Luku 24

Kegra fapulo

(Mat 28:1-10; Mak 16:1-8; Jon 20:1-10)

1Hamerane Sade ghagra pasa, gaꞌasere hata meresin teke tarabana thedire ne tei ka gluma te au thinigna mae Jisas na. 2Rehati ne filoni thina biꞌo na la kulu pili fadeleihi ka foflogna gluma na. 3Eghuteuna, rehati ruma lamna ka gluma na, nu rehati ne theome filoni thinigna mae Jisas. 4Kate ghathoni eigna igne teu reꞌe na, phei mae te fahaghe phoko siasigla megei nga ne kegra neu rhedi reꞌe. 5Rehati mhaghu nodi fara ne pogho soru pari. Phiamare ne cheke eghu ka reꞌe, “Mei hironi mala unha si ghotilo mae tela karhahi ia? Igne vido maladi kolho naikno teke lehera. 6Mana na theo agne. Mana na kela kegra fapulohi. Ghathoni si ghotilo teke cheke eghu mana ka ghotilo Galili ia, 7‘Mare ginauna na snakre lao ghau iara mae teke mei funu ka God gne ka khamedi mae te diꞌa fara re mala tupijuru ghau iara ka gaju fafatha. Eghuteuna ke kegra fapulo ka glehe ka fatilo narane na.’” 8Kate nomhini igne, goro gaꞌasere neke ghathoni unha teke chekeni mana na.

9Aonu reꞌe tei kokoni gluma na neke toutonu ka nabotho kaisei mae khurure nei keha mae fanomho langau eghu. 10Goro gaꞌase igrei Meri gna ka namono Makidala, nei Joana, nei Meri idogna mae Jemes, nei keha naikno langau eghu baludi. Rehati ne toutonu ka mae khurure unha teke filodi ka gluma na. 11Nu hatimare mae khuru ne theome fatutuanidi kolho goro gaꞌasere, naugna te ghathoni mare na rehati khogla tharuma cheke kolho.

12Nu mae Pita kegra haghe chari ne tei ka foflogna gluma na ne filo falamna. Nu mana ne filodi kolho pohe teke pipiha thinigna mae Jisas na. Aonu mana figri ne jaglo nogna fara ka unha teke filodi thegna re.

Mae Jisas ka nabrou te tei thoke Emaus

(Mak 16:12-13)

13Kau narane tuanala phei nogna mae fanomho mae Jisas re ne tei ka namono te kiloi Emaus. Nu namono Emaus gne jame nabotho kaisei kilomita funu Jerusalem. 14-15Kate toutonu te tei phiamare eidi unha teke edi mare ka mae Jisas na, mae Jisas thegna megei nga ne mei namo ka phiamare ne tei baludi. 16Phiamare ne filoni mae Jisas nu mae Jisas ne theome snakredi phiamare te filo glanini mana na.

17Mae Jisas ne cheke eghu ka phiamare, “Unha site toutonu fodu te tei ghopa ka nabrou gnea?”

Eghuteuna phiamare kegra snoto ne thono diꞌanagnafa fara fifilo dire. 18Kaisei mae ka phiamare nanghagna na mae Kleopas ne cheke eghu ka mana, “Tore, iagho gne ngala kaisei mae ihei te au Jerusalem te theome lasedi unha teke edi jare ka narane te liu ra?”

19Mae Jisas ne cheke eghu ka phiamare, “Eigna unha sia?”

Phiamare ne cheke eghu ka mana, “Eigna mae Jisas gna Nasaret. Mana kaisei mae profet funugna ka God. Eghuteuna nogna gloku nei nogna cheke teure thono nolaghi fara ke ulugna God nei ke uludi naikno te gnafa. 20Nu hatimare mae pris ulu, nei mae biꞌomi eghu ghehati re ne snakre laoni mana ka khamedi mae biꞌodi Rom. Mare ne fate faleheni, nei tupijuruni eghu mana kau gaju fafatha. 21Nu ghehati gaoghathomi na mae igne ngala kaisei mae mala fakarhidi naiknodi Israel. Eghuteuna gognarona la fatilo narane hila ke leghugna teke edi glepo tuare. 22Keha goro gaꞌase ka ghehati ne fajaglo ghami ghehati. Hamerane boibongi ginei reꞌe neke tei ka gluma na, 23nu rehati neke theome filoni thinigna mae Jisas na jare. Eghuteuna reꞌe mei ne toutonu ka ghehati te thakle keha engel tadi te cheke eghu na, ‘Mae Jisas na kela karhahi.’ 24Aonu keha mae ka tothoghei ghehati gne neke tei thoke la ka gluma na. Mare ne filodi gobigna lepo te chekedi goro gaꞌase re tutuani fara, nu mare ne theome filoni mae Jisas.”

25Ke leghugna igne mae Jisas ne cheke eghu ka phiamare, “Tore, ghopa gne ihou kolho signe. Ghopa gne theome faghose fatutuanidi kolho gobigna lepo teke chekedi hatimare mae profet ra! 26Unha te chekeni mare na mae Kraes gne mala kulu au papara ka gobigna lepo igre ame hata nga nolaghi biꞌo te siasigla na eghu.” 27Aonu mae Jisas ne funu rurutha fakeli ka phiamare gobigna lepo teke rioriso mare eigna thegna ka grioriso te blahi ra. Mana ne fufunu ka nogna grioriso mae Moses nei ka chekedi hatimare mae profet te gnafare.

