Matiyò 21

Yerzù à kpèelì nàa Kiŋgɛ̀ ò Jèrurzalɛ̀mù

(Mak 11.1-11; Luk 19.28-40; Yòw 12.12-19)

1Nà òma Yerzù na hwà-òkòwèlì hwa eni hwà mà kòmbɛ̀nɛ̀ e mbòwà ndɛnɛ ya Jèrurzalɛ̀mù, hwà mà uka e mbòwà ya Bɛ̀thvegi ò e hvàko ya Njàhwɛ̀. Yerzù rzi a òma Hwà-òkòwèlì hwa eni hwahwàkɛ ò lì ɛndɛ ò wòrzò, 2rzìi a hwa òhweyà nanù ema, “È ɛ̀ndɛ ò mbòwà ema e hwèlì ò wòrzò wò anyu. È ùŋmanɛlɛ jàkarzì ema i tiŋgɛhwɛyi aŋga ema i òhvi nà è ŋguma yà eni ò tòŋgòŋgò e ji rzòlòhwe, e nò jàneyà e jɔ. 3È hwèlì tɛ ema mòtò à è ijò tɛ tɔ̀ eyà, e mò òhweyà ema, Rzàŋgò#21.3 Rzàŋgò: Tɔ̀ È mòhwɛnɛ. à ji tukanelì. Oŋgò mòtò a ji òma lìwòkimɛnɛ.” 4Ene eyà e ma gbèyɛ̀nɛ nanù, ò lì òndìrzɛ̀ e mbɔrzi ema Lohwɛ̀ à mà òme lì akeyà na e mòòhwèlì wà èlìŋgɛ̀ nanù ema,

5“Ohweyà hwatò hwa Rzàyɔ̀nì nanù ema,

Wà à ɔ̀ŋgɔ, è kìŋgɛ yà aŋgɔ̀ yè è jèeyà!

À arzìhwìrzɛ̀yi, à lìyàyi ò ŋmanyu yà jàkarzì, ŋguma jàkarzì jà mòme.”

6Ò èŋgànɛ̀lɛ̀ rzɔ, hwaŋga Hwà-òkòwèlì hwa mà ɛ̀ndɛ rzi hwa gbeyà ndi nà òma Yerzù à mà hwa kànèyà ò lì gbeyà. 7Hwàŋga hwà-òkòwèlì hwahwàkɛ hwa mà jàneyà Yerzù iŋgi jàkarzì nà è ŋguma yà eni, hwa mà wòwa mààtù mà awu rzìi hwa mà tààlɛ̀ ò ŋmanyu iŋgi jàkarzì rzìi Yerzù à jà agba ò ŋmanyu. 8Ŋgindi ndɛnɛ yà hwatò è mà tààlɛ̀ mààtù mà awu ò njiya. Hwahvɛhvɛ hwa mà kɛ hwɛ̀kɔ̀kɔ̀ hwe màyi rzi hwa tààlɛ̀ ò njiya. 9È ŋgìndì ema è mà hwɛ lì ɛ̀ndɛ ò wòrzò wà ama Yerzù, nà è yɔ̀ ema è mà hwɛ lì mò nɔ̀ŋgɔ ò mburzà, hwa mà hwɛ lì tɛ̀ɛ̀ nanù ema,

“Hòrzana, nà jèka hvɛ ì hwɛ nà è Ŋmanà wà è nyɔ̀ŋgɔ̀nì yà ama Dàhwitì.

Mònàmɛ̀ mò hwèlì nà òŋgò ema à jelì ò lìnà là ama è Rzàŋgò.

Hòrzana,#21.9 jànda jà ene mbɔrzi ò hwèyòhwèlì hwe è mbɔrzi yà Hibrù hwe hwèlì ndi nanù ema, “Rzùŋga” ema è mà jà jòòhwì jà jèka. Ema è hwèlì hvɛ ò ŋmɛ̀ŋgɛ̀ nà 15. jèka ì hwɛ nà Lohwà ema mɔ̀ ndi à kàrzamì lì aka hwa arzɛ!”

10Nà òma Yerzù à mà kpèeyà ò tenì yà è mbòwà ndɛnɛ yà Jèrurzalɛ̀mù, è mbòwà yà arzɛ è mà nyìŋga ndi jèmì-jèmì, natɛ̀ɛ hwatò hwa mà wòteyà lì ijòwa nanù ema, “Njɛnɛ hvɛ ò nò e?” 11Eŋge ŋgìndì e hwa alàhwɛ̀ nanù ema, “Yerzù ònò, è Mòòhwèlì wà èlìŋgɛ̀ ema a uwɛ̀lɛ̀lɛ̀yi ò e mbòwà yà Nàrzarɛ̀tì ò èkòmè ya Galìlì.”

