Lukàrzɛ̀ 19

Yerzù nà Rzàkiyɔ̀rzì

1Nà òmà Yerzù a mà hwɛ lì ɛ̀ndɛ, rzìi a akeyà ò tenì yà è mbòwà yà Jèrìkò. 2O tenì yà èŋge mbòwà, ò mà hwɛ èhwàŋgì ya mòtò mɔ̀kɔ ema à ma hwɛ ndi è mòrzàŋgèlì wà è njàŋge yà lìkànèyà. Lìinà la eni lì mà hwɛ ndi Rzàkiyɔ̀rzì. 3Òŋgò mòtò à mà àrza lì ɛnɛ̀ njɛnɛ Yerzù a hwèlì, ndi nà òmà è ŋgìndì ema hwɛ aŋga ndèŋgànɛ̀lɛ̀ à mà ùtùwa a rzi tànɛyi lì mò ɛnɛ. 4Rzàkiyɔ̀rzì à mà hwaŋga lì ɛ̀ndɛ ò wòrzò, rzìi a àgba ò ŋmanyu yà gbèe wò Rzikamɔ, ò lì àrza lì ɛnɛ̀ Yerzù ema à ma hwɛ lì akeyà aŋga. 5Yerzù a mà ùke ò èŋge èki, rzìi a ɔ̀ŋgɔ ò ŋmanyu yà wòŋgò gbèe, rzìi a ɛnɛ Rzàkiyɔ̀rzì. Rzìi à mò òhweyà nanù ema, “Rzàkiyɔ̀rzì, rzìhwa kàrzì-kàrzì èhwanja nà hwɛnì lì hwɛ ŋmɛ̀ni ò ndawò yà aŋgɔ̀ yàwònò.” 6Rzàkiyɔ̀rzì à mà hvinjɛlɛ hwèrzìhwèlì, rzìi a mò ɛ̀ndɛnɛ ò ndawò yà èni rzìi a mò kàrzɛ nà màlìŋgò mà eni ma ŋmèmà mà arzɛ. 7Hwatò hwa àrzɛ hwa mà ɛ̀nɛ nanù, rzìi hwa wòteya lì arzàrzòhwɛ̀ nanù ema, “Yerzù à ɛ̀ndi ndi lì kpèeyà ò ndawò yà àma è mòtò wà wòhwɛ.”

8Rzàkiyɔ̀rzì rzìi a tɛ̀mɛ̀ ò ŋmanyu, a òhweyà e Rzàŋgò nanù ema, “Ìi Rzàŋgò wa ɔ̀ŋgɔ tɛ̀, nà hwɛnì lì kàhwa erzàŋgò ya amì ò ìtììtènì, lì e ŋgbà mèlìrza me hwatò. Ndèŋgànɛ̀lɛ̀ hvɛ, tɔ̀ ima mòtò ema nà mà lɔ̀kè, nà mò tìmbìrzɛ̀lɛ̀lɛ kòŋgi inɛ̀yi ya mamɛ ema na mà mò lɔ̀kɔ̀nè.” 9Yerzù rzìi a mò òhweyà nanù ema, “O yàwònò, lìrzùŋgàhwa lì ma kpèeyà ò tenì yà ène ndawò. Ònò mòtò mɔ̀ hvɛ à hwèlì ndi ò mòtende mò ama Abràhamù. 10È Ŋmanà wà è Mòtò wà Hwènàmà, à jelì ndi ò lì àrza hwaŋga hwatò ema hwa mà wɔ̀, nà ò lì hwa rzùŋgà.”

Ŋmàna mò wòkòndò wò gòòlù

(Mat 25.14-30)

