Hwègbèèlì 13
13
Èlìŋgɛ̀ yà Wòtani è hvɔ̀rzì Bànàbàrzì na Rzàwòlò
1O ŋmèmba ema mò hwèlì ò Antìyɔ̀kì lòŋgò la hwà-òhwèlì hwa hwèlìŋgɛ̀ na hwà-òkòlèlì hwà mà hwɛ aŋga. Hwàŋga hwatò hwà mà hwɛ ndi Bànàbàrzì, Rzimɔ̀nì (à mà hwɛ̀lɛ̀hwɛ̀ e Ŋmindò), Lùrzìyùrzì (ema à mà uwɛ̀lɛ̀lɛ̀yi ò Rzìlènè), Manayene (ema wɔ̀ na Hɛ̀rɔ̀dì e Gɔ̀winà hwà mà òŋgɛnɛ ekì yɔ̀kɔ), na Rzàwòlò. 2Nà òma hwà mà hwɛ lì gbèeyà Rzàŋgò na lì hwɛ hvɛ ò mòkìyà njàwò, Èlìŋgɛ̀ yà Wòtani rzìi e hwa òhweyà nanù ema, “È nò tindeya Bànàbàrzì na Rzàwòlò ò lì nò gbèeyà èwòlò ema imba nà mà hwa hwɛlɛnɛ.” 3Nà òma hwà mà kulɛ mòkìyà njàwò na màkanɛ̀, hwà mà hwàkɛ maà ma awu ò ma Bànàbàrzì na Rzàwòlò rzìi hwa hwà òhweyà nanù ema hwa ɛ̀ndɛ.
Pàwolò nà Bànàbàrzì hwa ùŋmànɛ̀lɛ̀ e ŋgaŋga ya mbòwa
4Nà òma Èlìŋgɛ̀ ya wòtani ema hwa òme wɔ̀ hwahwàkɛ, hwà mà ɔ̀ndɔ̀ ò mbòwa ya Rzɛ̀lùrzìyà. Aŋga ndi hwa a anjiyana wɔ̀ɔlɔ̀ ò lì ɛndɛ ò yòndi ya Rzàyìprɔ̀rzì. 5Nà òma hwà mà ùke ò mbòwa ya Rzàlàmìrzì, hwà mà òhwa eyà ya Lohwà ò mandawò ma màkanɛ̀ ma wònyà Yudà. Hwà mà lɛmbɛ Yòwanìrzɛ̀ Màkòrzì ò lì hwa òŋgòwànà. 6Hwà mà akeyà ò yòndi ya arzɛ natɛ̀ɛ hwa uka ò mbòwa ya Pàhvɔ̀rzì. Nà òma hwà mà uke aŋga, hwa ùŋmanɛlɛ ŋgaŋga hvɔ̀kɔ ya mbòwa ema e ma hwɛ̀lɛ̀hwɛ̀ Ba-Yerzù. A ma hwɛ ndi mòtò wà Yudà ema à mà ahwɛlɛ ŋmìti e mòòhwèlì wà èlìŋgɛ̀ wa ama Lohwɛ̀. 7Ba-Yerzù à mà hwɛ ndi e mbunda ya ama Rzɛ̀gìyùrzì Pàwùlùrzì. Rzɛ̀gìyùrzì Pàwùlùrzì mɔ̀ ndi à mà hwɛ e mòkànèlì wa eŋge yòndi. A ma hwɛ ndi mòtò ema à mà òhva lìhwiyè rzayi-rzayi. Oŋgò Gɔ̀winà, rzìi a hwɛlɛ Bànàbàrzì na Rzàwòlò èhwanja, à mà arza lì òkànèyà Eyà ya Lohwà. 8Ndi e mòtò ema lìinà la eni ò mbɔrzi ya Grìki lì ma hwɛ ndi Èlìmàrzì, a rzì hwa ŋgbe eŋge hvòlò. Mɔ̀ à mà arza nanù ema e mòtìmbèlì wa eŋge mbòwa, a rzi lòkɛ̀ ŋmɛ̀ndì mò gbamù. 