Ətefɨ̂aʼ 13

Zuʼse Ŋwaʼase ə chɔʼ Pànapàs yî Sɔ̂l, ə vɛ tom ghənə

1Ə ndɛ ə̀ Fezhə̀ ə Antyòk, fɨ̀aʼtè shîse tè nyîə nyi è tyəynsèsè. Ghɨ nə ghɛ mə tè nyi Pànapàs, Simyòn (vɛ ə tè tɔŋtə nə, fɨ̂mzè) è Lusiyùs (mə è fɨ pə̀yn ə Silên), è Maniyèn (vɛ ə è tè ndəmə luʼve mɔ̀ʼ yî tu apàs endaʼke Ɛlɔ̀t), è Sɔ̂l. 2Shɨŋ zɛ ghənə kɔʼsə Zhə̀fè fɨnə pamə ècho, Zuʼ se Ŋwaʼase ə pə̀ piə sê ghənə nə, “Ghàyn chɔʼ Pànapàs yî Sɔ̂l ə ndəm, ə ghənə ə nə̂ èfɨ̂aʼ zɛ ə m kyiŋə nə ghənə ə nə̂.”

3Ə pə̀ kə fɨ̀aʼtè sɛ è tyə̀ynsèsè mɨ̀sè tsə̂mzè è pam echo, ghənə ə ndə̀mə̀ ə̀gho ə Pànapàs yî Sɔ̂l ətu, ə tomə fɨsə̂ ghənə nə ndu ə nə̂ èfɨ̂aʼ ətəyn.

Pànapàs yî Pɔ̂l ə kwəynê yî ghə̀ wùə epfɨyntə Elimàs

4Zuʼ se Ŋwaʼase ə tiynsə̂ Pànapàs yî Sɔ̂l za, ghənə ə tso endaʼ ə Sèlusyà ə njiə ə ngwùʼ ə ndùə apàs endaʼ ə Sàypulòsè, ze nyi əfètə̂ tsò mə è zə kyɨ̀ŋ ka. 5Ə pə̀ kə ghənə ndû fɨ endaʼ ə Sàlamìszè ə ndàʼà tom ə̀ Fèzhə̀ ə sendɛ sə atsɨ̀ynte sə ghɨ Njûsghè. Ghənə ə njìə paʼsə̂ Njɔ̀yn Mâk kə è və tsâmtə̀ ghənə.

6Ghənə ə tsà tom èchùŋ ə tɔynə endaʼ nə zɛ ə ndùə tânə̀ endaʼ ə Pafòszè. Kə ghənə tè ndù tayn fu, ə kwəynə̂ è wùə è fɨyntə vîvè mə ə tɔŋtə̂ nə Pal Njisə̀s. È tè nyi wùə Njû tɔŋtə̂ ngɨŋə̂ vəyn nə zhi nyi fɨ̀aʼtè ə̀ Fèzhə̀. 7È tè nyi so ə̀ Senjus Polùs, ə wùə vɛ ə è tè saʼa pâs endaʼ nə kɛ ə ke tè nyi mə tsò ə kyìŋ ka. È tè nyi wùə tɔfə nâʼà àchûŋ. Senjus Polùs ə tɔŋɔ Pànapàs yî Sɔ̂l ə və shi kûmə̀ nə è tè nyîə kɔ̂ŋɔ̀ se zɨ eghɛ ə Fezhə̀zè. 8Pîza wùə èfɨyntə nə vɨnə̀ ə zə vəyn tè nyi Elimàs ewàmnè ə Nglêkzè ə tàʼa fo azhəm sê Pànapàs yî Sɔ̂l. È tè kyiŋə nə kə tu apàs endaʼ nə kɨ̂yn pomə tom èchùŋ. 9Zuʼ se Ŋwaʼase ə chisə Sɔ̂l vɛ ə zə vəynze tè nyi kepî Pɔ̂l, è və lotə̂ tɨmə naynə̂ ndûə wùfɨyntə ə̀təyn ə və shi, 10ə piə sê vəyn nə, “Ə ghô vâ ndə̂plè vɨ̀yn! Ò nyi pàyn sê nâʼà pi èghɛ èkè zɛ ə ze nyi achûŋ. Ò nyi mə o lwiyn è kyì tə tepi tekɨ̂m. Mɔ̂msə̀ kə shîŋə̀ tekɨ̂m se kɨ̀mnè ə səmɔʼ ə̀ Pɛ̂ nə ə nyi àkaŋ. 11Pɛ̂pɛ Zhə̀fè nə̀ fo ètsôs sê ghò zôyn. Ò nə̀ fòfə ə o vayn kàʼa ò fɨyn fe tèluʼ sə fendiŋə̀ fə ashìŋə̀fè.”

