Lûk 7
7
Njisə̀s ə tsuʼ wufɨ̀aʼa àtu ə sesokə̀ʼa
(Matyò 8.5-13)
1Ə̂ pə̀ kə̂ Njisə̀s wàmnè mɨ̂sè ghɛ ghɛ ə è tè kyiŋə nə ghɨ zɨ ə kɛse tso ə tə̀ʼ ə̀ Kàpanùm, 2tuə sesokə̀ʼ ə ghɨə endaʼ ə Lûm kyîke e nyi fu, kyi wufɨ̀aʼa ə̀ vəyn, kɔ̂ŋɔ̀ vəyn nâʼà àchûŋ. Wufɨ̀aʼa nə vɨ̂yn e zafə nâʼà sə ŋaŋ, tyəm se kwu. 3Tuə sesokə̀ʼ nə kɨ̂yn ə zɨə saʼghe kûmə̀ Njisə̀s ə tomə sèchəʼ sə Njû shise nə se ndu chyatê vəyn nə è pə̀yn tsuʼ wufɨ̀aʼa ə̀ vəyn nə vɛ. 4Ghənə ə ndù sê Njisə̀s ə chyatə̂ vəyn nâʼà sə ŋaŋ ə piə nə, “Tsàmte wùə vɨ̀yn, è nyi ke nâʼà wùə kə ò tsamte. 5Tuə sesokə̀ʼ nə kɨnə mə kɔ̂ŋɔ̀ ndò ghɨ ghasènìghe, mə è və tə tsàmte pɛ ndɛ̂ atsɨ̀ynte ə ghâsènì.”
6Nyi, Njisə̀s ə ndò yî ghə̀ ghənə. Ə pə̀ kə è kwi sè paʼsə̂ ndu ə ndɛ̂ àtuə sesokə̀ʼ nə kɛ, ke ə tomə sèsoyn sə vəynse nə se ndu pi sê Njisə̀s nə, “Pɛ̂pɛ, kə ò fɨyn fe ètsôs se pə̀yn kûmə̀ nə m kwənə va kə ò nji ə mìə ndɛ, 7fɨyn nyi nâʼà nyi kwənə̂ va se tyə̂m se wàmnè sê ghò nâʼà è ngɨŋ zɨm. Pîza, piə kə ndo nə wufɨ̀aʼa vɨm tɛ, kə è tɛ. 8M piə nyi kûmə̀ nə m pɔŋɔ fɨaʼà kəpi əghɨghe etyə̀, kyi kepî sesokə̀ʼ ə mìə etyə̀. M piə se vɨnə nə, ‘Ndùə!’ è və ndùə kə ndò, ə piə se vîə nə, ‘Pə!’ è və pə̀ kə ndò. M piə sê wufɨ̀aʼa vɨm nə, ‘Nə̀yn nyi’ è və nə kə zâ.”
9Njisə̀s ə zɨə eghɛ nə zɛ ə è pi choze ə zomə vəyn, è və piə sê nɔ̂yn ə ghɨ kɛ ə ke tè chùmtə vəyn nə, “M tsâ sê ghàyn nə, m pâʼà nyìəm fe wùə, è kyi èkyî epomə̂ zɨ̂yn, naʼapi ə Isìlây.”
10Soyn sə àtuə sesokə̀ʼ nə sɛ ə kɛse piə kwɨlə ndùə ə və ndɛ ə fe kə mə wufɨ̀aʼa ətəyn ə tɛ.
Njisə̀s ə zòmsè va zhwîə kwu.
