Hwègbèèlì 8
8
1Rzàwòlò à mà ukeya ndèŋgànɛ̀lɛ̀ mɔ̀ à mà emeyà nanù ema hwa òŋwe Rzìtehvànɛ.
Metàkìrzɛ̀nɛ ema mìitelì me ma luwe rzi me wuhweyà
O wòŋgò wùnyà mɛnɛ ŋmèmba mò Jèrurzalɛ̀mù me ma tàkìrzɛ̀hwɛ ŋginyà ò màà mà wònyà Yudà. Hwàlòkèlì hwa arzɛ hwà mà kuwa lì wuhweyà ò hwèrzòòkà hwe arzɛ hwe Jùdeyà na Rzàmàrìyà. Ndi I àpɔ̀rzìtòlò mɛnɛ ndi i ma lìiya. 2Ŋgurzu ja hwatò ema hwà mà ika mèèmà me awu me arzɛ ò lì gbèeyà Lohwɛ̀, hwà mà imeya Rzìtehvànɛ. Hwà mà hwɛ ò lì mò eyà na ò lì mò ɛhwɛ. 3Ndi Rzàwòlò mɔ̀ à mà arza ndi ò lì hvaŋga ŋmèmba. À mà lìŋgòwa ndawò nà ndawò tɛ, rzìi a rzììmà hwàlòkèlì, è wɔ̀ hwa wunyanà nà è wɔ̀ hwa hwalanà. Rzìi à hwa aŋgɛ wɔ̀ hwa arzɛ ò hwèwòwà.
Hvìlìpì à òhwi Ŋmɛ̀ndì mò Gbamù ò erzòòkà yà Rzàmàrìyà
4Hwàŋga hwàlòkèlì ema hwa mà wuhweyà hwa mà òhwa Ŋmɛ̀ndì mò Gbamù ò hwèki hwe arzɛ ema hwa mà ɛ̀ndɛ̀. 5Hvìlìpì mɔ̀ à mà ɛndɛ ò mbòwa ndɛnɛ hvɔ̀kɔ yà erzòòkà yà Rzàmàrìyà, rzìi a à hwa òhweyà Ŋmɛ̀ndì mò Gbamù mò è Mɔ̀ ema à Ɔ̀kirzɛ̀hwɛ̀yi. 6È ŋgindi è mà òkànèyà nɔ̀ke-nɔ̀ke mamɛ yà arzɛ ema Hvìlìpì à mà hwa òhweyà. Wɔ̀ hwa mà mò òkànèyà nà lì ɛnɛ hvɛ hwèmbànèlì hwe mànyakà ema mɔ̀ à mà gbèye. 7Hvìlìpì mɔ̀ à mà gbeyà hwèlìŋgɛ̀ hwe wòhwe hwe mà anjiya nà mòrzeya mòndɛ̀nɛ̀ ò inyò jà rzayi-rzayi jà hwatò. Hwatò rzayi-rzayi ema hwa mà ɔ̀kirzɛ̀ è nyàmbɛ yà njɛmbu nà mbòkò, hwa mà wɔ̀wìrzɛ̀hwɛ̀. 8Ò èŋgànɛ̀lɛ̀ rzɔ ò mà hwɛ mɔ̀nyɛ̀ŋgì mòndɛ̀nɛ ò eŋge mbòwà ndɛ̀ɛ̀ndɛ̀.