9Rzàwòlò ema a hwɛ̀lɛ̀hwɛ̀ hvɛ Pàwolò rzìi, à ònda na Èlìŋgɛ̀ yà Wòtani, rzìi a ɔŋgɔ̀ eŋge ŋgaŋga ya mbòwa ò mirzɔ̀ kòò, 10rzìi a òhwa nanù ema, “O wa, e ŋmanà wa ama Mòkarzɛ̀! O hwèlì ndi e mɔ̀kɔ̀yèlì wa tɔ̀ mamɛ ema e hvòmɛ̀nɛ̀yi. O òndi na inyayi jà àrzɛ̀ ja wòhwe ja meyanò. Tɔ̀ ima hvònda ò wa ò arza ndi ò lì tikòwa e jɔ̀kɛ̀ ya ama e Rzàŋgò ò lì e timbirzɛ hweyà hwe lì kɔ̀. 11Nàŋgɛ rzɔ, Rzàŋgò Lohwɛ̀ a ò kɔ̀kìrzɛ̀. O kpa ndima, ò rza ò ɛnɛ hvɛ ò ŋmanà hvòka hvònda.”
O lìwòkimɛnɛ, Èlìmàrzì a hweyà ndi ò a ɛnɛ òma lìmbaki lì ma mò hwanda mìirzɔ̀, rzìi mɔ̀ a à ŋmàrzɛ̀lɛ ò lì luwa mòtò ema a lɛmbɛ lìya la eni ò lì mò timba. 12Nà òma e mòkànèlì à mà ɛnɛ mamɛ ya arzɛ ema e ma gbèyɛ̀nɛ, rzìi a lòkɛ̀ Yerzù. Mɔ̀ à mà tameya hwèyòkòlèlì hwe ama Pàwolò na Bànàbàrzì ema hwà mà hwɛ lì òkòlɛ lì hvòmɛ̀nɛ̀ e Rzàŋgò Yerzù.
Pàwolò na Bànàbàrzì hwà mà uka ò mbòwa ya Antìyɔ̀kì
13Pàwolò na imbunda ja eni hwà mà kpèeyà ò wɔ̀lɔ̀ ò Pàhvɔ̀rzì hwa lùuka natɛ̀ɛ hwa uka e mbòwa ya Pɛ̀ga, ò erzòòkà ya Pàmhvilìyà. Ndi Yòwanìrzɛ̀ Màkòrzì à mà hwa lìya aŋga a tìmba e ye eni ò Jèrurzalɛ̀mù. 14Wɔ̀ hwà mà hwɛmɛ Pɛ̀ga rzìi hwa uka ò mbòwa ya Antìyɔ̀kì ò èkòmè ya Pìrzìdìyà. O Wùnyà wò lì arziyòlɛ, hwà mà kpèeyà ò ndawò ya màkànɛ̀, rzìi hwa lìya ò rze. 15Wɔ̀ hwà mà hweyà na òma hwà mà làŋge hwèhvàrzù hwe e kààtì ya mbenda ya ama Mòrzè na e kààtì ya hwetilelì ya hwà-òhwèlì hwa hwèlìŋgɛ̀, ò mburza hwene hwèlàŋgèlì, hwatimbelì hwa e ndawò ya màkanɛ̀ yà wònyà Yudà hwà mà òmeya Pàwolò na Bànàbàrzì ŋmɛ̀ndì nanù ema, “Wònyàmòwe, e òhvi tɛ ŋmɛ̀ndì ò lì ètìrzɛ̀ hwatò, i rzòrzòmelì e jèe e jò òhweyà.” 16Pàwolò à mà tɛ̀mɛ̀ ò ŋmanyu, a rzekɛlɛ hwatò lìya ò lì hwɛmɛ mɔtɔwu mò awu, rzìi a wòteya lì òhwa eyà.
