Jone 6

Mae Jisas neke faghamudi glima thogha mae

(Mat 14:13-21; Mak 6:30-44; Luk 9:10-17)

1Kaisei fata ke leghugna igne mae Jisas ne kasa baludi nogna mae fanomhore ka keha phile Kholo Galili te kiloni jaola Kholo Taebirias. 2Kmana naikno leghuni mana, naugna mare ne filodi nogna gloku te nolaghi te edi mana te fakelidi naikno te fogra re. 3Aonu, kate tei posa mare ka keha phile kholo na, mae Jisas ne haghe ka kaisei thogele, ne gnokro pari baludi nogna mae fanomhore. 4Ka vido tuana u nodi Gaghamu Ghasa-Polho mae Jiure la namohi.

5Mae Jisas efra haghe ne filodi kmana naikno ne mei ka mana. Aonu mae Jisas ne cheke eghu ka mae Filip, “Filip, aheva nate tei foli gano tahati te mala faghamudi naikno igre?” 6Mana ghusna eghu mala fariuriuni kolho mae Filip. Naugna mana la kulu lasenihi unha nate eni na.

7Mae Filip ne cheke eghu ka mana, “Tahati jame kafe loku kaisei nhigra te mala foli naba gano te mala katha vido kaisei naikno teuna!”

8Kaisei nogna mae fanomho mae Jisas, nanghagna na mae Aduru, tahigna mae Simon Pita, mana ne cheke eghu ka mae Jisas, 9“Kaisei mae sitei agne au glima bret nei phei sasa. Nu gano igre ginauna theome naba kolho ka naikno te kmana igre!”

10Mae Jisas ne cheke eghu ka mae fanomhore, “Ghotilo chekedi naikno are mala gnokro pari.” Vido tuana au kmana faghano buburu te mala gnokro na. Naiknore ne kafe gnokro pari. Eghuteuna khaputudi mae biꞌo te au jare kau narane tuana, jame naba glima thogha. 11Aonu, mae Jisas ne atha glima bret re, ne cheke fakelidi ka God, mana tusu lao ka mae fanomhore mala tufa ka naiknore. Mana jaola ka phei sasare, eghuteuna naiknore kafe ghamu ne boho.

12Ke leghugna te kafe ghamu te boho naiknore mae Jisas ne cheke eghu ka mae fanomhore, “Salo fodu ghotilo vido gano teke salaꞌui are na eghunu chochoghei tahati gano gre eghu.” 13Aonu, hatimare ne salofodu vido gano teke salaꞌui ka glima bret re ne fafofodu nabotho phei khara'o.

14Kate filoni u kofubobhoi te eni mae Jisas igne naiknore ne cheke eghu, “Tutuani fara, igne ngala mae profet biꞌo mala mei ka nauthoglu gne teku ka nodi grioriso hatimare mae profet tifa ra!” 15Ka narane tuana mae Jisas ne filo glanidi u gaoghathodi naiknore te magnahaghei huhuruni mana mala mae King. Aonu mana megei nga ne jifla ne tei au thegna kau thogele na.

Mae Jisas nonolo ne tei ke tagru kholo na

(Mat 14:22-33; Mak 6:45-52)

16-17Ka grafi tuana, nogna fanomho mae Jisas re ne soru ka kholo na ne ofoni mana ne ghilei bongi. Kate dofini mana na, mare saghe ka nodi mola na ne funu kasa ka kholo na mala thoke Kapanam. 18Ka vido tuana kaisei seseuru biꞌo ne mei ka mare, ne funu diꞌa u kholo na. 19Kate ghorha te teihi mare nabagna glima kilomita na, mare ne filoni mae Jisas te nonolo te mei ka thagrugna kholo na, mana mei ne namo ka nodi mola mare na. Kate filoni mae Jisas na hatimare ne kafe mhaghu fara. 20Nu mae Jisas ne cheke eghu mei ka mare, “Tore, thosei mhaghu! Iara mae Jisas!” 21Hatimare gleale'a fara ne fasagheni mana ka mola na. Aonu mare ghosei ne mei longa ka vido aheva teke magnahaghei tei mare na.

