Jenesis 37

Hatimare thubusigna ne diꞌatadi fara ka mae Josep

1Mae Jekop gne neke au ka kantri Kenan, ka vido aheva teke au mae kmagna tifa na.

2Igne u thoutonu eigna mae Jekop nei thugna mana re teuna.

Mae Josep gne kaisei mae majaghani fara, nabotho fitu finogha gna kolho. Mana neke mae mala reireghi sipu nei nanigot eghu baludi mae ke biꞌogna re, mae ke biꞌogna mana igre neke thudi Bilha ghe Silpa, phei khetogna mae kmagna. Mae Josep neke posa toutonu koba ka mae kmagna na unha puhi te diꞌa teke edi mae ke biꞌogna re.

3Aonu mae Jekop ne namhani fara mae Josep ke tulaodi keha thugna re, naugna mae Josep gne neke karha ka vido tela kuekuꞌehi mana na. Eghuteuna mana ne hohoro kaisei fagano phoko te brahu khamegna re ne tusu lao ka mae Josep. 4Hatimare mae thabusigna mana igre ne filoni mae kmadi na te namhani fara mae Josep ke tulaodi marei na ne diꞌatadi fara ka mana.

5Kaisei fata mae Josep ne mifi. Kate toutonu ni mana eigna u mifi igne ka mare na, mare ne thofno diꞌatadi fara ngala ka mana. 6Mae Josep ne cheke eghu ka mare, “Fanomho ghotilo ia ka nogu mifi iara gne. 7Kate au teu tahati ka nagare na tahati ne haru fodu wit re, eghuteuna u phala teke haru iara na ne kegra haghe ne kegra fadoglo. Eghuteuna nomi phala ghotilo te kegra faligohoni nogu phala iara na ne kafe pogho soru pha'udire pari ka nogu phala iara na.”

8Hatimare mae thabusigna mana igre ne nomhini igne ne cheke eghu ka mae Josep, “Ba, iagho magnahaghei te kegra haghe te mala kaisei nomi mae king ghehati mala funei fruni ghami ghehati sia!?” Hatimare mae thabusigna mana igre ne thofno diꞌatadi fara ka mae Josep eigna u mifi igne, nei eidi langau unha te chekedi mana re eghu.

9Ke leghugna igne mae Josep neke fapea mifi. Mana ne jaola neke toutonu ka mae ke biꞌogna re eigna u mifi igne. Mana ne cheke eghu ka mare, “Iara neke filoni keha mifi na neke thakle mei ka iara, eghuteuna gognaro na naprai ghe glaba nei nabotho kaisei nathunu teure ne pogho soru ke ulugu iara.”

10Mana jaola ne toutonu ka mae kmagna na u mifi igne. Mae kmagna na ne theome magnahagheni u nafnata thoutonu te eni mana igne ne cheke eghu, “Unha nafnata mifi na site eni iagho ignea? Iara nei idomu gne nei mae thabusimu iagho igre teuna theome tangomana te pogho soru ke ulumu iagho na.” 11Hatimare mae thabusigna thegna mae Josep gre ne goghotu fara ka mana. Nu mae kmagna na ne ghaoghatho ne brahu fara ka gaoghathogna nogna mifi mae Josep na.

Mae Ismael hatani mae Josep ne tei Ijep

12Kaisei narane hatimare mae thabusigna mae Josep gre ne tei Sekem mala reireghidi nogna sipu mae kmadi na. 13Mae Jekop ne cheke eghu ka mae Josep, “Hatimare mae thabusimu iagho ra kela teihi Sekem mala ke tei reireghidi keu nogu sipu iara te au teu jare ra. Iara magnahaghei nigho iagho te mala tei filodi mare jare.”

Mae Josep ne cheke eghu ka mae kmagna na, “Uve mama, keli fara iara na tei filodi mare jare.”

14Mae kmagna na ne cheke eghu ka mana, “Iagho na tei jare mala filodi hatimare mae thabusimu ra glahula te au fakeli ghu theo ghu teu mare na. Iagho jaola tei mala filodi u sipu ra glahula te au fakeli ghu theo ghu teu reꞌe na. Kate tei iagho te filodi mare na iagho ke pulo mei ka iara eghu mala ke toutonu ranghi ghau iara.” Ka narane igne, mae Jekop nei hatimare eghu au neu ka glogu Hebron.

Aonu mae Josep jifla ka namono na ne tei posa Sekem. 15Kate tei posa jare na, kaisei mae ne filoni mana te nolo tafri teu ka nagare na, ne ghusna eghu ka mana, “Iagho mei hiro unha agne sia?”

16Mae Josep ne cheke eghu ka mana, “Iara gne mei mala hirodi mae thabusigu ra. Ba, aheva iagho teke filodi mare te reireghi sipu teure?”

17Mana ne cheke eghu ka mae Josep, “Mare la jiflahi ka vido igne la teihi delei. Te chekeni mare te nomhini iara na hatimare tei ka namono Dotan.”

Aonu mae Josep ne ngolhi leghudi mare ne tei thafodi mare Dotan. 18Hatimare ne filo khaba laoni mae Josep. Ame mei posa nga mana teuna, mare ne roghe nodi te mala faleheni mana na.

