Njɔyn 19

Ə pì nə ə kyi se paynte ə Njisə̀s ə awâmnè

1Paylɛ̀t ə ke njiə Njisə̀s ə fo nə ə pus. 2Sokə̀ʼse ə pɛ àfɔ ke nyi kə afɔ ə tefɔ̀ynkè ə tə̂ m̀sòlèndzɔŋ ə sò ə Vəyn atu, ə màʼà sàŋ èpàŋa ə Vəyn ewìyn è fusə̂ sàŋ ə̀ tèfɔ̀yn, 3môtə̀ kə nyî pə̀ tyəmə̂ ə̂ vəyn əshi, pîə nə, “Pɔmsêzè nyì se ghò ə fɔ̀yn ə̀ ghɨ̀ə Njûsə̀!” Ə pìə za, ə tɛ Vəyn è ghoke ekyàʼ.

4Paylɛ̀t ə fɨnə fɨə kwəynsə̂ pə̂ ə pìə sê ghɨ Njûsə̀ ghɛ nə, “M njiə fɨə pə̀ è Vəyn sê ghàyn kə ghàyn ə ke nə m pâʼà fe ghɛ zɛ ə è pofse.” 5Njisə̀s ə fɨə pə̂, mə è və sò fɔ msòlèndzɔŋke ə màʼà tàla èpàŋə. Paylɛ̀t ə pìə sê ghɨ ghɛ nə, “Wùə ə̀təyn vɨ̂yn!”

6Kə ghɨkɔʼsə nə eshyə̀ ə ngaŋtə è ghɨə fɨaʼa Ndɛ Ètsə̀mə fe Vəyn, ghənə ə puʼlə̂ ndûə kə m̀pɔ̂ŋ nə, “Paynte Vəyn ə awâmnè! Paynte Vəyn ə awâmnè!”

Paylɛ̀t ə pìə sê ghənə nə, “Ghàyn nji Vəyn ə ghàyn ndu payntê. M pâʼà fe ghɛ zɛ ə è pofse.”

7Ghɨ Njûsghè ə fɨnə pîə kwəynsə̂ kə nə, “Ghàs kyi esaʼ ze tyə̂nə̀ nə è kyi se kwu kûmə̀ nə è ndə̀mə̀ nə È nyi Va Fèzhə̀.”

8Kə Paylɛ̀t zɨə za, fâynzè ə pɨlə ko vəyn. 9È və kɛsə̂ njîə njiə è Njisə̀s ə tɔʼ ə pfɨfə sê Vəyn nə, “Ò ndò nâʼà ghayn?”

Njisə̀s ə tàʼa pì eghɛ. 10Paylɛ̀t ə pfɨfə sê Vəyn nə, “Ò pə̀ynsə̀ va mi ə? Ò ke va nə m kyi ndô tyaʼa se pì nə ə za ghò è kɨ̀sə se pì nə ə paynte ghò ə awâmnè ə?”

11Njisə̀s ə pə̀ynsə̀ nə, “Ò kyi va tyaʼ kyîke ə Mì ə tu ə̀ tsɛ̂ kə va mə ə̀ fo Fezhə̀ kəynke sê ghò. Wùə vɛ ə è fo tsɛsè Mi se ghò ə nə̀yn kàyntè ə̀ pi.”

12Paylɛ̀t ə zɨə zâ, sè kyiŋə èndom se za Njisə̀s, pîza ghɨ Njûsə̀ ghə fɨnə pɨa pîə kə nə, “Ə ò zà wùə vɨ̂yn, è və ndò, ə nyi mə ò vachi so ə̀ Kaysà. Ə̀ pìə pi ndè nə e nyi fɔ̀yn, ə̀ nyi nə è vachi yî Kaysà.”