9Nàŋgɛ rzɔ ò mà hwɛ munyanà mɔ̀kɔ ò eŋge mbòwa, ema lìinà là eni lì mà hwɛ ndi Rzimɔ̀ni, à mà hwɛ lì gbeyà hweyà hwe mànyakà nà è ŋginyà yà eni yà mèrzòmba ò eŋge mbòwà ndɛ̀nɛ. Ndèŋgànɛ̀lɛ̀ mɔ̀ à mà tàmìrzɛ̀ hwatò hwa arzɛ hwa eŋge erzòòkà yà Rzàmàrìyà. À mà hwɛ lì ayèkìrzɛ̀ nanù ema tɔ̀ mòtò à rza mò uki. 10Ndèŋgànà hwatò hwa arzɛ hwa eŋge mbòwa, hwèyùmɛ̀ nà hwatò hwa ŋgundu, hwa mà hwɛ lì mò òhwàna nanù ema, “Onò munyanà à hwɛni ndi è ŋginyà yà ama Lohwɛ̀ ema è hwɛ̀lɛ̀hwɛ̀ è Ngiŋya Ndɛnɛ.” 11Wɔ̀ hwà mà mò òŋgama èhwanja, ò è hvònda ema è mà aka, mɔ̀ à mà hwa tàmìrzɛ̀ nà lìyaŋga là eni ema à mà hwɛ lì aŋgba. 12Ndì nà òma wɔ̀ hwa mà lòkɛ̀yi Hvìlìpì nà òma mɔ̀ à mà òhwe Ŋmɛ̀ndì mò gbamù mò lìkànèyà là ama Lohwɛ̀, nà lì hvòmɛ̀nɛ̀ Yerzù Krirztò, wunyanà nà hwààlanà hwa arzɛ hwa mà lùhwìrzɛ̀hwɛ̀. 13Rzimɔ̀ni mɔ̀ ŋmìti, mɔ̀ hvɛ à mà lòkɛ̀ rzìi a lùhwìrzɛ̀hwɛ̀. A ma òŋgama Hvìlìpì ò ekì ya arzɛ ema à mà ɛndɛ, ndèŋgànɛ̀lɛ̀ à mà jejeya hweyà hwe mànyakà hwe ndɛnɛ na hwembànèlì ema à mà ɛnɛ Hvìlìpì a gbeyà.
14Nà òma I àpɔ̀rzìtòlò ema i ma hwɛ ò Jèrurzalɛ̀mù i ma hweye nanù ema hwatò hwa Rzàmàrìyà hwà mà emeyà Ŋmɛ̀ndì mò Gbamù mò ama Lohwɛ̀, rzi hwà hwa òmeya Pètrò nà Yòwanìrzɛ̀. 15È hvònda ema wɔ̀ hwà mà uke aŋga, hwà mà kanɛ̀lɛ̀lɛ̀ hwàlòkèlì hwa hvènya nanù ema hwa luwe Èlìŋgɛ̀ yà Wòtani. 16Wɔ̀ hwà mà hwa kanɛ̀lɛ̀lɛ̀ èhwanja ò ene hvònda òma hwa rzi lu Èlìŋgɛ̀ yà Wòtani. Wɔ̀ hwà mà luwa ndi lì lùhwìrzɛ̀ ò lìinà la ama Rzàŋgò Yerzù. 17Aŋga ndì Pètrò nà Yòwanìrzɛ̀ hwà a hwa hwàkɛ màà mà awu rzi hwa luwa Èlìŋgɛ̀ yà Wòtani. 18Nà òma Rzimɔ̀ni à mà ɛnɛ nanù ema na òma I àpɔ̀rzìtòlò i ma hwàkɛ̀ màà mà awu ò hwatò wɔ hwa luwa Èlìŋgɛ̀ yà Wòtani, rzìi mɔ̀ à ulɛ wòlì ò lì ŋgba Pètrò nà Yòwanìrzɛ̀, 19rzi mɔ̀ à òhwa nanù ema, “È nò ŋgbe imba hvɛ ene ŋginyà. Aŋga nanù tɔ̀ ima mòtò ema imba hvɛ na hwàkɛ̀yi màà mà ami, mɔ̀ hvɛ a luwa Èlìŋgɛ̀ yà Wòtani.” 20Ndì Pètrò à mà mò alàhwɛ̀ nanù ema, “Inyɛ̀ ò wa na wòlì wò aŋgɔ̀ e ɛndɛ ò èhvɔ̀ndì ya mùnya. Èhwanja ò ɔ̀ŋgɛ̀lɛ̀ nanù ema ò tànɛyi lì anda jàhwèyà ja ama Lohwɛ̀ na wòlì. 21O rza hwɛni tɔ̀ eyà ya lì gbeyà tɔ̀ lìkayi ò èwòlò ya arzu. Èhwanja ŋmèma mò aŋgɔ̀ ò mirzɔ̀ mà ama Lohwɛ̀ mò rza rzaŋgi ò tenì. 22O tikòwe rzɔ, ò manù màlùtèyà ma aŋgɔ̀ ma wòhwe. O kanɛ̀ Rzàŋgò nanù ema a ò làkirzɛ̀ ema ò òhvi ene tumba mɔ̀ŋgɛ̀lɛ̀ ò ŋmèma mò aŋgɔ̀. 23Imba na ɛnɛ nanù ema, ò wa ò òndi na inòna ja ŋginyà, ndèŋgàna ò hwèlì ndi mòtò wa hwèwòwà ò wòhwe.” 24Rzimɔ̀ni rzi a òhweyà Pètrò nà Yòwanìrzɛ̀ nanù ema, “Ìi wònyamòwè kòkò, e nò kanɛ̀lɛ̀lɛ̀ e Rzàŋgò, aŋga nanù hwene hweyà hwe arzɛ ema e ma òhwɛ ò lì nò hvòmɛ̀nɛ̀, hwe rzi nò gbèyɛ̀nɛ.”