Yerzù a hvayi hwa àhwìrzèlèlì ò è Ndawò yà Lohwà

(Mak 11.15-19; Luk 19.45-48; Yòw 2.13-22)

12Ò mburza hvònda, Yerzù à mà ɛndɛ lì kpèeyà ò è Ndawò yà Lohwà. À mà hvaya hwaŋga hwatò hwa arzɛ ema hwa mà hwɛ lì anda nà lì àhwirzɛ̀ inyòŋga ja awu aŋga. À mà nòŋgòlɛ̀ itèhwèlì ja è wɔ̀ ema hwa mà hwɛ lì kènjirzɛ̀ ìkahvà, nà ì mbòkò jà è wɔ̀ ema hwa mà hwɛ lì àhwirzɛ̀ imbèŋgà. 13À mà hwa òhweyà nanù ema, “È tìlahwì ema, Lohwà a òhwi nanù ema,

‘È ndawò ya ami e ò hwɛ̀lɛ̀hwɛ̀ ndi e ndawò ya màkanɛ̀.’ Ndi inyɔ ye e timbirzɛ ndi ‘Èki ema hwayihwɛ hwa utàmà.’”

14Hwàŋga hwatò ema hwà mà ɔ̀kirzɛ̀ e nyàmbɛ ya ndima na mbòkò hwà mà mò jèeyà ò tenì ya e Ndawò yà Lohwà ya màkanɛ̀, ndèŋgànɛ̀lɛ̀ à mà hwa wɔ̀wìrzɛ̀. 15Ndi na òma Ipìlìrzì ndɛnɛ na Hwà-òkòlèlì hwa mbenda hwà mà ɛnɛ hwenè hweyà hwe mànyakà ema Yerzù à mà hwɛ lì gbeyà, ndèŋgànɛ̀lɛ̀ hvɛ merzeya ema hwàna hwarzàlì hwà mà hwɛ lì tɛ nanù ema, “Jèèka i hwɛ na è Ŋmanà wà e nyɔ̀ŋgɔ̀nì ya ama Dàhwitì,” hwà mà tàta rzayi-rzayi. 16Hwanù hwàkànèlì rzi hwa ijòwa Yerzù nanù ema, “Rzeke ò hwèya mamɛ ema hwanù hwàna hwa òhwa e?” Yerzù rzi a hwa alàhwɛ̀ nanù ema, “Ɛ̀ɛ na hweyi. Inyɔ e rzi laŋgi na òma e tìlahwì ò kààtì ya Lohwà nanù ema, ‘A ma wòmba hwàna na ŋmɛ̀ɛŋgɛ ò lì mò ŋgba jeka ja gbamù e?’” 17Yerzù à mà hwa lìya ò Jèrurzalɛ̀mù rzi a ɛ̀ndɛ ò lì naŋga ò mbòwà ya Bɛ̀tanì.

Yerzù à jemi gbèe wò hvigi

(Mak 11.12-14,20-24)

18O ekpa ya arzɛ ya wònɛyi wùnyà, na òma Yerzù à mà hwɛ lì tìmba ò Jèrurzalɛ̀mù, e njàwò e ma mò lɛ̀mbɛ. 19Nà òma à mà hwɛ lì ɛndɛ, rzìi a ɛnɛ gbèe ema wò ma hwɛ̀lɛ̀hwɛ̀ hvigi ò tòŋgòŋgò ya njiya, à mà ɛ̀ndɛ aŋga. Ndi a rzi ùŋmanɛlɛ tɔ̀ ehvùma yɔ̀kɔ aŋga, lì aka tɛ hwèyalì mɛnɛ. Yerzù rzìi a òhwirzɛnɛ wòŋgò gbèe nanù ema, “O rza ò ŋya hvɛ tɔ̀ ehvùma” ò lìwòkimɛnɛ wòŋgò gbèe rzìi wò rzɔnjɔ. 20Nà òma Hwà-òkòwèlì hwa eni hwà mà ɛnɛ ene eyà, hwà mà jeja. Rzi hwa ijòwa ŋgelì hvɔ̀kɔ nanù ema, “Nɛ wònò gbèe wò akɛlɛ lì rzɔ̀njɔ nanù e?” 21Yerzù à mà hwa alàhwɛ̀ nanù ema, “Nà e òhweyà ndi e jɔ̀kɛ̀, e òhvi tɛ lì lòkɛ̀ rzi e rzi tame, inyɔ hvɛ e tànɛyi lì gbeyà mamɛ ema na gbeyànì wònò gbee. Rzeke hvɛ tɔ̀ ene mɛnɛ, e tànɛyi hvɛ lì òhweyà ene hvàko nanù ema, ‘Anjiya anu òma, ò ɛndɛ ò ahvimbɛ ò wà witi ò tenì ya ŋmànja’ e gbèyɛ̀nɛ nanù. 22È òhvi tɛ lì lòkɛ̀ nanù ema, tɔ̀ mamɛ ema e ijòwani Lohwɛ̀ ò màkanɛ̀ ye e lùwa. Nànù òma e ijòwi tɛ ye e luwa.”

