Jenesis 43

Hatimare thabusigna neke pulo ka mae Josep Ijep

1Rofo na biꞌo fara jare ka kantri Kenan. 2Eghuteuna kate ghamu tela gnafahi gano teke tei teke hata mare Ijep ra, mae Jekop ne cheke eghu ka mae thugna re, “Ghotilo nake pulo Ijep mala ke foli gheda gano.”

3Nu mae Juda ne cheke eghu ka mae kmadi na, “Mama, ghehati la cheke hi ka iagho. Mae funei biꞌo gna Ijep na neke thono cheke faheta fara ka ghehati. Mana neke cheke eghu ka ghehati, ‘Hata mei balumi mae tahimi na agne. Te theo ghotilo na, iara theome magnahagheidi te filodi tathami ghotilo are agne.’ 4Jame te snakreni iagho mae tahimi ghehati Benjamin gne te tei balumi ghehati na, ghehati ginauna na tei mala foli gheu gano iagho. 5Nu jame te theome magnahagheni iagho na, ghehati ginauna na theome tangomana te tei na eghu, naugna mae funei biꞌo gna Ijep na neke chekenihi ka ghehati, mana ginauna theome magnahaghei te filo ghami ghehati jare Ijep na, eghu jame te theome tei mae Benjamin balumi ghehati na.”

6Mae Jekop, mae ihei te kiloni la Israel gne ne cheke eghu, “Mala unha neku neke chekeni nga ghotilo ka mana te au teu mae tahimi na agne na? Ghotilo gne fakabruni fara nagnafagu iara na.”

7Mare ne cheke eghu ka mana, “Mae igne thoghei e ghusnadi vikemi ghehati re. Mana ghusna eghu ka ghehati, ‘Mae kmami ghotilo na karhau ba la lehehi? Ghotilo au keha tahimi ka namono na ba theo?’ Ghehati khogla cheke tughudi kolho u faghusna te edi mana ka ghehati igre. Ghehati neke theome laseni na eghunu toreni mana mae tahimi gne mala hata tei jare Ijep teku na.”

8Mae Juda ne cheke eghu ka mae kmadi na, “Iagho snakreni mae Benjamin gne mala tei balumi ghehati. Teuna iagho nei thumi ghehati gre nei ghehati la ngau teu na ginauna na theome lehe ka rofo. 9Te chekeni iara ka iagho na, iara thegu ngala nate reireghini mana na. Jame te theome hata fapuloni iara mae Benjamin gne ka iagho na, iara eni hila kaisei najafra biꞌo ranghi nigho iagho, eghuteuna najafra igne ginauna na au fabrahu ka iara tifa e tifa. 10Jame theome lhoti ghami iagho meuna, ghehati gne jame nabau ngala te tei nei ke pulo mei teu hi phia fata na.”

11Aonu mae Jekop mae kmadi mare na ne cheke eghu ka mare, “Jame te eghu na, ghotilo na eghu agne. Hohono fafodu ka nomi gloi are keha gano te ulu fara ka namonoda tahati gne mala hata tei e namha ka mae funei na. Keha meresin, keha jurukuli, keha mur nei phei nafnata sitha te kiloni mare pistasio nei almond eghu. 12Sileni nate hata ghotilo gognaro na, na jateula te phei fata eghu thutagna na ke tulaognai teke hata teke tei ghotilo ka thei ulu lahu ia. Eghuteuna ghotilo na jaola ke hata fapulo sileni teke lilisei mare ka nomi duku ghotilo ra eghu. Glahula me keha najafra kolho mare neke lilisei ka nomi duku ghotilo ra. 13Ghotilo hata mae Benjamin gne tei balumi mala ghosei ke pulo ka mae funei na. 14Iara toreni God mae ihei te nolaghi fara na mala toghoni gaoghathogna mae funei igne mala kokhoni ghami ghotilo. Iara toreni God mala snakredi mae Simion ghe mae Benjamin gre mala ke pulo mei balumi ghotilo. Nu jame teke gaoghathogna God teke mala hata fadeleidi mae thugu iara gre teku na, mare na hata fadeleidi ka iara.”

15Aonu hatimare mae thugna mana re ne kafe hata glepo te mala namha re, eghuteuna sileni te hata mare gognaro na jateula te phei fata eghu thutagna na ka teke hata mare ka thei ulu lahu ia. Eghuteuna mare jaola ne hata mae Benjamin na baludi ne tei. Eghuteuna kate posa mare Ijep na, mare ne tei filoni mae Josep. 16Aonu kate filoni mae Benjamin gne baludi mare na, mae Josep ne cheke eghu ka mae gloku te mala reireghigna nogna suga na, “Iagho hata mae igre mala tei ka nogu suga iara gno. Eghuteuna falelehe kaisei buluka mala kuki. Mae igre mala ima balugu iara naublatha ginau.”