11Hwatò hwa mà hwɛ lì àneyà mamɛ Yerzù à mà hwɛ lì òhwà. Yerzù à mà hwɛ à mà kòmbɛ̀nɛ̀ è mbòwà yà Jèrurzalɛ̀mù. Hwa mà ɔ̀ŋgɛ̀lɛ̀ ema, Lìkànèyà là ama Lohwɛ̀ lì hwa rzìhweyà ò wòtɛmɛ̀tɛmɛ̀. 12Yerzù rzìi à òhwa nanù ema, “Mòtò mɔ̀kɔ wà èluhwe à mà ɛ̀ndɛ èkòmè yɔ̀kɔ ema è mà rzɔ̀lɛ̀nɛ̀ hvòhvò, ò lì lìirzɛhwɛ kiŋgɛ̀, ndèŋgàna à è tìmba ò ndawò yà èni. 13Òŋgò mòtò wà èluhwe, rzìi à hwɛlɛ lìyòmɛ̀ là eni là hwàgbèèlì, à hwa tɛ̀tìrzɛ̀ tɔ̀ ima mɔ̀ lìyòmɛ̀ là hwekòlì hwe kahvà rzìi à òhwa nanù ema, ‘Hwa gbeyànè è nyòŋga natɛ̀ɛ mɔ̀ à tìmbà ò èŋge yɔ̀ndɔ̀ yà eni.’ 14Kànàtɛ̀ lòŋgò là hwatò hwa èŋge èkòmè yà eni hwa rzi mò lìŋgànè, hwa mà wùrzìrzɛ̀ mèrzènjà ema mè mò oŋgàmà ò lì òhweyà lìkànèyà nanù ema, ‘Ì rzà arza ònò mòtò à hwɛ è kiŋgɛ̀ yà arzu.’

15“Ndi òŋgò mòtò wà èluhwe à mà lìirzɛhwɛ kiŋgɛ̀. À mà tìmbè ò ndawò yà èni, rzìi à òmeyà hwaŋga hwàgbèèlì hwa eni ŋmɛ̀ndì ema, hwa jè hwa mò òhweyà mamɛ tɔ̀ ima mɔ̀ à mà yàlɛ̀ ò ŋmanyu yà kahvà yà enì. 16È wà wòrzò à mà jà lì mò òhweyà nanù ema, ‘Ìi rzàŋgò wà ami, lìyòmɛ̀ là aŋgɔ là hwèkòlì ema ò mà nò ŋgbe lì yàlɛ̀ lìyòmɛ̀ là ŋgèlì.’ 17Èŋge kiŋgɛ̀ rzìi è mò òhweyà nanù ema, ‘Ò gbèyi gbamù. Ò hwèlì ndi mògbèèlì hwà gbamù! Kànatɛ ò tànɛyi lì ɔ̀ŋgeyà hwàna hweyà, ò èŋgànɛ̀lɛ̀ nà ò ŋgba lìyòmɛ̀ là màmbòwà ò lì mà kànèyà.’ 18È mɔ̀ ema à mà ùkirzɛ̀ hwàhwàkɛ̀ mɔ̀ hvɛ à mà òhwa nanù ema, ‘Ìi rzàŋgò wà ami, lìyòmɛ̀ là aŋgɔ là hwekòlì ema ò mà nò ŋgbe, lì mà yàlɛ̀ ŋgelì ita.’ 19È kiŋgɛ̀ rzìi è mò tìmbìrzɛ̀lɛ̀lɛ̀ nanù ema, ‘Ò wà hvɛ ò hwɛnì lì kànèyà màmbòwà Màta.’

20“Ò hvɛhvɛ mògbèèlì rzìi à jà, à òhweyà èŋge kiŋgɛ̀ nanù ema, ‘Ìi rzàŋgò wà ami, lìyòmɛ̀ là aŋgɔ là hwekòlì lìini ema nà mà lìŋgɛ̀lɛ̀ ò pɔ̀tìkà, nà mà ùte. 21Nà mà ò òka wɔ̀ŋgɔ̀, èhwànja ò ambirzɛnɛyi. Ò wòwà hwema ema ò rza utɛ. Ò rzàŋgà hvɛ mòlelì ema ò wà ò rzà ònɛyi.’ 22Èŋge kiŋgɛ̀ è mà mò alàhwɛ̀ nanù ema, ‘Ò hwèlì ndi mògbèèlì wà wòhwe. Nà hwɛnì ndi lì ò kàyìrzɛ̀ nà mamɛ ò wùrzìrzɛ ò wàna yà aŋgɔ̀. Ò hwi ema nà ambirzɛnɛ, nà wòwà wòkòndò ema nà rzà hwɛnɛyi, nà rzàŋgà hvɛ mòlelì ema nà rzà ònɛyi, 23mamɛ ndeŋgàtɛ ò rzi nò ikeyà wòkòndò wò amì ò ndawò yà lùùtà e? Aŋgà nanù òma nà òmà nà tìmbi nanù, wò nò yàlɛ̀ mɔ̀rzɛ̀ŋgì.’

