Yòwanìrzɛ̀ 20

Yerzù à mà Hvùmùwà

(Mat 28.1-8; Mak 16.1-8; Luk 24.1-12)

1O ekpààrzɛ̀ yà èlèlè ya Rzɔ̀ɔ̀ndì òma jììtìtì i hwèlì nanù mɛnɛ, Màlìyɛ̀ Màdàlènì à mà ɛ̀ndɛ ò rzɔ̀ŋgɔ̀ ema Yerzù à mà imàhwɛlɛ. Nà òma à mà uke aŋga rzìi a ɛnɛ nanù ema lìŋyàyi ema hwà mà hwandane hwèkpèèlì hwe rzɔ̀ŋgɔ̀ lì ma ulɛ̀hwɛ. 2A ma ɛ̀ndɛ lìhwaŋgi na lì hvinjɛlɛ rzi a ùŋmanɛlɛ Rzìmɔ̀nì Pètrò nà òhvɛhvɛ mòòkòwèlì wa ama Yerzù, òŋgò mòòkòwèlì à mà hwɛ ndi e mɔ̀ e ma Yerzù à mà lìŋgàne. Rzìi Màlìyɛ̀ a hwa òhweyà nanù ema, “Hwà mà ulɛ èhwèmbè ya ama Rzàŋgò ò rzɔ̀ŋgɔ̀, ò èŋgànɛ̀lɛ̀ i rza hwi èki ema hwa mò ikayi.” 3Rzìi Pètrò nà òŋgò mòòkòwèlì hwa ɛ̀ndɛ ò rzɔ̀ŋgɔ̀. 4Wɔ̀ hwahwàkɛ hwa mà hwaŋga lì ɛ̀ndɛ ò èŋge rzɔ̀ŋgɔ̀ ndi ɔ̀nɛyi mòòkòwèlì à mà hwaŋga karzi lì aka Pètrò. O èŋgànɛ̀lɛ̀ mɔ̀ à ma lòma lì uka ò rzɔ̀ŋgɔ̀. 5À mà ujama rzìi à ɔ̀ŋgɛ̀lɛ̀lɛ ò tenì yà eŋge rzɔ̀ŋgɔ̀ rzì à ɛnɛ è mbɔmi hwa mà lìŋgɛ̀lɛ̀nɛ Yerzù, ndi mɔ̀ à rzi kpèeyà ò tenì. 6Rzìmɔ̀nì Pètrò à mà hwɛ ò mburzà yà eni lì jà, è hvònda à mà ùke, ŋgèlì hvɔ̀kɔ mɛnɛ rzìi à kpèeyà ò tenì yà rzɔ̀ŋgɔ̀. À mà uŋma èŋge mbɔmi è hwèlì aŋga. 7À mà uŋma hvɛ e mbɔti ema hwà mà gbeyàne ò lì lìŋgɛ̀lɛ̀ mòòhvò mò ama Yerzù. Èŋge mbɔti e rzi hwɛ èki yɔ̀kɔ na e mbɔ̀mi, e ma alìŋgɛ̀lɛ̀ ò tòŋgòŋgò hvɔ̀kɔ. 8Rzìi ɔ̀nɛyi mòòkòwèlì ema à mà lòma lì uka ò rzɔ̀ŋgɔ̀ mɔ̀ hvɛ à mà kpeya ò tenì, à mà ɛnɛ hweŋge hwema rzìi a lòkɛ̀. 9Tɔ̀ nɛ wɔ̀ hwa rzi rzɔ̀ŋgìtɛ̀nɛ̀ mamɛ ema e ma tìlahwa ò Kaàti ya Lohwà ema Yerzù a ò hvùmùwà. 10O mburza nanù hwaŋga Hwà-òkòwèlì hwà mà tìmba ò ndawò.