17Mae gloku na ne eni unha te chekeni mae Josep na ne hatadi mare ne tei ka sugagna mae Josep na. 18Kate hatadi te tei ka sugagna mae Josep na, mare ne mhaghu nodi fara ne cheke eghu fari thedi, “Tore, mae igne hata mei ghita tahati agne, naugna eidi sileni teke lilisei ka noda duku tahati ra ka thei ulu lahu ia. Jame igne u ngala gaoghathogna te hata mei ghita mana ka suga igne. Mae igre ginauna na hata mei ghita tahati agne mala nodi mae gloku kolho mare. Eghuteuna mare ginauna na jaola hata noda dongki tahati gre eghu.” 19Aonu mare ne filoni nogna mae gloku mae Josep te mala reireghigna nogna suga mana na kegra neu jare rhegna grengatha na, mare tei ne cheke eghu ka mana, 20“Mae biꞌo, fanomho sagho ka ghehati. Kaisei fata ghehati neke mei agne mala foli wit neku. 21Kate jifla ghehati agne teke pulo ka namono na, ghehati ne tei ne bongi ka kaisei vido ne ei suga ne thuru jare. Kate sopagna tothora ghehati nomi duku re ghehati neke filodi sileni teke mei foli wit ghehati agne re neke au neu ka foflodi nomi duku ghehati re. Eghume gognaro na ghehati kela hata pulo mei balumi sileni tura. 22Ghehati jaola hata keha sileni la ngau eghu balumi mala foli keha gano. Ghehati theome laseni mae ihei teke lilisei dire sileni tura ka nomi duku ghehati re.”

23Nu mae gloku igne ne nomhidi nodi cheke mare igre ne cheke eghu, “Keliu ngala. Thosei mhaghu jame nomi God ghotilo na nei nodi God mae kmami ghotilo ra eghu ngala teke lilisei sileni tuare ka nomi duku ghotilo re. Nu sileni teke foli gano ghotilo ra la hatahi iara.” Aonu mae gloku igne ne tei ne hata mei mae Simion na ka mare.

24Mae gloku igne ne baludi mare ne ruma ka sugagna mae Josep na. Mana hata khoꞌu ne mei ka mare mala titihi ghahe mare, nei fagaghamu nodi dongki mare re. 25Kate nomhini mare mae Josep gne nate mei ima naublatha baludi na, mare ne tarabana nodi namha re mala tusu lao ka mana.

26Kate posa mei mae Josep ka suga na, mare ne tusu lao nodi namha re ka mana. Aonu mare ne pogho soru pari ke ulugna mana. 27Mae Josep ne cheke eghu ka mare, “Nehau ngau ghotilo ia? Nehau ngau mae khuekuꞌe teke chekeni ghotilo ka iara tifa ia? Mana na keliu ngala?”

28Mare ne cheke eghu ka mana, “Mae biꞌo, mae kmami ghehati na mana keliu ngala.” Eghuteuna mare neke fapea pogho sorui pari ke ulugna mana.

29Mae Josep ne filoni mae Benjamin thofno mae tahigna na ne cheke eghu, “Mae igne jau si mae iko lahu ka ghotilo teke chekeni ghotilo ka iara ia?” Eghuteuna mana ne cheke eghu ka mae Benjamin, “Thuguo, God na keli ranghi nigho iagho.” 30Mae Josep ne diꞌanagnafa fara ka mae tahigna na ne namo tanhi fabiꞌo, aonu mana ghosei ne jifla kokodi mare ne tei ka nogna chogho na ne tanhi poru neu jare.

31Aonu mana dadalu tathagna re neke jifla mei. Mana ne fatugeni thegna te groi tanhi na ne chekedi nogna mae glokure mala hata mei gano ka tevo na.

32Mae Josep thegna ka keha tevo na nei hatimare mae thabusignare thedi ka keha tevo na. Eghuteuna hatimare mae Ijep te au balugna mae Josep gre mare thedi ngau ka keha tevo na, naugna ka nodi kastom mae Ijep re mare theome tangomana te ima fodu baludi mae Hibru re. 33Mae Josep ne fagnokrodi mare leghuni teke karhadire, funu ka mae teke kulu karha na tei gnafa ka mae teke karha leghu lahu na. Kate eni nafnata na gnokro igne, mare jaglo nodi ne fari filoi. 34Hatimare mae gloku gre mei hata ghedi gano hatimare mae thabusigna gre ka tevo mae Josep na. Kate hata gano te mala faꞌimadi hatimare mae thabusignai igre na, mare hata fananaba kolho. Nu ghegna mae Benjamin na mare hata fabiꞌo fara naba te mala ima glima mae. Aonu mare ne ima nei ko'u nei glealeꞌa neu balugna mae Josep ne ghilei dranga.

Currently Selected:

Jenesis 43: mrn

Highlight

Copy