25È hvònda ema Petrò na Yòwanìrzɛ̀ hwà mà kulɛ ò lì òhwa hweyà hwe arzɛ lì hvòmɛ̀nɛ̀ Yerzù na lì kulɛ lì òhwa ŋmɛ̀ndì mò ama Rzàŋgò, rzìi hwa timba ò mbòwa ya Jèrurzalɛ̀mù. O hwetimbelì hwe awu, hwà mà hwɛ lì òhwa Ŋmɛ̀ndì mò Gbamù mò ama Yerzù ò mambòwà mà rzayi-rzayi ja hwèrzòokà hwe Rzàmàrìyà.
Hvìlìpì na e mòtò wa lìkànèyà la Ètòpìyà
26È aŋgèlì ya ama Rzàŋgò, rzi e òhweyà Hvìlìpì nanù ema, “Wòŋgirzɛnɛ, ò ɔ̀ndɔ̀ mbɛŋgɛ, ò ekì ema e njiya ema e uwɛ̀lɛ̀lɛ̀yi ò Jèrurzalɛ̀mù, e akeyà lì ɛndɛ ò Gàrza.” O naŋgɛ eŋge njiya e rza gbeyànɛhwɛ hvɛ. 27O èŋgànɛ̀lɛ̀ rzɔ, Hvìlìpì mɔ̀ à mà wòŋgirzɛnɛ rzìi a ɛndɛ, ò yɔ̀ndɔ̀ ya eni à mà uŋmànɛlɛ munyanà mɔ̀kɔ wa ŋgbakò ema à mà hwɛ lì timba ò èkòmè ya eni. Onò mòtò à mà hwɛ ndi mòkànèlì mò ndɛnɛ, à mà hwɛ lì ɔŋgeya lùùtà la arzɛ la Kàndɛrzi la gbàata wò Ètòpìyà. Onò munyanà à mà ɛndɛ ò Jèrurzalɛ̀mù ò lì kànɛ Lohwɛ̀. 28Nà òma à mà hwɛ lì timba, à mà lìya ò tenì ya ehwàmbanì ema e ma kòowahwa na e wɔ̀rzì, na òma à mà hwɛ lì ɛndɛ, rzìi a à làŋga e kààtì ya ama e mòòhwèlì wà èlìŋgɛ̀ Àyìrzayà. 29Èlìŋgɛ̀ yà Wòtani rzi e òhweyà Hvìlìpì nanù ema, “Ɛndɛ ò tòŋgòŋgò ya eŋge ehwàmbanì, ò e kòmbɛnɛ.” 30Hvìlìpì à mà hwaŋga lì ɛndɛ lì e kòmbɛnɛ, rzìi a hweyà na òma eŋge yumɛ e làŋga, ò e kààtì ya ama e mòòhwèlì wà èlìŋgɛ̀ Àyìrzayà. Hvìlìpì rzi a mò ijòwa nanù ema, “O wa ò rzɔ̀ŋgìtɛ̀nɛ̀ mamɛ ema ò làŋga nanù e?” 31Èŋge yumɛ rzi e alàhwɛ̀ Hvìlìpì nanù ema, “Nɛ na tànɛyi lì rzɔ̀ŋgìtɛ̀nɛ̀ e? Nàtɛ̀ɛ mòtò a nò telɛlɛ e yɔ.” Rzìi eŋge yumɛ e yòhwɛ Hvìlìpì ò lì agba ò ehwàmbanì rzìi wɔ̀ na mɔ̀ hwa lìya ò ekì yɔ̀kɔ. 32Èhvarzu ya e kààtì ema òŋgò mòtò à mà hwɛ lì làŋga e ma hwɛ ndi nanù ema,
“A ma timbahwa ndi nàa mɔ̀lɛ̀ŋgù ema hwa ɛ̀ndɛ̀nɛ̀ ò lì rzìika,
mɔ̀ à mà hwɛ ndi nàa ŋguma ya mɔ̀lɛ̀ŋgù ema mò rza eyà luwa lìrzakò ema hwa mò rzenjòwa i rzòwe,
ò èŋgànɛ̀lɛ̀ rzɔ mɔ̀ à rzi òhwe tɔ̀ eyà.