Naiknore ne hironi mae Jisas

22Ka keha narane na, naikno teke au faleghu tekeu ka keha phile kholo na mare laseni kaisei mola kolho au tekeu jare na, eghuteuna mare neke laseni la mae Jisas gne neke theome tei baludi nogna mae fanomhore nu mare neke tei kolho thedi. 23Aonu, keha molare ne mei funudi Taebirias. Mare mei ne longa ka vido aheva mae Jisas teke cheke fakelini ka God u gano teke ghamu naiknora. 24Aonu, kate theome filoni mae Jisas jare baludi nogna mae fanomhore, mare saghe ka molare ne tei hironi mana Kapanam.

Mae Jisas ngala u gano te mala tusu lao u karha na ka naiknore

25Naiknore ludeni mae Jisas ka keha phile kholo na ne cheke eghu ka mana, “Velepuhi, neke mei niha agne sagho ia?”

26Mae Jisas ne cheke eghu ka mare, “Tutuani fara te chekeni iara ka ghotilo na. Ghotilo mei hiro ghau iara agne naugna ghotilo neke ghamu neke boho kau bret ra kolho. Nu ghotilo theome lase fakelidi kolho gaoghathodi u kofubobhoi teke edi iara ra. 27U gano gna nauthoglu igne ghosei boto nei diꞌa eghu. Thosei loku eigna u nafnata gano tuana. Nu loku eigna u gano te au fabrahu te tusu ranghi ghami ghotilo u karha fei tifa na. Iara mae teke mei funu ka God na ginauna tusu ari ka ghotilo u gano tuana. Naugna God Mama na la falalasehi te namha ghau iara na.”

28Aonu naiknore ne ghusna eghu ka mana, “Unha glepo gre te magnahaghedi God te mala edi ghehati re?”

29Mana ne cheke eghu ka mare, “U gloku te magnahagheni God te mala eni ghotilo na igne, fatutuani ghau iara, mae ihei teke kuru mei mana gne.”

30Aonu, naiknore neke cheke eghu ka mana, “Edi sagho keha kofubobhoi mala fatutuani nigho ghehati. Unha glepo nate eni iagho na? 31Ka narane teke jifla teke tei mae kuꞌeda tahati re kau namono nagou na, mare neke ghamu fabrahu u nafnata gano te kiloi mare u ‘manna’ na. Jateula te chekeni kau grioriso te blahi na, ‘God neke tusu ranghidi mare u gano funugna kligna na mala ghamu.’ ”#6:31 Eks 16:4; Neh 9:15; Sam 78:24,25.

32Mae Jisas ne cheke eghu ka mare, “Tutuani fara te chekeni iara ka ghotilo na. Mae Moses neke theome tusu ranghidi mae ku'emi ghotilo ra gano gna kligna na. Nu mae Kmagu iara na neke tusu ranghi ghami ghotilo u thofno gano teke mei funugna kligna na. 33U gano teke tusu mei God na mae ihei teke soru mei funugna kligna te mala tusu lao u karha na ka naikno te gnafa kau nauthoglu igne.”

34Naiknore ne cheke eghu ka mae Jisas, “Mae biꞌo, tusu mei fabrahu u nafnata gano tuana ka ghehati.”