11Epàm ətəyn Njisə̀s ə ndò ə ndùə ə tɔ̂ŋ zhîze, e tɔŋtə̂ nə Nâyn, yî chùmtè èpàm sə vəynse è nɔ̂yn ə ghɨ̀a, ke tsɨ̀ə kə nyi. 12Ə pə̀ kə è paʼsə pə̀ echo tɔ̂ŋ, è və fe əghɨ mə pɨàʼà wùə èkwuə sè fɨə pə̂ è vəyn. Wùə èkwuə nə vɨ̂yn tè nyi ke vayn ndômə̀ èmɔ̀ʼ vɛ ə nyiə vəyn tè kyi, nyiə vəyn nə vɛ e nyi zhwiə kwu. Zhwiə kwu nə vɨ̂yn tè nyi yî nɔ̂yn ə ghɨ̀kè, ke tsɨ̀ə kə nyi kə ke ndò ə tɔ̂ŋ nə zɛ. 13Pɛ̂pɛ ə fe wùzhɔyn nə vɨ̂yn nyi èkomə̂ ewiyn sê vəyn nâʼà sə ŋaŋ ə piə sê vəyn nə, “Kɨme, kə ò fɨyn chi.” 14Njisə̀s ə piə za ə fɨtə̂ ndùə kûmə̀ àtayntayn ə wùə èkwuə nə kɛ, ghɨ ghɛ ə ghe pɨ̂aʼà vəyn ghə tyəmə kə ndò, è və piə nə, “Vayn èkwuŋ, ndwi.” 15Wùə èkwuə nə vɛ ə ndwìə tsɨsə ə zhə̀tə̀ sè wàmnə̀. Njisə̀s ə kyiə vəyn ə kɛsə fo vəyn sê nyiə vəyn.
16Fâynzè ə ko nâʼà ghɨ əkɨ̂m fu. Ghənə e tsîtə̀ Fèzhə̀ piə nə, “Fɨ̀aʼtè èghaʼâ ə pə̀yn ə ghâsènì əfètəyn. Zhə̀fè ə pə̀yn se nayne ə ghɨ və!”
17Saʼghe nə zɨ̀yn kûmə̀ Njisə̀s ə waŋa kə endaʼ ə Njòndyâzè ekɨ̂m, nâʼà tèndaʼ tekɨ̂m tɛ te nyi ətetitepì tə təynte.
Ndùətom sə Njɔyn Fo M̀mòse
(Matyò 11.2-19)
18Chùmtè sə Njɔyn Foə Mòse ə tsà kɔʼɔ ə̀ghɛ nə ghɨyn kûmə̀ Njisə̀s sê vəyn. Njɔyn ə tɔŋɔ əghɨ ə pɛ̀ 19ə tomə nə ghe ndù pfɨf sê Pɛ̂pɛ Njisə̀s nə, “Ə̀ nyi gho vɛ ò vâ nyi se pə̀yn mə mə, ghàs kyi sə̂ lɨmtə̂ wùə ndò o?”
20Ghɨ nə ghɨyn ə ndùə fe Njisə̀s ə piə sê vəyn nə, “Njɔyn Foə M̀mò tom nə ghàs pə̀yn pfɨf sê ghò nə, ‹Ə̀ nyi gho vɛ ò tè nyi se pə̀yn mə, mə ghàs kyi sə̂ lɨmtə̂ wùə ndò o?›”
21Ghənə piə pə̂ ndò, Njisə̀s e tsuʼə ə̀ghɨ ashìŋə̀ nə kɛ, ghe tsɨ̀ə kə nyi ə tekyì tə tezafte tîte ə ghənə tè zafə è təynte fɨnə chûmə̀ fɨsə sèzuʼ se pise, fɨnə nə̂ nə fòf etsɨəve ə kɛsə̂ fe tèluʼ. 22Njisə̀s ə pə̀ynsə̀ piə sê ghənə nə, “Ghàyn kɛse ndù tsàyn sê Njɔyn ghɛ ghe ə ghàyn fe sə ghà ngɨŋ ə fɨnə zɨə sê ghɨə mɔ̀ʼɔ: fòfvè nə̂ kɛsə fe tèluʼ, m̀ngə̂s e kwi, ghɨ akwùsghè e tɛ, kwùʼve e zɨə ə̀ghɛ, ghɨ kwutəghe e zômə̀, e ndâʼà tom èchùŋ sê ghɨafɨfə. 23Chùŋ nyi sê wùə vɛ ə è tàʼa màʼà epomə̂ zɛ è kyi sê mi.”