13Kə Paylɛ̀t tè zɨ zɨnə mə, ə njiə fɨə pə̀ è Njisə̀s ə tsɨsə ə fèkyə̂ fə tesaʼfe. Luʼ vɛ ə è tè tsɨs ətəyn, ə tè tɔŋtə nə, Apɨəyn kɛ ə tè pom Èchiə. (Ə tè tɔŋtə ewàmnè ə Ipilòzè nə, Ngapatà) 14Ə̀ tè se kâynè nyi ə tɛ ə̀chwì etuʼ vɛ ə tè pɨaʼtə se zhiə mtuʼ me zaʼatsɛ̂mè ətəyn. Paylɛ̀t ə pìə se ghɨə ə təynghe nə, “Ə̀ nyi fɔ̀yn vâyn nyi!”

15Pîza ghənə ə pɨa pîə kə nə, “Zhwi Vəyn! Zhwi Vəyn! Paynte Vəyn awâmnè!”

Paylɛ̀t ə pfɨfə sê ghənə nə, “Ghàyn kyiŋə nə m paynte fɔ̀yn vâyn və awâmnè ə?”

Ghɨkɔʼsə nə eshyə̀ ə ngaŋtəghe ə pìə nə, “Ghàs kyi va fɔ̀yn vîvè, ə̀ tsɛ̂ kə va Kaysà.”

16Paylɛ̀t ə ke fo Njisə̀s nə ghənə ndu payntê.

Ə paynte Njisə̀s ə awâmnè

(Matyò 27.32-44; Mâk 15.21-32; Lûk 23.26-43)

Ghənə ə ke njiə ndò è Njisə̀s. 17È və pɨ̀aʼà awâmnè ə Vəynke sə və ngɨŋ fumə endaʼ ə njiə ndûə è kəynke elùʼ vɛ ə tè tɔŋtə nə, “Ewɔf-Atuve” tɔŋtə̂ eluʼ ətəynve ewàmnè ə Ipilòzè nə, (Ngolngotà.) 18Fumə, ghənə ə payntə̂ Vəyn, ə payntə̂ kəpi ə̀ghɨ əmɔ̀ʼɔ ghəpɛ̀, və mɔʼɔ ekɔyn ekôvè è və mɔ̀ʼɔ ekɔyn twɔve. Njisə̀s e nyi əfètəyn fètəyn. 19Paylɛ̀t ə nyàʼà apàŋ afɨake nə,

“Njisə̀s və Nazalɛ̀t, ə fɔ̀yn ə̀ ghɨ̀ə Njûsə̀”

ə payntə̂ àpâŋ afɨa ətəynke ə Vəyn etuə awâmnè. 20Ghɨə Njûsə̀ se tsɨ̀ ə tɔŋɔ̂ èghɛ nə zɨ̂yn kûmə̀ nə luʼ vɛ ə tè paynte Njisə̀s ətəyn tè va ndu sə aghaf sê Njèlusalɛ̀m. Fɨa nə kɛ tè nyi mə ə nyaʼ ewàmnə Ipilòzè, ə nyàʼà kəpî ewàmnè ə Latɨ̀ynzè, è wâmnè ə Nglêkzè. 21Ghɨkɔʼsə nə eshyə̀ ə ngaŋtəghe ə pìə sê Paylɛ̀t nə, “Kə ò nyaʼ nə è nyi, ‹Fɔ̀yn ə̀ ghɨ Njûsə̀.› Pɨl nyàʼ nə, Wùə vɨ̂nə tè pi nə, ‹M nyi Fɔ̀yn ə̀ghɨ Njûsə̀.›”

22Paylɛ̀t ə pə̀ynsə̀ nə, “Ghɛ zɛ m nyaʼ, mə nyàʼ.

