Lûk 16

Etɔf ə wufɨaʼe

1Njisə̀s ə fɨnə tsà fèmɛngâyn fife sê chùmtè epàm sə vəynse nə, “Wùə èghaʼâ viu tè kyi wufɨ̀aʼa kə è ndə̀m nə è və tɔ̂ʼnə̀ è ghaʼ ə vəynze. Tuʼve ə zo, ghɨghe e sè piə sê vəyn nə è vɛ ə è pofsə̂ kə fɨa ə vəyn səndô. 2Wùə èghaʼâ nə vɛ ə tɔŋɔ vəyn ə pfɨfə nə, ‘M zɨ nə ghe nyi kûmə̀ ghò ə? Tyə̀yn sê mi nə, ə̀ nji ghe, ə̀ fɨ ghe ə? Shîŋə̀kè ə kwəyn kə ò fɨ efɨ̀aʼ.’ 3Wufɨ̀aʼa nə vɛ e sè kayntə̂ nə zhi nyiə nə̀ nə̂ nâʼà ghè kə pɛ̀ èfɨ̀aʼ ə̀ vəyn ə sè kyiŋə se fɨsə̂ zhi efɨ̀aʼ ə. Zhi kyi va tyaʼa sə̂ kwîə tɨmə tèluʼ sə ekɛ, ghomə ghaʼa sə̂ kwîə ndɔnə. 4Ə fɨnə kɛsə̂ piə kə sə vəyn ə ngɨŋ nə, ‘Mə kê ghɛ zɛ kə m nəyn kə ə taʼa chùm ə mi efɨ̀aʼ, ə wùə tə tàʼa chùm ə mi ə və ndɛ.’ 5È və kwàʼtə̀ za sè tɔŋɔ kə wùə èmɔ̀ʼ emɔ̀ʼ əfetəynə̀ ghɨ̀ ghɛ ə ghe kyi kɛ ə pɛ̀ efɨ̀aʼ ə̀ vəyn, ghe pə̂. Və shi ə pə̀, è və pfɨfə nə è kyi ghe se kɛsə̂ ndàʼ sê pɛ̀ èfɨ̀aʼ ə̀ və ə? 6È və piə nə, ‘M kyi ekwaŋ ə mngwɨlve ewə̀.’ È və piə sê vəyn nə è ko ŋwàʼlè zɛ ə è nyaʼte kɛ nə̂ vɛ ətəyn ə è zaŋse nyaʼtè nə è kyi se fo kə ekwaŋ, mghɨm m̀tâyn. 7Kùmtè ə wûəkè ə pə̀, è və pfɨfə sê vəyn nə è kyi se fo ghe ə? È və piə nə, ‘M kyi se fo seshəyn sə wîtsè, ewə̀.’ È və piə nə è ko ŋwàʼlè ə nyaʼte nə ə nyi ke seshəyn mghɨm m̀famə. 8Pɛ̀ èfɨ̀aʼ ə fe eghɛ zɛ ə wùfɨ̀aʼ è wamə nə vɛ nə̀yn ə tsìtə̀ endom etɔf vɛ ə è fè fɛte ghɛ vəynze ətəyn.” Njisə̀s ə wàmnə̀ za, ə ke pi nə, “Ghɨə mbiə nə̂ tɔfə ə tendom tɛ ə ghənə fɛtə̂ ghɛ ə ghənə ətəyn tsɛ̂ ə̀ghɔyn epanə.

9M sè pi sê ghàyn nə, ghàyn e nə̂ chùŋ è kɛ vɨ̀nə ə ve ndamə faŋa va se pə̀yn è ngəʼ nyi kə ve tə mi, ə ghàyn piə ə kwɨlə endaʼ e faŋae, ə fi ghàyn è gho ghə pɛ̀. 10Ə wùə fɛte kyiə ghɛ̂lə̀ me tətə̂m, ò fo əghɛ e ghaʼa, ə è fɛte kyi kepî za. È nyi mə è vâyn kàʼa è kyi ghɛ̂lə̀ me tətə̂m, ò fo naʼapi əghɛ e ghaʼa, è vâyn fɛtə̂ kyi. 11Ə ze se nyi mə ze ə ghaʼ ghàyn se kyi eghaʼ ə mbize, ə̂ tə fo ndè kàyntè eghaʼ sê ghàyn ə? 12Ə ze se nyi mə wùə ə ndò vâyn kàʼa è fo fɨa ə vəyn nə ghàyn fɛte ndəm, ə tə fo nâʼà ndè kaynke ə?

13Wùə vayn kàʼa è və nyi wùə efɨ̀aʼ sê ghɨghe əpɛ̀. Ə ze nyi za, ə è və pànə̀ èmɔ̀ʼ, kɔ̂ŋɔ̀ vəmɔ̀ʼɔ; ə̀ va za, ə è və ngɨmnə̂ èmɔ̀ʼ, chîynə̀ vəmɔ̀ʼɔ. Ò vayn kàʼa ə ò fɨaʼà sê Zhə̀fè fɨnə fɨaʼà kepî sê kɛu.”

Njisə̀s ə zɔ̀ se ghɨə Falàsîə

(Matyò 11.12-13; 5.31-32; Mâk 10.11-12)

14Ghɨ Falàsî yîghe ə zɨə za sè chaʼa Njisə̀s kûmə̀ nə ghənə tè kɔ̀ŋɔ̀ kɛu. 15Njisə̀s ə se pi sê ghənə nə, “Ə nyi ghàyn ghɛ ə kwiə tyə̂nə̀ sê ghɨ nə ghàyn nyi əghɨəe chûŋə̀, pîza Zhə̀fè e ke ətəm ghaynghe. Naʼapi ghè vɛ ə kwàʼtè ə ghɨ̀zè njiə nâʼà sə afɨa nyi ke àfɨa e zomke sê Zhə̀fè.

