Yòwanìrzɛ̀ 1

Èyà e ma timba mòtò wa hwènàmà

1O hwèwòtelì ndèŋgàna Lohwɛ̀ a e hwiya lì wèka e rze, Eyà ya Lohwà e mà lòma lì hwɛ. Ène Eyà e mà hwɛ ndi na Lohwɛ̀. Èŋge Eyà e ma hwɛ ndi Lohwɛ̀. 2O hwèwòtelì ene Eyà e ma hwɛ ndi èki yɔ̀kɔ na Lohwɛ̀. 3Lohwɛ̀ à mà gbeyàna eyà ò lì wèkana hweyà hwe àrzɛ, ò rzi hwɛ tɔ̀ yòma ema Lohwɛ̀ à mà wèkè, e rzi hwɛ eyà. 4Lòŋgɛ la arzɛ lì ma uhwɛlɛlɛ ndi ò eyà. À ma òhva lòŋgɛ rzi lìŋgi lòŋgɛ hvɛ lì mà jàneya hwatò ŋmàye. 5Mònò ŋmàye mò mà hvànya ò jìtìtì ndi jììtìtì i rzi tanɛ lì mò lìmìrzɛ̀.

6Lohwɛ̀ à ma òma mèrzènja meyɔ̀kɔ. Lìina la eni lì ma hwɛ ndi Yòwanìrzɛ̀. 7Yòwanìrzɛ̀ à mà jà ndi ò lì òhweyà hwatò lì hvòmɛ̀nɛ̀ mònò ŋmàye ò lì arza nanù ema hwa arzɛ hwa hwèye mònò ŋmɛ̀ndì rzìi hwa lòkɛ̀. 8Rzeketɛ Yòwanìrzɛ̀ ŋmitɛ-ŋmitɛ ndi à mà hwɛ mònò ŋmàye à mà hwɛ ndi mbòŋgi ya lì òhwa lì hvòmɛ̀nɛ̀ mònò ŋmàye. 9Eyà ndi e ma hwɛ ŋmàye mò jɔ̀kɛ̀ ema mò ma uŋmɛ̀lɛ̀ hwatò èki ya arzɛ. Mɔ̀ ndi à mà hwɛ e mɔ̀ ema à mà hwɛnɛ lì jà ò rze. 10À mà hwɛ ò ène rze ya mɔ̀nyɛ̀ tɔ̀ nɛ Lohwɛ̀ à mà wèkè ene rze ya mɔ̀nyɛ̀ na mɔ̀ ndi è rze ya mɔ̀nyɛ̀ e rzi mò embè. 11A mà jèeya ndi e mbòwà ya eni ndi hwatò hwa eni hwa rzi mò kàrzɛ. 12Ndi e wɔ̀ ema hwà mà mò kàrzɛ na lì mò lòkɛ̀ hwanu ndi à mà ŋgbèe è wònjà ò lì hwɛ hwàànà hwa ama Lohwɛ̀. 13Wɔ̀ hwa rza enje ndi hwàànà hwa ama Lohwɛ̀ nàa hwatò hwa hwènàmà hwa ŋyàa hwànà. Hwa rzi hwɛ ndi hwàànà hwa ama Lohwɛ̀ nàa ò à ɛnɛ ema mòtò wà hwènàmà ndi à hwa ŋyàayi. Lohwɛ̀ mɔ̀ ŋmìti ndi à hwèlì è Tatɛ̀ yà awu.

14Eyà è mà jà mòtò wà hwènàmà, rzi è lìya nà irzɔ. Ì mà ɛnɛ èluhwe yà eni ema Tatɛ̀ wà eni à mà mò ŋgbèe nàa ehvòwà yà eni yà ŋmanà. À mà ònda ndèli rzi à jò wùlùhweyà è jɔ̀kɛ̀ lì hvòmɛ̀nɛ̀ Lohwɛ̀. 15Yòwanìrzɛ̀ à mà òhwa lì mò hvòmɛ̀nɛ̀ nà òmà mɔ̀ à mà akɛ̀lɛ̀ è njàmbɛ̀ nanù ema, “È mòtò ònò ema nà mà hwɛ lì è òhweyà nanù ema, ‘Mòtò mɔ̀kɔ à ò jà ò mburzà yà ami ema à kàrzàmi lì nò àka èhwanja nà è hwiya lì ŋyàahwà mɔ̀ à mà lòma lì hwɛ.’” 16Nà òma mɔ̀ à òndi nà ndèli, ò èŋgànɛ̀lɛ̀ irzɔ hwa arzɛ ì lu mònàmɛ̀ mɔ̀kɔ, mɔ̀kɔ nà ɔ̀nɛyi. 17Lohwɛ̀ à mà ŋgbà è mbenda lì akeyà nà Mòrzè ndi è ndèli nà è jɔ̀kɛ̀ è mà jà ndi lì akeyà nà Yerzù Krirztò. 18Tɔ̀ mòtò à rzi ɛni Lohwɛ̀ tɔ̀ wùnyà lì aka tɛ ehvòwà yà eni yà ŋmanà ema è hwèlì ò ŋmanyu yà Lohwà ò tòŋgòŋgò yà eni. Mɔ̀ ndi à jò wùlùhwèlì Tatà Lohwɛ̀.