23Ə pə̀ kə sokə̀ʼse paynte mɨ̂sè Njisə̀s, ə njìə sè ndzɨs sə Vəynse ə chyàtə̀ pɨ̂asvè kwàʼ, nâʼàpî sokə̀ʼ èkè e kyi àpâs àmɔ̀ʼ. Ə njìə kəpi sèndzɨs sɛ ə È tè màʼ əfètəyn. Ndzɨs sə təynse tè nyi ndɔ̀ʼɔ tas elùʼ vîve. Se zhə̀tè atu se tso tàyn esas, zhûŋəke tè va ətəyn. 24Sokə̀ʼse ətəynse e pìə sê ngɨŋ sə ghənə̂sè nə, Ə ghâsènì tàʼa pàytè ə səynse, ə ghâsènì tɨm pèʼ ətəyn ə fe nə̂ ə nə̀ kyîə ndè ə. Ghɛ nə zɨ̂nə̀ tè kyâyn nyî kə ghɛ zɛ ə tè nyàʼ ə Ŋwàʼlè ə̀ Fèzhə̀ kwəyn nə:

Ghənə tè chyàte sendzɨs sɨmse sê ngɨŋ sə ghənə̂sè

ə tɨmə pèʼ, se chyàtè ə sàŋ Zɨ̂mzè.”

Sokə̀ʼ nə sɛ tè nə̀yn ke eghɛ nə zɨ̂nə̀.

25Ghɨ ghɛ ə tè tyəm paʼsê ə Njisə̀s awâmnè tè nyi nyìə Vəyn, è ànyìə nyiə Vəyn ve zhɔyn, è Mèli ə zhwiə Klopàs è Mèli Màkndàlɛ̂n. 26Njisə̀s ə fe nyìə Vəyn è chùmtè èpàm ə̀ Vəyn vɛ ə è tè kɔ̂ŋɔ̀ è tyəm fumə, È və pìə se nyì nə, “Nyì Vɨ̂mè, ə̀ vɨ̀nə nyi vayn vɛ̂vè.” 27Ə fɨnə pîə sê chùmtè èpàm ə̀ Vəyn zɛ nə, “Ə̀ vɨ̀nə nyi nɛ̂.” Se zhə̀tə̀ fumə ashìŋə̀, chùmtè èpàm ə Njisə̀s nə zɛ ə njiə nyìə Njisə̀s, yî vəyn e ndamə ə vəyn apɨəyn.

Njisə̀s ə kwu

(Matyò 27.45-56; Mâk 15.33-41; Lûk 23.44-49)

28Epàm ətəyn, Njisə̀s ə fe nə ghɛ ghəkɨ̂m ə mì kə ə tè nyaʼ. Kèpî se lwiynse eghɛ zɛ ə tè nyàʼ ə Ŋwàʼlè ə̀ Fèzhə̀. È və ke pì nə, “Chɨ̀ŋə̀ m̀mò nyîə zafə Mi.”

29Sà m̀lɨ̀ tè tyəm fu, è lɨ̀mè ngwaŋə̂m mə təyn. Ə tsɨ̀ə kwùynchaʼ ətəyn, ə fa ə ngɔyn ə fèkàʼ fə isòpfè ə kɔʼsə̂ ndə̂mə̀ ə Vəyn echo. 30Njisə̀s ə mɨə mlɨ̂ me ngwaŋə̂m mə̂təynm ə pìə nə, “Zə mì.

Kè sə ashìŋə̀, e və ngɨmsə̂ àtu ə Vəynke ə kwuə.”