35Mae Jisas ne cheke eghu ka mare, “Iara jateula u gano eghu mala tusu lao u karha na ka naiknore. Mae ihei te mei ka iara na mana ginauna theome rofo. Mae ihei te fatutuani ghau iara na mana ginauna theome roi koꞌu. 36Nu iara neke chekenihi ka ghotilo, neuba ghotilo ne filo ghauhi iara, ghotilo theome fatutuani ghau iara kolho. 37Naikno te gnafa teke tusu mei mae Mama ka iara re ginauna mei ka iara. Nu ihei te mei ka iara na iara ginauna theome brue fapuloni. 38Naugna iara neke mei funu kligna mala edi unha te magnahaghedi mae Mama mae ihei teke kuru mei ghau iara na theome mala edi unha te magnahaghedi iara thegu re. 39Mae ihei teke kuru mei ghau iara na mana theome magnahaghei ghau iara te lisa lao mala sniki kaisei naikno teke chekedi mana mala reireghidi iara teku igre, nu mala fakarha fapulodi iara kau narane leghu lahu na. 40Naugna mae Kmagu iara na magnahagheidi naiknore te kafe filo glani ghau iara mae Thugna na nei fatutuani ghau iara teuna mala athini u karha fei tifa na. Eghuteuna iara na fakarha fapulodi kau narane leghu lahu na.”

41Ka vido tuana hatimare mae Jiure ne funu buiburini mae Jisas. Mare buiburini mae Jisas naugna mana ne cheke eghu, “Iara ngala u gano teke mei funugna kligna na.” 42Mare ne cheke eghu fari thedi, “Mae igne mae Jisas kolho. Tahati kafe lasedi kmagna nei idogna teure. Mana thugna mae Josep kolho. Naugna unha site chekeni mana ‘Iara neke mei funu kligna’ teu gnea?”

43Aonu, mae Jisas ne cheke eghu ka mare, “Thosei buiburi eghu fari themi! 44Theo kaisei naikno tangomana te mei ka iara na ghilei batu meini mae Mama mae teke kuru mei ghau iara na. Eghuteuna mae ihei te mei ka iara na, iara ginauna fakarha fapuloni mana kau narane leghu lahu na. 45U cheke teke risodi hatimare mae profet tifa ra cheke eghu, ‘God ginauna kafe farirhiudi naiknore.’#6:45 Isa 54:13. Ihei te nomhini chekegna mae Mama na eghuteuna leghuni teuna, mana na mei ka iara. 46Theo kaisei naikno teke filoni God mae Kmagu iara na. Kaisei iara mae teke au balugna mana na ngala te filoni mana na. 47Tutuani fara te chekeni iara ka ghotilo na. Mae ihei te fatutuani ghau iara na, mana na athini u karha fei tifa na. 48Iara ngala u gano te mala tusu lao u karha na ka naiknore. 49Mae ku'emi ghotilo re neke ghamuni u ‘manna’ na ka namono nagou na, nu neuba ngau mare neke kafe lehe ngala. 50Nu igne u gano teke soru mei funugna kligna na. Mae ihei te ghamuni u gano igne na, mana ginauna theome lehe. 51Iara ngala u gano karha teke mei funu kligna na. Ihei te ghamuni gano igne na, mana na karha fabrahu. U gano igne ngala u thinigu iara na. Iara ginauna tusu lao ka naiknogna u nauthoglu igne mala tangomana te athini u karha na.”

52Kate nomhidi cheke mae Jisas igre, hatimare mae Jiu ne funu diꞌa tadi ne fapholai fari thedi. Aonu, mare ne cheke eghu, “Faꞌunha tangomana si mae igne te tusu mei ka tahati thinigna na te mala ghamu na ia?”