Mìijòwelì lì hvòmɛ̀nɛ̀ e wònja ya ama Yerzù

(Mak 11.27-33; Luk 20.1-8)

23Yerzù à mà kpèeyà ò tenì ya e Ndawò yà Lohwà rzìi a òkòlɛ hwatò. Nà òma mɔ̀ à mà hwɛ lì òkòlɛ̀, Ipilìrzi ndɛnɛ na hwàmbaki hwa hwatò rzi hwa mò jèeyà, hwa mò ijòwa nanù ema, “Ima lìkànèyà ò hwɛni ò lì gbeyà hwenè hweyà e? Ndèŋgànɛ̀lɛ̀ hvɛ njɛnɛ a ò ŋgbelì lìni lìkànèyà e?” 24Yerzù rzi a hwa alàhwɛ̀ nanù ema, “Imba hvɛ na e ijòwa miijòwelì mèyɔ̀kɔ. È nò alàhwɛ̀ tɛ, na e òhweyà ima lìkànèyà ema na òhvi ò lì gbeyàna hwenè hweyà. 25One è wònjà ya lì lùhwìrzɛ̀ la ama Yòwanìrzɛ̀ e Mòlùhwìrzèlì, lì ma uhwɛlɛlɛ e? È ma uhwɛlɛlɛ ndi ò ma Lohwɛ̀, ŋga ò hwatò hwa hwènàmà e?” Hwà mà àwòhwànɛ̀lɛ̀ eŋge mbɔrzi wɔ̀ na wɔ̀, rzi hwa òhwa ema, i òhwi tɛ nanù ema “È wònja ya eni e uwɛ̀lɛ̀lɛ̀yi ndi ò ma Lohwɛ̀, a jò ijòwa nanù ema, ‘O mamɛ ndeŋgatɛ e rzi lòkɛ̀ Yòwanìrzɛ̀ e Mòlùhwìrzèlì e?’ 26Ndi i òhwi tɛ nanù ema, ‘È wònja ya eni e uwɛ̀lɛ̀lɛ̀yi ndi ò hwatò hwa hwènàmà,’ nanù òma ene ŋgindi ya hwatò e jò gbeyàna wòhwe, èhwanja wɔ̀ hwa arzɛ hwa hwi ema Yòwanìrzɛ̀ à mà hwɛ ndi Mòòhwèlì wà èlìŋgɛ̀.” 27Ene ŋgàna e ma gbeyà wɔ̀ hwà mà alàhwɛ̀ Yerzù nanù ema, “Irzɔ i rza hwi.” Yerzù rzì a hwa òhweyà nanù ema, “O èŋgànɛ̀lɛ̀ rzɔ tɔ̀ imba hvɛ na rza e òhweyà è wònjà ema na òhvi ò lì gbeyàna hwenè hweyà.”

