Jenesis 45

Mae Josep ne fatakleni thegna ka mae thabusignare

1Kate haimini mae Josep te rogna tanhi fara na, mana ne cheke eghu ka nogna mae gloku re, “Ghotilo ke jifla ghu kosi!” Ka vido tuana mana thegna kolho te au teu baludi mae thabusignare. 2Mae Josep ne tanhi fa biꞌo fara, eghuteuna naiknodi Ijep teke au fanamo teku jare na ne nomhi ni te tanhi mana na. Eghuteuna mare ne tei ne toutonu ka naikno te au ka sugagna mae king na eigna igne.

3Mae Josep ne cheke eghu, “Iara mae Josep. Ba, mae kmagu iara na karhau ngau?” Nu hatimare mae thabusigna mana re ne mhaghu nodi fara ne theome tangomana te eni kaisei cheke na.

4Aonu mae Josep ne cheke eghu ka mare, “Mei si ghotilo rhegu iara agne.” Kate lao mare te namo ka mana na, mana ne cheke eghu ka mare, “Iara mae Josep ngala. Iara thofno mae thabusimi ghotilo. Ghotilo tifa na neke snakre ghau iara ka mae bisnis ra neke foli ghau iara neke hata mei ghau iara agne Ijep mala kaisei nodi mae gloku mare. 5Eghuteuna gognaro na ghotilo thosei mhaghu nei diꞌatami ka themi eghu eigna puhi teke eni ghotilo ka iara ia. Eigna God neke kuru mei ghau iara agne ke ulumi ghotilo mala togho ghami ghotilo nei mala theome lehe ghotilo eghu ka vido te rofo gognaro gne. 6Gognaro na la phei finogha hi te theo gano na. Nu keha glima finogha re au ngau te mala theo gano na. 7Eghume, God na neke kuru mei ghau iara agne ke ulumi ghotilo mala togho ghami ghotilo nei mala theome lehe ghotilo ka glehe rofo te jaglo nodani tahati gognaro gne. Naugna ka nafnata puhi igne mana magnahaghei te ke hata fapulo ghami ghotilo.

8“Eghume theome ghotilo teke kuru mei ghau iara ka namono igne na, nu God teke kuru mei ghau iara na. God neke vahi ghau iara mala nogna mae ofisa biꞌo lahu mae king gna Ijep. Iara mae mala reireghidi naikno te gnafa te au ka sugagna mana na igre, nei mae funei di vido te gnafa ka kantri Ijep. 9Gognaro na ghotilo faghose ke pulo ka mama mala cheke eghu ka mana, ‘Iara mae Josep iara mae thumu iagho, igne unha te chekeni iara ka iagho na. God neke fakegra funei ghau iara agne ka kantri Ijep. Eghume, iagho thosei ofo, faghosei mei ka iara agne. 10Ghotilo ginauna na kafe mei au rhegu iara agne ka nohi Gosen. Iagho baludi thumu, nei gramu, nei nou sipu, nei nou nanigot, nei nou buluka, nei nou gobigna lepo teke khotodi iagho ra eghu mala mei gnokro soru ka nohi igne. 11Te mei iagho agne Gosen na, iara ginauna fiofilo nigho ke lamnadi glima finogha te theo gano igre. Eigna iara theome magnahaghe nigho iagho nei tharaknamu nei nou sipu, nanigot, nei buluka teu iagho are te rofo na.’ ”

12Eghuteuna mae Josep ne cheke eghu ka mae thabusigna re. “Gognaro na ghotilo la filo ghauhi iara themi la lase ghauhi eghu iara mae ihei te cheke teu ka ghotilo igne. Iara mae Josep ngala, theome mae ihei nga. Eghuteuna iagho mae Benjamin, iagho thofno mae tahigu iara, iagho jaola la filo ghauhi iara. 13Ghotilo ke pulo ke toutonu ka mae mama eidi naikno te gnafa ka kantri Ijep gne, mare kafe ghatho tahu ghau iara. Eghuteuna ghotilo jaola toutonu ranghini mana eidi gobigna lepo tela mei filodi hi ghotilo igre. Eghume faghosei tei mala hata meini mana agne.”