Yòwanìrzɛ̀ à mà rzeketɛ mɔ̀ ndi à hwèlì è Mɔ̀ ema à Ɔ̀kirzɛ̀hwɛ̀yi

(Mat 3.1-12; Mak 1.1-8; Luk 3.1-18)

19Hwàmbaki hwa hwatò hwa wònyà Yudà ò e mbòwà ya Jèrurzalɛ̀mù hwà mà òma lòŋgò la Pìlìrzì na lòŋgò la hwatò hwa lìtumba la ama Lɛ̀hvì òma Yòwanìrzɛ̀ ò lì mò ijòwa nanù ema, njɛnɛ mɔ̀ à hwèlì. 20Yòwanìrzɛ̀ a rzi hwaŋge lì hwa òhweyà e jɔ̀kɛ̀, ndi à mà hwa òhweyà gbèegbee nanù ema, “Rzeketɛ imba ndi na hwèlì è Mɔ̀ ema à Ɔ̀kirzɛ̀hwɛ̀yi.” 21Rzìi hwa mà mò ijòwa nanù ema, “Njɛnɛ rzɔ ò wa ò hwèlì e? O wa ndi ò hwèlì Èlàyijà e?” A ma wa alàhwɛ nanù ema, “Jàyɛ̀, rzeketɛ imba.” Hwà mà ijòwa hvɛ nanù ema, “O wa ndi ò hwèlì e mòòhwèlì wà èlìŋgɛ̀ ja ambɛ̀lɛ e?” A ma hwa alàhwɛ̀ hvɛ nanù ema, “Jàyɛ̀.” 22O lìrzùkù hwà mà mò ijòwa hvɛ nanù ema, “Njɛnɛ rzɔ ò wa ò hwèlì e? O jò òhweyà aŋga nanù i tìmba lì òhweyà hwatò ema hwa jò òmi. Njɛnɛ rzɔ ò òhwa nanù ema ò hwèlì e?” 23Yòwanìrzɛ̀ rzìi à hwa tìmbìrzɛ̀lɛ̀lɛ̀ nà è mbɔrzi ema è mòòhwèlì wà èlìŋgɛ̀ Àyìrzayà à mà òhwe nanù ema,

“Imba ndi nà hwèlì lìlò là ama è mòtò ema akɛ̀lɛ̀ njàmbɛ̀ ò mòrzanjɛ̀ nanù ema,

‘È tɛ̀nɛ̀nɛ̀ ì njìya jà hweyàkèlì hwe eni.’”

24Ihvàlìrzàyì ndi ì mà òma hwaŋga hwatò ema hwa mà ɛndɛya Yòwanìrzɛ̀. 25Rzìi hwa mò ijòwa hvɛ nanù ema, “Ò wà ò rza enje tɛ è Mɔ̀ ema à Ɔ̀kirzɛ̀hwɛ̀yi tɔ̀ Èlàyijà tɔ̀ è mòòhwèlì wà èlìŋgɛ̀ ema à ambɛlɛhwɛyi ì mà wònjà rzɔ ò wà ò hwɛnì ò lì lùhwìrzɛ̀ e?” 26Yòwanìrzɛ̀ rzìi à hwa alàhwɛ̀ hvɛ nanù ema, “Nà lùhwìrzɛ̀ ndi nà malìhwa, ndi ò ìtììtènì jà anyu ò hwèlì mɔ̀kɔ ema inyɔ è rza hwiyɛ̀. 27Mɔ̀ ndi à hwèlì è mɔ̀ ema à ò jɛ̀ɛ̀ ò mburza yà ami. Ndi nà rzà ukì hvɛ tɔ̀ òŋgò ema à tànɛyì lì wùnduwa mèèrzìŋgà mè hwètàmbì hwe eni.”

28Hwenè hweyà hwe arzɛ hwe mà gbèyɛ̀nɛ̀ ndi ò è mbòwà yà Bɛ̀tanì ò enɛ̀yi èhvàrzù yà mòrzò mò Jɔdànì ema Yòwanìrzɛ̀ à mà hwɛ lì lùhwìrzɛ̀ hwatò.