Yerzù à mà awuŋmɛ̀lɛ̀ mɔ̀ ŋmìti ò ma Màlìyɛ̀ Màdalenà

(Mat 28.9-10; Mak 16.9-11)

11Màlìyɛ̀ à mà lìiya ò hwèkpèèlì hwe èŋge rzɔ̀ŋgɔ̀ rzi a à eeya. Nà òma à mà hwɛ lì èya, à mà ujama rzìi a ɔ̀ŋgɔ ò tenì ya rzɔ̀ŋgɔ̀. 12Rzìi à ɛnɛ aŋgèlì ihwàkɛ i wɔ̀ti mbɔ̀mi, wɔ̀ ndi hwa lìyayi èki ema èèmbè ya ama Yerzù e ma nàŋgɛlɛhwɛ, mɔ̀kɔ ò èki ya mòhvò, ɔ̀nɛyi hvɛ ò èki ya mataŋga. 13Rzìi hwa ijòwa Màlìyɛ̀ nanù ema, “Mòlanà kòkò, mamɛ ò eyeya e?” Rzìi à hwa alàhwɛ̀ nanù ema, “Hwà mà wòwa èembè ya ama Rzàŋgò wa ami, ò èŋgànɛ̀lɛ̀ na rza hwi èki ema hwa mò ikayi.” 14Rzìi à ayèŋgòwɛ̀, a ɛnɛ mòtò ndi à tɛmi aŋga, òŋgò mòtò à mà hwɛ ndi Yerzù, ndi à rzi hwiye nanù ema Yerzù òŋgò. 15Yerzù rzìi a mò ijòwa nanù ema, “Mòlanà kòkò, mamɛ ndèŋgàtɛ̀ ò eyaa e? Njɛnɛ ò wa ò arza e?” Màlìyɛ̀ à mà ɔ̀ŋgɛ̀lɛ̀ ndi nanù ema òŋgò mòtò a hwèlì ndi e mòtò a gbèeyà ò eŋge hvaya. Rzìi à mò òhweyà nanù ema, “Rzàŋgò a hwèlì tɛ nanù ema ò wa ndi ò wòwi èembè ya eni, ò nò òhweyà èki ò wa ò ma e ika, imba na ɛ̀ndɛ lì e wòwa.” 16Yerzù rzìi a mò hwɛlɛ nanù ema, “Ìi Màlìyɛ̀!” Màlìyɛ̀ rzìi a mò ayeŋgòwɛ̀lɛ̀lɛ̀, rzìi a òhwa ò mbɔrzi ya Hibrù nanù ema, “Rabòni!” (Ène ŋgàna e hwèlì ndi nanù ema, “Mòòkòlèlì”) 17Yerzù rzìi a mò òhweyà nanù ema, “O rzi nò hwàkɛ lìya la aŋgɔ̀ èhwanja na rzìi timbi òma Tatɛ̀. Ndi ɛ̀ndɛ òma hwà-òkòwèlì hwa ami, hwa wònyanyàŋgò wa ami, ò hwa òhweyà nanù ema, na timbeya Tatɛ̀ wa ami ema a hwèlì hvɛ ndi Tatɛ̀ hwa anyu. Mɔ̀ ndi à hwèlì Lohwà la ami na Lohwà la anyu.” 18Rzìi Màlìyɛ̀ Màdalenà à mà tìmba lì òhweyà Hwà-òkòwèlì nanù ema à mà ɛnɛ e Rzàŋgò, rzìi a hwa nɔ̀ŋgeyà hweyà hwe arzɛ ema Yerzù à mà mò òhweyà.

Yerzù à mà awuŋmɛ̀lɛ̀ mɔ̀ ŋmìti ò hwà-òkòwèlì hwa eni

(Mat 28.16-20; Mak 16.14-18; Luk 24.36-49)

19O èŋge ŋgòmbe ya Rzɔ̀ɔ̀ndi mɛnɛ, Hwà-òkòwèlì hwa ama Yerzù hwà mà arzaŋganɛ ò tenì ya ndawò, rzìi hwa umbanɛ èhwanja hwà mà hwɛ lì òka wònyà Yudà wɔ̀ŋgɔ̀. Yerzù rzìi a hwa wurzeya rzìi a tɛ̀mɛ̀ ò ìtììtènì ja awu, rzìi a òhwa nanù ema, “Ɛ̀yɔ̀lɛ̀ e hwɛ nà inyɔ.” 20Nà òma à mà kulɛ lì òhwa nanù, rzìi a hwa uŋmɛ̀lɛ̀ màà mà eni na èhvàrzù ya eni ya luuŋga. Hwà-òkòwèlì hwa eni hwà mà lìŋga na òma hwa mò ɛnɛ. 21Yerzù rzìi a òhwa hvɛ nanù ema, “Ɛ̀yɔ̀lɛ̀ e hwɛ na inyɔ, Tatɛ̀ a nò òmi, ò èŋgànɛ̀lɛ̀ imba hvɛ na e òmi.” 22Rzìi à hwa uŋgɛlɛ muulu, a hwa òhweyà nanù ema, “È wòwe Èlìŋgɛ̀ yà Wòtani. 23Tɔ̀ ima mòtò ema e làkìrzɛ̀yi wòhwe wò eni, wò làkìrzɛ̀hwɛ̀, e rza hwa làkìrzɛ̀ tɛ, hwa rza làkìrzɛ̀hwɛ̀.”

