Roma 9
9
Pauluse isusa le eni tamataru esi hlaleke loko Yesuse mo
9:1-5
1Saisa rebe tatike pine au beteke meije tinai le aure Kristuse Enie. Au lemake mo! Laleku meije Alla Eni Rore Ikbasaele, kai Iono au rekwa be au beteke meije tinai. 2Au susa titinai kai laleku ekera titinai 3le tamata Yahudia boka esi suka hlaleke loko Yesuse mo. Eteise, au suka kena Alla Ikutuke au kai Ipoie au bei Yesuse Kristuse leine, mahabe pusue meru eono esi hlamate. 4Le bei akmena sa, tamata Yahudiaru esi supu untune elake peneka. Siere tamata Israele le Alla Ibitikesi kena Eni nanae kai Iaseluke Eni kbasa rebe hita lakwai esare etesi. Ile pine Ibeteke saisa rebe namake Irilukele eteise kai Iriluke hukume rebe Musa ilekire etesi. Alla Iaseluke cara rebe tinai kena tatu lokoIje etesi. Kai yelu bokala rebe Italuke eteise. 5Yahudiaru esi ntuana menaru: Abrahame, Isake kai Yakupe Alla Ibitikesi. Kai Ile rebe Alla IulakeNi kena Iono hlamate tamatare, kena Iono tamatare, Irulu beisi. Yesuse Ikbasa lesi bei sasaisa neka. RuaIje Alla hoko suke holmateI eti pela!#9:5 Kena terjemahane makete ebeteke be: Isike Alla eti pela. Amine.
Abrahame eni anubuaru pususi supu saisa rebe Alla Italuke ete tamata rebe Ibitikeise mo
9:6-9
6Kwali betaya, pamuli meije tamata Yahudia boka esi suka hlaleke loko Yesuse Kristuse mo, po mere elake Alla Iriluke saisa rebe Italukele ete Abrahame, Isake kai Yakupe mo. Le pusue tamata Yahudi esi rulu bei Israele mo, rebe Alla Ibitikesi kena Eni tamatare. 7Ele mere lekwe, Abrahame eni anubuaru pususi mo, rebe Alla Inoakesi kena esi supu saisa rebe Italukele. Po Ibitike Isake kena isupu saisa rebe Italuke pende. Le Alla Ibeteke ete Abrahame be: “Batuke Isake eni anubuaru pine betekeise amu anubu.”#9:7 Atn. 21:12 8Mere be, Abrahame eni anubu rebe esi ono Alla Eni nanare batuke anubua rebe Alla Italukeise, po pusue Abrabahame eni anubuaru mo. 9Abrahame eni nanae Isake, rueleije lulu Alla Italuke ete Abrahame. Alla Italuke Abrahame kena eni nanae Isake elere: “Kena Au luake musune suike Sara iruele kwete mokwai sae peneka.”#9:9 Atn. 18:10
Alla bitike tamata leke supu saisa rebe Italukele lulu Eni sukare
9:10-18
10Batuke mere mo po ite selue kena Esau kai Yakupe, bei luaise Alla Ibitike sae eteI. Ripka iruele kwete mokwai ktebala lua, amaisi kena Isake, tamata Yahudiaru esi ntuane mena. 11Kena kwetela lua meru ruelesi mosa, kai esi ono sasaisa mosa kena ite selu be emise pise more, po kena mere Alla Ibitike andia bei luasi rebe Iriluke misete eteije peneka. 12Alla Ibeteke ete Ribka peneka be, “Kwete menare namake itatu loko kwete mulire.”#9:12 Atn. 25:23 13Mere saka Alla Eni lepate rebe lekire ebeteke lekwe be: “Au aseluke lale misete ete Yakupe po Au aseluke ete Esau mo.”#9:13 Mal. 1:2-3
14Ele mere hoko tamata leini esi ombe, “Sepo Alla Ibitike sae yo saere mo, hoko Alla Iteu sasaisare enkena mo.” Beteke ele mere yake. Le saisa rebe Alla Iteure enkena. 15Le Alla Ibeteke loko Musa be,
“Au oki sie rebe laleKu kena okise.