Yerzù è Ŋgumà mɔ̀lɛ̀ŋgù wà ama Lohwɛ̀

29Ò wònɛ̀yi wùnyà Yòwanìrzɛ̀ rzìi à ɛnɛ Yerzù nà òma à mò jèeyà. Rzìi Yòwanìrzɛ̀ à òhwa nanù ema, “È ɔŋgɔ̀ tɛ, è Ŋgumà Mɔ̀lɛ̀ŋgù wà ama Lohwɛ̀ mɔ̀ òŋgò. Mɔ̀ ndi à wòwi wòhwe wò hwatò hwa è rze yà mɔ̀nyɛ̀ yà arzɛ. 30Mɔ̀ ndi nà mà hwɛ lì è òhweyà lì hvòmɛ̀nɛ̀ è hvònda nà mà òhwe nanù ema, ‘Mòtò à jà ò mburzà yà ami ema à kàrzàmi lì nà aka, èhwanja nà è hwiya lì ŋyàhwa mɔ̀ à mà lòma lì hwɛ.’ 31Imba mbiti nà rzi mò hwiye ndi nà mà jà rzìi nà à lùhwìrzɛ̀ hwatò nà malìhwa aŋga nanù ò mà hwatò hwa Irzàyɛ̀lì hwa mà mò hwiya.” 32Yòwanirzɛ rzìi à mò tɛ̀meyà mbòŋgi à òhwa nanù ema, “Nà mà ɛnɛ èlìŋgɛ̀ yà wòtani è uwɛlɛlɛ ò ŋmanyu yà lohwà nàa mbeŋga rzìi è tɛ̀mɛ̀ ò ŋmanyu yà eni. 33Tɔ̀ nɛ nà rzi rzɔ̀ŋgìtɛ̀nɛ̀ nanù ema mɔ̀ òŋgò. Ndi nà òma Lohwɛ̀ à mà nò òme ò lì lùhwìrzɛ̀ hwatò nà màlìhwa, à mà nò òhweyà nanù ema, ‘È mɔ̀ ema ò ɛni èlìŋgɛ̀ è mò rzihwèlì lì mò tɛmeyà, mɔ̀ ndi à hwèlì è mɔ̀ ema à ò lùhwìrzɛ̀ hwatò nà èlìŋgɛ̀ yà wòtani.’ 34Nà mà ɛnɛ hwene hweyà hwe arzɛ, ò èŋgànɛ̀lɛ̀ nà tɛ̀mi mbòŋgi ò lì òhwa ema mɔ̀ ndi à hwèlì è Ŋmanà wà ama Lohwɛ̀.”

Hwà-òkòwèlì hwa wòrzò hwa ama Yerzù

35Ènɛyi eka yà èlèlè hvɛ, Yòwanìrzɛ̀ à mà tɛ̀mɛ̀ hvɛ nà hwà-òkòwèlì hwa eni hwahwàkɛ. 36Nà òma Yerzù à mà hwɛ lì aka, Yòwanìrzɛ̀ rzìi à mò ɔŋgɔ̀ kòò rzìi à òhwa nanù ema, “È ɔ̀ŋgɔ tɛ, è Ŋguma yà Mɔ̀lɛ̀ŋgù mò ama Lohwɛ̀ mɔ̀ ònò.” 37Nà òma Hwà-òkòwèlì hwa eni hwahwàkɛ hwa mà hwèya nanù hwa mà wòteyà lì òŋgama Yerzù 38Yerzù rzìi à ayèŋgòwɛ̀ à hwa ɛnɛ rzìi à hwa ijòwa nanù ema, “Mamɛ è arza e?” Hwa mò alàhwɛ̀ nanù ema, “Ràbi” (ène ŋgàna e hwèlì ndi nanù ema mòòkòlèlì) “One ò lìya e?” 39Yerzù rzìi, à hwa alàhwɛ̀ nanù ema “È jè è ɔŋgɔ̀ èki ema nà lìya.” Ò èŋgànɛ̀lɛ̀ rzɔ hwa mà ɛndɛ ò lì ɛnɛ èki ema à lìya. Nà òma hwa mà uke aŋga, ò mà hwɛ ndi eyà yà ŋgɛ̀ŋgi inɛ̀yi jà ŋmèrze. Hwa mà hwɛ aŋga natɛ̀ɛ wùnyà wò mà kɔ̀ɔ̀. 40Àndèlè ema hwa mà yàhwa na Rzìmɔ̀nì Pètrò à mà hwɛ ndi mɔ̀kɔ hwa hwaŋga hwà-òkòwèlì hwahwàkɛ ema hwà mà hweyà mamɛ ema Yòwanìrzɛ̀ à mà òhwe rzìi à oŋgàmà Yerzù. 41Eyà yà wòrzò Àndèlè à mà gbèye ema hwɛ ndi ò lì ɛ̀ndɛ lì arza ŋmanyàŋgò wà eni Rzimɔ̀nì. Nà òma à mà mò ɛnɛ rzìi à mò òhweyà nanù ema, “Ì mà ɛnɛ è Mɔ̀ ema à Ɔ̀kirzɛ̀hwɛ̀yi” (Èŋge ŋgàna è hwèlì ndi Krirztò). 42Àndèlè rzìi à jànà Rzimɔ̀nì ò mà Yerzù, Yerzù rzìi à ɔ̀ŋgɔ Rzìmɔ̀nì kòò à mò òhweyà nanù ema, “Lìinà lì aŋgɔ lì hwèlì ndi Rzimɔ̀nì è ŋmanà wà mùnyanà hwa ama Yòwanìrzɛ̀. Ndi ò nàŋgɛ ò hwɛ̀lɛ̀hwɛ̀ ndi Rzɛ̀hvàrzì.” (Lìni lìna lì hwèlì ndi nyayi hvɔ̀kɔ nà Pètrò ema jànda ì hwèlì ndì ema èwòmɛ̀ yà lìŋyàyi).