Kè sə ashìŋə̀, mbàʼsè ə kɨytə̂ ə̀shi ə vəynghe, ghe ə fɨ̀mə̀, è ve kwîə mɔ̂mtə̀ tèluʼ, kyiŋə wùə kə è və shîyntə̀ vəyn agho. 12Ə pə̀ kə tu apàs endaʼ kɛ fe ghɛ zɛ ə ze kyâyn, ə pomə sê Njisə̀s. È tè nyi èkaynze nâʼà sə ŋaŋ əte èzaʼlê zɛ Pànapàs yî Pɔ̂l tè zaʼlə kûmə̀ Pɛ̂pɛ Njisə̀s.

Pɔ̂l yî Pànapàs ə ndàʼa tom èchùŋ ə Antyòk

13Pɔ̂l yî soyn sə vəyn sɛ ə yî ghə̀ ghənə tè kwìə, ə njiə ə ngwùʼ ə Pafòs ə ndùə tânə̀ ə endaʼ ə Pengàzè, apàs endaʼ ə Pàmfilyàkè. Njɔ̀yn Mâk ə za ghənə fu ə kɛse ndûə ə Njèlusalɛ̀m. 14Ghənə ə ndò ə Pengà ə kɔʼɔ ndûə ə endaʼ Antyòk zɛ ə è tè nyi endaʼ èghaʼâ ə Pìsindyà. Tuʼ endaʼ ə ghɨ Njûsvè ə pə̀, ghənə ndùə njiə ə ndɛ̂ atsɨ̀ynte ə tso tsɨsə ə chi. 15Ghənə ə zɨ kə tɔŋɔ ghɛ andiŋ ə ŋwàʼlè Èsaʼ ə Mosîskè, è ŋwàʼlè sə sèfɨ̀aʼtè. Kə ghənə tɔŋɔ mɨsè, ghɨ ghɛ ə ghe chisə ghɛ ə ndɛ̂ atsɨ̀ynte ə tomə tom sê Pɔ̂l è Pànapàs pîə nə, “Ghɔnyîə, ə ghàyn kyi ghɛze se pì kə ze fo təm ətɛ sê ghɨ ghɨ̀yn, ghàyn ə piə.” 16Pɔ̂l ə ndwìə ə nə̀ʼsə̀ àgho se nə̀yn nə ghənə kɨmə̂ mɔŋ ə zhə̀tə̀ se wàmnè.

È və pìə nə, “Ghɔnyì ghɨm ghə Isìlâyghè, è ghɨə mɔ̀ʼɔ ghɛ ə ghe nyi fâyn, ə ghàyn ghɛ ə ghàyn ngɨmnə Zhə̀fè, ghàyn zɨte ghɛ zɛ ə m kyiŋə se pì. 17Zhə̀fè ghɨ̀ə Isìlâyfè, ə tə chɔʼ pɨ̀a ə ghâsènì ghəshiə, ə nə̀ ghənə e tsɨ̂ə kə nyi etuʼ vɛ ə ghənə tè ndamə kə kə ghɨ ghɛ ə̀ tè vachi ə̀ghɨ ə Njûsghè endaʼ ə Enjìpzè. Zhə̀fè ə fɨsə̂ ghənə e endaʼ ə Enjìpzè è tyaʼa kwəmnə kɛ ə fe kyi. 18Fe ə faŋa kolə kə ndò təmə yîghə̀ ghənə sə sepìŋ m̀ghɨm m̀kyàʼ endaʼ ashəshəze. 19Zhə̀fè ə tə pofsê ndaʼ tesɛ̀mbɛ̂ ə mchi mə Kanànə̀m ə njìə m̀chi mə təynmè ə fo sê ghɨ vəynghe. 20Nâʼà ə̀ghɛ nə ghɨyn ə̀kɨ̂m tè kyànə əfètəyn sèpìŋ zaʼâ wəte kyàʼ è m̀ghɨm m̀tâyn.