19Hatimare ne cheke eghu fari thedi, “Igne tela mei mae te mala mifi ia! 20Mei ghotilo, mala falelehe nodani mae igne mala koko lao nodani thinigna mae tuana ka kaisei khora ka igre eghu. Ke leghu na tahati ginauna na cheke eghu ka mae mama, ‘Kaisei bosu mhata ne ghamuni mana.’ Aonu tahati na laseni ne faꞌunha teuna ka nogna mifi mana igne.”

21Mae Ruben ne nomhini puhi majora te eni mare igne ne cheke eghu ka gaoghathogna na, “Iara ginauna na cheke fothidi mare mala thosei eni puhi tuana mala ke hata fapuloni mana ka mae mama thogheiro eghu.” Aonu mae Ruben ne cheke eghu ka mare, “Tahati na thosei faleheni mana. 22Tahati theome tangomana te goigoni ni u nakarhagna mae thabusida na ka namono nagou igne. Nu tahati na koko soruni kolho mana ka khora igne.”

23Aonu kate mei mae Josep ka mare na, mare lokini mana ne hata koko nogna phoko brahu mana na, nogna famane phoko teke tufa mae kmagna na. 24Hatimare ne leghuni nogna cheke mae Ruben na ne koko soruni mana ka khora tela krangohi na.

25Ke leghugna tela koko sorunihi mae Josep ka khora na, mare gnokro soru ne ghamu. Kate ghamu teu mare na, mare ne filodi vikegna mae Ismael re ne mei funudi Gilead mala tei Ijep. Nodi kamel re fodu ka wit nei meresin nei sedi mala ghiha ka thini eghu. Glepo igre mala tei sabiri ka kantri Ijep.

26Aonu mae Juda ne cheke eghu ka mae thabusignare, “Jame te faleheni tahati mae thabusida igne te poruni tahati unha teke eni theda na, puhi igne na theome togho ghita tahati kaisei glepo te keli. 27Jame te keli na tahati sabiri mae igne ka vikegna mae Ismael igre mala nodi mae gloku kolho mare. Tahati theome tangomana te goigoni ni mana na, naugna mae igne neke thofno mae thabusida nei dadarada eghu ngala theda.” Aonu cheke mana igne ne kafe keli ka hatimare thabusigna.

28Ka vido te eni teu mare cheke igne, keha maedi Midian ne mei ne filoni mae Josep ka khora na. Hatimare ne mei korho fajiflani mae Josep ka khora na ne snakre lao ni mana ka hatimare mae vikegna mae Ismael mala foli mare mala nodi mae gloku. Mare ne folini mae Josep ka maedi Midian gre. Varadaki silva ne hatani mana ne tei Ijep.

29Ke leghugna igne mae Ruben teke theome au jare ka vido tuana neke tei neke efra ka khora na. Kate dofini mae Josep jare na, mana ne diꞌanagnafagna fara ne rerheku nogna pohe na. 30Aonu mana neke figri ka mae tahignare ne cheke eghu, “Tore, iara theome filoni mae Josep na jare. Faꞌunha eghu ame tangomana nga iara teke hata fapuloni mana ka khamedi mae te hatani mana te tei Ijep gre eghu?” Hatimare ne theome cheke tughu ka mana ne cheke eghu ka gaoghathodire, “Mala unha ni si mae ignea, lisa laoni mae tuana.”

31Aonu hatimare mae thabusigna mana re ne tirodi cheke ka mana ne eni unha te ghathoni mare na ne falehe kaisei nanigot ne titihi nogna pohe mae Josep na ka dadaragna na. 32Eghuteuna mare ne hata pohe na neke figri ka mae kmadi na ne cheke eghu ka mana, “Mama, ghehati ne filoni pohe igne ka kaisei vido. Filo sagho. Glahula me pohegna mae thumu iagho ia ngala igne.”

33Mae kmadi na ne filo glani pohe igne ne cheke eghu, “Uve, igne ngala nogna pohe mae thugu iara Josep ia! Kaisei lion la faleheni mana la ghamuni hi mana!”

34Mae Jekop ne tanhini mae thugna na ne rerheku nogna pohe na, eghuteuna mana ne hata kaisei nabreku pohe te tiatifa ne pipichi, igne fagaglana gna te diꞌanagnafani mae thugna na. Kmana narane mana ne tanhi ni mae thugna na. 35Thugna nalhaꞌu nei thugna gaꞌase teure ne kafe mei fameomegoni mana mala ke keli nagnafa fapulo mana. Mana tirogna fara ne cheke eghu, “Iara gne na tanhini mana fabrahu ngala ghilei tei iara au balugna mana ka namonodi mae tela lehehi ra.” Aonu mae Jekop ne theome gnafa ne tanhini fabrahuni mae Josep.

36Hatimare maedi Midian ra hatani mae Josep ne tei Ijep. Hatimare hatani mae Josep ne tei ka mae Potifa mala foli mana mala kaisei nogna mae gloku mana. Mae Potifa gne kaisei nogna ofisa mae king gna Ijep, nei mana kaisei nodi kapten hatimare mae soldia te mala reireghigna nogna suga biꞌo mae king gna Ijep na.

Currently Selected:

Jenesis 37: mrn

Highlight

Copy