Yerzù à hwɛlɛyi Hvìlìpì nà Nàtànìyɛ̀lì

43Ènɛ̀yi eka yà èlèlè Yerzù à mà kùlɛ̀ nanù ema à hwɛni lì ɛ̀ndɛ ò erzòòkà yà Galìlì. À mà ɛndɛ lì ùŋmànɛ̀lɛ̀ Hvìlìpì rzìi à mò òhweyà nanù ema, “Jà, ò nò òŋgame.” 44Hvìlìpì àma uwɛlɛlɛ ndi ò Bɛ̀trzàyìdà ene mbòwà mɛnɛ ndi Àndèlè na Pètrò hwà mà uhwɛlɛlɛ. 45Hvìlìpì à mà ɛ̀ndɛ lì arza Nàtànìyɛ̀lì. Rzìi à mò òhweyà nanù ema, “Ì mà lùwa è mòtò ema Mòrzè à mà tile lì hvòmɛ̀nɛ̀ ò e kààtì yà mbenda. Hwà-òhwèlì hwa hwèlìŋgɛ̀ hwa kòhwà wɔhvɛ hwa mà tìla lì mò hvòmɛ̀nɛ̀. Lìinà là eni lì hwèlì ndi Yerzù mòtò wà Nàrzàrɛ̀tì è ŋmanà wà ama Jòrzɛ̀hvù.” 46Nàtànìyɛ̀lì rzìi à ijòwa nanù ema, “Ima lìtumba là eyà yà gbamù è tànɛyi lì uwɛlɛlɛ ò mbòwà yà Nàrzàrɛ̀tì e?” Hvìlìpì rzi à mò alàhwɛ̀ nanù ema, “Jà anù ò ɔ̀ŋgɔ.” 47Nà òma Yerzù à mà ɛnɛ Nàtànìyɛ̀lì à jà rzìi à òhwa lì mò hvòmɛ̀nɛ̀ nanù ema, “Ɔ̀ŋgɔ tɛ, è timɛtìmɛ yà ŋmanà wà mùnyanà hwa Irzàyɛ̀lì ònò mòtò ema à rza òhvɛ̀yi tɔ̀ njɔ̀mi!” 48Nàtànìyɛ̀lì rzi à ijòwa Yerzù nanù ema, “Nɛ ò gbèyi ònò hwiyelì e?” Yerzù rzìi à mò alàhwɛ̀ nanù ema, “Tɔ̀ biyana Hvìlìpì à ò hwɛlɛ nà mà ò ɛnɛ ò rze yà gbèe wò ehvùma yà nyɔ̀hvinyà.” 49Nàtànìyɛ̀lì rzìi à òhwa nanù ema, “Ìi Mòòkòlèlì, ò wà ndi ò hwèlì è Ŋmanà wà ama Lohwɛ̀. Ò wà ndi ò hwèlì è Kìŋgɛ yà Irzàyɛ̀lì.” 50Yerzù rzìi à mò alàhwɛ̀ nanù ema, “Ò lòkɛ̀yì ndi èhwanja nà ò hwèlì ema nà mò ɛnɛ ò rze yà gbèè wò ehvùma yà nyɔ̀hvinyà, o ò ɛnɛ hweyà hwe ndɛnɛ hwe aka hwenè.” 51Yerzù rzìi à òhwa hvɛ nanù ema, “Nà è òhweyà ndi è jɔ̀kɛ̀ è ɛnɛ è ŋmanyu yà lohwà è lìhvòweyà rzìi i aŋgèlì jà ama Lohwɛ̀ jà agba jò ɔ̀ndɔ̀ ò ŋmanyu yà ama è Ŋmanà wà è Mòtò wà Hwènàmà.”

Currently Selected:

Yòwanìrzɛ̀ 1: bri

Highlight

Copy