Ə tsuʼ puʼ tipì ə Njisə̀szè

31Ghɨə ghaʼa ə Njûsghè ə pìə sê Paylɛ̀t nə è zàmaʼà ə ghənə kəmte fɨəyntə ghɨ̀ ghɛ ə tè paynte awâmnè, ə nji tsosê tèpfɨyn tə ghənə̂tè awâmnè. Ghənə tè pi zɨnə mə kûmə̀ nə ə̀ tè nyi etuʼ sê pɨaʼtê se tuʼ endaʼve, ghənə e kɔ̂ŋɔ̀ va nə pfɨyn tə ghənə̂tè faŋ ewâmnè etuʼ endaʼ, kûmə̀ nə tuʼ endaʼ vɛ ə ve tè kɔʼɔ pə̂ tè nyîə kyi m̀kɔʼnè sə nɨŋ. 32Sokə̀ʼse ə pə̀ kəmtə̂ tèfɨəyntə wûə shi tɛ ə tè paynte yî Njisə̀s, ə fɨnə ndùə kyəmtə̂ tə wùə mɔ̀ʼɔte. 33Pîza ə pə̀ se Njisə̀s, ə fe mə è və kàynè kwu, ə tàʼa kəmtə tefɨəyntə Vəynte. 34Sokə̀ʼ vîvè èmɔ̀ʼ ə pɨlə njîə èghɔŋ ə tsuʼə pùʼə̀ etipìə Njisə̀szè, kè sə ashìŋə̀, ndə̂m è môm ə pɨ̀a fɨə. 35Ə̀ ghɛ nə zɨnə tsayn wùə vɛ ə è tè fe kə ze kyaynə̀. È ke ndô nə zhi wâmnə̀ kə səmɔʼ, tsâ èghɛ nə zɨ̂nə̀ kə ò zɨ ə ò pɔŋ pomə̂. 36Ghɛ nə ghɨnə tè kyàyn se lwiynsê eghɛ zɛ ə tè nyàʼ ə Ŋwàʼlè ə̀ Fèzhə̀ nə, “Ə tə kəmə va ghəf ə Vəynke nâʼà àmɔ̀ʼ.” 37Ghɛ mɔ̀ʼɔ zɛ ə tè nyàʼ ə ŋwàʼlè ə Fèzhə̀ nə, “Ghɨ tə nə̂ naynə̂ Vəyn vɛ ə tsuʼ.”

Ə pfɨ̂mə̀ Njisə̀s

(Matyò 27.57-61; Mâk 15.42-47; Lûk 23.50-56)

38Ə pə̀ kə zɨnə tsɛ̂, Njosɛ̀f vɛ è ndò ə tɔ̂ŋ ə̀ Àlimàtiyà ə pìə sê Paylɛ̀t nə è fo zhi è tyaʼa kə zhi nji pfɨnə Njisə̀sè ə zhi pfɨ̂mə. Njosɛ̀f tè nyì kepî chùmtè epàm ə̀ Njisə̀s, pîza mə è nyaʼtə̂ chumtə̀ kə ndò kûmə̀ nə è tè fànə əghɨ ə Njûsə̀. Paylɛ̀t ə pomə̂, è və ke nduə njiə ndò è pfɨyn ətəynze. 39È tè nyì yî Nìkòndemùs vɛ ə è tè ndù môtè Njisə̀s etuʼve zâ. Ghənə ə njìə nduə è ngwɨl me lɨ̀mtə̂m se fɛte ewiyn ə Njisə̀svè ətəyn. Ə tè fɛte mngwɨl mə təynmè è mɨa è kɨsè alòs. Ngwɨl mə təynm̀ tè nyì se zaʼâ ngɔ̀ʼsè mghɨm ta njòse tâyn. 40Ndômnè ətəynghe əpɛ̀ ə kɨmnə̂ èpfɨyn ə Njisə̀svè è ngwɨl nə mɛ ə koytə̂ Vəynve ə tə̂ àkɨ̀m kè kə lâŋ əghɨ̀ Njûskè tyə̀. 41Ə tè paynte Njisə̀s elùʼ, fûʼkè e nyi paʼsê fu. Shyə̂ eghaʼâ efeze tè nyì fu afùʼ, ndɔ̀ʼɔ ə tyəm pfɨ̂mə̀ wùə ətəyn. 42Kə tè se nyi etuʼ vɛ ə ghɨ Njûsə̀ tè pɨaʼtə sê tuʼ endaʼve, shyə̂ eghaʼâ zɛ e nyi paʼsê kepî fu, ghənə ə ndə̀mə̀ èpfɨyn ə Njisə̀svè ətəyn.

Currently Selected:

Njɔyn 19: bfm

Highlight

Copy