14Ke leghugna te cheke eghu te gnafa na, mae Josep ne loku ka mae Benjamin, mae tahigna na ne tanhi. Eghuteuna mae Benjamin ne jaola ne tanhi. 15Eghuteuna mae Josep ne sopa loku ka mae tighagna re ne tanhi balu gnanghodi mare. Ke leghugna igne hatimare mae tighagna re ne toutonu balugna mana.

16Keha naiknore ne toutonu ka iheire te loku ka sugagna mae king na eigna te mei au teu mae thabusigna mae Josep gre jare na. Mae king baludi nogna mae ofisa re ne nomhini cheke igne ne keli tadi fara. 17Aonu mae king ne cheke eghu ka mae Josep, “Chekedi mae thabusimu re mala tarabana nodi dongki re mala ke pulo Kenan. 18Chekedi mare mala hata mei mae kmadi na nei tharaknadi teure mala ke pulo mei ka iara agne. Iara ginauna na vahini kaisei vido te keli agne mala au mare. Eghuteuna mare ginauna karha kmana ghedi gano te mala ima na ka vido tuana.

19“Iagho jaola cheke ka mare mala hata tei keha kat mala luja meidi goro gaꞌase nei goro sua nei mae kmadi na eghu baludi. 20Iagho cheke ranghidi mala thosei nangadi mare gobigna lepo te au faleghu teu ka kantri Kenan, naugna iara ginauna na tusu ranghidi kmana glepo te keli fara te au ka kantri Ijep.”

21Aonu thugna nalhaꞌu mae Jekop re ne leghuni unha teke chekeni mae king na. Mae Josep ne leghuni nogna cheke mae king na ne tusu lao keha kat ka mare. Eghuteuna mana ne jaola ne tusu lao keha gano te mala toghodi mare ka nabrou na. 22Mana jaola ne tufa pohe majaghani ka mare. Nu ka thofno mae thabusigna thegna mae Benjamin gne mana ne falao glima khangafa pohe majaghani nei thilo gobi vido silva. 23Mae Josep jaola ne hata kmana famane glepodi Ijep ne luja lao ka nabotho dongki nalhaꞌu di re malagna mae kmagna. Eghuteuna mana ne hata wit nei bret nei keha nafnata gano la ngau eghu ne luja ka nabotho dongki gaꞌase di re mala toghoni mae kmagna kate mei ka nabrou te mala mei thoke Ijep na. 24Kate kuru teidi mae thabusigna re, mae Josep ne cheke eghu ka mare, “Ghotilo jifla tei, nu thosei fari fapholai fari themi eghu.”

25Aonu hatimare jifla Ijep neke pulo ka kantri Kenan ka mae kmadi Jekop. 26Kate posa mare ka namono na, mare ne cheke eghu ka mae kmadi na, “Mama, mae Josep ne lelehi teku ia mana karhau ngala, mana theome lehe. Gognaro na mana ngala te funei ka vido te gnafa ka kantri Ijep na.” Mae Jekop nomhidi cheke igre ne rhana nogna fara ne tirogna fatutuani di nodi cheke mare igre. 27Nu hatimare ne toutonu ka mae kmadi na gobigna lepo teke chekedi mae Josep ka mare re. Kate filodi mae Jekop kat teke famei mae Josep te mala hatani mana te tei Ijep na, gaoghathogna mana na neke keli fapulo. 28Aonu mae Jekop ne cheke eghu ka mae thugnare, “Tutuani fara, gognaro na iara kela fatutuani ghami ghotilo. Mae thugu iara Josep na mana karhau ngala gognaro na. Iara ginauna na tei mala filoni ngala mana ka tathagu na ame lehe nga iara eghu!”

Currently Selected:

Jenesis 45: mrn

Highlight

Copy