Lûk 14

Njisə̀s ə tsuʼ wùə èzafə viu etuʼ endaʼ ə ghɨə Njûsə̀

1Ə̀ tè nyi etu endaʼ vîve, Njisə̀s ə ndùə ə ndɛ ə̀ wùə vîvè, ə nyi kepî àtu sê ghɨ Falàsîə se zhi, ghɨ ghɛ ə ghe tè nyi fumə ə ndə̀mə̀ èshi ə vəyn ewiyn nâʼà sə ŋaŋ. 2Wùə viu tè tsɨs ə və shi zafə è mòl. 3Njisə̀s ə se pfɨf sê tyə̀ynsè sə alàŋsè paʼsə̂ kə è ghɨə Falàsîə nə, “Saʼe pomə̂ ndò nə ə tsuʼ wùə etuʼ endaʼ mə, mə ze kwiynsə̂ ndò ə?”

4Pîza ghənə kɨ̂m ə tsɨsə kə mɔŋ. Njisə̀s ə kûmə̀ wùə ətəyn ə tsuʼə vəyn ə piə nə è ndò kwɨlə̂, 5ə kɛsə pfɨfə sê ghənə nə, “Ə̀ nyi nde ə ghàyn əfètəyn ə va vəyn kɨ̀sə ə nyi pi nyàm ə̀ vəyn pfɨə epə mmòze etuʼ endaʼ, ə è tàʼa fɨsə kə sə ashìŋə̀ ə?”

6Ghənə e kyi va nâʼà eghɛ se pi.

Engɨmne è tɔ̂ʼnèzè

7Njisə̀s ə piə è fe, ghɨ ghɛ ə ndâmnè nə ghe pə̀yn fumə elùʼ ezhiəe e sè pə̂ njiə kə m̀kyə̂ mə èngaŋtə̂m. È və təftə̂ ghənə ə ngàyn nə, 8“Ə̂ wùə ndàm ghò nə ò pə̀yn elùʼ ezhiə nə malə̂e, ò pə̀, kə ò tsɨsə elùʼ engaŋtəe kûmə̀ nə è kàʼa ə è və nyi mə è və ndàm wùə è kɔʼnə̂ tsɛ̂ ghò. 9Ə wùə vɛ ə è ndàm ghàyn əkɨ̂m pə̀yn pi sê ghò nə, ‘Ndwi fo luʼve sê wùə vɨ̀yn.’ Nyi, ə tu kɛke ə sè tɨ̂lə̀ se ndùə tsɨsə əfekyə̀ fe tətə̂fè. 10Pîza ə wùə ndàm ghò, ə ò ndùə, o pɨlə tsɨsə̂ kə elùʼ e tətə̂vè kə wùə vɛ ə è ndàm ghò pə̀yn pi sê gho nə, ‘Soyn vɨ̂mè, kɔʼte pə̀ tsɨsə elùʼ engaŋtəe fâyn.’ Nyi, ə ò kɔʼnə̂ ə̂ ghɨ ghɛ ghâyn ghə̀ ghənə nyi əshi. 11Nâʼàpî ndè vɛ ə è kɔʼsə ngɨŋ ə vəyn ekwùtwəyn, Zhə̀fè nə̀ tsosə̂ vəyn əchi, ə naʼapi ndè vɛ ə è njiə ngɨŋ ə vəyn əchi, ə Zhə̀fè nə kɔʼsê vəyn ekwùtwəyn.”

12Njisə̀s ə kɛsə̂ pîə sê wùə vɛ ə è fè ndàm vəyn nə, “Ə̂ ò kyi ghɛze se ndâmnè əghɨ naʼapi ashìŋə̀ àkè, kə o ndàm soyn sɛse pi əghɔ nɛ̂ghè pi ə̀ghɨ esas ə ndɛ ghɛghe è ghɨ ghaʼâ ghɛ ə ghâynghə̀ ghənə ndamə paʼsə̂, kûmə̀ nə ezhoghɛ ə ghənə pɔŋ kyi èghɛ ə ghənə̂zè, ghənə ə pɔŋɔ ndâmə̀ ghò, ə nyi mə ə kɛsê ndaʼ ghô. 13Ə ò kyi ghɛe ezhize, o pɨlə ndâmnə̀ əghɨ afɨfə è ghə̀ kèngɛchi è m̀ngə̂s è fòfvè. 14Ə ò nə̀yn za, ə pɔsêzè pə̀yn sê ghò kûmə̀ nə ghənə tə kɛsə̂ ndâʼà va gho. Ə Zhə̀fè tə ndàʼ ghò etuʼ vɛ ghɨ ghɛ ghe nyi chichi ə və shi kɛse zômə̀.”