A ma òhwa nanù ema, “Wònyàmòwe hwa Irzàyɛ̀lì na inyɔ hwatò ema e rza enje wònyà Yudà ema e gbèeyà Lohwɛ̀, e nò òkànèyà. 17Lohwà la ama wònyà Irzàyɛ̀lì lì ma hvɔ̀rzɔ̀ imbamba ja arzu, à mà òlòwirzɛ hwatò rzayi-rzayi e hvònda ema wɔ̀ hwà mà hwɛ hwàyɛ̀nì ò èkòmè ya Ìjiptò. O mburza nanù, Lohwɛ̀ rzìi a gbeyàna e ŋginyà ya eni ndɛnɛ ò lì hwa ulɛ ò tenì ya èkòmè ya Ìjiptò. 18Eyà ya mènìmènìi me meya mɔ̀ à mà kàkànà hwègbèèlì hwe awu ŋmèma ò tenì ya mòrzànjɛ. 19Lohwɛ̀ à mà hvaŋga hwèkòmè lìrzamba ò mɔ̀nyɛ̀ mò Kenàanì, rzìi a ŋgbà hwatò hwa eni mɔ̀nyɛ̀ mò awu. 20Hwenè hweyà hwe arzɛ hwe ma wòwana eyà ya hwègbe hwenii na menìmeta me meya.
“O mburza nanù, Lohwɛ̀ rzìi a hwa ŋgbà hwàkàyìrzèlì natɛ̀ɛ na e hvònda ya ama e mòòhwèlì wà èlìŋgɛ̀ Rzamùwɛlì. 21Hwanu hwatò rzìi hwa ijòwa Lohwɛ̀ nanù ema a hwa ŋgbe kiŋgɛ̀, Lohwɛ̀ à mà hwa ŋgbà Rzàwòlò e ŋmanà wa ama Kirzi ema à mà uwɛ̀lɛ̀lɛ̀yi ò lìtumba la ama Bènjàmɛ̀nì à mà hwa kànèyà ò tenì ya mènìmenì me meya. 22Lohwɛ̀ rzìi a ulɛ Rzàwòlò a ika Dàhwitì e kiŋgɛ̀ ya awu. A ma òhwa lì hvòmɛ̀nɛ̀ Dàhwitì nanù ema, ‘Nà ɛnɛ nanù ema, Dàhwitì, e ŋmanà wa munyanà wa ama Jɛ̀rzɛ̀, a hwèlì ndi lìtumba la mòtò ema na lìŋgàni. A hwèlì ndi mòtò ema a ò gbèyɛɛ hweyà hwe arzɛ ema na arzɛ nanù ema a gbeye.’ 23Yerzù mɔ̀ ema a uwɛ̀lɛ̀lɛ̀yi ò mòtende mò ama Dàhwitì, mɔ̀ ndi Lohwɛ̀ à mà gbeye e Mòrzùŋgèlì hwà hwatò hwa Irzàyɛ̀lì, na òma mɔ̀ à mà òhwe nanù ema a gbeyà. 24Ndeŋgana Yerzù a e wòteyà èwòlò ya eni, Yòwanìrzɛ̀ à mà òhweyà hwatò hwa arzɛ hwa Irzàyɛ̀lì nanù ema, hwa tikòwe ò wòhwe wò awu na lì lùhwìrzɛ̀hwɛ̀. 25Nà òma Yòwanìrzɛ̀ à mà arze lì kùlɛ̀ èwòlò yà eni, rzìi à ijòwa hwatò nanù ema, ‘Njɛ̀nɛ inyɔ è ɔ̀ŋgɛ̀lɛ̀ nanù ema nà hwèlì e? Rzeketɛ imba ndi nà hwèlì è mɔ̀ ema ya ambɛ̀lɛ̀. È ɔŋgɔ̀ tɛ, mɔ̀ à ò jà ò mburza yà ami, imba nà rza uki hvɛ tɔ̀ mòtò ema à tànɛ̀yì lì rzòlohwà hwètàmbì hwe eni ò màtaŋga mà eni.’”
