Ətefɨ̂aʼ 12
12
Ɛlɔ̀t ə fɨyn tsə̂fsè ghɨə poməghe
1Ə̀ tè nyì ə mtuʼ nə mɛ, Fɔ̀yn Ɛlɔ̀t ə zhə̀tə̀ se tsə̀fsè əghɨ ndɛ ə Fèzhə̀ əmɔ̀ʼɔ̂. 2È və nə̀ ə ko Njə̂m, ə̀ nyi ànyìə Njɔyn, ə zhwiə vəyn è nyife tyâfè. 3Ə pə̀ kə è fe nə ghɨ Njûsə̀ nyîə kɔ̂ŋɔ̀ èghɛ zɛ ə è nə̀yn, è ve nə̀ nə ə pɔŋ kyî Pità. Ghɛ nə zɨ̂nə̀ tè kyàyn sê Pità ə mtuʼ mɛ ə tè zhiə, Zhiəa Apaynke Fèsə̀ʼ e va ətəyn. 4Ə pə̀ kə ko Pità, ə fà vəyn ə ndɛ ə̀chaʼ. Ə fo tsɛsə̀ vəyn sê nɔ̂yn ə sokə̀ʼve kwàʼ nə və tsɨ̂ŋnə̀ vəyn. Nâʼàpî ànɔ̂yn àkɛ̀ tè kyi se sokə̀ʼ se kyàʼ. Ɛlɔ̀t tè pɨaʼtə nə ə zhi mɨ̂sè tuʼ mə Àzhiə Zaʼâ Tsɛ̂m ə zhi pi ə fɨse vəyn ə saʼ vəyn ə ghɨghe əshi. 5Ə ndə̀mə̀ Pità ə ndɛ̂ chaʼ, ghɨə poməghe ə faŋa epàm tsə̂mə̀ sê Zhə̀fè ètəmghe əkɨ̂m.
Tsiə Fèzhə̀ ə nə̀yn, Pità vɛ è fɨ ə ndɛ̂ chaʼ
6Ɛlɔ̀t tè kyiŋə se pə̀yn è Pità əghɨghə shi è pɨsə̀pɨsə̀. Etuʼve, kə tuʼe zo pə̂yn, Ɛlɔ̀t tè kyiŋə se njiə pə̀yn è Pità ə̀təyn əghɨghə shi, Pità tè nyɨ̀ŋ əfètə̂ sè sokə̀ʼ sepɛ̀. Mə ghənə fà vəyn è chaʼse kɔyn tepɛ̀, sokə̀ʼ səmɔ̀ʼɔse e tyəm echo mbàyn, tsɨ̂ŋnə̀. 7Tsì ə̀ Pɛ̂pɛ ə pfɨ̀ŋə̀ fɨə fuə ndɛ ə̀chaʼ, paynze ə panə fuə ndɛ ə̀chaʼ. Tsì ə̀təyn ə sə̀ʼsə̀ Pità ə mbɨ̀aʼà, ə ndwìsə̀ vəyn ə pìə se vəyn nə, “Zàŋse ndwi.” Kè sə ashìŋə̀, chaʼ sɛ ə se tè nyi ə Pità ekɔyn ə zhə̀nə̀ kə ndò. 8Tsi ə̀ Pɛ̂pɛ ə̀təyn ə fɨnə pîə sê Pità nə, “Fɛte màʼ ndzɨs sɛse ə tuŋə sepfɨ sə ghòl sɛse.” Pità ə nə̀ zamə. Tsì ə̀təyn ə tsà se vəyn nə, “Màʼ laf kɛke ə chùmtə̀ mi.” 9Pità ə chùmtə̀ vəyn, yî tsì ə̀təyn ə fɨə fu ə ndɛ̂ chaʼ. È tè fɨə za, ke va nə ghɛ zɛ ə tsì ə̀ Pɛ̂pɛ nə̂ nyi səmɔʼ. È tè kwàʼtə nə zhi fe ə̀ghɛ ə telaynəlayn. 10Ghənə ə tsɛ̀ eluʼ vɛ ə sokə̀ʼ sə shise tè tsɨs ətəyn, ə fɨnə tsɛ kùmtə̀ sə mɔ̀ʼɔse, ə pə̀ tânə̀ echo mbàyn àkas zɛ ə è tè njiə pə̂ endaʼ, cho mbàyn ətəynze ə chwìə kə sə ngɨŋ, ghənə ə tsɛ̀ fɨə. Ə pə̀ kə ghənə kwî ndû ghafke, Tsì ə̀ Pɛ̂pɛ zɛ ə pfɨ̂ŋə̀ ndô zâ Pità.
11Kè sə ashìŋə̀, tɔf ə Pitàzè ə kɛsə pə̂, è və pìə nə, “Mə ke zôyn nə ze lote nyi səmɔʼ nə Pɛ̂pɛ tom tsì ə̀ Vəyn nə è sɔza mi nə kə Ɛlɔ̀t nəyn ghɛze sê mi è nâʼà pi èghɛ èkè zɛ ə ghɨ ə Njûsə̀ fe kwàʼtə se nə̀yn sê mi.”