24Ndùətom sə Njɔyn nə sɛ ə kɛsə̂ ndô, Njisə̀s ə zhə̀tə̀ sè wàmnə̀ sê nɔ̂yn ə ghɨ nə kɛ kûmə̀ Njɔyn, pfɨfə nə, “Ghàyn tè ndù ə achi ezoma se fe ghe fu ə? Ghàyn tè ndù se fe wùə, è nəʼə̀ kə fesɛtə̂ ezhoghɛ fofa tsɛ̂ mə? 25Ghàyn tè ndù nâʼà se fe ghe? Ə wùə kə è laf laf echûŋzè mə? Ghàyn ke nə ghɨ ghɛ ə ghe lafə endom nə vɛ fɨnə zhiə efɨa echûŋ ndamə kə ə tɔʼ. 26Ghàyn tsàyn sê mi nə ghàyn tè ndù nâʼà se fe ghè ə? Ə fɨ̀aʼtè èghaʼâ mə? E nyi ke nâʼà za. M piə sê ghàyn nə è tsɛ̀ ndò fɨ̀aʼtè èghaʼâ. 27Ə̀ nyi Njɔyn wùə vɛ ə tè nyàʼ ə Ŋwàʼlè ə̀ Fèzhə̀ kûmə̀ vəyn nə,
‘Fekə, m nə̀ tomə ndùətom vɨ̂m, ə è ndù əgho shi, ə è fɛte ndom vɛve sê ghò’
28M tsâ sê ghàyn nə, wùə pâʼà tyəm pə nyi fâ ə chi, tsɛ̂ Njɔyn Foə M̀mò, pîza naʼapi vɛ ə è tətə kwûŋsə̀ elùʼ efɔ̀yn ə Fezhə̀vè tsɛ̂ ndò vəyn.”
29Ghɨ ghe əkɨ̂m ə tə zɨ wàmnè ə Njisə̀szè paʼsə̂ è ghɨ ghɛ ə tè tənə tâks sè pomsə̂ Fèzhə̀ kûmə̀ nə ghənə tə fi mômè sê Njɔyn. 30Pîza, ghɨ Falàsîə è tyə̀ynsè sə alàŋsè ə kwiynsə̂ se kê ekwâʼtè zɛ ə Zhə̀fè tè kyi kûmə̀ ghənə kepî eghɨ kə ghənə tè kwiynse se fi mmo sê Njɔyn.
31Njisə̀s ə fɨnə pîə nə, “M nyi kàʼa ə m səyne ghɨ mbiə nda nâʼà è ghè, ghənə nyi nâʼà kə ghe? 32Ghənə nyi ke kə mmɨ̂ətə̀ ə mtsɨs ezhɔyn, yî ghe tɔŋɔ piə sê yiə nə, ‘ghàs ə zhəm njàŋ sefɔməse nə ghàyn pɨyn, ghàyn pâʼà pɨyn, ə zhəmə sènjàŋ sekwuse nə ghàyn chi, ghàyn pâʼà chi.’ 33Njɔyn Fo M̀mò ə tə pə̀yn zhiə va fɨake, mɨə va lɨ̀m, ghà piə nə, ‘È nyîə kyi èpamə̂ ə satàynzè.’ 34Va Wùə vɛ è pə̀yn zhiə, fɨnə mɨə, ghàyn ghɛ ə pì nə, ‘È zhiə tsɛ̂sə̀ndò fɨyn nyi è soyn yî ghə̀ ghɨ ghɛ ə ghe tənə tâks è ghɨ piə mɔ̀ʼɔ!’ 35Pîza, Zhə̀fè tyə̀nə̀ nə tɔf eghaʼâ ə vəynze nyi ke nâʼà səmɔʼ tɔynə̂ əghɛ ghɛ ə ghɨ vəynghe nâʼà əkɨ̂m nə̀ ə̂ ghənə endam.”
Njisə̀s ə zhi ə̂ Wùə Falàsî ə Ndɛ
36Wùə Falàsî viu ə ndàmnə̀ Njisə̀s nə è pə̀yn ə və ndɛ, ə yî vəyn zhi. È və ndùə ə tso tsɨsə elùʼ e zhiu. 37Wùzhɔyn əghɛ piə viu mə è tè ndamə fumə ə tə̀ʼ ə zɨə nə Njisə̀s zhiə ə wùə Falàsî nə vɛ ə ndɛ, ə njiə fèshə̀ʼə̀lê fîfe, mə fɛte è chi zhîze, e tɔŋtə̂ nə àlàpastà, ngwɨl me lɨ̀mtə̂m me nyi ətəyn, ə ndùə è fəynfe fu. 38Kə è ndù zâ, ə tyəmə ə Njisə̀s ə ngwùŋ sè chîə, shîmè e tàyntə̀ ə Njisə̀s əghòl, è və ngɨmtə̂ zə̂sə̀ è nyuŋ sə vəyn sə atuse, pɔynə̂ ə̀ghol ə vəynghe fɨnə kɨmnə è ngwɨl mə èlɨ̀mtə̂ mɛ. 39Wùə Falàsî nə vɛ ə è ndàm Njisə̀s ə fe eghɛ nə zɨ̂yn sè piə kə sê ngɨŋ ə̂ vəyn nə, “Ə wùə vɨ̀nə fè nyi ke nâʼà fɨ̀aʼtè èghaʼâ, mə è və kê kyiə wùzhɔyn vɛ ə è kə̀mnə̀ vəyn nyi, nə è nyi nyî, nyi ke nâʼà wùə əghɛ piə.”