Ngàyn kûmə̀ ezhi eghaʼâzè

(Matyò 22.1-10)

15Ə pə̀ kə wùə viu fumə əfètə̂ ànɔ̀yn nə kɛ zɨ ghɛ nə zɨ̂yn, è və pìə sê Njisə̀s nə, “Saŋnêzè tə nə̂ ə ze ə nyi sê ghɨ ghɛ ə ghe tè zhiə elùʼ efɔ̀yn ə Fezhə̀u!”

16Njisə̀s ə piə sê vəyn nə, “Wùə viu tè kyi ezhi eghaʼazè ə ndàmə̀ əghɨ, ghe tsɨ̀ə kə nyi. 17Shîŋə̀kè ə nə̀ kwənə, è və tomə wufɨ̀aʼa ə̀ vəyn ə piə nə è kwi tsàyn sê ghɨ ghɛ ə è tè ndàm nə ghənə pə̀yn kûmə̀ nə ə pɨaʼtê mɨ̂sè nâʼàpî ghè. 18Pîza ghənə ə ndùə zhə̀tə̀ kə fèmɔ̀ʼ femɔ̀ʼ se ndɔnə endom. Wùə ə̀shi ə piə nə, ‘Mə zhɔyn fûʼà, kyi se ndùə nayne. Ndùə chyate pɛ̂ nə kə è və nyɔʼsə̀ ètɔŋ sê mi.’ 19Wùə mɔ̀ʼɔ ə piə nə, ‘Mə zhɔyn mbɔ̀ŋ seghɨm, nə se ə fə̂ àfùʼ kɨma, sè ndùə se mɔ̀m ə fe. Ndùə chyate pɛ̂ nə kə è və nyɔʼsə̀ ètɔŋ sê mi.’ 20È və piə è ndùə sê wùə mɔ̀ʼɔ, è və piə nə, ‘M pə̀ va kûmə̀ nə ghâsè zhwi vɨ̂mvè kwùʼ malə̂ kêndò.’ 21Wufɨ̀aʼa nə vɨ̂yn ə kɛsə̂ kwɨlə tsà əghɛ nə ghɨ̂yn sê pɛ̀ èfɨ̀aʼ ə̀ vəyn. Tɔŋve ə zafə vəyn, è və piə sê va ətəyn nə, ‘Zàŋse fɨ ndù ə tendom tetɛte è te tətə̂tè ə tɔ̂ŋ ə kumtə̂ pə̂ ə̀ghɨ afɨf ghɛ ə ghe nyi fumə è ghe ngəplə è ghe fofə è m̀ngə̂s.’ 22Wufɨ̀aʼa ətəyn ə ndùə kɛsə pə̀ ə piə sê vəyn nə, ‘Pɛ̀ apɨəyn, mə nə̀yn naʼapi ghè vɛ ə ò pi, pîza ndɛ pâʼà nyìəm lwiyn.’ 23Nyi, pɛ̀ èfɨ̀aʼ ə fɨnə piə sê vəyn nə, ‘Fɨ ndù fâ endaʼ ə ndùə ə mndômnə̀ mə̂ afùʼə̀m è luʼ təmɔ̀ʼɔ tɛ ə ghɨ nyi kepî ətəyn ə nə̀ ə ghənə pə̀yn kə ndɛ zɨ̂m lwiyn. 24M piə sê ghàyn nə, nâʼà wùə nə̂ mɔ̂mə̀ va fɨa ə ezhiə kɨmke əfètə̂ ə̀ghɨ ghɛ ə m tè ndàm, ghe ə tə.’”