Kai Au aseluke lale misete
ete sie rebe Au suka aseluke lale misete eteise.”#9:15 Sir. 33:19
16Hoko saisa rebe Alla Iteure, mere selue bei tamata eni sukare mo kai tamata eni makerike mo, po bei Alla Eni lale misete ete sie rebe Ililakeise. 17Nete loko akmena Alla Eni lepate ete kamale Mesire be, “Au bitike ale kena kamale, lulu Auku sukare. Leke bei ale, Au aseluke Auku kbasare kai leke pusue tamata mei nusare esi holmate Au.”#9:17 Sir. 9:16 18Hoko Alla laleije noa sae sepo Isuka ele mere, kai Iono sae ulu buaije ela sepo Isuka ele mere lekwe.
Alla Inasuke tamata leini yo laleIje mise ete tamata leini
9:19-24
19Yapine sae bei imi ibeteke loko au be, “Ele mere hoko mise mo, sepo Alla Ileuke sala ete tamata, le pususi lulu Eni sukare.” 20Po kwali betaya imi! Itere tamata neka. Imi lelie Alla yake. Pote kena atnane bunare ebeteke loko tamata maka ono pote mo be, “Le mula pine aono au ele meije?” 21Ile rebe iono pote mere sebeie ionoe lulu laleije neka. Bei tapele ului esa ile mere iono pota lua. Saere mise kai saere mise remo.
22Hoko Alla lekwe, Ikbasa kena ono saisa neka lulu Eni sukare. LaleI kena Iaseluke Eni nasute kai Eni kbasare. Po Itahane laleI loko sie rebe suke esi supu hukume le esi ono Inasure. 23Alla laleI lekwe kena Iriluke misete elake titinai ete ite rebe Ioki itere. Iaknekae ite peneka kena supu misete mere. 24Ikoti ite peneka. Ikoti batuke tamata Yahudi mo po tamata Yahudi more lekwe.
Alla Ibitike batuke tamata Yahudi mo po tamata Yahudi more lekwe
9:25-29
25Kena buku rebe nabi Hosea ilekire, Alla Ibeteke be:
“Tamata rebe Auku tamata kenasi more,
namake Au kotise Auku tamata.
Tamata rebe Au okisi more,
namake Au okisi lekwe.”#9:25 Hos. 2:22
26Kai Ibeteke lekwe be:
“Akmenare Auku tamata kena imi mo,
po pamuli meije kotie imire Alla
rebe Irue eti pelare Eni nanae.”#9:26 Hos. 1:10
27Alla Ibeteke ete tamata rebe Israela more ele mere.
Po Eni lepate loko tamata Israelaru baue nabi Yesaya be:
“Masike tamata Israelaru esi boka saka ume ndau meite
po rebe esi hlamate boka mo.
28Le lau mo Tuhane Iteu pakala
ete pusue tamata mei nusa meije neka.
Iono mere tinai.
Petu kena Ionore, Isoae moneka.”#9:28 Yes. 10:22, 23
29Nabi Yesaya Ibeteke lekwe be:
“Sepo Alla rebe Ipletae pusue yelu mei nusa meije
Isebeie anubu esa pise lua ete ite mo,
hoko itere saka tamata me kota Sodome kai Gomorare peneka.”#9:29 Yes. 1:9
Tamata Yahudiaru esi lulu lalane tinai leke esi nkena
9:30-10:4
30Hoko kwali betaya, mere esi natire elere: Tamata Yahudi more esi atula kena esi nkena me Alla oaI mo, po bei esi hlaleke loko Yesuse Kristuse hoko Alla Iono esi nkena me oaI. 31Po ete tamata Yahudiaru, esi atula titinai kena lulu hukume leke esi nkena me Alla oaI, po saisa mo. 32Saisa mo le esi ono mere esi hlaleke loko Yesuse Kristuse mo, po batuke esi lulu hukume. Le esi ombe tinake lulu hukume, Alla Itrimasi. Esi suka lalane baue Yesuse mo hoko mere saka pahburuesi kena batu elake. 33Kena Alla Eni lepate rebe lekire, elepae loko Yesuse elere:
“Imi lene meije mimise.
Ndete kota Sione, Au bitike kamale sae,
mere Au umpamaeNi kena batu sae.
Batu mere tamata pahburuesi kenae
eti esi koli le esi hlaleke loko Kamale mere mo.
Po tamata rebe esi hlaleke lokoIje kaplalesi mo
le namake esi supu saisa rebe Italuke eteise.”#9:33 Yes. 8:14; 28:16
Currently Selected:
Roma 9: alp
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.
