Luku 12

Thosei chaghidi naiknore

(Mat 10:26-27)

1Kaisei fata, kmana thogha thogha naikno ne khapru faligohoni mae Jisas mala fanomho ka mana ne ghilei tapla kligna naikno. Ame cheke nga mae Jisas ka naiknore teuna, mana ne kulu cheke eghu ka nogna mae fanomhore, “Fiofilo ghami ka puhidi mae Farasi gre. Mare chaghidi fara naiknore. 2Unha te pophoru ghotilo na, naikno te gnafare ginauna filo glani ngala. Uve, unha te pophoru gognaro na, naikno te gnafare ginauna laseni ngala. 3Unha te cheke poruni ghotilo na, naikno te gnafare ginauna na nomhini unha te cheke poruni ghotilo tuana. Eghuteuna unha te cheke faꞌikoi ghotilo ka khuligna keha mae na ka nomi chogho themi na, naikno te gnafare ginauna na nomhini unha teke cheke faꞌikoi ghotilo ka khuligna keha mae na.”

Eigna nogna nolaghi God

(Mat 10:28-31)

4Aonu mae Jisas ne cheke eghu ka nogna mae fanomhore, “Uve, kheraguro, te chekeni iara ka ghotilo na, thosei mhaghudi naiknore. Mare tangomana te falehedi kolho thinimi ghotilo re, nu ke leghugna tuana mare theome tangomana te eni kaisei glepo te mala fadiꞌa ghami ghotilo na. 5Iara na falalase ari ka ghotilo unha nafnata mae te mala mhaghuni ghotilo na. Mae jame te mala mhaghuni ghotilo na God ngala, naugna mana au nolaghi te mala falehe ghami ghotilo na, nei jaola au nolaghi te mala koko lao ghami ghotilo Gehena. Uve, kaisei mana ngala jame te mala mhaghuni ghotilo na. 6Kate fofoli mare glima nanghaji ikodire, mare na foli ka sileni ikoi kolho. Nu God theome ghatho ihoni kaisei nanghaji ka igre. 7Tutuani fara, God na lasedi gobigna lepore jateula mana te lasedi niha khakla ka phaꞌumi ghotilo re. Eghume, thosei mhaghuni unha nate thoke ghami ghotilo na, naugna ka tathagna God na ghotilo glepo ulu tulao ka nanghaji te kmana igre.”

Farirhiu eigna nogna naikno Kraes

(Mat 10:32-33; 12:32)

8Mae Jisas ne cheke eghu, “Uve, te chekeni iara ka ghotilo na, jame kaisei mae kegra ke uludi keha naiknore eghuteuna cheke thakleni thegna te fatutuani ghau iara teuna, iara mae teke mei funu ka God na ginauna jaola cheke thakleni mana ka engel nogna God re mae tuana te nogu iara na. 9Nu ihei te kegra ke uludi keha naiknore te cheke thakleni thegna te theome fatutuani ghau iara teuna, iara mae teke mei funu ka God na ginauna jaola cheke thakleni mana ka engel nogna God mae tuana te theome nogu iara na. 10Eghuteuna ihei te cheke fapari ghau iara mae teke mei funu ka God, God tangomana te hata fadeleidi nakhibogna mana re. Nu ihei te cheke fadiꞌani nogna gloku Tharunga te Blahi na, God ginauna theome hata fadeleidi nakhibogna mana re.

11 “Eghuteuna naiknore ginauna hata ghami ghotilo tei ka fate ke lamna suga tharai, ke uludi hatimare mae funei ba hatimare mae biꞌo naugna ghotilo nogu iara. Thosei nanga nomi eigna unha nate cheke eimi themi nei cheke tughudi nodi cheke hatimare re. 12Kau narane tuana mae Tharunga te Blahi na ginauna farirhiu ghami ghotilo unha te mala chekeni ghotilo na.”

Eigna u dedei ka nauthoglu igne

13Kaisei mae ka nakhapru na kegra fanomho neu ka nogna cheke mae Jisas re. Mana ne cheke eghu, “Ghema velepuhi, cheke ka mae thabusigu ia mala tufa farihoteimi ghepa glepo teke lehe kokodi mae mama ra.”

