1 Kɔ̀rintìyà 7
7
Mayowà mà ama Pàwolò lì hvaànà hweyà hwe lìhwa
1Nàŋgɛ lì hvomɛ̀nɛ̀ hweyà ema e ma no tìleya, o lɔ̀wu nanù ema e mòtò wà mùnyanà a rzìi hwaa. 2Kanatɛ mòrzònje mò àkɛ̀lɛ̀nɛ̀yì, tɔ̀ ima mòtò wà mùnyanà à ohve è wà eni jòjìyɛ̀, rzìi tɔ̀ ima mòtò wà molànà à ohve wà eni mòjòmɛ̀. 3È mòjòmɛ̀ a hwɛnì lì ondìrzɛ̀ e nyìrzɛ̀ ya e jòjìyɛ̀ ya eni, lì hwàanà hweyà hwe lìnɔ̀ŋgɔ, e jòjìyɛ̀ yɔ hvɛ e hwɛnì ndi lì gbeyà e mòjòmɛ̀ wà eni nanù mɛ̀nɛ̀. 4È jòjìyɛ̀ e rza hwɛnì lìkànèyà na e nyo ya eni, e mòjòmɛ̀ wà eni ndi à hwɛnì lìkànèyà là e nyo ya eni. Nànù mɛ̀nɛ̀ hvɛ e mòjòmɛ̀ a rza hwɛnɛ lìkànèyà na e nyo ya eni, èhwanja e jòjìyɛ̀ ya eni ndi à e hwɛnì. 5Inyɔ ema e hwàahwì, e rzìi a imànɛ̀yi mɔ̀kɔ na ɔ̀nɛyi, o lìnɔ̀ŋgɔ, e hwɛ ndi nanù ema inyɔ ya ahweyànɛlɛ nanù ema, e gbeyà ndi nanù o ŋmàna hvòkà wà hvondà, aŋga nanù ya aŋgbɛ̀ɛ inyɔ hwiti o Màkànɛ. O mburzà ya nanù, e timbe e hwɛ ndi na oma e ma lome lì hwɛ, aŋga nanù Mòkarzɛ̀ à rza e kèkirzɛ, o lì ɛ̀ndɛ o mòrzònje. 6Nà e òhwèlì ndi ene eyà nàa màyowà, rzeketɛ lìkànèyà ndi na e kànelì. 7Nà lìŋgànì nanù ema inyɔ hwa arzɛ e hwɛ ndi nàa imba ema na rza hwàayi. Ndi tɔ̀ ima mòtò a ohvi e ja eni jàhwèyà, ema Lohwɛ̀ a mo ŋgbelì, mɔ̀kɔ a ohvi e nyìrzɛ̀ ya lìhwà, ɔ̀nɛyi mɔ̀hvɛ a rza ohvi. 8Nà e ohweyà rzɔ inyɔ ema e rza hwaahwɛ tɔ̀ lìhwa, na mekurze nanù ema, o lɔ̀wu ema e rzìi hwaahwa tɔ̀ lìhwa, na oma imba hvɛ na rza hwàayi. 9Ndi e rza tànɛ tɛ lì alɛ̀mbɛ, e hwàà nà lì hwààhwà. Èhwanja o lɔ̀wu lì hwààhwà lì aka lì ohva mùnya mò è nyìrzɛ̀ yà wònàŋgì. 10Rzàŋgo Yerzù rzɔ ndi à ohwèlì hwatò ema hwa hwààyì nà hwaŋga ema hwa hwààhwi hwenè hweyà rzeketɛ imba. A ohwi ndi nanù ema è jòjìyɛ̀ è rzi hwɛmɛ mòjòmɛ̀ mò eni. 11“Ndi imba nà è òhweyà ema, jòjìyɛ̀ a hwɛmi tɛ e mòjòmɛ̀ wà eni, a rzi keka lì hwaahwa ohvɛhvɛ mùnyanà, tɔ̀ a gbeye màrzèèlì na è mòjòmɛ̀ wà eni.” È mòjòmɛ̀ a rzi keka lì hvàya e jòjìyɛ̀ yà eni o lìhwa. 12O hwanɛ̀yi hwatò, imba ndi nà è ohweyà, rzeketɛ Rzàŋgo Yerzù. Tɔ̀ ima mòtò wà wònyà Krirztò ema a ohvi mòlanà ema a rza lòkɛ̀yì Krirztò, ema a lìŋganì lì lìya na mɔ̀, òŋgo mòtò a rzi mo hvàyà o lìhwa. 13Ndèŋgana e hwèlì tɛ ema mòlanà ema a lòkɛ̀ Krirztò a ohvi tɛ mòjòmɛ̀ ema a rza enje mòlòkelì wa ama Krirztò, ndi e munyànà a lìŋganì lì hwɛ o lìhwa na mɔ̀, e mòlanà a rza hwɛnì lì mo hwɛmɛ. 