò ònò, ema natɛ̀ɛ na è mbɛ̀hvɛ̀nì na hwèmùnɛ̀ hwe ŋmànja hwe mò hweyànà e?”

Yerzù à mà wɔ̀wìrzɛ̀ hwatò hwahwàkɛ ema hwa mà òhva hwèlìŋgɛ̀ hwe wòhwe

(Mak 5.1-20; Luk 8.26-39)

28È hvònda ema Yerzù na hwà-òkòwèlì hwa eni hwa ma uke ò ɛnɛyi èhvarzù yà yulu, yà erzòòkà yà Gɛ̀ràrzɛ̀nì, hwatò hwahwàkɛ ema hwa mà òhva hwèlìŋgɛ̀ hwe wòhwe ò tenì ja awu, hwa ma uwɛ̀lɛ̀lɛ ò mòònda mò rzɔ̀ŋgɔ̀ hwa ma mò ùŋmanɛlɛ. Hwanù hwatò hwa ma ambìrzɛ̀nɛ̀ ema, tɔ̀ mòtò à rzìi tanɛ lì akeyà ò eŋge èhvàrzù ya njiya ema hwa ma hwɛ. 29Nà òma hwa ma ɛnɛ Yerzù, rzìi hwa wòteyà lì tɛɛ nanù ema, “È Ŋmàna wà ama Lohwɛ̀, mamɛ ò hwɛnì lì jò gbeyàna e? O jelì ndi anù ò lì jò kɔ̀kìrzɛ̀ ema e hvònda e rzìi uki e?” 30O ma hwɛ gbàka wò ŋgòwa ema wò ma hwɛ lì leeya ŋmanà hvòka lì hwa kòmbɛ̀nɛ̀. 31O èŋgànɛ̀lɛ̀ hweŋge hwèlìŋgɛ̀ hwe wòhwe rzìi hwe rzòrzòmeya Yerzù nanù ema, “I hwi nanù ema ò hwɛni lì jò hvaya, ò jò òme ò wòŋgò gbàka wò ŋgòwa.” 32Yerzù rzìi à kaneyà hweŋge hwèlìŋgɛ̀ hwe wòhwe nanù ema, “È wurze” lìwòkìmɛnɛ rzɔ hweŋge hwèlìŋgɛ̀ hwe ma hwa wurza rzìi hwe kpèeyà wòŋgò gbàka wò ŋgòwa. Iŋgi ŋgòwa ja arzɛ rzìi ì hwaŋga lìhwaŋgi la mànyakà ò mbèmbè yà lìyòwà rzìi, i unda ò tenì yà yùlu ya malìhwa, ì kùwa lì indeya aŋga. 33Hwàŋga hwatò ema hwa ma hwɛ lì ɔ̀ŋgeyà iŋgi ŋgòwa hwa mà hwaŋga, hwa ɛ̀ndɛ lì kpèeyà ò mbòwà. Hwa wòteyà lì òhweyà hwatò mamɛ ya arzɛ ema e gbèyɛ̀nɛ̀ na hwaŋga hwatò ema hwa ma òhva hwèlìŋgɛ̀ hwe wòhwe. 34Nà òma hwatò hwa eŋge mbòwà hwa ma hweye nanù, rzìi hwa wurza ò lì ɛ̀ndɛ lì ùŋma Yerzù. Nà òma hwa ma mò ɛnɛ, hwa mò rzòrzòmeyà ema a anjiye ò erzòòkà ya awu.

Currently Selected:

Matiyò 8: bri

Highlight

Copy