14Nu mae Jisas ne cheke eghu ka mana, “Ghema! Iara theo nogu nolaghi te mala mei tufa glepo farihoteimi ghopa na.” 15Mae Jisas tudu ne cheke eghu, “Fiofilo fakeli ghami ka kmana nafnata khiri te magnahaghedi ghotilo igre. Naugna thofno nakarhagna naikno na theome leghudi kolho glepo kmana te khotodi mana re.”

16Ke leghugna igne, mae Jisas ne chekeni kaisei cheke naba ka naiknore, “Uve, fanomho ka thoutonu igne ghotilo ia. Kaisei mae te dedei na au keha nogna glose te keli, aonu mana au kmana ghegna gano ka nogna nagare na. 17-18Aonu mae te dedei igne ne ghaoghatho eghu ka nagnafagna thegna na, ‘Tore, na faꞌunha eghu iara ginauna? Iara theo kaisei vido naba te mala liliseidi nogu bukrei gano gre. Uve, igne unha nate eni iara na. Iara ginauna paꞌe soru suga ikodi teke nanhaꞌa gano iara ke lamnadi igre, eghuteuna iara ginauna hohoro suga majaghani ke biꞌodi igrei. Ke leghugna igne iara ginauna lilisei nogu ganore ke lamnadi suga majaghani tuare baludi la keha nogu glepore. 19Gnafa teuna, iara ginauna cheke eghu ka thegu: Iara gognarona au nogu kmana glepo te keli nabagna kmana finogha. Eghume iara gognarona tangomana te au fakeli nogu, nei theome nanga nogu, gnafa nogu, ghamu ghegu, koꞌu ghegu nei gleale'a nogu eghu!’

20 “Nu God ne cheke eghu ka mae tuana, ‘Iagho mae meomekro! Bongi na iagho na lehe. Keha mae ngau nate hata gobigna lepo teke tarabana iagho malamu themu teku igre!’

21 “Uve, na jateula igne eghu ihei te salo fodu dedei malagna thegna na ka nauthoglu igne, nu fei God na mana theo kaisei glepo kolho.”

Fatutuani ni God

(Mat 6:19-34)

22Mae Jisas ne cheke eghu ka nogna mae fanomhore, “Eghume, te chekeni iara ka ghotilo na, thosei nanga nomi eigna gano te mala ima te mala karha teuna. Ba eigna pohe te mala pipichi ghotilo ka thinimi are. 23Naugna nakarha na glepo ke ulugna ganoi, nei thini na glepo ke ulugna pohei. 24Kulu filo laodi si ghotilo nanghaji are. Rehati theome nanga nodi te mala loku kaisei nagare te mala hata gano na, ba rehati theo kaisei suga la te mala tathaji gano na. Nu neuba ngau, God ngala te faghamudire. Nu ghotilo na glepo ulu fara ka tathagna God na ke tulaodi nanghaji igrei. 25Eghuteuna neubane nangadi fara ghotilo nakarhamire, ghotilo themi na theome tangomana nate eni nakarhamire te mala au faraugha na. 26Te theome edi ghotilo glepo te ikodi igre na, mala unha si ghotilo te nanga nomidi fara eidi glepo te biꞌo igrea?

27 “Kulu filo laodi ghu si ghotilo sisi te kotu tafri are. Rehati theome eni kaisei gloku, eghuteuna rehati theome susuki kaisei pohe. Nu te chekeni iara ka ghotilo na, sisi are thono khuakhuda fara filodire uluni nogna pohe mae King Solomon tifa ia, mae ihei teke dedei fara teke pipichi nogna kmana nafnata famane pohe. 28Sisi te au tafri are reꞌe tangomana te au katha vido kmoꞌei kolho, eghuteuna ke leghugna igne, mare ginauna koko lao ka khaꞌaghi sisi tuare. Nu neuba reꞌe ne eghu ngau, God tusu ranghidi glepo te mala keli fara fifilodire. Eghume God na theome ghatho iho ghami ghotilo, nu mana ginauna na tusu ranghi ghami ghotilo unha te magnahagheni ghotilo na. Tore, nomi fatutuani ghotilo na ikoi fara! 29Thosei nanga nomi fara nei ghathoni fabrahu eghu eigna unha nate ghamu ghotilo na, ba unha nate koꞌu ghotilo na. 30Naikno bongihehe ka nauthoglu igne kafe fariuriu fara mala hata glepo igre. Nu mae Kmami ghotilo na laseni te magnahaghedi ghotilo glepo igre. 31Glepo jame te ghathoni fabrahu ghotilo na karha te funei frunini God igne. Eghuteuna gobigna lepo te magnahaghedi ghotilo re God ginauna na tusu ari ka ghotilo.