33“Mɔ̀ à mà enyìrzɛ̀hwɛ, ndèŋgàna hwà mà mò hvɔ̀ɔ̀tɔnɔ e wònja ya eni.
Njɛnɛ a tànɛyi ò lì òhwa lì hvòmɛ̀nɛ̀ e nyɔ̀ŋgɔ̀ni ya eni,
na òma lòŋgɛ la eni lì ma ulɛhwɛyi ò rze ya mɔ̀nyɛ̀.”
34Èŋge yumɛ rzìi e ijòwa Hvìlìpì nanù ema, “O nò òhweyà njɛ̀nɛ ò nò mòòhwèlì wà èlìŋgɛ̀ mɔ̀ à òhwa lì hvòmɛ̀nɛ̀ nanù e? À a òhwànɛ̀lɛ̀ ndi mɔ̀ ŋmìti ŋga òhvɛhvɛ mòtò e?” 35Hvìlìpì rzìi a wòteyà lì mò òhweyà Ŋmɛ̀ndì mò Gbamù mò ama Yerzù, rzìi a mò telɛlɛ hweyà hwe arzɛ ò lì wòteyà na ene èhvàrzù. 36Nà òma hwà mà hwɛ lì ɛndɛ, rzìi hwa uka èki ema e ma hwɛ malìhwa, rzìi eŋge yumɛ e òhwa nanù ema, “Ɔŋgɔ̀ malìhwà mà anu, ò rza nò lùhwìrzɛ̀ ŋgelì hvɔ̀kɔ e?”#8.36 Lòŋgò la ikààtì ja wòrzò ema i ma lòma lì tìlahwa i lati ŋmɛ̀ŋgɛ ema mò ùkirzɛ̀ 37: Hvìlìpì à mà mò òhwèyà nanù ema, “Ò wà ò lòkɛ̀ tɛ Yerzù nà ŋmèma mò aŋgɔ̀ mò arzɛ nà tanɛyi lì ò lùhwirzɛ̀.” È ŋgbakò è mà alàhwɛ̀ nanù ema, “Nà lòkɛ̀ nanù ema Yerzù Krirztò ndi à hwèlì è ŋmanà wà ama Lohwɛ̀.” 38Èŋge yumɛ rzi e òhweyà e mɔ̀ ema à mà hwɛ lì ɛ̀ndɛ̀nɛ̀ eŋge ehwàmbanì ama a tɛ̀mɛ̀. Rzìi mɔ̀ na Hvìlìpì hwa rzihwa ò eŋge ehwàmbanì rzìi hwa kpèeyà ò tenì ya malìhwa, Hvìlìpì rzìi a mò lùhwìrzɛ̀. 39Lìrzàkò ema wɔ̀ hwà mà anjiye ò tenì ya malìhwa, Èlìŋgɛ̀ ya ama Rzàŋgò rzìi e wòwa Hvìlìpì. Èŋge yumɛ e rzi ɛnɛ Hvìlìpì hvɛ. Ndi à mà ɛ̀ndɛ̀nɛ̀ ndi yɔ̀ndɔ ya eni ò wòrzò, na mɔ̀nyɛ̀ŋgì. 40Hvìlìpì à mà ayèmbɛ mɔ̀ ŋmìti ò mbòwa ya Arzɔ̀tùrzì, tɔ̀ ima mbòwa ema à mà uke à mà hwɛ lì òhwa Ŋmɛ̀ndì mò Gbamù natɛ̀ɛ à mà uka ò mbòwa ya Kàyìrzèrìyà.
Currently Selected:
Hwègbèèlì 8: bri
Highlight
Share
Copy

Want to have your highlights saved across all your devices? Sign up or sign in
© 2022, CABTAL