53Mae Jisas ne cheke eghu ka mare, “Tutuani fara te chekeni iara ka ghotilo na. Te theome ghamuni ghotilo thinigu iara na nei theome ko'uni dadaragu iara mae teke mei funu ka God na teuna ghotilo ginauna theome athini u thofno karha na! 54Mae ihei te ghamuni thinigu iara na nei ko'uni dadaragu iara na teuna, mana athini karha fei tifa na. Iara ginauna fakarha fapuloni mana kau narane leghu lahu na. 55Naugna thinigu iara na ngala u thofno gano te tutuani na, nei u dadaragu iara na ngala u thofno khoꞌu te tutuani na. 56Mae ihei te ghamuni thinigu iara na nei ko'uni dadaragu iara na teuna, mana na au balugu iara, eghuteuna iara na au balugna mana. 57Mae Kmagu iara mae ihei teke kuru mei ghau iara na, mana neke tusu mei u karha na. Eghuteuna u karha tuana au ka iara naugna mae Mama neke tusu mei ka iara. Jateula tuana eghu mae ihei te ghamu ghau iara na, mana na athini u karha tutuani na ka iara. 58Eghume igne u thofno gano tutuani teke mei funugna kligna na. Theome jateula u gano te kiloi ‘manna’ teke ghamuni mae ku'emi ghotilo ra eghu. Ke leghugna ghamu te gnafa mare u ‘manna’ tuana na mare neke kafe lehe ngala. Nu mae ihei te ghamuni u gano igne na mana ginauna karha fabrahu.” 59Mae Jisas neke chekedi u glepo igre ka teke farirhiudi mana naiknore ke lamnagna u suga tharai na ka namono Kapanam.

U farirhiu eigna u karha fei tifa

60Kmana ka naikno teke leghuni fabrahu mae Jisas igre nomhini u nafnata farirhiu igne ne cheke eghu, “U farirhiu igne thono ninhigrana fara. Ginauna theome tangomana kaisei naikno nate fatutuanidi u nafnata farirhiu igre.”

61Neubane theome nomhidi ngau, mae Jisas lasenihi te buiburi mare eigna u farirhiu igne. Aonu mana ne cheke eghu ka mare, “Ba, ka farirhiu igne nu la tiromi leghu ghau la iara eghu si ghotilo ia? 62Te eghu na, na unha eghu ghotilo gaoghathomi na nate filo ghau iara mae teke mei funu ka God na teke pulo iara ka vido aheva teke kulu au iara tifa na? 63U thini na theome tangomana tusu lao u karha ka naikno na. Mae Tharunga te Blahi ngala tangomana te tusu lao u karha ka naikno na. Eghume, chekegu iara gre ngala te mala athini ghotilo u Tharunga te Blahi na, mae ihei nate tusu mei u karha na. 64Nu keha naikno ka ghotilo theome fatutuani ghau iara.” Funu ka vuvuhagna na mae Jisas la kulu lasedihi mae iheire te theome fatutuani ni mana re. Eghuteuna mana la lasenihi mae ihei nate majorani mana na. 65Mae Jisas neke cheke eghu, “Igne u gaoghathogna teke chekeni iara ia, theome tangomana kaisei naikno te mei ka iara na jame te theome snakre meini mae Mama ka iara na.”

66Ke leghugna te cheke eghu mae Jisas igne, kmana naikno teke leghuni fabrahu mana re, mare ne tei kokoni mana neke tirodi leghuni mana.

67Aonu, mae Jisas ne ghusna eghu ka nabotho phei nogna mae fanomhore, “Ghotilo ba, ghotilo jaola magnahaghei te tei koko ghau iara sia?”

68Mae Simon Pita ne cheke eghu ka mana, “Lord, ghehati theo kaisei mae te mala leghuni na kaisei iagho ngala. Eghuteuna u chekemu iagho re ngala te mala athini ghehati u karha fei tifa na. 69Gognaro ghehati fatutuani nigho iagho. Ghehati laseni nigho iagho mae blahi neke mei funu ka God.”

70Mae Jisas ne cheke eghu ka mare, “Iara neke kafe vahi ghami ghotilo nabotho phei mae. Nu neuba ngau kaisei mae ka ghotilo na thono jateula mae Satan eghu.” 71Mae Jisas cheke eigna mae Judas, thugna mae Simon Iskariot. Mae Judas gne kaisei mae ka hatimare nabotho phei mae nogna fanomho gre. Nu mana ngala nate majorani mae Jisas na.

Currently Selected:

Jone 6: mrn

Highlight

Copy