32 “Neubane theome nheta ghotilo, thosei mhaghu. Naugna mae Kmami ghotilo na keli tagna fara te snakre ghami ghotilo te mala au ke lamnagna karha te funei frunini mana na. 33Eghume ghotilo fofoli nomi glepore mala hata sileni mala tusu lao ka naikno te kumare. Ghotilo hata thofno gloi sileni te theome tangomana te thona nei breku teu igne. Ghotilo mala salo fodu nomi dedei gna kligna te theo ka gnafa gna, nu au fabrahu. Eghuteuna kligna na theo kaisei mae te mala blau te tangomana te tei thokeni ba theo kaisei khokorosi nate ghamu fadiꞌani na. 34Naugna aheva te au nomi dedei ghotilo na, igne ngala te mala au gaoghathomi ghotilo tagna na.”

Tarabana fabrahu leghu fata

(Mat 24:45-51)

35Mae Jisas ne cheke eghu, “Ghotilo tarabana nomi koba leghu fata jateula kaisei mae gloku te kulu fakasa nogna juta na nei kulu famamhaku nogna phipichi na teu ia eghu. 36Ghotilo mala jateula hatimare mae gloku te ofoni ke pulo meigna nodi mae funei teke tei ka gaghamu tholaghi na eghu. Kate mei kikidi mana ka grengatha na, mare na ghosei tothora grengatha na ranghini mana. 37Hatimare mae gloku re keli tadi fara kate ke pulo mei nodi mae funei na te filodi mare te kulu tarabana ofoni mana teu. Tutuani fara te chekeni iara ka ghotilo na, mana ginauna tabadi mare. Mana na pipichi nogna pohe na mala tarabana gano maladi mare, eghuteuna chekedi mare mala ima balugna. 38Mae glokure ginauna keli tadi, naugna mae funei na filodi mare tarabana ofoni mana neu, neuba mana ne pulo mei farihotei bongiro ba hamerane boibongi. 39Nu ghotilo laseni igne, jame mae khotogna suga na laseni narane te mala meigna mae mala blau na, mana ginauna filo fakeli eigna mana theome snakreni nogna suga na mala ruma mana. 40Eghume ghotilo jaola tarabana nomi fabrahu, naugna iara mae teke mei funu ka God na ginauna nake pulo mei kau nauthoglu igne ka narane te theome ghathoni ghotilo mala ke pulo meigu iara na.”

41Mae Pita ne cheke eghu, “Lord, iagho chekeni cheke naba igne ka ghehati kolho, ba ka iheire te gnafa khapru teu igre?”

42Te mala laseni mae fanomhore gaoghathogna cheke naba igne, mae Jisas ne cheke eghu ka mare, “Ba, mae ihei si mae gloku te keli tagnani mae funei na ia? Mae gloku te lalase fara te leghuni fabrahu nogna cheke mae funei na. Igne ngala mae teke vavahi nogna mae funei na te mala reireghidi keha mae glokure kate tei mae funei na. Mae gloku igne ginauna tangomana te tufa nanaba ganore ka keha mae glokure ka thofno narane te mala ghamu mare na. 43Mae gloku igne ginauna keli tagna fara kate mei nogna mae funei na te filoni mana te famane eni fabrahu nogna gloku na. 44Uve, tutuani fara te chekeni iara ka ghotilo na. Mae funei na ginauna na vahini mana mala reireghidi nogna gobigna lepore. 45Nu jame te cheke eghu mae gloku tuana ka nagnafagna na, ‘Nogu mae funei iara ia ginauna theome faghose ke pulo mei sia.’ Aonu mae tuana ginauna ghatho ihoni nogna gloku na, eghuteuna mana na funu puridi keha naikno glokure, gaꞌase ba nalhaꞌu. Eghuteuna mana ne leghuni gaoghathogna thegna na, ne ghamu ghegna nei koꞌu ghegna neu ne ghilei dranga fara. 46Eghuteuna nogna mae funei mana na ginauna nake pulo mei ka narane te theome tarabana nei theome ghathoni teu mana na. Mae funei tuana ginauna parani fara mae gloku tuana baludi keha naikno te theome leghuni mae funei na. 47Mae gloku te laseni unha te magnahagheni nogna mae funei na, nu theome tarabana ba theome eni unha te magnahagheni mana teuna, mae funei igne ginauna parani fara mana. 48Nu mae gloku te theome laseni unha te magnahagheni mae funei na nei edi glepo te theome magnahaghedi mana re teuna, mae funei na ginauna theome raꞌe parani fara mana. Naugna mae ihei teke tusu lao God ranghini mana kmana glepo te mala reireghi na, God ginauna magnahagheni mana te mala edi keha glepo ke biꞌodi igrei. Eghuteuna mae ihei teke tusu lao God ranghini kmana gloku na, God ginauna magnahagheni mae tuana mala ke edi keha gloku langau.”