28Thilomare mei ne namo ka namono Emaus, eghuteuna mae Jisas jateula te theome mala gnafa jare te tei fabrahu teu eghu. 29Phiamare ne toreni mana, ne cheke eghu, “Iagho au balumi ghepa, naugna narane gne la rafihi, eghuteuna la namo romnohi.” Aonu mana ruma ka suga na ne au baludi phiamare.

30Mana gnokro soru baludi phiamare ka tevo na ne hata keha bret. Mana cheke fakelidi ka God ganore ne piphike. Aonu mana ne tufa ka phiamare. 31Eghuteuna ka vido tuana mae Jisas ne snakredi phiamare mala filo glanini mana. Nu kate laseni phiamare ne mae Jisas teuna mana megei nga ne dofini. 32Phiamare ne cheke eghu fari thedi, “Tore, kate toutonu mana ka tapa ka nabrou ia, mana neke rurutha fakeli ka tapa thofno gaoghathodi gobigna lepo ka grioriso te blahi ra. Eghuteuna kate nomhi tapa igne, tapa ne keli tada fara!”

33Aonu phiamare kegra haghe neke pulo Jerusalem. Jare phiamare neke ludedi hatimare nabotho kaisei mae khurure nei keha naikno langau eghu ne khapru neu jare. 34Mare ne cheke eghu fari thedi, “Tuani fara, noda Lord na kela karha fapulohi! Mana neke thakle ka mae Simon.” 35Phiamare teke funudi Emaus gre ne toutonu la ka mare eigna teke thakle mae Jisas ka nabrou na, nei eigna te glani phiamare mae Jisas ka narane teke piphike mana bret na.

Mae Jisas ne thakle ka mae nogna khurure

(Mat 28:16-20; Mak 16:14-18; Jon 20:19-23; MK 1:6-8)

36Kate toutonuni phiamare igne, mae Jisas ne megei nga ne kegra neu fari hoteidi mare ne cheke eghu, “Pharikeli na au ka ghotilo.”

37Mare rhana ne mhaghu fara, naugna mare gaoghathodi na ne filoni kaisei naitu eghu. 38Nu mae Jisas ne cheke eghu ka mare, “Naugna unha site mhaghu fara ghotilo gnea? Thosei ghatho peapea. Iara ngala. 39Filo si ghotilo ka khamegu nei ghahegu teu iara gre. Iara thegu ngala! Habo ghau iara si ghotilo. Ghotilo laseni tharunga na theome au nafnahi nei nhubra eghu jateula te filodi ghotilo ka iara gre eghu.”

40Ke leghugna te cheke eghu igne, mae Jisas ne fatakle ka mare khamegna nei ghahegna teure. 41Mae fanomhore jaglo nodi ne thono gleale'a fara. Neuba ngau mare theome fatutuani ni mana ngala. Mae Jisas ne cheke eghu ka mare, “Au keha gano si ghotilo ia?” 42Mare ne tusu lao ka mana kaisei vido sasa muita. 43Mana hata sasa na ne ghamu ke uludi.

44Mana ne cheke eghu ka mare, “Glepo te edi ka iara igre, iara neke kulu chekedihi ka ghotilo ka teke au nga tekeu iara balumi ghotilo ia. Iara neke rurutha fakelihi ka ghotilo eidi unha teke rioriso eigu iara ka nogna vetula mae Moses, nei ka nodi buka hatimare mae profet, nei ka buka Sam teu igre. Tutuani fara teke chekeni iara ka ghotilo na, gobigna lepo igre la tutuani fara.”

45Mae Jisas ne tothora gaoghathodi mare re. Aonu mare ne tangomana te laseni grioriso te blahi na. 46Mana ne cheke eghu ka mare, “Igne unha teke chekeni ka grioriso te blahi na, ‘Mae Kraes na mala lehe eghuteuna ka fatilo narane na mana nake kegra fapulo.’ 47-48Ghotilo neke filodi glepo igre. Eghume ghotilo mala toutonu ka naiknore mala tughu nagnafa nei nakarha eghu mare. Jame te eni mare igne na, God ginauna hata fadeleidi nakhibodire. Ghotilo mala fufunu Jerusalem. Toutonu glepo igre ka nanghagu iara ranghidi naikno ka namono te gnafa ka nauthoglu gne. 49Iara ginauna kuru mei ka ghotilo mae ihei teke nhaꞌa cheke mae Mama na. Nu ghotilo mala au ngala Jerusalem ghilei hatini nogna nolaghi God te mei funu kligna na.”

Mae Jisas neke pulo haghe kligna

(Mak 16:19-20; MK 1:9-11)

50Mae Jisas ne batu fajifladi nogna mae fanomhore Jerusalem ne tei thoke Betani. Jare mana ne ngafa haghe khamegnare ne fablahidi mare. 51Kate fablahidi mare na, mana jifla kokodi mare, eghuteuna God ne hatani mana ne haghe kligna. 52Hatimare ne turupuku soru ranghini mana. Eghuteuna mare neke pulo Jerusalem balu gleale'a biꞌo fara. 53Leuleghu fata na mare au fabrahu ke lamna Sugablahi, eghuteuna mare ne theome gnafa te kilo fnaknoni God.

Currently Selected:

Luku 24: mrn

Highlight

Copy