Epàm ətəyn Zhə̀fè ə fo əghɨ kə ghe ə saʼa ghənə se zaʼâ shɨŋ ə̀ fɨ̀aʼtè Samwèl. 21Ghɨ Njûs nə ghɨyn ə tə pì nə ə fo fɔ̀yn sê ghənə, Zhə̀fè ə fo Sɔ̂l se ghənə, ə vâ Kis. È tè fɨ etàŋ ə Penjamə̀ynzè. È tè nyi fɔ̀yn ə ghənə̂ sə se pìŋ m̀ghɨm m̀kyàʼ. 22Zhə̀fè ə tsosə Sɔ̂l, ə ndə̀mə̀ Ndàfît kə fɔ̀yn ə ghənə̂. Zhə̀fè ə pìə ə̀ghɛ ghɨnə̀ kûmə̀ Ndàfît nə, ‘Mə fe Ndàfît, ə va Njesì, ə nyi wùə vɛ ə m kɔ̂ŋɔ̀. È nə̂ nə̂ nâʼà ə̀ghɛ ə̀kɨ̂m ghɛ ə m kyiŋə nə è nəyn.’ 23Njisə̀s vɛ ə è tè fɨ etɔ̀ŋ ə ndɛ Ndàfîtzè, ə nyi Vəyn vɛ ə Zhə̀fè tè ndəm nə è və nyi Sɔ̀zà se ghɨə Isìlâyghè, kè kə è tè tsɨ̀ne nə Zhi tə nə̂. 24Ə̀ tè nyi tsɔ̀fə kə Njisə̀s zhə̀te fɨ̂aʼ ə Vəynze, Njɔyn Fo M̀mò e nyi mə è və zaʼle ghɨə Isìlâyghè ə̀kɨ̂m nə ghənə kwiyne ə ghənə ə ghənə ə sepi ə fi môm. 25Ə̀ tè nyi kə Njɔyn mɨ̂sə̀ ndùə fɨ̂aʼ ə vəynze, è və pfɨfə sê ghɨ nə, ‹Ghàyn kwàʼtə̀ nə m nyi nde? M va wùə vɛ ə ghàyn lɨmtə. Ghàyn nayne kə, È pə̂ ə mi epàm, m kwəynə̂ va se zhə̀yntə sèkwɨ̀l sə sepfɨ sə ghòl sə Vəynse.›”

26Pɔ̂l ə pìə kwəynsə̂ nə, “Ghɔnyì ghɨm ghetɔ̀ŋ ə ndɛ Aplàghâmghè, è ghayn ghɨ ghɛ ə̀ vachi ə̀ghɨ ə Njûs ghɛ ə ghe nyi fâyn, ngɨmnə̂ kəpî Fèzhə̀, tom èchùŋ zɨ̀nə è pə̀ è sɔzaze sê ghɨ nyi mə ə tom sê ghâsènì. 27Ghɨ ghɛ ə ghe ndamə ə Njèlusalɛ̀m è ghɨə ghənə̂ ghe chisəghe tè keva nə Njisə̀s nyi Sɔ̀zà, fɨnə zɨə kêva ghɛ ghɛ ə fɨ̀aʼtè se ghaʼâsè tè nyàʼ ndəm, e tɔŋɔ kə ə ghənə mtuʼ me ndaʼm̀ m̀kɨ̂m. Nâʼàpî ghənə tè nə̀yn nə ghɛ ghɛ ə fɨ̀aʼtèsè tè tsàyn ndəm nə ze tə kyâynə̀ kè kə ghənə tè pi nə ə tə zhwiə Njisə̀s. 28Naʼapi kə ghɨ nə ghɨyn tè tyə̀nə̀ va ghɛ zɛ ə Njisə̀s pofse se kwu, ghənə tə chyate Paylɛ̀t nə è nəyn kə ə zhwi Njisə̀s. 29Ə pə̀ kə ghənə nə̀yn mɨ̂sè nâʼà ghɛ əkɨ̂m ghɛ ə tè nyàʼ ə Ŋwàʼlè ə̀ Fèzhə̀ kûmə̀ vəyn, chùmtè èpàm sə vəyn shîse ə tsosə̂ èpfɨyn ə vəyn ə awâmnè ə ndùə nyɨŋsə̀ əfètəyn èshyə̀ eghaʼâzè. 30Pîza Zhə̀fè ə nə̀ è və zòmə̀. Epàmə zɛ mə, 31È və tyə̀nə̀ ngɨŋə̂ vəyn shîŋə̀ tetsɨəte sê ghɨ ghɛ ə yî ghənə tè ndo ə Ngalìlî əmɔʼ ə kɔʼɔ pə̂ ə Njèlusalɛ̀m. Ghɨ nə ghɛ mə nyi ghɛ ə ghənə tsâ se ghɨə ghɛ zɛ ə ghənə tè fe. 32Ghàs e sè nyi zôyn se tsà tom èchùŋ sê ghàyn, ə nyi zɛ ə Zhə̀fè tè tsɨ̀ne ndəm sê pɨ̀a əghɨ Njûs ghəshiə. Fe ə lwiynse tsɨ̀nè ətəyn sê ghâsènì. 33Tsɨ̂nè nə zɨ̂nə ə kɔʼ kwəyn sê ghàs ghɔ etɔ̀ŋ ə ndɛ ghənə̂ghè, endom nə Zhə̀fè ə tə nə̀yn Njisə̀s ə zòmə̀. E nyi ke èghɨ kə nyi mə nyàʼ əfètəyn àkùmte ə ŋwàʼlè ə̀ sè Njàŋkè nə:

‘Mə njì ghò sə mìə Vayn,

se zhə̀tə̀ ndàyn, m nə nyi Pɨ̀a vɛ̂vè.’

34Zhə̀fè ə tə zòmsè Vəyn kə È tàʼa kɛsə ndù eshyə̀ se fì.

Zhə̀fè ə wàmnə̀ kûmə̀ zɨnə mə nə, ‘Səmɔʼ, m tə fo èpɔse zɨm ze ŋwaʼaze sê ghàyn mə e vayn faŋ sə nyi zamə

kə m tè tsɨ̀ne sê Ndàfît.’

35Ə̀ nyì zamə kə è wàmnè kepî andiŋ əmɔ̀ʼɔke kə nyâʼ nə,

‘Ò nə̀ zâ va pfɨyn ə wufɨ̀aʼa vɛ və èchùŋ nə ve fì əfètəyn èshyə̀.’

36Ghâsènì ke ndô kə fɔ̀yn Ndàfît tè nyi etwɔ, è tè nyîə fɨaʼà se Zhə̀fè endom vɛ ə Zhə̀fè tè kyiŋə. Epàm ətəyn, è və kwuə, ə pfɨ̀mə̀ vəyn elùʼ vɛ ə tè pfɨ̀mə pɨ̀a ə vəyn ghəshiə, è və fìə. 37Pîza vɛ Zhə̀fè tè zòmse, è tè paʼà fì. 38Ghɔnyì ghɨmə, ghàyn e ke səmɔʼ nə, ə̀ nəyn Njisə̀s tsɔ̀fə kə ə ndaʼà tom èchùŋ se ghàyn nə Zhə̀fè nyiə lɛsə̀ fo sèpi sə ghɨ̀sè. 39E za tyə̀nə̀ nə ə̀ pomə pi ndè sê vəyn, ə è sɔza vəyn ə və ghɛ piə. Saʼ ə Mosîszè tè vayn kàʼa e sɔ̀zâ wùə. 40Ghàyn etɔ̂ʼnə̀ kə ghɛ epi zɛ ə fɨ̀aʼtèsè tè tsayn tə kyayn se ghàyn. Ghənə tè pi nə,

41Fekə ‹Ghàyn ghɨnə, ə ghàyn wàmnə̀ va achûŋ kûmə̀ Fèzhə̀!

Ghàyn tə pə̂ ə nyi èkaynze, ə ghàyn kwu,

kûmə̀ nə ghɛ zɛ m nə̀ nə̂ fa mtuʼ,

ə nyi eghɛ mə ghàyn tə pomə̂ va ə wùə tsàyn paynse pî se ghàyn.›”