Mae Jisas ginauna na fotadi naiknore ka nauthoglu igne

(Mat 10:34-36)

49Mae Jisas tudu ne cheke eghu, “Iara gne mei mala ei khaꞌaghi ka nauthoglu igne. Eghuteuna iara magnahagheni fara khaꞌaghi igne mala ngaja fakeli, nu khaꞌaghi igne theome mei ngau. 50Nu ulu lahu na iara na ruma haghe ke lamnagna naꞌau papara na nei lehe eghu tagna. Eghuteuna leuleghu fata na iara nanga nogu fara koba ghilei thokeni narane nate sala'u ari glepo igne. 51Ba, na mei iara mala au naikno te gnafare ka pharikeli ka nauthoglu igne eghu jau si ghotilo gaoghathomi naia? Theo. Iara mei mala fotadi naiknore mala iheire te theome fatutuani ghau iara re mala magra baludi iheire te fatutuani ghau iara re. 52Funu gognaro te haghe na, glima naikno te au ke lamnagna kaisei suga na ginauna na fnota. Thilo naiknore ginauna magridi keha phei naiknore, eghuteuna keha phei naiknore ginauna na magridi keha thilo naiknore. 53Mae kmagna na ginauna magra ka mae thugna nalhaꞌu na, eghuteuna mae thugna nalhaꞌu na ginauna magra ka mae kmagna na. Eghuteuna idogna na ginauna na magra ka thugna gaꞌase na, eghuteuna thugna gaꞌase na ginauna magra ka idogna na. Eghuteuna idogna mae nalhaꞌu na ginauna na magra ka nanghogna na, eghuteuna nanghogna na ginauna magra ka idogna mae nalhaꞌu na.”

Eidi fagaglana

(Mat 16:2-3; 5:25-26)

54Mae Jisas ne cheke eghu ka naiknore, “Kate filodi ghotilo khoveo te haghe ke mosu agne Israel, ghotilo ginauna cheke eghu, ‘Nake nakhete si ginauna gne tore.’ Thogheiro na na nakhete tutuani. 55Eghuteuna kate ghaghafa mei nuri ke mata na, ghotilo na cheke eghu, ‘Nake brana si ginauna gne tore.’ Eghuteuna tutuani fara. 56Kate mei khoveo na, ghotilo ginauna filo glanini nate meigna nakhete ba nuri na. Tutuani, ghotilo laseni fara gaoghathodi glepo igre kate filo glani ghotilo maloa gne. Neuba, ghotilo theome laseni puhigna God te doglo na! Nu ghotilo mae chaichaghi kolho! Naugna unha si ghotilo te theome tangomana te filo glanidi kolho unha te edi God gognaro grea?”

57Aonu, mae Jisas ne cheke eghu, “Naugna unha ne theome vavahi malami themi nga ghotilo glepo te doglo na? 58Jateula igne eghu. Kate hata nigho te tei kaisei mae ka fate na, iagho faghose fariuriu fadoglini puhi tuana farihoteimi ghopa kate theome teinga teu ghopa ka fate na. Na eghunu hata nigho tei mana ke ulugna mae mala fate na mala fate nigho mana. Naugna kate fate nigho te gnafa na, mae mala fate na ginauna snakre tei nigho ka hatimare mae pulis mala koko lao nigho lamna suga sosolo. 59Te chekeni iara ka ghotilo na, te eghu na, iagho ginauna theome jifla jare ghilei thokeni narane te foli fahui iagho sileni leghu lahu gna nou faen na.”

Currently Selected:

Luku 12: mrn

Highlight

Copy