16Ə tè kwiə etîə Alàŋ ə Mosîskè fɨnə kwiə əfètə̂ ezaʼlê ə sèfɨ̀aʼtè seghaʼâsè se kɔʼɔ tàyn etuʼ ə Njɔyn Foə M̀mòze. Se zhə̀tə̀ kə etuʼ nə vɛ, e sè ndàʼà tom èchùŋ kûmə̀ èfɔ̂yn ə Fezhə̀e, naʼapi ndè e nô kə ndò se nji elùʼ efɔ̀yn nə vɨ̂yn. 17Pîza e tyə̂nə̀ va nə Lâŋ ə Mosîskè ə mi E pɔynə̂ kə wuləke è chia tsɛ, tsɛ̂ kə tyaʼ alàŋ kɛ ə ke tətə kwûŋsə̀ mi.

18Ə̀ za chùm pi ndè zhwiə vəyn ə ndùə sê və ndò, ə ə̀ nyi mə è və kɨm lâŋ ə malə̂kè, wùndômə̀ ə ndùə sê wùzhɔyn nə vɛ, ə ə̀ nyi mə è və kɨm lâŋ ə malə̂kè.”

Lazalùs yî wùə èghaʼâ

19È və wàmnə̀ za ə fɨnə tsâ fèmɛngâyn fife nə, “Wùə èghaʼâ viu tè nyi, maʼà kə sendzɨs sə tefɔ̀yntè, fɨnə zhisə̂ ewiyn ə vəyn kè tuʼmè m̀kɨ̂m. 20Ə̀ nyi za mə ə pə̀yn ndəm wùə kyiŋə viu ə vəyn echo apɨəyn, e tɔŋtə̂ nə Lazalùs, mə luʼte zafəte ə lwiyn ke wiyn ə vəynve ekɨ̂m. 21È ve tsə̂mə̀ kə nâʼà nə ndè fo pɨaʼle efɨa vɛ sê zhi ə piə ə zhiə ndò ə wùə ə ghaʼa nə vɛ ə ndɛ, ve tàyntə̀ ə chi ə. Kyiŋə̀ za, puse fɨnə pə̀ ndɛ èchiə vəynve. 22È və tə kwuə, tsìsè ə njìə vəyn ə ndùə ndə̀mə ə Aplàghâm ngwùŋ. Wùə èghaʼâ nə vɛ ə tə pɔŋɔ kwuə, ə pfɨ̀mə̀ vəyn. 23È və ndùə endaʼ ə ghɨchie sè fe ngəʼ è kayntə fu, ə tə ndwisè əshi ə vəynghe ə naynə̂ ndùə ə fe Aplàghâm sə aghaf è Lazalùs ə vəyn ə ngwùŋ. 24È və tɔŋɔ vəyn ə piə nə, ‘Aplàghâm, kose səyn sê mi ə pɛ̂ ə tomə Lazalùs ə è tuŋ ke nâʼà paŋ àgho ə̀ vəyn ə mmò ə è pə̀yn tsɨ̂lè ètɔŋ vɨmve ətəyn. M zɨə kə nâʼà etɨ̂m fà fètəyn èwùs.’ 25Aplàghâm ə piə sê vəyn nə, ‘Vayn, kə ò lɛse nə ò tə zhi chùŋ zɛ kə ò pa ndamə ə chi, Lazalùs e pɔŋɔ fe ngəʼ ə̀ vəyn. Ə̀ zô se nyi, è zhiə ewiyn ə vəyn fayn, ò pɨlə zɨə etɨ̂m. 26Naʼapi sə kàyn, fɔŋne kyia nyi, ghaʼə kə nyi ə ke chyâsə̀ ghâsènì, mə wùə ndò ə ghàs apàs fâyn kyiŋə se tyàŋ apàs kɛ ə ghàyn nyi ətəyn, è vâyn fe endom, wùə ndò naʼapi apàs kɛ pə̂ fayn, è vâyn kê se tyàŋ.’ 27Wùə vɛ ə piə sê Aplàghâm nə, ‘M chyatə̂ gho ə pɛ̂ nə e se nyi nyî nə, ò kɛse tom Lazalùs ə pɨ̀a vɨ̂mvè ə ndɛ̂, 28ə è ndù təfte ə̀ ghɔnyì ghɨmə kûmə̀ eghɛ zɨ̂yn, kə ghənə tə pɔŋɔ nji ə ngəʼ nə̂ zɨ̂yn. Ghənə pa nyi etwɔ, ə̀ tayn.’ 29Aplàghâm ə piə nə, ‘Za ghənə ə zɨtə̂ əghɛ ghɛ ə Mosîs yî fɨ̀aʼtè seghaʼâsè tè nyâʼ.’ 30È və piə sê Aplàghâm nə, ‘Ngâŋngaŋ ə Pɛ, ə wùə pɨl ndò endaʼ ə ghɨchi fâyn ə kɛsə̂ ndùə sê ghənə, ə ghənə kwiyne təm ə ghənə ghe piə.’ 31Aplàghâm ə se pi sê vəyn nə, ‹Ə ghənə tàʼa zɨtê əghɛ ghɛ Mosîs yî fɨ̀aʼtè seghaʼâsè tè nyàʼ, ghənə vâyn tə zɨtê eghɛ, naʼapi ezhoghɛ wùə kɛse ndù sê ghənə mə è zômə̀ e kwu.›”

Currently Selected:

Lûk 16: bfm

Highlight

Copy