26Pàwolò à mà hwatɛ hvɛ ò lì òhwa nanù ema, “Ìi wònyàmòwe kòkò, ò mòtèndè mò ama Abràhamù, na hwatò ema hwa gbèeyà Lohwɛ̀ naŋgɛ nanù, irzɔ ndi hwa òmelì mònò ŋmɛ̀ndì mò gbamù mò lì rzùŋgàhwa. 27Hwàtò ema hwa mà hwɛ lì lìya ò Jèrurzalɛ̀mù nà hwàtìmbèlì hwa awu hwa rzìi hwiye nanù ema, Yerzù ndi à hwèlì è Mòrzùŋgèlì. Hwa rzi rzɔ̀ŋgìtɛ̀nɛ̀ hwetilelì hwe hwà-òhwèlì hwa hwèlìŋgɛ̀ ema wɔ̀ hwa mà hwɛ lì làŋga ò tɔ̀ ima Wùnya wò lì Arzìyòlɛ. Tɔ̀ nɛ wɔ̀ hwa mà gbèye hweyà ema hwà-òhwèlì hwa hwèlìŋgɛ̀ hwa mà òhwe hwe mà òndìrzɛ̀hwɛ, nà òma hwa mà òhwe nanù ema hwa òŋwa Yerzù. 28Tɔ̀ nɛ wònyà Yudà hwa rzi lùwɛ tɔ̀ njɔ̀mì ò lì mò òŋwa, hwa mà òhweyà Pìlatò nanù ema à gbèye hwa òŋwe Yerzù. 29È hvònda ema hwa mà kùlɛ̀ lì òndìrzɛ̀ mamɛ ema è mà tìlahwa ò è kààtì yà Lohwà lì hvomɛ̀nɛ̀ Yerzù, hwa mà mò rzìhwìrzɛ ò mbàrza, rzìi hwa mò ika ò rzɔ̀ŋgɔ̀ ema è mà hvòkòwahwa ò tenì yà màŋyàyi. 30Ndi Lohwɛ̀ à mà mò hvùmùlɛ̀ ò kpèelì. Ò mburza nanù, 31ndèŋgànɛ̀lɛ̀ ò tenì yà rzayi-rzayi jà mèenyà mɔ̀ à mà à uŋmɛ̀lɛ̀ mɔ̀ ŋmìti ò hwatò ema wɔ̀ nà mɔ̀ hwa mà ɛ̀ndɛ̀lɛ̀nɛ̀ lì wòteyà ò Galìlì natɛ̀ɛ nà ò Jèrurzalɛ̀mù. Ò naŋgɛ nanù hwaŋga hwatò ndi hwa òhweyà hwatò hwa Irzàyɛ̀lì mamɛ ema hwa mà ɛnɛ. 32Nàŋgɛ rzɔ̀ mòŋgò Ŋmɛ̀ndì mò Gbamù mɔ̀ ndi ì mà è jàneyà. Mòŋgò ŋmɛ̀ndì mò hwèlì ndi nanù ema eyà ema Lohwɛ̀ à mà òhwe nanù ema à ŋgba irzàŋgo jà arzu mɔ̀ à mà è òndìrzɛ̀ lì akeyà nà irzɔ. 33Mɔ̀ à mà òndìrzɛ̀ eyà ema à mà òhwe ò lì akeyà nà irzɔ ema ì hwèlì ò mòtende mò awu, nà òma à mà hvùmùlɛ̀ Yerzù ò kpelì. Nà òma è tìlahwì ò kààtì yà mɛ̀rzɔ̀kɔ̀ yà ama Lohwɛ̀ ò èhvàrzù ema è ùkirzɛ̀ hwehwakɛ nanù ema,
‘Ò wà ò hwèlì ndi è Ŋmanà wà ami,
yawònò nà mà jà ndi è Tatɛ̀ yà aŋgɔ̀.’