24“Èŋge kiŋgɛ̀ rzìi è òhweyà hwaŋga hwatò ema hwa mà tɛ̀mɛ̀ aŋga nanù ema, ‘È wòwànè ònò mògbèèlì iŋgi kahvà, è ŋgbè òŋgò mògbèèlì ema à òhvi egbe yà hwekòlì.’ 25Hwàŋga hwatò hwa mà mò òhweyà nanù ema, ‘Ìi rzàŋgò, mɔ̀ à lòmi lì òhvà egbe yà hwekòlì!’ 26Èŋge kiŋgɛ̀ è mà hwa alàhwɛ̀ nanù ema, ‘Tɔ̀ ima mòtò ema à òhvì, Lohwɛ̀ à mò hwàteyà hvɛ rzi òma à mà lùwà hveyii. Ndi òŋgò mòtò hvɛ ema à rza òhvɛ̀, Lohwɛ̀ à mò wòwànà hvɛ tɔ̀ èŋge tenyi ema à òhvì. 27Ò nàŋgɛ nanù, hwaŋga hwa arzɛ ema hwa nò kɔ̀wu, ema hwa rza àrza ema nà hwɛ è kiŋgɛ̀ yà àwu, è hwa jànè anù. È hwa òŋwe ò wòrzò wò amì.’”

Yerzù à mà kpèeyà ò Jèrurzalɛ̀mù nàa Kiŋgɛ̀

(Mat 21.1-11; Mak 11.1-11; Yòw 12.12-19)

28Nà òmà Yerzù à mà kulɛ lì kpɛ̀ɛ mònò ŋmàna, rzìi à wòteyà yɔ̀ndɔ̀ yà lì àgba ò mbòwà yà Jèrurzalɛ̀mù. 29È hvònda ema à mà kòmbɛ̀nɛ̀ è mbòwà yà Bɛ̀thvegi nà Bɛ̀tanì, ema ì hwèlì ò Mòòlì mò Njàhwɛ̀, à mà òma hwà-òkòwèlì wà eni hwàhwàkɛ̀ ò wòrzò, rzìi à hwa òhweyà nanù ema, 30“È ɛ̀ndɛ̀ è kpèeyà ò tenì yà èŋge mbòwà ema è hwèlì ò wòrzò wò anyu. Ò hwè kpeèlì hwe anyu ò èŋge mbòwà, è ɛnɛ̀ ŋguma jàkàrzì ema ja aŋgɛhwɛyi, ema tɔ̀ mòtò à rzi lìyayi. È ji wùndùhwè, è jì jànè anù. 31Mòtò à è ijòwi tɛ nanù ema, ‘Mamɛ ndeŋgàtɛ è rzòlòwà iŋgi jàkàrzì e?’ È mò òhweyà nanù ema, ‘È Rzàŋgò è ji tukanelì.’”

32Hwàŋga hwà-òkòwèlì hwa mà ɛ̀ndɛ, rzìi hwa ùŋmanɛlɛ hweyà hwe àrzɛ nà òmà Yerzù à mà hwa òhweyà. 33Nà òmà hwa mà wòteya lì rzòlòwà iŋgi jàkàrzì, hwatò ema hwà ma ji hwɛnɛ rzìi hwà hwa ijòwa nanù èma, “Mamɛ ndeŋgàtɛ è ji rzòlòwà e?” 34Hwa mà hwa alàhwɛ̀ nanù ema, “È Rzàŋgò è ji tukanelì.” 35Hwa mà jàneyà Yerzù iŋgi jàkàrzì. Rzìi hwa tààlɛ̀ mààtù mà awu ò mɔ̀ɔ̀ŋgɔ̀ mò iŋgi jàkàrzì. Aŋga ndi hwa mà àgbɛlɛ Yerzù ò lì jì lìyà. 36Nà òmà Yerzù à mà wòteya lì ɛ̀ndɛ, hwatò hwa mà mò tàlɛ̀lɛ̀ mààtù mè awu ò njìyà.