Yerzù à mà awuŋmɛ̀lɛ̀ mɔ̀ ŋmìti ò ma Tɔ̀màrzì

24Tɔ̀màrzì mɔ̀kɔ wa lìyòmɛ la Hwà-òkòwèlì na hwahwàkɛ hwa ama Yerzù, ema à mà hwɛ̀lɛ̀hwɛ̀ ema, Mayɛrzɛ, a rzìi hwɛ na imbunda ja eni e hvònda Yerzù à mà jèe. 25È hvònda à mà je hwanɛ̀yi Hwà-òkòwèlì hwa mò òhweyà nanù ema, “Irzɔ ima ɛnɛ Rzàŋgò Yerzù.” Tɔ̀màrzì rzìi a hwa òhweyà nanù ema, “Nàtɛ̀ɛ na ɛnɛ hwèŋge hwetɛndɛ hwe merziŋge ò màà mà eni, rzìi na ika hwèyɔ̀nɔ̀ hwe ami ò hweŋge hwetɛndɛ, rzìi na ika hvɛ màà mà ami ò tòŋgòŋgò ya luuŋga la eni, na rza lòkɛ̀.”

26Menya hwàmbi hvɛ me ma ùke, Hwà-òkòwèlì hwa ama Yerzù hwà mà arzàŋganɛ hvɛ ò tenì ya ndawò. Tɔ̀màrzì mɔ̀ hvɛ à mà hwɛ na wɔ̀. Liyòhva lì ma umbawa ndi Yerzù à mà hwa wurzeya rzìi a tɛ̀mɛ̀ ò ìtììtènì ja awu. Rzìi à hwa òhweyà nanù ema, “Ɛ̀yɔ̀lɛ̀ e hwɛ na inyɔ.” 27Rzìi à òhweyà Tɔ̀màrzì nanù ema, “Ika jɔ̀nɔ ja aŋgɔ ò hwene hwetɛndɛ anù. O ɔ̀ŋgɔ màà mà ami, rzìi wòwa màà mà aŋgɔ ò òkànèyà e tòŋgòŋgò ya lùuŋga la amì. O rzìi hwɛ òŋgò ema a rza lòkɛ̀yi, ò hwɛ ndi òŋgò ema a lòkɛ̀yi.” 28Tɔ̀màrzì à mà mò alàhwɛ̀ nanù ema, “Rzàŋgò wa ami na Lohwà la ami!” 29Yerzù rzìi a mò òhweyà nanù ema, “O lòkɛ̀ rzɔ ndì èhwanja ò nò ɛni e? Mònàmɛ̀ mò hwɛ na hwaŋga ema hwa rza ɛnɛ rzìi hwa lòkɛ̀yì.”

Jànda ndeŋgatɛ ene kaàtì e tìlahwì

30Yerzù à mà gbeyà hwehvɛhvɛ hweyà hwe mànyakà jɔ̀ɔjɔ̀ɔ ò ìtììtènì ya hwà-òkòwèlì hwa eni, ema hwe rza tìlahwɛ̀ ò ene kààtì. 31Ndi hwenè hweyà hwe tìlahwì aŋga nanù e lòkɛ̀ nanù ema Yerzù ndi à hwèlì è Mɔ̀ ema à Ɔ̀kirzɛ̀hwɛ̀yi, è Ŋmanà wà Lohwà. O mò lòkɛ̀yì tɛ o ò luwa lòŋgɛ la gbìndèyà ò lìna la eni.

Currently Selected:

Yòwanìrzɛ̀ 20: bri

Highlight

Copy