Ŋmàna mò hwàna hwa wunyanà hwahwàkɛ

28Yerzù à mà ijòwa hvɛ ipìlìrzi ndɛnɛ na hwàmbaki hwa mbòwa nanù ema, “Nɛ inyɔ e lutanelì mònò ŋmàna e? O ma hwɛ mùnyanà mɔ̀kɔ ema à mà ŋya hwàna hwa wunyanà hwahwàkɛ. A ma ɛ̀ndɛ ò ma e ŋmanà wa mùnyanà wa wòrzò, rzi a mò òhweyà nanù ema, ‘È ŋmanà wa ami wa mùnyanà kòkò, ɛ̀ndɛ ò gbèèye èwòlò yawònò ò hvaya.’ 29Oŋgò ŋmanà à mà timbirzɛlɛlɛ e rzaŋgò ya eni nanù ema, ‘Nà rza ɛ̀ndɛ.’ Ndi ò mburzà hvònda à mà tikòwa mɔ̀ŋgɛ̀lɛ̀ ma eni rzi a ɛ̀ndɛ. 30È rzaŋgò rzi a ɛ̀ndɛ hvɛ òma ònɛyi ŋmanà wa eni wa mùnyanà, a mò òhweyà mòlemilemi mò eyà. Oŋgò ŋmanà à mà alàhwɛ̀ rzaŋgɛ nanù ema, ‘Tatà na ɛ̀ndɛ.’ Ndi a rzi ɛ̀ndɛ e ya eni tɔ̀ èki.” 31Yerzù rzìi a ijòwa ipilìrzi ndɛnɛ nanù ema, “Ima mɔ̀ wa hwanù hwàna hwahwàkɛ à mà gbeyà mamɛ ema e rzaŋgò ya awu e ma arze e?” Hwà mà alàhwɛ̀ Yerzù nanù ema, “È ŋmanà wa wòrzò.” Yerzù rzìi a hwa òhweyà nanù ema, “Nà e òhweyà na e jɔ̀kɛ̀ ema, hwàrzàŋgèlì hwa e njàŋge yà lìkànèyà, na hwaŋga hwalanà hwa àkpàlà, hwa lòma lì kpèeyà ò lìkànèyà la ama Lohwɛ̀ ndèŋgànà inyɔ. 32Nà òhwa ene eyà nanù èhwanja Yòwanìrzɛ̀ e Mòlùhwìrzèlì à mà jà, ò lì e uŋmɛ̀lɛ̀ e njiya ema e enyòhwɛnɛ, ndi inyɔ e rzi mò lòkɛ̀. Ndi hwarzaŋgelì hwa e njàŋge ya lìkànèyà na hwàalanà hwa àkpàlà hwà mà mò lòkɛ̀. Tɔ̀ na òma inyɔ e ma ɛnɛ ene eyà, inyɔ e rzi aŋgòwɛ ò wòhwe wò anyu ndèŋgànà e rzi mò lòkɛ̀.”

Ŋmàna mò hwàgbèelì hwa mòòŋgò mahwakɛ

(Mak 12.1-12; Luk 20.9-19)