37È hvònda ema Yerzù à mà hwɛ lì rzìhwa ò Mòòlì mò Njàhwɛ̀ ò lì kpèeyà ò mbòwà yà Jèrurzalɛ̀mù, è ŋgìndì yà hwà-òkòwèlì hwa eni è mà wòteyà lì embà nà mɔ̀nyɛ̀ŋgì, nà màlò mà kàrzàmi ò lì ekà Lohwɛ̀, lì hvòmɛ̀nɛ̀ hweyà hwe àrzɛ hwe mànyàka ema hwa mà ɛ̀nɛ, 38rzìi hwa wòteyà ò lì òhwa nanù ema,

“Mònàmɛ̀ mò hwèlì nà è kiŋgɛ̀ ema è jelì ò lìna là ama è Rzàŋgò!

Ɛ̀yɔ̀lɛ̀ è hwɛ ò ŋmanyu yà lohwà,

Èluhwe hvɛ nà Lohwɛ̀ ema à kàrzamì!”

39Lòŋgò là Hvàlìrzàyì ò èŋge ŋgìndì rzìi hwa òhweyà Yerzù nanù ema, “Mòòkòlèlì kànja hwà-òkòwèlì hwa aŋgɔ̀, èhwànja hwa rzà kànɛ̀yi lì òhwà ène nyayi yà mbɔrzi!” 40Yerzù rzìi à hwa alàhwɛ̀ nanù ema, “Hwa lìyayi tɛ ŋmɛ̀ɛ, màŋyàyi ŋmìti mà wòteyà lì tɛ.”

Yerzù à mà ahvahvɛlɛlɛ è mbòwà yà Jèrurzalɛ̀mù

41È hvònda ema Yerzù à mà kòmbɛ̀nɛ̀ Jèrurzalɛ̀mù nà òmà à mà ɛnɛ è mbòwà, à mà wòteya lì eyaa. 42Rzìi à òhwa nanù ema, “È mà hwiya tɛ mamɛ ema è àrzàhwà ò lì lìyànà ɛ̀yɔ̀lɛ̀ ò yàwònò, òma ò lɔ̀wu. Ndi ò naŋgɛ hwèŋge hweyà hwe utamì ò mirzɔ̀ mà anyu. 43Mènyà mè ò jà ema hwàkɔ̀yèlì hwa aŋgɔ̀ hwa ò tòŋgà nà lì ò kekà nàa ŋgàwò. 44Hwa hwɛnì lì ò nyɔ̀kɔ wàrzɛ-wàrzɛ nà hwàànà hwà aŋgɔ̀ hwa àrzɛ. Hwàkɔ̀yèlì hwa aŋgɔ̀ hwa rzà lìya tɔ̀ lìŋyàyi tɔ̀ lɔ̀kɔ ò ŋmanyu yà lìnɛ̀yi. Èhwànja ò rzi hwiye lìrzakò ema Lohwɛ̀ a mà jèe lì rzùŋgà lòŋgɛ la aŋgɔ.”

Yerzù à ɛ̀ndi ò Ndawò yà Lohwà

(Mat 21.12-17; Mak 11.15-19; Yòw 2.13-22)

45Yerzù rzìi à kpèeyà ò Ndawò yà Lohwà. À wòteyà lì hvayà hwatò ema hwa mà hwɛ lì àhwirzɛ̀ è nyòŋga. 46À mà hwa òhweyà nanù ema, “È tìlahwì ò kaàtì yà Lohwà nanù ema, Lohwɛ̀ à òhwi nanù ema, ‘È ndawò yà amì è hwɛ ndi è ndawò yà màkanɛ̀.’ Ndi inyɔ yè è tìmbìrzɛ̀ ndi èki yà hwàyihwɛ̀.”

47Wùnyà tɛ, Yerzù à mà hwɛ lì òkòlɛ̀ ò Ndawò yà Lohwà. Ipìlìrzì ndɛnɛ̀ nà hwà-òkòlèlì hwa mbenda, nà hwàtìmbèlì hwa hwatò, hwa mà hwɛ ndi lì àrza ŋmànò ò lì mò òŋwà. 48Ndi ò rzi hwɛ tɔ̀ Èya ema hwa mà tànɛyi lì gbeyà èhwànja hwatò hwa àrzɛ hwa mà lìŋgàna mamɛ yà àrzɛ ema Yerzù à mà hwɛ lì òhwa nà mèèmà mè awu mè arzɛ.

Currently Selected:

Lukàrzɛ̀ 19: bri

Highlight

Copy