14Èhwànja e mòjòmɛ̀ ema a rza lòkɛ̀yi Krirztò a hwɛ wòtani lì akeyà na e jòjìyɛ̀ wà eni ema a lòkɛ̀yi Krirztò o lìhwà la awu. È jòjìyɛ̀ hvɛ ema a rza lòkɛ̀ Krirztò, yɔ hvɛ e hwɛ wòtani lì akeyà e mòjòmɛ̀ wà eni ema a lòkɛ̀yi Krirztò o lìhwa la awu. È rza enje tɛ nanù, hwàanà hwa awu hwa rza hwɛ wòrzaŋgi, ndi o naŋgɛ wɔ̀ hwa hwèlì, wòtani. 15Ndi e mòjòmɛ̀ tɔ̀ e jòjìyɛ̀ ema e rza enje mòlòkèlì wà ama Krirztò, a inɛlɛyi tɛ ema mɔ̀ à anjìyà o lìŋgì lìhwà, inyɛ mɔ̀ à ɛ̀ndɛ. O ene tumbà hwehwɛ̀ɛlì, e mòjòmɛ̀ tɔ̀ e jòjìyɛ̀ ema e lòkɛ̀yì Krirztò e rza kakahwi na èŋge mbenda ya lìhwa. Lohwɛ̀ a jo lati ndi o lì lìya na ɛ̀yɔ̀lɛ̀. 16Inyɔ ijòjìyɛ̀ ema e lòkɛ̀ Krirztò e rza hwi nanù ema, inyɔ eŋga, mèjòmɛ̀ me anyu ema me rza lòkɛ̀yi Krirztò me tànɛyi lì rzùŋgàhwà e? Tɔ̀ inyɔ mèjòmɛ̀ ema e lòkɛ̀ Krirztò e rza hwi nanù ema, inyɔ ye eŋga ijòjìyɛ̀ ja anyu ema i rza lòkɛ̀ Krirztò i tànɛyi lì rzùŋgàhwà e?
Pàwolò à mà hwatò hwa hwɛ ndi nà oma Lohwɛ̀ à ma hwa hvɔ̀rzè
17Tɔ̀ ima mɔ̀ hwa arzu, a lìiya hvɛ ndi o hwètɛ̀yìrzèlèlì hwe ama Rzàŋgo Yerzù na oma i ma hwɛ, o lìrzako ema Lohwɛ̀ a mà lome lì jo hwɛ̀lɛ. Èya ya ami ene ema imba na okolɛ̀ o mìitelì me arzɛ. 18Ène ŋgàna e hwèlì ndi ema, e mòtò ema à mà loma lì endàhwà, ndèŋgàna Lohwɛ̀ a e mo hvɔ̀rzɔ̀, a rza tànɛyi lì keka o lì ulɛ hwetɛ̀ndɛ hwe lì endàhwà. Oŋgo mùnyanà mɔhvɛ ema a rzi endàhwɛ̀ ndèŋgàna Lohwɛ̀ a e mo hvɔ̀rzɔ̀, a rzi keka lì endàhwà. 19O lì endàhwa o rza uŋmɛ̀lɛ̀ tɔ̀ eyà, o rza endàhwì hvɛ tɛ o rza uŋmɛ̀lɛ̀ tɔ̀ eyà. Èya ema e hwèlì wòlìtò e hwèlì ndi o lì ika i mbenda ja ama Lohwɛ̀. 20Tɔ̀ ima mɔ̀ wa anyu a lìiya ndi na oma à mà lome lì hwɛ e hvonda ema Lohwɛ̀ à mà mo hwɛlɛ. 21O ma hwɛ tɛ ndi mòkòmì e hvonda ema Lohwɛ̀ à mà o hvɔ̀rzè, ene eyà e rza o tàkirzɛ. Ndi e mòkànèlì wà aŋgɔ a o rzolohwi tɛ o emeyà. 22O ma hwɛ tɛ mòkòmì ndèŋgàna Lohwɛ̀ a o hwɛlɛ, o naŋgɛ nanù e Rzàŋgo Yerzù à mà o rzòlohwà. Ndèŋgànɛ̀lɛ̀ hvɛ o ma hwɛ tɛ wònjà lìrzako ema Rzàŋgo à mà o hvɔ̀rzè, o naŋgɛ̀ nanù, o ma tìmba ndi e mokome wà ama Krirztò. 23Lohwɛ̀ à mà e àndana na lì kàyi lì ndɛ̀nɛ̀, o èŋgànɛ̀lɛ̀ e rzi hweyàna hwaŋga hwatò ema hwe e ohweyà hweyà ema hwe e kaka nàa hwàkòmì. 24Ìi wònyànyàŋgò hwa ami, na arza ema inyɔ e lìiya ndi o ŋmèmba na Lohwɛ̀ nàa e hvonda ema à mà e hvɔ̀rzè.