40Njisə̀s ə tɔŋtə̂ Shimùyn ə piə nə, “M kyi eghɛ sè pi sê ghò.”
È və pə̀ynsə̀ ə piə nə, “Tyə̀ynsè, piə pə, m zɨtə̂ ndò.”
41Njisə̀s ə piə nə, “Ghɨghe ə pɛ̀ tè kyi ekɛ ə wùə vɛ è tè samsə̂ kɛu sê ghɨ, wùə mɔ̀ʼɔ e kyi ekɛ, ve kɔʼɔ zaʼâ eghɨ e tâyn, vîvè e kyi ke m̀ghɨm tâyn. 42Nâʼà wùə èmɔ̀ʼ ə ghənə fètəyn è kyi va kɛe se kɛsə ndàʼ. Pɛ̀ èkɛ nə vɛ ə za ndùə èkɛ ətəyn sê ghənə əkɨ̂m. Ò nyiə ke nə ə̀ nyi vɨ̀yn əfètə̂ ə̀ghɨ nə ghɨ̂yn ə pɛ̀ ə è nə ngəsə̂ kɔ̂ŋɔ̀ pɛ̀ èkɛ nə vɛ tsɛ̂ vəmɔ̀ʼɔ ə?”
43Shimùyn ə pə̀ynsə̀ nə, “M kwàʼtə̀ nə ə̀ nyi vɛ ə zâ kɛe tsɨə sê vəyn.”
Njisə̀s ə piə sê vəyn nə, “Ò pi ke nâʼà səmɔʼ.” 44È və fɨnə pə̀ynsə̀ ewiyn ə naynə̂ wùzhɔyn ətəyn ə piə sê Shimùyn nə, “Ò fe wùzhɔyn vɨnə? M pə ə ghò ndɛ, ò vɛ ò tàʼa fo mmo nə m shù ghol ghɨmghe ətəyn, pîza è və shù ghol ghɨmə è shîəm ə zə̂sə̀ è nyuŋ sə vəyn sə atuse. 45Ò fè pâʼà paŋne mi ashìŋə̀ kɛ m pəyn, pîza se ezhoghɛ m fə pəyn, è və faŋ pɔynə̂ kə mi. 46Ò fè pâʼà kɨmne pi tu kɨmke è kàyn ə̀ m̀ngwɨl, pîza è kɨmne ə̀ghol ghɨmə è ngwɨ̂l mê lɨ̀mtə̂m. 47Kûmə̀ nyi m piə sê gho nə, kɔ̂ŋ èghaʼâ zɛ è tyən sê mi tyə̂nə̀ nə Zhə̀fè ə lɛ̀sè fo ghɛ piə vəynghe nâʼà əkɨ̂m, pîza wùə vɛ ə lɛ̀sè fo vəyn kè sechə pɔŋɔ tyə̂nə̀ kə èkɔ̂ŋ se chə.”
48Njisə̀s ə se pì sê wùzhɔyn nə vɨ̂yn nə, “Ə lɛ̀sè fo ghɛ pi ghɛghe.”
49Ghɨ mɔ̀ʼɔ ghɛ ə ghe tè nyi yî vəyn elùʼ ə zhiəe e sè kayntə̂ kə se ngɨŋ sə ghənə̂sè nə, “Ə̀ nyi nâʼà ndè nə vɨ̂yn ə è lɛ̀sə̀ fo pisə ghɨ̀ sə?”
50Njisə̀s ə se pi sê wùzhɔyn ətəyn nə, “Pomə zɛze ə sɔ̀ za gho. Kwɨlə ke è pɔ̂ynè.”
Currently Selected:
Lûk 7: bfm
Highlight
Share
Copy
Want to have your highlights saved across all your devices? Sign up or sign in
©2022 CABTAL