12Kə Pità tè ke ghɛ zɛ ə ze nyi mə zə kyàyn se vəyn, è və ndò ndûə ə Mèli ə ndɛ, ə̀ nyi nyìə Njɔyn Mâk. Ghɨə tsɨəghe tè nyi mə ə zùŋtè fumə tsə̂mə̀. 13Ə pə̀ kə Pità zaʼâ, ə ngɔʼtə̂ ècho mbàyn zɛ ə ze tè njiə ndûə fumə apɨəyn. Vayn è zhɔyn vîvè ə è tè fɨ̀aʼa fumə apɨəyn, zə vəynze e nyi Londà ə pə̀ se fe nə ə̀ nyi nde ə. 14Ə pə̀ kə è zɨ ke kyə̀ Pità, è və saŋnə̂ nâʼà sə ŋaŋ ə kɛsə nyɨŋə nduə ndɔ̀ʼɔ è chɔʼ pî echo mbàyn ə tsà sê ghɨ təynghe nə, “Pità tyəm echô mbàyn.” 15Ghənə piə se vəyn nə, “Ò va ə ghò etɔf!” Pîza è və tɛ faŋa kə èchoze nə zhi pîə səmɔʼ. Ghənə ə ke fɨnə pì nə, “Ə̀ nyi tsì ə̀ vəyn.”
16Pîza Pità ə faŋə ngɔʼtə̂ kə ndò cho mbàyn nə zɛ. Ghənə ə ke chwî echo ə mbàyn ətəynze. Ə pə̀ kə ghənə fe vəyn, zə kayntə̂ ghənə. 17È və kɨmsə̂ ghənə è ghoke ə fɛte tsâ sê ghənə kə Pɛ̂pɛ fè pə̀yn nji fɨ è vəyn ə ndɛ̂ chaʼ. È və tsà se ghənə nə, “Ghàyn tsayn ghɛ nə zɨ̂nə̀ sê Njə̂m è ghɨə mɔ̀ʼɔ ghɛ ə ghe pomə Njisə̀s ghɛ nə zɨ̂yn.” È və wàmnə̀ mɨ̂sə̀ zâ, ə ndò ndûə elùʼ ə ndôvè.
18Tuʼve ə zo, ghɛ ətəynze ə fo ngəʼ sê sokə̀ʼ sɛ ə se tè tsɨ̀ŋnə Pità nâʼà sə ŋaŋ. Kûmə̀ nə ghənə tè keva ghɛ zɛ ə ze kyâyn sê Pità. 19Ɛlɔ̀t ə tsɛ̀sə̀ àlâŋ nə ə kyiŋ vəyn, pîza ghənə ə kyiŋə ə tàʼa fe. Ɛlɔ̀t ə ke saʼa se sokə̀ʼ sɛ ə tsɛ̀sə̀ àlaŋ nə ə zhwi ghənə.
Epàm ətəyn, Ɛlɔ̀t ə ndò ə Njòndyâ ə tso ndamə ə Kàysalyà sə fe ndiŋə̀.
Fɔ̀yn Ɛlɔ̀t ə kwu
20Ɛlɔ̀t tè nyîə nyɔʼsə̀ ètɔŋ sê ghɨə endaʼ ə Tayà è Sindɔ̀n. Ə chɔʼtə̂ ə̀ghɨ ə tèndâʼà nə tɨ̂yn nə ghənə ndu fe Ɛlɔ̀t. Ghənə ə ndùə se fe Ɛlɔ̀t nə pɔ̂ynè ə nyi kûmə̀ nə fɨazhiə ə ghənəvè nâʼà èkɨ̂m tè fɨə kə endaʼ ə Ɛlɔ̀tzè. Wùə vɛ ə ghənə tè ndù fe sə shi se pɨaʼtê endam ə ghənə̂zè yîghə̀ Ɛlɔ̀t tè nyi Plastùs. Plastùs tè nyi atu se ghɨ əfɨaʼaghe ə fɔ̀yn Ɛlɔ̀t ə ndɛ. 21Tuʼ fɛ ə Ɛlɔ̀t tè pɨaʼte ə pə̀ kwəynə, Ɛlɔ̀t ə màʼà tàla ə̀ tèfɔ̀yn ə̀ vəyn ə tsɨsə ə fèkyə̂ fə tefɔ̀ynfè. Ə zhə̀tə̀ se wàmnè sê ghɨ. 22Kə è tè wàmne mɨsè, ghɨ nə ghɛ ə zhə̀tə̀ puʼə m̀pɔ̂ŋ pîə nə, “Ə̀ wàmnə̀ kə nâʼà Fèzhə̀ za è ngɨŋə̂ vəyn, ə̀ vachi wùə m̀sɔ̀ŋ.” 23Kè sə ashìŋə̀ tsì ə̀ Pɛ̂pɛ ə tɨmə ezaf ə Ɛlɔ̀t ewìyn kûmə̀ nə è tè fo va kɔʼsêzè sê Zhə̀fè. Ghɔ̂ŋghɔ̀ŋɔtə vəyn te ndwɔ̀tè ə kwɨlə vəyn ə və fètəyn è və kwuə.
24Pîza ghɛ Fezhə̀zè ə ndəmə̂ ə waŋə ndûə kə èshike.
25Pànapàs yî Sɔ̂l ə mɨ̀sə̀ èfɨ̂aʼ ə ghənə̂zè ə Njèlusalɛ̀m, ə kɛsə pə̀ ə Antyòk yî ghə̀ Njɔ̀yn Mâk.
Currently Selected:
Ətefɨ̂aʼ 12: bfm
Highlight
Share
Copy
Want to have your highlights saved across all your devices? Sign up or sign in
©2022 CABTAL