42Ə̀ tè se nyi kə Pɔ̂l yî Pànapàs sè fɨə se ndò ə ndɛ̂ atsɨ̀ynte nə zɛ, ghɨghə tsà nə ghənə tə kɛse pəyn etuʼ endaʼ e pəve ə tsayn kwəynsê ə̀ghɛ kûmə̀ ə̀ghɛ ghɛ ə ghənə tsâyn za. 43Ə̀ tè nyi kə ghɨ chyâsə ə ndɛ̂ atsɨ̀ynte, ghɨə Njûsghè ə chùmtə̀ ndùə Pɔ̂l yî Pànapàs, tsɨ̀ə kə nyi. Ghənə tè nyi yî ghə̀ ghɨə mɔ̀ʼɔ ghɛ ə̀ tè vachi ə̀ghɨ ə Njûsghè kə ghe kɛse sè nyi kepî kə ghɨ Njûsə̀. Pɔ̂l yî Pànapàs ə wàmnə̀ se ghɨ ətəynghe, ə fo ə̀təm ə tɛ nə ghənə ndu ke èshike se kyi epɔysê zɨ̂nə̀ ə Zhə̀fè fo sê ghənə.

44Tuʼ endaʼve ə pə̀ kwənə, ghɨghe ə ndɛtə̂ kə nyi se fɨə kə ə̀kɨ̂m fumə tɔ̂ŋ se pə zɨte eghɛ ə Pɛ̂pɛze. 45Pîza ghɨ Njûs yîghe ə fe kə nɔ̂yn ətəynke tè tsɨ̀ə, ghə̀ʼkè ə kyîə ghənə nâʼà sə ŋaŋ. Nâʼàpî èghɛ èkɛ zɛ ə Pɔ̂l tè pìə, ghənə e piə kə nə ə̀ nyi akaŋ, pîə ə̀ghɛ epighe ə vəyn wìyn. 46Pîza Pɔ̂l yî Pànapàs ə pɨlə wàmnə̀ ndùə kə èshike fanə̀ va ghɛ zhîze. Ghənə tè piə nə, “Ghàyn ghɨ Njûsə̀, e tè tsɔ̀fə nə ghàs tsayn chi èghɛ ə Fezhə̀zè sê ghàyn sə shi. Pîza kə ghàyn kwiynse zəynze, ə tàʼa njiə sengɨŋ saynse kə əghɨ ghɛ ə ghe nyi kwəynê se kyi endam zɛ ə ze tə mîə va, e za nyi nə, ghàs nə̀ zâ ghàyn ə ghàs ndu sê ghɨ ghɛ ə̀ vachi ə̀ghɨ ə Njûsghè. 47Ghɛ zɛ ə Zhə̀fè tè tsayn nə Zhi tə nə̂,

‹Mə nə̀yn nə o nyi èpayn sê ghɨ ghɛ ə̀ vachi ə̀ghɨ ə Njûsghè,

kə nâʼà ə̀ghɨ ə̀kɨ̂m ə mbi fi sɔzaze kûmə̀ ghò.›”

48Kə ghɨ ghɛ ə̀ tè vachi ə̀ghɨ ə Njûsghè zɨ ghɛ ətəynze, saŋnə̂ nâʼà sə ŋaŋ, tsîtə̀ tom ə̀ Fèzhə̀. Ghɨ etsɨəghe ə pomə sê Pɛ̂pɛ Njisə̀s, ə̀ nyi ghɛ ə Zhə̀fè chitê nə ghənə kyi ndam zɛ ə ze tə mîə va.

49Tomə̀ Pɛ̂pɛ ə zhamə ndùə kə apàs endaʼ nə kɛ nâʼà àkɨ̂m. 50Pîza ghɨ Njûs nə ghɛ ə chiyntə̂ ə̀ghɨ ghaʼâghè fumə apàs endaʼke è zəyn e tɛ ghɛ ə ghe tè ngɨmnə Zhə̀fè nə ghənə fo ngəʼ sê Pɔ̂l yî Pànapàs. Ghɨ nə ghɨ̂yn ə chûmə̀ fɨsə ghənə fumə apàs endaʼke. 51Ə pə̀ kə ghənə nyi se ndò, ghənə ə puʼə tsɨ̂sə̀ àpɨ̂l ə ghənə əghòl se tyə̀yn nə yighə̀ ghənə ə mì ə ndò ndùə endaʼa Ìkonyùmzè. 52Chùmtè èpàm sə Njisə̀s shise ə Antyòk ə faŋa epàm sè saŋnə̂ nâʼà àchûŋ, mə ə lwiyn è Zuʼ se Ŋwaʼase.

Currently Selected:

Ətefɨ̂aʼ 13: bfm

Highlight

Copy