34Lohwɛ̀ à mà mò hvùmùlɛ̀ ò kpèelì e rzi hwɛ mɔ̀ lì timba ò mɔ̀nyɛ̀ lì rzɔ̀mbɔ̀. Lohwɛ̀ à mà òhwa lì hvòmɛ̀nɛ̀ eŋge nanù ema,
‘Imba na ò ŋgba lì nàmìrzɛ̀hwɛ la wòtani ema lì rza ayèŋgòwɛ̀, ema nà mà òhwe nanù ema na ŋgba kiŋgɛ Dàhwitì.’
35Ndèŋgànà è tìlàhwì ò ehvɛhvɛ èki nanù ema,
‘Ò rza ò kìnyɛ̀lɛ̀ è mògbèèlì wà aŋgɔ̀ ema à ò gbèeyà nà ŋmèma mɔ̀kɔ ò lì rzɔ̀mbeyà ò tenì yà rzɔ̀ŋgɔ̀.’
36Irzɔ i hwi nanù ema e hvònda ema kiŋgɛ Dàhwitì a hwèlì lòŋgɛ, à mà gbèeya Lohwɛ̀ na òma Lohwɛ̀ à mà arze. O mburza nanù, à mà ŋwa, hwà mà mò imeya ò ekì ema hwà mà imeya imbamba ja eni ò eŋgànɛ̀lɛ̀ à mà rzɔ̀mbɔ̀. 37Ndi e mɔ̀ ema Lohwɛ̀ à mà hvùmùlɛ̀ ò kpelì a rzìi rzɔmbe. 38O èŋgànɛ̀lɛ̀, wònyàmòwe imba na arza ema inyɔ e hwiye nanù ema, Yerzù ndi à gbèyi ndèŋgànà hwa e òhweyà nanù ema, Lohwɛ̀ a làkìrzɛ hwatò wòhwe wò awu. 39Ndeŋgànɛ̀lɛ̀ inyɔ e hwiye nanù ema, tɔ̀ ima mòtò ema a mò lòkɛ̀yi Lohwɛ̀ a mò emeyà ò wòrzò wò eni nàa mòtò ema a hwèlì ehve-ehve. Imbenda ja ama Mòrzè i rzi tanɛyi lì mò gbeyà nanù ema Lohwɛ̀ a mò emeyà. 40È àŋgòhweyà ema eyà ya wòhwe ema hwà-òhwèlì hwa hwèlìŋgɛ̀ hwà mà òhwe e rza e gbèyɛ̀nɛ inyɔ. Wɔ̀ hwà mà òhwa nanù ema,
41‘È ɔŋgɔ̀ tɛ inyɔ hwatò ema e kikòwa Lohwɛ̀! È ò tàmà, ndèŋgànà e ò ŋwa,
èhwanja eyà ema na ò gbèyɛ mene mèenyà,
e hwèlì ndi eyà ema inyɔ e rza ò lòkɛ̀, tɔ̀ e hwɛ ndi nanù ema mòtò a e telɛlɛyi e yɔ.’”
42Nà òma Pàwolò na Bànàbàrzì hwà mà hwɛ lì anjiya ò e ndawò ya màkànɛ̀ ya wònyà Yudà, hwatò hwà mà hwa òhweyà nanù ema wɔ̀ hwa jèe hvɛ ò wònɛyi Wùnya wò lì Arzìyòlɛ, ò lì hwa òhweyà hwene hweyà hvɛ. 43È hvònda ema hwaŋga hwatò hwà mà wurze ò màkanɛ̀, rzayì-rzayì ja wònyà Yudà na hwaŋga hwatò ema hwa rza enje wònyà Yudà ema hwà mà tikòwahwɛ ò lì lòkɛ̀ la wònyà Yudà, hwà mà òŋgamà Pàwolò na Bànàbàrzì. Pàwolò na Bànàbàrzì hwà mà hwa òhwìrzɛ̀nɛ̀ rzìi hwa hwà kɔ̀mɛlɛ nanù ema hwa hwɛ ndi ò lì lòkɛ̀ e ndèli ya ama Lohwɛ̀.