Eghɛ zɛ kə wùə nə̀yn ə è və nyi chùmtè èpàm ə̀ Njisə̀s

(Matyò 10.37-38)

25Ə̂ pə̀ kə̂ Njisə̀s ndò kwiə ndùə, nɔ̂yn ə ghɨ̀kè e chûmtə̀ ndùə vəyn. È və kɛsə̂ pə̀ynsə̀ èwiyn ə piə sê ghənə nə, 26“Wùə vâyn kàʼa ə è kwəyne sə̂ nyi chùmtè zɨ̂m, ə̀ tsɛ̂ kəva mə è kɔ̀ŋɔ̀ ndò mi tsɛ̂ kə è kɔ̀ŋɔ̀ pɨ̀aə vəyn è nyiə vəyn è zhwiə vəyn è ghɔə vəynghe è ghɔnyiə vəynghe, nâʼàpî è ngɨŋ ə vəyn. 27Ə̂ faŋ naʼapi ndè se pɨàʼà awâmnè ə vəynke se chùmtè ə mi, è vâyn kàʼa ə è və nyi chùmtè zɨ̂m. 28Ə̀ nyiə nyi nâʼà ndè ə ghàyn əfètəyn ə è kàʼa ə è və kyiŋə se pɛ ndɛ èghaʼâ ə e tàʼa tso tsɨsə se naynə fe nə è vɛ è kyi kɛe ve tsɨ̀ə kwənə kə è nə̂ mɨ̂sè pɛ ətəynze ətəyn ə? 29Ə̂ è tàʼa nə̀yn za, ə ndə̀mə̀ achi ə ndɛa, ə tàʼa pɛ mɨ̀sè, ə̂ sè tsɛ̂ naʼapi ndè endom fe za, chaʼa ndùə vəyn, 30piə nə, ‹Wùə vɨ̀nə tè zhə̀te epɛ, sè va se mɨ̀sè.› 31Ə̀ va za, ə̀ nyiə kàʼa ə nyi fɔ̀yn è kwə̀ ə è pɨaʼtə se səʼ ə nò fɔ̀yn ə̀mɔ̀ʼɔ̂, kyi ke ə̀ghɨ ghɔ̀ŋə kam seghɨm, ə è tàʼa tso tsɨsə se naynêə fe nə ghɨ nə ghɨnə ghɛ ghe tɛ kwənə se nò əghɨə fɔ̀yn ə̀mɔ̀ʼɔ̂ vɛ ə è kyi kamse m̀ghɨm m̀ pɛ ə? 32Ə è fe nə è vâyn kàʼa è mɔ̀m, ə è tom ndùətom sə vəynse nə ghənə ndu fe fɔ̀yn ə̀mɔ̀ʼɔ̂ vɛ, nâʼà sə aghaf, ə chyate vəyn nə è kɔ̀ŋɔ̀ se fo naʼapi ghè kə yî vəyn pɨaʼte ghɛ ətəyn. 33E za nyi kepî eghɨ kə naʼapi ndè ə ghàyn əfètəyn tàʼa za naʼapi ghè vɛ ə è kyi, è vâyn kàʼa ə è və nyi chùmtè zɨ̂m.”

Chùmtè èpam sə Njisə̀s sɛ se pa kyi èwəynse

(Matyò 5.13; Mâk 9.50)

34“Ghàyn ke ndô nə ngwaŋfe nyiə tsɔ̂fə̀, pîza mə ə fe fɨnə tɔfə va, ə fɨyn ghayn ghè è fəynfe nə fe ə fɨnə tɔfə ə? 35Ə fe ə tsɔ̂fə̀ va kə ə nə̀yn nâʼà eghɛ zhize ətəyn ə̀ tsɛ̂ kəva nə ə sɨs mâʼà. Ə̀ tɔfə pi ndè, è və tɔ̀ʼɔ̀ zɨtə̂.”

Currently Selected:

Lûk 14: bfm

Highlight

Copy