Yohani 10

Umulumbe wachipimpo chang'onzi

1Awenche nkuwanena nkuti, umuntu wino asikwinjila much ipimpo chang'onzi pamulyango, ukuwa akwela pambali, atela amung'o swinya wekapoka. 2Umuntu wino akakwinjila pamulyango atela amuchemi wang'onzi. 3Wino akasunga impongolo akamwiyulila impongolo; ning'onzi azyivwa izwi lyakwe, pano akuzita amazina yawo, azikolelela kunzi. 4Akulanga ndi wafumya ing'onzi zyakwe kunzi, azikolelela, ing'onzi azimukonka pansinzi, amuno zyamanya izwi lyakwe. 5Zitanga zikonke umuntu winji; ukuwa zingamusamala, amuno zitamanya izwi lyakwe.

6Yesu awumila umulumbenye woo, ukuwa nanti kwiluka chino wawanenanga.

E Yesu amuchemi muzima

7Achaleka Yesu awanena swinya ati, Awenche nkuwanena nkuti, Nemulyango wang'onzi, 8Wonsi wane wizile pankolelo pakwe nene walinji awang'o swinya awakapoka; ning'onzi zitawivwile. 9Nemulyango. Wensi wino wiza winjilila pakwe nene ahtulwa; aliwakwinjila mukasi, anyoka afumila kunzi, aya azana umulemvwe. 10Ukuwa umung'o akwizilanga ukwiwa, ukukoma, nukonona. Nenji niza alyakuti ziwe nuwumi, uwumi wenecho.

11Nemuchemi muzima. Umuchemi muzima akalonda ukufwila ing'onzi zyakwe. 12Umulalikwa, wino asi amuchemi swinya asi amwening'onzi, akula ndi walola impumpi yiza asamala asya ing'onzi zyonga; impumpi izilema izisasya. 13Umulalikwa akasamala amuno walalikwa awowo swinya atapechela ing'onzi. 14-15Nemuchemi muzima. Ndimuno Tata wamanyila avino nani namanya Tata, swinya avino namanya ing'onzi zyane nazyo zyamanya nene. Nkalonda ukufwila ing'onzi zyane. 16Kuli ning'onzi zinjinye zino azyane zino zisi muchipimpo chonye-choo. Nazyonye inde nkazisende; zize zivwe izwi lyane, ziwe uwufyo wonga ziwe zyonsi apaliponga.

17Etata wankunda muno nkalonda ukufwila ing'onzi, alyakuti njize imbe nuwumi swinya, 18Pasi wumwi wino angasenda uwumi wane. Nkawuleka nemwenechonye nenga nukulonda kwane. Achane ukuwupa, swinya achane ukuwupochelela. Choo achino Tata wankomelezya ukuchita.

19Muno amazwinye yaa awa Yuda awapawunkana. 20Awavule pakwe woliwo watanji, Ali navyamuzimu! Wechipenanye pano wapakula! Ngamukumwivwila chani?

21Ukuwa wanji watanji, Umuntu wamuzimu wuwipe atanga avwange wonye-woo! Nga umuzimu wuwipe wungiyula aminso yantonko wuli?

AwaYuda awakana Yesu

22Impindi ifichila iyachakulya chakuyitopwa iyakwimichila ing'anda yakwe Leza mwe Yerusalemu; paponye yalinji amasika. 23Yesu wapitanga mwipembo lyakwe Solomoni ilyang'anda yakwe Leza, 24awala awaYuda waya wamuliwilizya awamuwuzya awati, Nga wandi utwilike yanga? Tunene ichilola: ndi we Mesaya?

25Yesu atolelela ati, Nawanena kali, ukuwa mwakana ukunsuwila. Imilimo yino nkachitila mumaka yakwe Tata ayino ikawapanichisizya vino indi; 26ukuwa mwakana ukusuwila muno musi mweng'onzi zyane. 27Ing'onzi zyane zikakwivwa izwi lyane; nazimanya, nazyo zikankonka. 28Nkazipa uwumi wamuyayaya, zitalitela zifwe;

swinya pasi wumwi wino angazisompola kwenene. 29Vino Tata wampa vyakula vyalusya vyonsi, pasi wumwi wino angazisompola azifumye kwe Tata. 30Etata nani swewaliwonga.

31Swinyanye awaYuda awasola amawe ukuti wamupole. 32Yesu awanena ati, Nawalanjizya imilimo mivule imikulu yino Tata wampa ukuti mbombe; wuzye amulimochi wuno nachita wuno mukulonda ukuti mumpolele?

33AwaYuda awatolelela swinya awati, Tusinakulonda ukuti tukupolele kumilimo mizima yino wachita, ukuwa tukasi tukupole amuno ukukwelengula Leza! Wemuntu, ukuwa ukuyichita ngati we Leza!

34Yesu atolelela ati, Yawalikwa mumasundo yinu muno Leza wavwanga wati, Mwetwaleza. 35Twamanya kuno chino Amazwi Matele yavwanga ayakusimichila pe; nu Leza wawisile ati, atwaleza, awantu wane amazwinye yayo yavwanzilwe kwewoliwo. 36Ukuwa nenji, we Tata awino wansola swinya wantuma munsi. Ngafwandi mungati nkukwelengula Leza wuli muno natili ne Mwanakwe Leza vwile? 37Fwandi ndi nsinakuwomba imilimo yakwe Tata, mutize munsuwile. 38Ukuwa ndinaponye mutanga munsuwile, pane nkuwomba imilimo yakwe Leza, ukuwa imilimo yane yeni mule muyisuwile, alyakuti mutafwa nukuvwilika kuno Tata ali mwenene, nani indi mwe Tata.

39Swinyanye awalonda ukuti wamulele, ukuwa afyutumuka mumakasa yawo.

40Yesu alamba uluzi swinya aya mumbalala mwe Yordani aya kumasyo yano Yohani wabatizyanga kali, ayikala kokonye. 41Awantu wavule awaya kweweliwe awati, Yohani atatela achite imilimo mikalambane yimwi, ukuwa vyonsinye vino wavwanganga ivyamuntu wee avyakusimichila. 42Awantu wavulenye awakweneko awamusuwila.

Currently Selected:

Yohani 10: WWN82

Highlight

Copy