44O wònɛyi Wùnya wò lì Arzìyòlɛ, ò ma gbeyà ndi nàa hwatò hwa arzɛ hwa eŋge mbòwà hwà mà ukeya ò lì òkànèyà eyà ya ama Rzàŋgò. 45È hvònda wònyà Yudà hwà mà ɛnɛ e ŋgìndì, hwà mà òndana na lìrziŋga. Rzìi hwa wòteya lì teŋgɛ̀nɛ̀ mamɛ ema Pàwolò à mà hwɛ lì òhwa na ò lì mò rzòrzòlɛ hweyòlì. 46Ndi Pàwolò na Bànàbàrzì hwà mà hwɛ ndi lì òhwa nanù mɛnɛ e rzi hwɛ lì òka wɔ̀ŋgɔ̀. Hwà mà hwɛ lì òhwa nanù ema, “Inyɔ wònyà Yudà, inyɔ ndi e ma àŋgàmɛ̀nɛ̀ lì lòma lì òhwa eyà ya ama Lohwɛ̀. Kanatɛ inyɔ ye e rzɔ̀rzi, ndèŋgànɛlɛ na òma inyɔ hvɛ e rza awòwɛ̀ nàa hwatò ema hwa àŋgàmɛ̀nɛ̀yi lì òhva lòŋgɛ la gbìndèyà, ò naŋgɛ nanù, irzɔ je e hwɛmɛ ò lì àyiŋgòwɛ̀lɛ̀lɛ̀ hwaŋga hwatò ema hwa rza enje wònyà Yudà. 47Eyà ema Lohwɛ̀ a jò kànèlì nanù ema i gbeye, e hwèlì ndi nanù ema,
‘Nà ma ò gbeyà ndi nàa ŋmàye ò hwaŋga hwatò ema hwa rza enje wònyà Yudà,
aŋga nanù, hwatò hwa arzɛ hwa e rze ya arzɛ hwa ò luwa lì òŋgìrzɛ̀ lì akeyà na ò wa.’”
48È hvònda ema hwaŋga hwatò ema hwa rza enje wònyà Yudà hwà mà hwèya ene hwà mà lìŋgà rzìi hwa kàrzɛ ŋmɛ̀ndì mò ama Rzàŋgò. Ndeŋgana hwatò hwa arzɛ ema hwà mà hvɔ̀rzɔ̀wɔ̀ ò lì luwa lòŋgɛ la gbìndèyà hwà mà lòkɛ̀ Rzàŋgò Yerzù. 49È mbɔrzi ya ama e Rzàŋgò e ma nyàla ò hwèrzòòkà hwe arzɛ. 50Ndi wònyà Yudà hwà mà umbɛlɛlɛ hwàtimbelì hwa e mbòwa, na hwàmbaki hwa hwàalanà ema hwà mà hwɛ lì gbèeya Lohwɛ̀. Hwanu hwatò rzɔ hwà mà jàneyà Pàwolò na Bànàbàrzì lùwànje rzìi hwa hwà hvaya ò erzòòkà ya awu. 51I àpɔ̀rzìtòlò i ma hvàkùmɛ̀lɛ̀ irzɔ̀hwɛ̀ ema i ma hwɛ ò màtàŋgà ma awu, nàa embànèlì nanù ema wɔ̀ hwa òhvi e kɔ̀kìrzɛ̀. Nà òma hwà mà kùlɛ̀ lì gbeyà nanù, rzìi hwa ɛ̀ndɛ ò mbòwà ya Ikɔ̀nìyùmì. 52Hwàtò ema hwà mà lòkɛ̀ Yerzù ò mbòwa ya Antìyɔ̀kì hwà mà ònda na mɔ̀nyɛ̀ŋgì na Èlìŋgɛ̀ yà Wòtani.
Currently Selected:
Hwègbèèlì 13: bri
Highlight
Share
Copy

Want to have your highlights saved across all your devices? Sign up or sign in
© 2022, CABTAL