33Yerzù rzìi a òhwa hvɛ nanù ema, “È òkànèyà hvɛ mòhvɛhvɛ ŋmàna. O ma hwɛ mòhwɛnɛ wa hvaya ema à mà rzarza e hvaya ya eni, rzi a òna mayi ma hwehvùma ema hwe nyukahwa ò lì gbeyà hwènyɔ̀ɔ̀nì. A ma kaka ŋgawò ò lì lìŋga eŋge hvaya ya arzɛ, à mà òŋga hvɛ lìyami ò lì mita hwehvùma ò lì wurzirzɛ hwènyɔ̀ɔ̀nì. A ma òŋga hvɛ lìwòndò la ndɛkì ema e ma karzama ò ŋmanyu ema aŋga ndi hwà-ɔ̀ŋgelì hwà mà lìya ò lì ɔŋgeya eŋge hvaya. A ma aka hwatò ema hwà mà hwɛnɛ lì kawa eŋge mbòtà na mɔ̀ ndèŋgànà a ɛ̀ndɛ ò ehvɛhvɛ èkòmè. 34Nà òma e hvònda ya lì hvata hwehvùma e ma ùke, òŋgò mòhwɛnɛ wa hvaya rzi a òma hwakutu hwa eni ò hwaŋga hwàgbèelì hwa eŋge hvaya ò lì ɛ̀ndɛ lì mò wòhweya e la eni lòŋgò la hwehvùma. 35Hwàŋga hwàgbèèlì hwa eŋge hvaya rzi hwa hvùma hwaŋga hwakutu. Hwa anana mɔ̀kɔ, hwa òŋwa òhvɛhvɛ, e mɔ̀ ema à mà ùkirzɛ̀ hwàyàwò à mà aŋgbahwa màŋyàyi natɛ̀ɛ a ŋwa. 36È mòhwɛnɛ wa hvaya rzi a hwa òmeya hwahvɛhvɛ hwàkutu hwa eni. Mɔ̀rzɔ̀ŋgì mò ma aka tɔ̀ e mò wòrzò. Ndi hwaŋga hwàgbèèlì hwa eŋge hvaya, hwa tìmba ndi lì hwa gbeyàna mamɛ ya arzɛ ema wɔ̀ hwà mà gbeyàne e wɔ̀ hwa wòrzò. 37O lìrzukù, rzi e mò hwɛnɛ wa e hvaya a hwa òmeya ndi e ŋmanà wa eni wa mùnyanà. A òhwahwɛlɛ mɔ̀ ŋmìti nanù ema, ‘Ò jɔ̀kɛ̀ ònò nanù hwa hwɛni lì mò ŋgba èluhwe.’ 38Ndi na òma hwaŋga hwàgbèèlì hwa eŋge hvaya, hwà mà ɛnɛ eŋge mberza ya ama òŋgò mò hwɛnɛ wa hvaya ndi à jà, hwa òhwanɛ̀lɛ mɔ̀kɔ nà ɔ̀nɛyi nanù ema, ‘Onò ndi à rzaŋgòwa rzaŋgɛ. È je anù i mò òŋwe aŋga nanù ò ma i ma kùwàna ene erzaŋgò ya arzɛ.’ 39O èŋgànɛ̀lɛ̀ rzɔ hwà mà mò hvùma, hwa mò wurzana ò tenì ya eŋge hvaya, rzi hwa mò òŋwa.” 40Yerzù rzìi a ijòwa iŋgi pìlìrzì ndɛnɛ na hwàmbaki hwa mbòwa nanù ema, “È ɔ̀ŋgɔ tɛ! Nàŋgɛ rzɔ e mòhwɛnɛ wa hvaya a jelì tɛ, mamɛ a gbeyàna hwaŋga hwatò ema hwà mà ɔŋgeya eŋge hvaya e?” 41Hwà mà alàhwɛ̀ Yerzù nanù ema, “À ò òŋwa hwaŋga hwatò hwa wòhwe. Rzi a ika hwahvɛhvɛ hwatò ò lì ɔŋgeya eŋge hvaya, ema hwa ò mò ŋgbɛ e la eni lòŋgò la mbòtà ò lìrzakò la lì hvata la hwehvùma.” 42Yerzù rzi a hwa òhweyà nanù ema, “È rzi laŋgi ò èki ema Èya ya Lohwà e òhwa nanù ema,

‘Lìnyayi ema hwà-òŋgèlì hwà mà hvake na yòma ya ŋgundu, lì ɔ̀ndi lì ma timbɛ lìŋyàyi ema lì endàhwàwɛlɛ.

È Rzàŋgò ndi à mà gbeyà ene eyà. Ndèŋgànɛ̀lɛ̀ e hwèlì mànyakà ò mirzɔ̀ ma arzu.’

43Yerzù a hwatɛ hvɛ ò lì òhwa nanù ema, ‘Ene ŋgàna e gbèyi imba na e òhweyà ema, hwa ò e wòwàna hwehvòlò hwe anyu ema inyɔ e òhvi nàa hwatò hwa lìkànèyà là ama Lohwɛ̀, rzìi hweŋge hwehvòlò hwe ò ŋgbààhwà hwatò ema hwa ò gbeyɛ mamɛ ema Lohwɛ̀ a arza.’”#21.43 Lòŋgò la ikààtì ja wòrzò i lati ŋmɛ̀ŋgɛ 44 È mòtò ema a ò unda ò lìni lìŋyàyi a kɛrzeya ndi kɛrzɛ-kɛrzɛ, ndi e mɔ̀ ema lìni lìŋyàyi lì ò undeya, a ò nyɔ̀keyà ndi nyɔ̀ki-nyɔ̀ki. 45Nà òma Ipìlìrzì ndɛnɛ na Ihvàlìrzàyì i ma hweye mene meyàna ema Yerzù à mà kpɛ, hwà mà ayèmbɛ nanù ema wɔ̀ ndi à mà hwɛ lì kpɛ̀ɛyà mene meyàna. 46Wɔ̀ rzìi, hwa wòteya lì arza ŋmanò mò lì mò lɛmbɛ. Ndi wɔ̀ hwà mà òka wɔ̀ŋgɔ̀ ò lì gbeyà nanù èhwanja wɔ̀ hwà mà ayèmbɛ nanù ema eŋge ŋgìndì e ma ɛnɛ ndi Yerzù nàa Mòòhwèlì wà èlìŋgɛ̀.

Currently Selected:

Matiyò 21: bri

Highlight

Copy