Pàwolò a ohwi lì hvomɛ̀nɛ̀ mekɛ̀yɔ̀ me wunyanà nà mekurze me hwalanà
25O naŋgɛ nanù o lì hvomɛ̀nɛ̀ hwatò ema hwa rza hwàayi na hwaŋga ema hwa rzi hwàahwì. Imba na rza ohvi lìkànèyà ema Rzàŋgo Yerzù a no ŋgbèlì, tɔ̀ eyà o lì e ohweyà lì hvomɛ̀nɛ̀ hwenè hwètɛ̀yìrzèlèlì. Ndi tɔ̀ nɛ Rzàŋgo Yerzù à nò òŋgòwani o lì hwɛ e mòtò ema hwatò hwa lòkɛ̀yì. O èŋgànɛ̀lɛ̀ na e ohweyà mamɛ ema na hwi ema e hvomɛ̀nɛ̀yi. 26Li hvomɛ̀nɛ̀ monò motaka o naŋgɛ, o lɔ̀wu ema hwatò hwa lìya e rzi hwɛ lìhwa na lì hwaahwa. 27È hwèlì tɛ ema o hwàayi, o rzi hvaya jòjìyɛ̀ ya aŋgɔ. Ndi o rzi hwàayi tɛ, o rza arza tɔ̀ jòjìyɛ̀. 28Ndi inyɔ hwatò hwa wunyanà e hwàayi tɛ, oma e rza gbèyi tɔ̀ eyà ya wòhwe. Ndi o ene hvonda ya naŋgɛ, molànà a hwàahwì tɛ a rza gbèyi tɔ̀ eyà yà wòhwe. Tɔ̀ nɛ, lìhwa lì jànà rzayì-rzayì ja mètàkà na mètàkà ndi na rza o lìŋgàna nanù ema ya akeyà mene mètàkà me arzɛ. 29Ìi wònyamòwè, mamɛ ema na hwɛnì lì e ohweyà e hwèlì ndi nanù ema, e hvonda ema jo òhvi anù rze ya mɔ̀nyɛ̀ e utù, o èŋgànɛ̀lɛ̀ lì wòteya naŋgɛ lì ɛ̀ndɛ o worzò, tɔ̀ ima mùnyanà ema a hwàayi molànà, a àŋgàmɛ̀nɛyi lì hwiya nanù ema jòjìyɛ̀ ya eni, i rza enje ndi eyà ya wòlìtò o lòŋgɛ la eni. 30O enè ŋgàna mɛnɛ, hwatò ema hwa ɛhwɛ, hwa hwɛ ndi na hwatò ema hwa rza ohvɛ ndùtù. Hwàŋga hwatò ema hwa lìŋga, hwà ɛnɛ ema hwa rza ohvi màlìŋgò. Hwàŋga hwatò ema hwa anda hweemà hwà ɛnɛ̀ nanù ema hwa rza ohvi ndàndɛ̀. 31Hwatò ema hwa gbeyàna hwèèmà hwe ene rze ya mɔ̀nyɛ̀, wɔ̀ hwa rza ika mèèmà me awu aŋga. Èhwanja na oma ene rze e hwèlì nanù, e rza inda tii. 32Nà o lìŋgànà ema tɔ̀ eyà tɔ̀ yɔ̀kɔ e rzi e tàkirzɛ̀ mèèmà me anyu. È mùnyanà ema a rzi hwàayi molànà, a ika ndi mèèmà mo eni mo arzɛ na èwòlò yà ama e Rzàŋgo, aŋga nanù a òkìrzɛ̀ Rzàŋgo mɔ̀nyɛ̀ŋgì. 33Ndi e mòtò wa mùnyanà ema a hwàayi a lùteyà ndi hweyà hwe ene rze, o lì arza lì òkìrzɛ̀ jòjìyɛ̀ wà eni mɔ̀nyɛ̀ŋgì. 34Èhwanja e nyɔ̀ŋgì ya eni ya akàhwanɛ̀ o mèèmà mo eni. È molànà ema a rzi hwàahwì, tɔ̀ e mɔ̀ ema a rzi hwi mùnyanà, a ika ndi mèèmà mo eni mo arzɛ o lì gbèeyà Rzàŋgo, èhwanja mɔ̀ à ika ndi mèèmà mo eni ma arzɛ, o lì gbeyà Rzàŋgo nà è nyo na èlìŋgɛ̀ yà eni ya arzɛ̀. Ndi e molànà ema a hwàahwì mɔ̀ à luteyà ndi hweyà hwe ene rze ya mɔ̀nyɛ̀, aŋga nanù, mɔ̀ à tànɛyi lì òkìrzɛ̀ e mòjòmɛ̀ wà eni mɔ̀nyɛ̀ŋgì. 35Nà ohwa ndi hwenè hweyà o gbamù wà anyu rzeketɛ o lì e wùnana, na arza ema e gbeyè tɔ̀ mamɛ̀ ema e òŋgòwàna lì gbèeyà Rzàŋgo gbamù nà mèèmà me anyu me arzɛ. 36Ndi e mòtò wà mùnyanà a lutelì tɛ nanù ema a rza tànɛyi lì alɛ̀mbɛ kɔ̀yi-kɔ̀yi na ehwàndà ya eni, a lutelì tɛ nanù ema a arza lì mo hwaa, inyɛ a mo hwaa. Ènè nyayi ya eyà e rza enje ndi eyà ya wòhwe. 37Ndi e mòtò ema a lùtèlì nanù ema a rza hwaa, rzìi mɔ̀ à rzi tàkirzɛhwɛ hvɛ tɔ̀ o lì hwaa, rzìi e hwɛ nanù ema a tànɛyi lì a alɛ̀mbɛ. A rza hwàayi tɛ, nanù o ma a gbèyi ndi eyà ya gbamù. 38O èŋgànɛ̀lɛ̀ e mùnyanà ema a hwàayi e jòjìyɛ̀ ya eni a gbèyi ndi eyà ya gbamù, ndi e mùnyanà ema a rzìi hwàayi molànà, a gbèyi ndi gbamù wò akɛ̀lɛnɛ. 39Ò eŋgànɛ̀lɛ̀ e jòjìyɛ̀ e hwɛnì ndi lì hwɛ na e mòjòmɛ̀ wà eni o lìhwa la awu o lòŋgɛ la arzɛ. Ndi mòjòmɛ̀ wà eni a ŋwelì tɛ a hwɛnì wònjà lì hwaahwa tɔ̀ ima mùnyanà ema a lìŋgàni. Ndi òŋgo mùnyanà a hwɛnì ndi lì hwɛ o ŋmèmba mo ama Krirztò. 40Ndi o màlùtèyà ma ami, à ò lìŋga, e hwèlì tɛ ema a rza o hwàahwa ohvɛhvɛ mùnyanà. Èlìŋgɛ̀ yà ama Lohwɛ̀ yɔ̀ndi è nò lìyɛ̀lɛ̀ o lì e ohweyà hwenè hweyà hwe arzɛ.
Currently Selected:
1 Kɔ̀rintìyà 7: bri
Highlight
Share
Copy
Want to have your highlights saved across all your devices? Sign up or sign in
© 2022, CABTAL
